ನಂ.1 ಮೋದಿ, ನಂ.3 ವಿಜಯ್​!...ಪ್ರಧಾನಿ ರೇಸ್‌ನಲ್ಲಿ 2ನೇ ಸ್ಥಾನ ಯಾರಿಗೆ..?: ಮೂಡ್ ಆಫ್ ದಿ ನೇಷನ್ ಸಮೀಕ್ಷೆಯಿಂದ ಹೊರಬಿತ್ತು ಅಚ್ಚರಿ ಸುದ್ದಿ! | Mood Of The Nation

2024ರಲ್ಲಿ ರಾಜಕೀಯ ರಂಗಕ್ಕೆ ಕಾಲಿಟ್ಟ ವಿಜಯ್​, ಇತ್ತೀಚಿನ ಇಂಡಿಯಾ ಟುಡೇ-ಸಿವೋಟರ್ ಮೂಡ್ ಆಫ್ ದಿ ನೇಷನ್ ಸಮೀಕ್ಷೆಯಲ್ಲಿ ಭಾರತದ ಮುಂದಿನ ಪ್ರಧಾನಮಂತ್ರಿ ಹುದ್ದೆಗೆ ಮೂರನೇ ಆಯ್ಕೆಯಾಗಿ ಹೊರಹೊಮ್ಮಿದ್ದಾರೆ.

ಈ ಸಮೀಕ್ಷೆಯ ಫಲಿತಾಂಶವು ವಿಜಯ್ ಸ್ಥಾನದ ಕಾರಣಕ್ಕೆ ಮಾತ್ರವಲ್ಲದೆ, ಅವರು ಅತ್ಯಂತ ವೇಗವಾಗಿ ರಾಷ್ಟ್ರ ರಾಜಕೀಯದಲ್ಲಿ ಗುರುತಿಸಿಕೊಂಡಿದ್ದರಿಂದಲೂ ಗಮನ ಸೆಳೆದಿದೆ. ತಮಿಳಗ ವೆಟ್ರಿ ಕಳಗಂ ಸಂಸ್ಥಾಪಕರಾದ ವಿಜಯ್​ಗೆ ಮುಂದಿನ ಪ್ರಧಾನಿಯಾಗಲು ಶೇ. 9.2 ರಷ್ಟು ಜನರ ಬೆಂಬಲ ಸಿಕ್ಕಿದೆ. ಈ ರೇಸ್‌ನಲ್ಲಿ ಶೇ. 48.7 ರಷ್ಟು ಬೆಂಬಲದೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಮೊದಲ ಸ್ಥಾನದಲ್ಲಿದ್ದರೆ, ಶೇ. 27.1 ರಷ್ಟು ಬೆಂಬಲದೊಂದಿಗೆ ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಎರಡನೇ ಸ್ಥಾನದಲ್ಲಿದ್ದಾರೆ.

ತಮಿಳುನಾಡಿನ ಟಿವಿಕೆ ಸರ್ಕಾರಕ್ಕೆ ಕಾಂಗ್ರೆಸ್ ಬೆಂಬಲ ನೀಡಿದ್ದು, ಪ್ರಧಾನಿ ಆಯ್ಕೆಯ ರೇಸ್‌ನಲ್ಲಿ ವಿಜಯ್ ಜನಪ್ರಿಯತೆ ಹೆಚ್ಚಿರುವುದು ರಾಹುಲ್ ಗಾಂಧಿ ಮೇಲೆಯೇ ಪರಿಣಾಮ ಬೀರಿದೆ ಎನ್ನಬಹುದು. ದಳಪತಿ ಅವರು ಟಿಎಂಸಿಯ ಮಮತಾ ಬ್ಯಾನರ್ಜಿ (2%), ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ (1.7%), ಕಾಕ್ರೋಚ್​ ಜನತಾ ಪಾರ್ಟಿ ಸಂಸ್ಥಾಪಕ ಮತ್ತು ಸಂಚಾಲಕ ಅಭಿಜಿತ್ ದೀಪ್ಕೆ (1.3%) ಹಾಗೂ ಆಮ್ ಆದ್ಮಿ ಪಾರ್ಟಿಯ ರಾಷ್ಟ್ರೀಯ ಸಂಚಾಲಕ ಅರವಿಂದ್ ಕೇಜ್ರಿವಾಲ್ (1.2%) ಅವರಿಗಿಂತ ಮುಂದಿದ್ದಾರೆ.

