Vijay ವಿರುದ್ಧ ಉದಯನಿಧಿ ವೈಯಕ್ತಿಕ ಟೀಕೆ: ‘ಪತ್ನಿ ಪತಿಯನ್ನು ಹುಡುಕುತ್ತಿರುವ ಕಥೆ ರಾಜ್ಯಕ್ಕೆ ಗೊತ್ತು’ ಎಂದ ಉದಯನಿಧಿ!

ರಾಜ್ಯಪಾಲರ ಭಾಷಣಕ್ಕೆ ಉತ್ತರಿಸುತ್ತಿದ್ದ ವಿಜಯ್, “ಪಕ್ಷ ನಿಧಿ ಸಂಗ್ರಹದ ಹೆಸರಿನಲ್ಲಿ ದುರುಪಯೋಗಗೊಂಡ ಸಾರ್ವಜನಿಕ ಹಣವನ್ನು ನಮ್ಮ ಸರ್ಕಾರ ವಾಪಸ್ ಪಡೆಯಲಿದೆ” ಎಂದು ಆರೋಪಿಸಿದರು.

ಇದಕ್ಕೆ ಡಿಎಂಕೆ ಸದಸ್ಯರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ಉದಯನಿಧಿ ಸ್ಟಾಲಿನ್ ಸಾಕ್ಷ್ಯವಿದ್ದರೆ ಮಾತ್ರ ಇಂತಹ ಆರೋಪ ಮಾಡಬೇಕು ಎಂದು ಸದನದಲ್ಲಿ ಆಕ್ಷೇಪ ದಾಖಲಿಸಿದರು. ಆದರೆ ಸ್ಪೀಕರ್, ಮುಖ್ಯಮಂತ್ರಿ ತಮ್ಮ ಭಾಷಣ ಪೂರ್ಣಗೊಳಿಸಲು ಅವಕಾಶ ನೀಡಬೇಕು ಎಂದು ತಿಳಿಸಿದರು.

ಭಾಷಣ ಮುಂದುವರಿಸಿದ ವಿಜಯ್, “ಟಿವಿಕೆ ಸರ್ಕಾರ ಡಿಎಂಕೆ ಸರ್ಕಾರದಂತೆ ಭ್ರಷ್ಟಾಚಾರ ಮಾಡುವುದಿಲ್ಲ. ಸರ್ಕಾರಿ ಖಜಾನೆಯನ್ನು ಯಾರೂ ಲೂಟಿ ಮಾಡಲು ಅವಕಾಶ ನೀಡುವುದಿಲ್ಲ” ಎಂದು ಹೇಳಿದರು. ಇದೇ ವೇಳೆ, ಅವರು ಮಾಜಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಮಾಡಿದ್ದ ಕೈ ಸನ್ನೆಯನ್ನು ಅನುಕರಿಸಿದಂತೆ ಕಂಡ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ವಿಧಾನಸಭೆಯ ಹೊರಗೆ ಮಾತನಾಡಿದ ಉದಯನಿಧಿ ಸ್ಟಾಲಿನ್, ವಿಜಯ್ ರೈತರ ಪ್ರತಿಭಟನೆ ಬಗ್ಗೆ ನೀಡಿದ್ದ ಹೇಳಿಕೆಯನ್ನು ಖಂಡಿಸಿದರು. “ರೈತರು ವಿರೋಧ ಪಕ್ಷಗಳ ಪ್ರೇರಣೆಯಿಂದ ಪ್ರತಿಭಟನೆ ನಡೆಸುತ್ತಿದ್ದಾರೆ ಎಂದು ಹೇಳುವುದು ರೈತರಿಗೆ ಅವಮಾನ. ಅವರು ಸಣ್ಣ ಕಥೆ ಹೇಳುತ್ತಿದ್ದೇನೆ ಎಂದಿರುವುದು ರೈತರ ಗೌರವಕ್ಕೆ ವಿರುದ್ಧವಾಗಿದೆ. ಚೆಂಗಲ್ಪಟ್ಟು ನ್ಯಾಯಾಲಯದಲ್ಲಿ ಪತ್ನಿ ಪತಿಯನ್ನು ಹುಡುಕುತ್ತಿರುವ ಕಥೆ ತಮಿಳುನಾಡಿಗೆ ಗೊತ್ತಿದೆ. ವಿಜಯ್ ಅದನ್ನು ಈಗಾದರೂ ಮರೆತುಬಿಡಲಿ” ಎಂದು ಹೇಳಿದರು. ಇದು ವಿಜಯ್ ಅವರ ಪತ್ನಿ ಸಂಗೀತಾ ಸೋರ್ನಲಿಂಗಂ ಸಲ್ಲಿಸಿರುವ ವಿಚ್ಛೇದನ ಅರ್ಜಿಗೆ ಪರೋಕ್ಷ ಉಲ್ಲೇಖ ಎಂದು ರಾಜಕೀಯ ವಲಯದಲ್ಲಿ ಚರ್ಚೆಯಾಗುತ್ತಿದೆ. ಈ ಪ್ರಕರಣ ಚೆಂಗಲ್ಪಟ್ಟು ಕುಟುಂಬ ನ್ಯಾಯಾಲಯದಲ್ಲಿ ವಿಚಾರಣೆಯಲ್ಲಿದ್ದು, ಮುಂದಿನ ವಿಚಾರಣೆ ಆಗಸ್ಟ್ 7ಕ್ಕೆ ನಿಗದಿಯಾಗಿದೆ.

ಉದಯನಿಧಿ ಸ್ಟಾಲಿನ್ ಮತ್ತಷ್ಟು ವ್ಯಂಗ್ಯವಾಡಿ, “ಟಿವಿಕೆ ವಿಧಾನಸಭೆಯನ್ನು ಸಿನಿಮಾ ಥಿಯೇಟರ್ ಆಗಿ ಮಾಡಿದೆ. ಮುಖ್ಯಮಂತ್ರಿ ಭಾಷಣ ಸಂಪೂರ್ಣ ರೀಲ್ಸ್ ಮತ್ತು ಸಾಮಾಜಿಕ ಜಾಲತಾಣಗಳಿಗಾಗಿ ಸಿದ್ಧಪಡಿಸಿದಂತಿತ್ತು. ಸ್ಪೀಕರ್ ‘ಆಕ್ಷನ್’ ಮತ್ತು ‘ಕಟ್’ ಹೇಳುತ್ತಿರುವಂತೆ ಕಾಣುತ್ತಿತ್ತು” ಎಂದು ಟೀಕಿಸಿದರು. ಮುಂದೆ ಕ್ಯಾರವಾನ್, ಮೇಕಪ್ ಕಲಾವಿದರು ಮತ್ತು ಸ್ಟಂಟ್ ಮಾಸ್ಟರ್‌ಗಳೂ ಬರುತ್ತಾರೆ ಎಂದು ವ್ಯಂಗ್ಯವಾಗಿ ಹೇಳಿದರು.

ವಿಧಾನಸಭೆಯಲ್ಲಿನ ಈ ವಾಗ್ವಾದ ತಮಿಳುನಾಡು ರಾಜಕೀಯದಲ್ಲಿ ಮುಖ್ಯಮಂತ್ರಿ ವಿಜಯ್ ಮತ್ತು ಡಿಎಂಕೆ ನಡುವಿನ ಸಂಘರ್ಷವನ್ನು ಮತ್ತಷ್ಟು ತೀವ್ರಗೊಳಿಸಿದೆ,(ಏಜೆನ್ಸೀಸ್​​).