ಕಡೆಗೂ ವಿಜಯ್ ನಂಬಿಕೆ ಉಳಿಸಿದ ಕಾರು ಚಾಲಕನ ಪುತ್ರ​! ಟಿವಿಕೆ ಶಾಸಕನ ಹಳೆಯ ವಿಡಿಯೋ ವೈರಲ್​ | TVK

ಚೆನ್ನೈ: ಪ್ರಸ್ತುತ, ತಮಿಳುನಾಡಿನ ಚುನಾವಣಾ ಲೆಕ್ಕಾಚಾರ ಸಂಪೂರ್ಣ ಬದಲಾಗಿದ್ದು, ತಮ್ಮ ಚೊಚ್ಚಲ ಸ್ಪರ್ಧೆಯಲ್ಲೇ ನಟ ವಿಜಯ್​ ನೇತೃತ್ವದ ಟಿವಿಕೆ ಐತಿಹಾಸಿಕೆ ಗೆಲುವು ದಾಖಲಿಸಿರುವುದು ಹಲವರ ಹುಬ್ಬೇರಿಸಿದೆ.

ತಮಿಳುನಾಡು ವಿಧಾನಸಭಾ ಚುನಾವಣಾ ಫಲಿತಾಂಶದಲ್ಲಿ ಟಿವಿಕೆ ಹೊಸ ಸಂಚಲನ ಸೃಷ್ಟಿಸಿದೆ. ವಿಜಯ್ ಅವರ ಪಕ್ಷವು ಯಾವುದೇ ಗುರುತಿಲ್ಲದ ಅತ್ಯಂತ ಸಾಮಾನ್ಯ ಜನರಿಗೆ ಟಿಕೆಟ್ ನೀಡುವ ಮೂಲಕ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿತ್ತು. ರಾಜಕೀಯ ಹಿನ್ನೆಲೆ ಇಲ್ಲದ ವ್ಯಕ್ತಿಗಳ ಮೇಲೆ ಸಂಪೂರ್ಣ ಭರವಸೆಯನ್ನಿಟ್ಟ ವಿಜಯ್​, ಈ ಸಾಲಿನಲ್ಲಿ ತಮ್ಮ ಕಾರು ಚಾಲಕನ ಪುತ್ರ ಆರ್​. ಶಬರಿನಾಥನ್ ಅವರಿಗೂ ಟಿಕೆಟ್ ನೀಡಿದ್ದರು. ಈಗ ಚುನಾವಣೆಯ ಫಲಿತಾಂಶದಲ್ಲಿ ವಿಜಯ್​ ನಂಬಿಕೆಯನ್ನು ಉಳಿಸಿಕೊಂಡಿರುವ ಅವರು, ಟಿವಿಕೆಗೆ ಜಯ ತಂದುಕೊಟ್ಟಿದ್ದಾರೆ.

ತಮ್ಮ ಕಾರು ಚಾಲಕ ಆರ್. ಶಬರಿನಾಥನ್ ಅವರನ್ನು ತಮಿಳು ವೆಟ್ರಿ ಕಳಗಂ (ಟಿವಿಕೆ) ಅಭ್ಯರ್ಥಿಯಾಗಿ ಕಣಕ್ಕಿಳಿಸಿದ ದಳಪತಿ, ಟಿವಿಕೆ ಅಭ್ಯರ್ಥಿಗಳ ಪಟ್ಟಿಯಲ್ಲಿ ಅವರ ಹೆಸರನ್ನು ಘೋಷಿಸಿದ್ದು ಕೇಳಿ ಶಬರಿನಾಥನ್ ವೇದಿಕೆಯಲ್ಲಿ ಕಣ್ಣೀರಿಟ್ಟರು. ಈ ವೇಳೆ, ವಿಜಯ್ ಅವರನ್ನು ಬಿಗಿಯಾಗಿ ತಬ್ಬಿದ ಅವರು, ಜನ ನಾಯಗನ್​ಗೆ ಧನ್ಯವಾದ ತಿಳಿಸಿದ್ದರು. ಈ ವಿಡಿಯೋ ಅಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿತ್ತು. ಈಗ ಅವರ ಗೆಲುವಿನ ಬೆನ್ನಲ್ಲೇ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ.

ತಮಿಳುನಾಡಿನ ಒಟ್ಟು 234 ಸ್ಥಾನಗಳಿಗೆ ಅಭ್ಯರ್ಥಿಗಳ ಪಟ್ಟಿಯನ್ನು ಬಿಡುಗಡೆಗೊಳಿಸಿದ್ದ ವಿಜಯ್​, ಈ ಚುನಾವಣೆಯಲ್ಲಿ ಎರಡು ಕಡೆಯಿಂದ ಸ್ಪರ್ಧಿಸುವ ಮೂಲಕ ತಮ್ಮ ಗೆಲುವನ್ನು ಮೊದಲೇ ಬುದ್ಧಿವಂತಿಕೆಯಿಂದ ನಿರ್ಧರಿಸಿದ್ದು ವಿಶೇಷ. ತಮಿಳುನಾಡಿನ ಪೆರಂಬೂರು (ಚೆನ್ನೈ) ಮತ್ತು ತಿರುಚಿ (ಪೂರ್ವ) ಕ್ಷೇತ್ರಗಳಿಂದ ವಿಜಯ್​ ಚುನಾವಣಾ ಕಣಕ್ಕಿಳಿದು. ಈಗ ಎರಡರಲ್ಲೂ ಜಯ ಸಾಧಿಸಿರುವುದು ನಿಜಕ್ಕೂ ಗಮನಾರ್ಹ.

ಮತ್ತೊಂದೆಡೆ, ಟಿವಿಕೆ ಗೆದ್ದರೆ ರಾಜ್ಯವನ್ನು ಮಾದಕ ವಸ್ತು ಮುಕ್ತಗೊಳಿಸುವುದಾಗಿ ವಿಜಯ್​ ತಮಿಳುನಾಡಿನ ಜನತೆಗೆ ಭರವಸೆ ನೀಡಿದ್ದಾರೆ. ನಿರುದ್ಯೋಗಿಗಳಿಗೆ 4,000 ರೂ. ಭತ್ಯೆ ಮತ್ತು ಉದ್ಯೋಗಗಳಲ್ಲಿ ಸ್ಥಳೀಯರಿಗೆ ಆದ್ಯತೆ ನೀಡಲಾಗುವುದು. ಯುವಕರಿಗೆ ಉದ್ಯೋಗ ಧನ ಸಹಾಯವಾಗಿ 20 ಲಕ್ಷ ರೂ. ಕೊಡಲಾಗುವುದು. ಇದರೊಂದಿಗೆ, ತಮಿಳುನಾಡಿನಲ್ಲಿ ಸ್ವಯಂಸೇವಕ ವ್ಯವಸ್ಥೆಯನ್ನು ಪರಿಚಯಿಸಲಾಗುವುದು ಎಂದು ಒತ್ತಿ ಹೇಳಿದ್ದಾರೆ. ಈಗ ಅಧಿಕಾರ ಚುಕ್ಕಾಣಿ ಹಿಡಿಯಲಿರುವ ವಿಜಯ್​, ತಾವು ನೀಡಿರುವ ಭರವಸೆಗಳನ್ನು ಹೇಗೆ ಕಾರ್ಯರೂಪಕ್ಕೆ ತರಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.