ಮೂಡ್ ಆಫ್ ದಿ ನೇಷನ್ ಎಂಬುದು ಇಂಡಿಯಾ ಟುಡೇ ಗ್ರೂಪ್ ಕಳೆದ ಎರಡು ದಶಕಗಳಿಂದ ನಡೆಸಿಕೊಂಡು ಬರುತ್ತಿರುವ ದ್ವೈವಾರ್ಷಿಕ ಸಮೀಕ್ಷೆಯಾಗಿದ್ದು, ಈ ತಿಂಗಳ ಆವೃತ್ತಿಯನ್ನು ಸಿವೋಟರ್ ಸಂಸ್ಥೆಯು ಜುಲೈ 1 ರಿಂದ ಆಗಸ್ಟ್ 25ರ ನಡುವೆ 25,184 ಜನರ ನೇರ ಸಮೀಕ್ಷೆಯ ಮೂಲಕ ನಡೆಸಿದೆ. ಆಗಸ್ಟ್ ಮೂಡ್ ಆಫ್ ದಿ ನೇಷನ್ 2026ರ ಫಲಿತಾಂಶಗಳನ್ನು ರೂಪಿಸಲು ಸಿವೋಟರ್‌ನ ನಿಯಮಿತ ಟ್ರ್ಯಾಕಿಂಗ್‌ನ ಭಾಗವಾಗಿ ಕಳೆದ ಆರು ತಿಂಗಳಲ್ಲಿ ನಡೆಸಲಾದ 91,795 ಸಂದರ್ಶನಗಳ ಮತ್ತೊಂದು ಗುಂಪನ್ನು ಸಹ ಬಳಸಿಕೊಳ್ಳಲಾಗಿದೆ.

ಸಮೀಕ್ಷೆಯಲ್ಲಿ ವಿಜಯ್ ಮುಂದಿನ ಪ್ರಧಾನಿಯಾಗಬೇಕು ಎಂಬ ಪ್ರಶ್ನೆಗೆ ಮಾತ್ರ ಸೀಮಿತವಾಗಿಲ್ಲ. ವಿರೋಧ ಪಕ್ಷಗಳ ಮೈತ್ರಿಕೂಟವನ್ನು ಮುನ್ನಡೆಸಲು ಪ್ರಸ್ತುತ ಯಾವ ವಿರೋಧ ಪಕ್ಷದ ನಾಯಕ ಹೆಚ್ಚು ಸೂಕ್ತ ಎಂದು ಉತ್ತರಿಸಿದವರನ್ನು ಕೇಳಿದಾಗ, ವಿಜಯ್ 12.2% ಮತಗಳನ್ನು ಪಡೆಯುವ ಮೂಲಕ ಮತ್ತೆ ಅಗ್ರಸ್ಥಾನದ ಸನಿಹದಲ್ಲಿದ್ದಾರೆ. ಅವರು 29% ಮತಗಳೊಂದಿಗೆ ಮುಂಚೂಣಿಯಲ್ಲಿರುವ ರಾಹುಲ್ ಗಾಂಧಿ ಅವರ ಹಿಂದಿದ್ದು, ಮಮತಾ ಬ್ಯಾನರ್ಜಿ (8.5%), ಅರವಿಂದ್ ಕೇಜ್ರಿವಾಲ್ (7.5%) ಮತ್ತು ಅಖಿಲೇಶ್ ಯಾದವ್ (6.9%) ಅವರಿಗಿಂತ ಮುಂದಿದ್ದಾರೆ.

ತಮ್ಮ ಮೊದಲ ಅವಧಿಯ ಕೆಲವೇ ತಿಂಗಳುಗಳಲ್ಲಿರುವ ರಾಜಕಾರಣಿಯೊಬ್ಬರು ತಮಿಳುನಾಡಿನಿಂದ ಆಚೆಗೆ ತಮ್ಮ ರಾಜಕೀಯ ಹೆಜ್ಜೆ ಗುರುತನ್ನು ಎಷ್ಟು ವೇಗವಾಗಿ ವಿಸ್ತರಿಸಿಕೊಂಡಿದ್ದಾರೆ ಎಂಬುದರ ಸಣ್ಣ ಸುಳಿವನ್ನು ಈ ಫಲಿತಾಂಶಗಳು ನೀಡುತ್ತವೆ.

