ವಿಶ್ವದ ಅತಿ ಎತ್ತರದ ಶಿಖರ ಮೌಂಟ್ ಎವರೆಸ್ಟ್​ನಲ್ಲಿ ಕಾಣಿಸಿಕೊಂಡ ಕಾಳಿಂಗ ಸರ್ಪ! ಜಗತ್ತಿಗೆ ಕಾದಿದೆ ಗಂಡಾಂತರ? Mount Everest

Mount Everest : ಪ್ರಪಂಚದ ಅತ್ಯಂತ ಎತ್ತರದ ಶಿಖರವಾದ ಮೌಂಟ್ ಎವರೆಸ್ಟ್ ಏರಲು ಬಯಸುವ ಪರ್ವತಾರೋಹಿಗಳಿಗೆ ಹಾಗೂ ಆ ಭಾಗದ ನಿವಾಸಿಗಳಿಗೆ ತೀವ್ರ ಆತಂಕಕಾರಿ ಸುದ್ದಿಯೊಂದು ಎದುರಾಗಿದೆ. ಹಿಮಾಲಯದ ಎತ್ತರದ ಪರ್ವತ ಪ್ರದೇಶಗಳನ್ನು ಹೊಂದಿರುವ ನೇಪಾಳದಲ್ಲಿ ಇತ್ತೀಚಿನ ದಿನಗಳಲ್ಲಿ ವಿಷಪೂರಿತ ಹಾವುಗಳ ಹಾವಳಿ ಗಣನೀಯವಾಗಿ ಹೆಚ್ಚಾಗುತ್ತಿದೆ ಎಂದು ವರದಿಗಳು ತಿಳಿಸಿವೆ.

ಜಾಗತಿಕ ತಾಪಮಾನ ಏರಿಕೆ ಹಾಗೂ ಹವಾಮಾನ ವೈಪರೀತ್ಯದಿಂದಾಗಿ ಈ ಹಿಂದೆ ಎಂದಿಗೂ ಕಂಡುಬರದಿದ್ದ ಎತ್ತರದ ಹಿಮಾಲಯದ ಪ್ರದೇಶಗಳಿಗೂ ಕಾಳಿಂಗ ಸರ್ಪದಂತಹ ಅತ್ಯಂತ ವಿಷಕಾರಿ ಹಾವುಗಳು ವಲಸೆ ಬಂದು ನೆಲೆಸುತ್ತಿರುವುದು ವಿಜ್ಞಾನಿಗಳನ್ನು ಮತ್ತು ಸ್ಥಳೀಯರನ್ನು ಆಶ್ಚರ್ಯ ಹಾಗೂ ಆತಂಕಕ್ಕೀಡುಮಾಡಿದೆ.

ಹಾವು ಕಡಿತದ ಪ್ರಕರಣಗಳು ಹಠಾತ್ ಹೆಚ್ಚಾಗುತ್ತಿರುವುದರಿಂದ, ಮುನ್ನೆಚ್ಚರಿಕಾ ಕ್ರಮವಾಗಿ ಹಿಮಾಲಯದ ಪರ್ವತ ಪ್ರದೇಶದ ಆಸ್ಪತ್ರೆಗಳಲ್ಲಿ ತುರ್ತು ಚಿಕಿತ್ಸೆಗಾಗಿ ಅಗತ್ಯವಿರುವ 'ಆ್ಯಂಟಿ-ವೆನಮ್' (ಹಾವು ಕಡಿತದ ಪ್ರತಿವಿಷ) ದಾಸ್ತಾನು ಇಡಲು ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ. ಆದರೆ, ಈ ಭಾಗದ ಅನೇಕ ಆಸ್ಪತ್ರೆಗಳು ಸೂಕ್ತವಾದ ಮತ್ತು ಗುಣಮಟ್ಟದ ಆ್ಯಂಟಿ-ವೆನಮ್ ಲಸಿಕೆಯನ್ನು ಪಡೆದುಕೊಳ್ಳಲು ತೀವ್ರವಾಗಿ ಹೆಣಗಾಡುತ್ತಿವೆ.

