ಪಂದ್ಯದ ವೇಳೆ ಜೇನುನೊಣಗಳ ಅಟ್ಟಹಾಸ: ಕ್ರಿಕೆಟ್ ಮೈದಾನದಲ್ಲೇ ಅಂಪೈರ್ ದಾರುಣ ಸಾವು | Umpire

ಕಾನ್ಪುರ: ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಕ್ರಿಕೆಟ್​ ಪಂದ್ಯದ ವೇಳೆ ಜೇನುನೊಣಗಳ ಹಿಂಡು ದಾಳಿ ಮಾಡಿದ ಪರಿಣಾಮ ಅಂಪೈರಿಂಗ್ (Umpire) ಮಾಡುತ್ತಿದ್ದ ಮಾಣಿಕ್ ಗುಪ್ತಾ (65) ಸವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.

ಪಂದ್ಯದ ಮಧ್ಯದಲ್ಲಿ ಡ್ರಿಂಕ್ಸ್​ ಬ್ರೇಕ್​ ನೀಡಿದ ಸಂದರ್ಭದಲ್ಲಿ ಜೇನಿನ ದಾಳಿ ನಡೆದ್ದಿದ್ದು, ಒಂದೇ ಸಮನೆ ಜೇನು ನಮ್ಮ ಮೇಲೆ ದಾಳಿ ಮಾಡಿದವು, ಅವುಗಳಿಂದ ತಪ್ಪಿಸಿಕೊಳ್ಳುವ ಸಮಯದಲ್ಲಿ ಮಾಣಿಕ್ ಗುಪ್ತಾ ನೆಲಕ್ಕೆ ಬಿದ್ದರು ಮತ್ತು ಅವರು ನೂರಾರು ಜೇನುಗಳು ಸುತ್ತುವರೆದು ಕಚ್ಚಿದವು ಎಂದು ಮಾನಿಕ್​ ಅವರ ಸಹೋದರ ಅಮಿತ್ ಕುಮಾರ್ ಗುಪ್ತಾ ತಿಳಿಸಿದ್ದಾರೆ.

ಡ್ರಿಂಕ್ಸ್ ಬ್ರೇಕ್ ಸಮಯದಲ್ಲಿ ನಮ್ಮ ಮೇಲೆ ಜೇನುನೊಣಗಳ ಹಿಂಡು ದಾಳಿ ಮಾಡಿತು. ನಾವು ಓಡಿಹೋದೆವು, ಆದರೆ ಮಾಣಿಕ್ ಅವರಿಗೆ ವಯಸ್ಸಾಗಿದ್ದರಿಂದ ಅವರಿಗೆ ಓಡಲಾಗದೆ ಜೇನುನೊಣಗಳ ದಾಳಿಗೆ ತುತ್ತಾದರು ಎಂದು ಅವರ ಸಹ ಅಂಪೈರ್ ಭರತೇಂದು ಪುರಿ ಹೇಳಿದ್ದಾರೆ.

ಮಾಣಿಕ್ ಗುಪ್ತಾ ಅವರು ತಮ್ಮ ಇಡೀ ಜೀವನವನ್ನು ಅಂಪೈರಿಂಗ್​ಗಾಗಿ ಮೀಸಲಿಟ್ಟಿವರಾಗಿದ್ದರು. ಇದೊಂದು ದುರದೃಷ್ಟಕರ ಘಟನೆಯಾಗಿದ್ದು, ಕಾನ್ಪುರ್ ಕ್ರಿಕೆಟ್ ಅಸೋಸಿಯೇಷನ್‌ ಒಬ್ಬ ಪ್ರತಿಷ್ಠಿತ ಅಂಪೈರ್​ನ್ನು ಕಳೆದುಕೊಂಡಿದೆ ಎಂದು ಅವರು ಹೇಳಿದರು,(ಏಜನ್ಸೀಸ್​).