ವಿಜಯ್ ರಾಜಕೀಯ ಪಯಣವು ರಾಷ್ಟ್ರ ರಾಜಕೀಯದಲ್ಲಿ ಅಪರೂಪವಾಗಿ ಕಂಡುಬರುವ ವೇಗದಲ್ಲಿ ಸಾಗಿದೆ. 2024 ರಲ್ಲಿ ಟಿವಿಕೆ ಪ್ರಾರಂಭಿಸುವ ಮೂಲಕ ಅಧಿಕೃತವಾಗಿ ರಾಜಕೀಯಕ್ಕೆ ಪ್ರವೇಶಿಸಿದ ದಳಪತಿ, ಕೇವಲ ಎರಡು ವರ್ಷಗಳಲ್ಲಿ, ಅದರಲ್ಲೂ ತನ್ನ ಮೊದಲ ಚುನಾವಣೆಯಲ್ಲಿ ಸ್ಪರ್ಧಿಸಿ, ತಮಿಳುನಾಡಿನಲ್ಲಿ ಅಧಿಕಾರಕ್ಕೆ ಬಂದಿತು. ಅವರ ಸರ್ಕಾರವು ತನ್ನ ಒಂದು ವರ್ಷವನ್ನು ಪೂರ್ಣಗೊಳಿಸುವ ಮೊದಲೇ, ದೇಶದ ರಾಜಕೀಯ ಮನಸ್ಥಿತಿಯನ್ನು ಲೆಕ್ಕ ಹಾಕುವ ಸಮೀಕ್ಷೆಯಲ್ಲಿ ಅವರ ಹೆಸರನ್ನು ಅನುಭವಿ ರಾಷ್ಟ್ರೀಯ ನಾಯಕರ ಜೊತೆಗೆ ನೋಡಲಾಗುತ್ತಿದೆ.

ಇತ್ತೀಚೆಗೆ ಟಿವಿಕೆ ಕೆಲ ನಾಯಕರು ವಿಜಯ್ ರಾಷ್ಟ್ರೀಯ ಮಟ್ಟದ ನಾಯಕ, ಮುಂಬರುವ 2029 ರ ಲೋಕಸಭಾ ಚುನಾವಣೆಗೆ ಪ್ರಧಾನಿ ಅಭ್ಯರ್ಥಿ ಎಂದು ಮಾತನಾಡುತ್ತಿದ್ದರು. ಈಗ ಬಂದಿರುವ ಮೂಡ್ ಆಫ್ ದಿ ನೇಷನ್ ಸಮೀಕ್ಷೆಯ ಅಂಕಿಅಂಶಗಳು ಅವರ ಈ ಮಾತಿಗೆ ಮತ್ತು ಚುನಾವಣಾ ಚರ್ಚೆಗೆ ಮತ್ತಷ್ಟು ಪುಷ್ಟಿ ನೀಡಿವೆ. ಲೋಕಸಭಾ ಚುನಾವಣೆಗೆ ಇನ್ನು ಮೂರು ವರ್ಷಗಳ ಸಮಯವಿದ್ದು, ಈ ಜನಪ್ರಿಯತೆಯನ್ನು ರಾಷ್ಟ್ರೀಯ ಮಟ್ಟದ ದೊಡ್ಡ ಮೈತ್ರಿಕೂಟವಾಗಿ ಬೆಳೆಸುವುದು ಸುಲಭವಲ್ಲ. ಆದಾಗ್ಯೂ, ವಿಜಯ್ ಅವರನ್ನು ಪ್ರಧಾನಿ ಅಭ್ಯರ್ಥಿಯಾಗಿ ನೋಡುವ ಕಲ್ಪನೆ ಕೇವಲ ತಮಿಳುನಾಡಿಗೆ ಸೀಮಿತವಾಗಿಲ್ಲ, ದೇಶಾದ್ಯಂತ ಹರಡುತ್ತಿದೆ ಎಂಬುದನ್ನು ಈ ಸಮೀಕ್ಷೆ ತೋರಿಸಿಕೊಟ್ಟಿದೆ(ಏಜೆನ್ಸೀಸ್​).