ಹಾವಿನ ಹಾವಳಿ ಇಲ್ಲದ ಕಾರಣಕ್ಕೆ ಈ ಮೊದಲು ಇಂತಹ ಯಾವುದೇ ಚಿಕಿತ್ಸೆಗೆ ಸಜ್ಜಾಗದ ನೇಪಾಳದ ಪರ್ವತ ಪ್ರದೇಶದ ಆಸ್ಪತ್ರೆಗಳು, ಈಗ ಇತಿಹಾಸದಲ್ಲೇ ಹಿಂದೆಂದೂ ಕಾಣದಂತಹ ಗಂಭೀರ ಆರೋಗ್ಯ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸಿದ್ಧತೆ ನಡೆಸಬೇಕಾದ ಅನಿವಾರ್ಯತೆಗೆ ಸಿಲುಕಿವೆ.

ನೇಪಾಳದ ಮಂಜಿನಿಂದ ಆವೃತವಾದ ಹಿಮಾಲಯ ಪರ್ವತ ಪ್ರದೇಶಗಳಲ್ಲಿ ತಾಪಮಾನ ಏರಿಕೆಯಾಗುತ್ತಿರುವುದು ಪರಿಸರದಲ್ಲಿ ಭಾರಿ ಬದಲಾವಣೆಗಳಿಗೆ ಕಾರಣವಾಗಿದೆ. ಹೆಚ್ಚುತ್ತಿರುವ ಬಿಸಿಯಾದ ಹವಾಮಾನದಿಂದಾಗಿ ಈ ಎತ್ತರದ ಪ್ರದೇಶಗಳತ್ತ ವಿಷಪೂರಿತ ಹಾವುಗಳು ಆಕರ್ಷಿತವಾಗುತ್ತಿದ್ದು, ಅತ್ಯಂತ ಅಪಾಯಕಾರಿ ಕಾಳಿಂಗ ಸರ್ಪ ಸಹ ಈಗ ಇಲ್ಲಿ ಪ್ರತ್ಯಕ್ಷವಾಗುತ್ತಿವೆ. ಈ ಆತಂಕಕಾರಿ ಬೆಳವಣಿಗೆಯು ನೇಪಾಳದ ಸುಂದರ ಪರ್ವತಗಳನ್ನು ನೋಡಲು ಬರುವ ಪ್ರವಾಸಿಗರಲ್ಲಿ ಮತ್ತು ವಿಶ್ವದ ಅತ್ಯಂತ ಎತ್ತರದ ಶಿಖರಗಳನ್ನು ಏರಲು ಬರುವ ಪರ್ವತಾರೋಹಿಗಳಲ್ಲಿ ತೀವ್ರ ಆತಂಕವನ್ನು ಸೃಷ್ಟಿಸಿದೆ.

ವಿಶ್ವದ ಅತ್ಯಂತ ಎತ್ತರದ ಮೌಂಟ್ ಎವರೆಸ್ಟ್ ಶಿಖರವಿರುವ ಸೋಲುಖುಂಬು ಜಿಲ್ಲೆಯ 'ಸೋತಾಂಗ್ ಪ್ರಾಥಮಿಕ ಆಸ್ಪತ್ರೆ'ಯು ಇತ್ತೀಚಿನ ದಿನಗಳಲ್ಲಿ ಹಾವು ಕಡಿತದ ಪ್ರಕರಣಗಳಿಂದ ಕಂಗಾಲಾಗಿದೆ. ಸಮುದ್ರ ಮಟ್ಟದಿಂದ ಬರೋಬ್ಬರಿ 6,562 ಅಡಿ ಎತ್ತರದಲ್ಲಿರುವ ಈ ಆಸ್ಪತ್ರೆಯ ವ್ಯಾಪ್ತಿಯಲ್ಲಿ ಏಪ್ರಿಲ್ 14 ರಿಂದ ಈವರೆಗೆ ಬರೋಬ್ಬರಿ 30 ಹಾವು ಕಡಿತದ ಪ್ರಕರಣಗಳು ವರದಿಯಾಗಿವೆ. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತಿರುವ ಆಸ್ಪತ್ರೆಯ ಆಡಳಿತ ಮಂಡಳಿಯು, ತುರ್ತು ಚಿಕಿತ್ಸೆಗಾಗಿ ಹೆಚ್ಚಿನ ಪ್ರಮಾಣದ 'ಆ್ಯಂಟಿ-ವೆನಮ್' (ಪ್ರತಿವಿಷ) ಪೂರೈಸುವಂತೆ ಸರ್ಕಾರಕ್ಕೆ ತುರ್ತು ವಿನಂತಿ ಮಾಡಿಕೊಂಡಿದೆ.

