ಕ್ಷೇತ್ರಗಳು ಹಲವು, ನಾಯಕ ಒಬ್ಬರೇ... ವಿಜಯ್ ಭೇಟಿ ನೀಡದ ಕಡೆ ಹೊಲೊಗ್ರಾಮ್ ಮತ್ತು ಡೂಪ್‌ಗಳದ್ದೇ ಹವಾ! | TVK Vijay

ಪೆರಂಬೂರಿನಲ್ಲಿ ಮನೆ ಮನೆಗೆ ತೆರಳಿ ಮತಯಾಚನೆ ಮಾಡಿದ ವಿಜಯ್​, ಸಾಮಾನ್ಯ ಜನರೊಂದಿಗೆ ನೇರವಾಗಿ ಸಂವಾದ ನಡೆಸಿದರು. ಸಾಂಸ್ಕೃತಿಕವಾಗಿ ಮಹಿಳಾ ಮತದಾರರನ್ನು ತಲುಪುವ ಉದ್ದೇಶದಿಂದ, ಮಹಿಳಾ ಬೆಂಬಲಿಗರೊಂದಿಗೆ ಸೇರಿ ತಮ್ಮ ಪಕ್ಷದ ಶಿಳ್ಳೆ ಚಿಹ್ನೆಯನ್ನು ರಂಗೋಲಿಯಾಗಿ ಬಿಡಿಸುವ ಮೂಲಕ ತಳಮಟ್ಟದ ಮತದಾರರ ಗಮನ ಸೆಳೆದರು.

ತಮಿಳುನಾಡಿನ 38 ಜಿಲ್ಲೆಗಳ ಪೈಕಿ ಕೇವಲ ಆರು ಜಿಲ್ಲೆಗಳಲ್ಲಿ ಮಾತ್ರ ವಿಜಯ್ ಖುದ್ದಾಗಿ ಪ್ರಚಾರ ನಡೆಸುತ್ತಿದ್ದು, ಕರೂರ್‌ನಲ್ಲಿ ಸಂಭವಿಸಿದ ಕಾಲ್ತುಳಿತ ದುರಂತದ ಬಳಿಕ ಅವರ ಪ್ರಚಾರ ವೇಳಾಪಟ್ಟಿಯಲ್ಲಿ ಭಾರಿ ಬದಲಾವಣೆಗಳಾಗಿವೆ. ಉಳಿದ ಜಿಲ್ಲೆಗಳಲ್ಲಿ ಅವರ ಅನುಪಸ್ಥಿತಿಯನ್ನು ಸರಿದೂಗಿಸಲು ಟಿವಿಕೆ ಪಕ್ಷವು ಅತ್ಯಾಧುನಿಕ ತಂತ್ರಜ್ಞಾನದ ಮೊರೆ ಹೋಗಿದೆ. ವಿಜಯ್ ಭೇಟಿ ನೀಡಲು ಸಾಧ್ಯವಾಗದ ಕ್ಷೇತ್ರಗಳಲ್ಲಿ ಹೊಲೊಗ್ರಾಮ್‌ಗಳು, ಎತ್ತರದ ಕಟೌಟ್‌ಗಳು ಮತ್ತು ವಿಜಯ್‌ರಂತೆ ಕಾಣುವ (look-alikes) ವ್ಯಕ್ತಿಗಳನ್ನು ನಿಯೋಜಿಸಿ ಮತದಾರರ ನಡುವೆ ಅವರ ಉಪಸ್ಥಿತಿ ಇರುವಂತೆ ನೋಡಿಕೊಳ್ಳಲಾಗುತ್ತಿದೆ. ಯುವಕರು ಮತ್ತು ಮೊದಲ ಬಾರಿಗೆ ಮತದಾನ ಮಾಡುವವರಲ್ಲಿ ವಿಜಯ್‌ಗೆ ಇರುವ ಕ್ರೇಜ್ ಬಳಸಿಕೊಳ್ಳಲು ಪಕ್ಷ ಸಾಮಾಜಿಕ ಜಾಲತಾಣಗಳನ್ನು ಸಮರ್ಥವಾಗಿ ಬಳಸುತ್ತಿದೆ.

