ಬೇಕರಿಯಿಂದ ತಂದ ನೀರಿನ ಬಾಟಲಿಯಲ್ಲಿತ್ತು ಗಂಡಾಂತರ: ಮಹಿಳೆಯನ್ನು ಸಾವಿನ ದವಡೆಗೆ ನೂಕಿದ ಒಂದು ಸಣ್ಣ ನಿರ್ಲಕ್ಷ್ಯ! UP Woman

ಲಖನೌ: ಉತ್ತರ ಪ್ರದೇಶದ ಹಾಪುರ್ ಜಿಲ್ಲೆಯ ಜ್ಯುವೆಲ್ಲರಿ ಅಂಗಡಿಯೊಂದರಲ್ಲಿ ಆಘಾತಕಾರಿ ಘಟನೆಯೊಂದು ನಡೆದಿದ್ದು, ನೀರಿನ ಬಾಟಲಿ ಎಂದು ಭಾವಿಸಿ ಮಹಿಳೆಯೊಬ್ಬರು ( UP Woman ) ಆಕಸ್ಮಿಕವಾಗಿ ಆಸಿಡ್ ಕುಡಿದು ಅತ್ಯಂತ ಗಂಭೀರ ಸ್ಥಿತಿಯಲ್ಲಿದ್ದಾರೆ.

ಬೇಕರಿಯಿಂದ ತಂದ ನೀರಿನ ಬಾಟಲಿಯಿಂದ ಒಂದು ಸಿಪ್ ನೀರನ್ನು ಬಾಯಿಗೆ ಹಾಕಿಕೊಳ್ಳುತ್ತಿದ್ದಂತೆ ತೀವ್ರ ಉರಿ ತಾಳಲಾರದೆ ಹೊರಗೆ ಉಗುಳಲು ಓಡುತ್ತಿರುವ ಭೀಕರ ದೃಶ್ಯ ಅಲ್ಲಿನ ಸಿಸಿಟಿವಿ (CCTV) ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಕೇವಲ ಒಂದು ಸಣ್ಣ ನಿರ್ಲಕ್ಷ್ಯದಿಂದಾಗಿ ಪ್ರಾಣಾಪಾಯಕ್ಕೆ ಸಿಲುಕಿರುವ ಈ ಮಹಿಳೆಯ ಪರಿಸ್ಥಿತಿ ಸದ್ಯ ಅತ್ಯಂತ ಕಷ್ಟಕರವಾಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಮುಂದುವರಿದಿದೆ.

ಶುಕ್ರವಾರ ಸಂಜೆ ಅರ್ಜುನ್ ನಗರ ಪ್ರದೇಶದಲ್ಲಿ ಮಹಿಳೆಯೊಬ್ಬರು ಜ್ಯುವೆಲ್ಲರಿ ಶಾಪಿಂಗ್ ಮಾಡಲು ಹೋಗಿದ್ದಾಗ ಈ ದುರಂತ ಸಂಭವಿಸಿದೆ. ಅಂಗಡಿಯಲ್ಲಿದ್ದಾಗ ತೀವ್ರ ಬಾಯಾರಿಕೆಯಾದ ಕಾರಣ ಅವರು ಕುಡಿಯಲು ನೀರು ಕೇಳಿದ್ದಾರೆ. ತಕ್ಷಣವೇ ಆ ಅಂಗಡಿಯ ನೌಕರನೊಬ್ಬ ಪಕ್ಕದಲ್ಲೇ ಇದ್ದ ಬೇಕರಿಯಿಂದ ಸೀಲ್ ಮಾಡಿದ ನೀರಿನ ಬಾಟಲಿಯನ್ನು ತರಲು ಹೋಗಿದ್ದಾನೆ. ಬೇಕರಿ ಮಾಲೀಕನು ತನ್ನ ಫ್ರಿಡ್ಜ್‌ನಿಂದ ತಣ್ಣಗಿದ್ದ ಬಾಟಲಿಯನ್ನು ತೆಗೆದು ಆ ನೌಕರನಿಗೆ ನೀಡಿದ್ದು, ಅವನು ಅದನ್ನು ತಂದು ಮಹಿಳೆಗೆ ಹಸ್ತಾಂತರಿಸಿದ್ದಾನೆ.