ಜಾಗತಿಕ ತಾಪಮಾನ ಏರಿಕೆ ಹಾಗೂ ಹವಾಮಾನ ವೈಪರೀತ್ಯವೇ ಈ ರೀತಿ ವಿಷಪೂರಿತ ಹಾವುಗಳು ಎತ್ತರದ ಪರ್ವತ ಪ್ರದೇಶಗಳತ್ತ ವಲಸೆ ಹೋಗಲು ಪ್ರಮುಖ ಕಾರಣ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಎವರೆಸ್ಟ್‌ನಂತಹ ಪ್ರದೇಶಗಳಲ್ಲಿ ಈಗ ಕೇವಲ ಕಾಳಿಂಗ ಸರ್ಪಗಳು ಮಾತ್ರವಲ್ಲದೆ, ಪರಿಸರದಲ್ಲಿ ಸುಲಭವಾಗಿ ಗುರುತಿಸಲು ಸಿಗದ 'ಪಿಟ್ ವೈಪರ್' (ಹೊದಿಕೆ ಹಾವು/ಕುಳಿ ಮಂಡಲ) ನಂತಹ ಅಪಾಯಕಾರಿ ಹಾವಿನ ಪ್ರಭೇದಗಳೂ ಕಾಣಿಸಿಕೊಳ್ಳುತ್ತಿವೆ. ನೇಪಾಳದಲ್ಲಿ ಹಾವು ಕಡಿತಕ್ಕೆ ಒಳಗಾಗುವವರ ಪೈಕಿ ಶೇ. 80 ಕ್ಕಿಂತ ಹೆಚ್ಚು ಜನರು ಸೂಕ್ತ ಆಸ್ಪತ್ರೆ ಅಥವಾ ಆರೋಗ್ಯ ಕೇಂದ್ರವನ್ನು ತಲುಪುವ ಮುನ್ನವೇ ಸಾವಿಗೀಡಾಗುತ್ತಿದ್ದಾರೆ ಎಂಬುದು ತಜ್ಞರು ಎತ್ತಿ ತೋರಿಸಿರುವ ಮತ್ತೊಂದು ಅತ್ಯಂತ ಗಂಭೀರವಾದ ಸಂಗತಿಯಾಗಿದೆ.

ವಿಶ್ವಸಂಸ್ಥೆಯು ಬಿಡುಗಡೆ ಮಾಡಿರುವ ಹಾವು ಕಡಿತದ ಮರಣ ಪ್ರಮಾಣದ ಅಂಕಿ-ಅಂಶಗಳನ್ನು ಆಧರಿಸಿ, ನೇಪಾಳ ಸರ್ಕಾರವು ಒಂದು ಮಹತ್ವದ ಗುರಿಯನ್ನು ಹಾಕಿಕೊಂಡಿದೆ. ದೇಶದಲ್ಲಿ ಹಾವು ಕಡಿತದಿಂದ ಸಂಭವಿಸುವ ಸಾವುಗಳ ಸಂಖ್ಯೆಯನ್ನು 2030ರ ವೇಳೆಗೆ ಅರ್ಧದಷ್ಟು (ಶೇ. 50 ರಷ್ಟು) ಕಡಿಮೆ ಮಾಡುವುದು ನೇಪಾಳ ಸರ್ಕಾರದ ಮುಖ್ಯ ಉದ್ದೇಶವಾಗಿದೆ. ಇದಕ್ಕಾಗಿ ಪರ್ವತ ಪ್ರದೇಶಗಳ ಆಸ್ಪತ್ರೆಗಳನ್ನು ಸಜ್ಜುಗೊಳಿಸುವುದು ಮತ್ತು ಸಕಾಲದಲ್ಲಿ ಚಿಕಿತ್ಸೆ ಸಿಗುವಂತೆ ಮಾಡುವುದು ಸರ್ಕಾರಕ್ಕೆ ಈಗ ದೊಡ್ಡ ಸವಾಲಾಗಿ ಪರಿಣಮಿಸಿದೆ, (ಏಜೆನ್ಸೀಸ್​).