ವಿಜಯ್ ಜನಪ್ರಿಯತೆ ಹೆಚ್ಚಾಗಿ ಅಲ್ಪಸಂಖ್ಯಾತ ಸಮುದಾಯಗಳು ಮತ್ತು ಮೀನುಗಾರರಲ್ಲಿ ಇರುವುದರಿಂದ, ಆ ವರ್ಗದ ಮತಗಳನ್ನು ಸೆಳೆಯುವುದು ಟಿವಿಕೆಯ ಮೊದಲ ಆದ್ಯತೆ. ಆಡಳಿತಾರೂಢ ಡಿಎಂಕೆ ಪಕ್ಷಕ್ಕೆ ಪರ್ಯಾಯವಾಗಿ ತನ್ನನ್ನು ತಾನು ಬಿಂಬಿಸಿಕೊಳ್ಳುತ್ತಿರುವ ವಿಜಯ್​, ಭ್ರಷ್ಟಾಚಾರ, ಕುಟುಂಬ ರಾಜಕೀಯ ಮತ್ತು ಮಹಿಳಾ ಸುರಕ್ಷತೆಯ ವಿಷಯಗಳ ಮೇಲೆ ಬೆಳಕು ಚೆಲ್ಲಿದ್ದಾರೆ. ಟಿವಿಕೆ ಪ್ರಣಾಳಿಕೆಯಲ್ಲಿ ವಾರ್ಷಿಕ ಆರು ಉಚಿತ ಎಲ್‌ಪಿಜಿ ಸಿಲಿಂಡರ್, ಮಹಿಳೆಯರಿಗೆ ನೀಡಲಾಗುವ ಮಾಸಿಕ ಆರ್ಥಿಕ ನೆರವನ್ನು 1,000 ರೂ.ಗಳಿಂದ 2,500 ರೂ.ಗಳಿಗೆ ಏರಿಕೆ ಮತ್ತು ಪ್ರತಿ ಕುಟುಂಬಕ್ಕೆ 25 ಲಕ್ಷ ರೂ.ವರೆಗಿನ ಆರೋಗ್ಯ ವಿಮೆಯಂತಹ ಜನಪ್ರಿಯ ಭರವಸೆಗಳನ್ನು ನೀಡಲಾಗಿದೆ.

ಅಧಿಕಾರದಲ್ಲಿ ಪಾಲು ನೀಡುವುದಾಗಿ ಭರವಸೆ ನೀಡಿದ್ದರೂ, ತಮಿಳುನಾಡಿನ ಯಾವುದೇ ಪ್ರಮುಖ ಪಕ್ಷಗಳು ಟಿವಿಕೆ ಜೊತೆ ಮೈತ್ರಿ ಮಾಡಿಕೊಳ್ಳಲು ಮುಂದೆ ಬಂದಿಲ್ಲ. ಹೀಗಾಗಿ ವಿಜಯ್ ಬಹುಕೋನ ಸ್ಪರ್ಧೆಯಲ್ಲಿ ಏಕಾಂಗಿಯಾಗಿ ಸ್ಪರ್ಧಿಸುತ್ತಿದ್ದಾರೆ. ಏಪ್ರಿಲ್ 23 ರಂದು ತಮಿಳುನಾಡಿನಲ್ಲಿ ಒಂದೇ ಹಂತದಲ್ಲಿ ಮತದಾನ ನಡೆಯಲಿದ್ದು, ಮೇ 4 ರಂದು ಫಲಿತಾಂಶ ಹೊರಬೀಳಲಿದೆ. ಡಿಎಂಕೆ ನೇತೃತ್ವದ ಎಸ್‌ಪಿಎ ಮತ್ತು ಎಐಎಡಿಎಂಕೆ ನೇತೃತ್ವದ ಎನ್‌ಡಿಎ ಮೈತ್ರಿಕೂಟಗಳ ನಡುವಿನ ಹಣಾಹಣಿಯಲ್ಲಿ ವಿಜಯ್ ಪಕ್ಷವು ಎಷ್ಟು ಪ್ರಭಾವ ಬೀರಲಿದೆ ಎಂಬುದು ಸದ್ಯ ಕುತೂಹಲ ಮೂಡಿಸಿದೆ(ಏಜೆನ್ಸೀಸ್​​).