ಬಾಟಲಿಯ ಒಳಗಿರುವುದು ನೀರಲ್ಲ ಎಂಬ ಸಣ್ಣ ಸುಳಿವೂ ಇಲ್ಲದ ಮಹಿಳೆ, ಅದರ ಸೀಲ್ ಓಪನ್ ಮಾಡಿ ತಕ್ಷಣವೇ ಒಂದು ಸಿಪ್ ಕುಡಿದಿದ್ದಾರೆ. ಬಾಯಿಗೆ ಹಾಕಿಕೊಳ್ಳುತ್ತಿದ್ದಂತೆಯೇ ತೀವ್ರ ಉರಿ ಕಾಣಿಸಿಕೊಂಡಿದ್ದರಿಂದ ನೋವು ತಾಳಲಾರದೆ ಜೋರಾಗಿ ಕಿರುಚಾಡುತ್ತಾ, ಅದನ್ನು ಹೊರಗೆ ಉಗುಳಲು ಅಂಗಡಿಯಿಂದ ಹೊರಗಡೆ ಓಡಿ ಬಂದಿದ್ದಾರೆ. ಆ ನೀರಿನ ಬಾಟಲಿಯಲ್ಲಿ ನೀರಿಗೆ ಬದಲಾಗಿ ಆಸಿಡ್ ಇತ್ತು ಎಂದು ಆರೋಪಿಸಲಾಗಿದ್ದು, ಸದ್ಯ ಮಹಿಳೆಯ ಸ್ಥಿತಿ ಗಂಭೀರವಾಗಿದೆ.

ಆಸಿಡ್ ಕುಡಿದ ಮಹಿಳೆಯ ಆರೋಗ್ಯ ಸ್ಥಿತಿ ತೀವ್ರವಾಗಿ ಕ್ಷೀಣಿಸಿದ ಕಾರಣ, ಅವರನ್ನು ತಕ್ಷಣವೇ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ಪರಿಸ್ಥಿತಿ ಗಂಭೀರವಾಗಿದ್ದರಿಂದ ಹೆಚ್ಚಿನ ಚಿಕಿತ್ಸೆಗಾಗಿ ಮತ್ತೊಂದು ವೈದ್ಯಕೀಯ ಸಂಸ್ಥೆಗೆ ರವಾನಿಸಲಾಗಿದ್ದು, ಸದ್ಯ ಅವರು ಮೆಡಿಕಲ್ ಕಾಲೇಜೊಂದರಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಬೇಕರಿ ಮಾಲೀಕನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ. ಆದರೆ, ತಾನು ಫ್ರಿಡ್ಜ್‌ನಿಂದ ಸೀಲ್ ಆಗಿದ್ದ ಬಾಟಲಿಯನ್ನೇ ಹಾಗೆಯೇ ತಂದುಕೊಟ್ಟಿರುವುದಾಗಿ ಬೇಕರಿ ವ್ಯಾಪಾರಿ ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದಾನೆ.

ಪೊಲೀಸರು ಈಗಾಗಲೇ ಆ ಬೇಕರಿ ಅಂಗಡಿಯಿಂದ ಕೆಲವು ಆಸಿಡ್ ಬಾಟಲಿಗಳನ್ನು ವಶಪಡಿಸಿಕೊಂಡಿದ್ದು, ಪ್ರಕರಣದ ಹಿಂದಿನ ಅಸಲಿ ರಹಸ್ಯ ತಿಳಿಯಲು ತನಿಖೆಯನ್ನು ಚುರುಕುಗೊಳಿಸಿದ್ದಾರೆ. ಇತ್ತ ಜ್ಯುವೆಲ್ಲರಿ ಅಂಗಡಿಯ ಮಾಲೀಕನಾದ ದೇನು ಎಂಬುವವರು ಮಾತನಾಡಿ, ನಮಗೆ ತಿಳಿದಿರುವ ಮಟ್ಟಿಗೆ ಆ ಬಾಟಲಿ ಸಂಪೂರ್ಣವಾಗಿ ಸೀಲ್ ಆಗಿತ್ತು, ಬೇಕರಿಯ ಫ್ರಿಡ್ಜ್‌ನಿಂದ ತಂದ ಬಾಟಲಿಯನ್ನು ನಾವು ಹೇಗೆ ಇತ್ತೋ ಹಾಗೆಯೇ ಗ್ರಾಹಕರಿಗೆ ನೀಡಿದ್ದೆವು ಎಂದು ತಿಳಿಸಿದ್ದಾರೆ. ಒಟ್ಟಾರೆಯಾಗಿ ಸೀಲ್ಡ್ ಬಾಟಲಿಯಲ್ಲಿ ಆಸಿಡ್ ಹೇಗೆ ಬಂತು ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ, (ಏಜೆನ್ಸೀಸ್​).