ಮದುವೆಗೆ ಇನ್ನೆರಡೇ ತಿಂಗಳು ಬಾಕಿ ಇರುವಾಗಲೇ ಕಡಲಲ್ಲಿ ಹೆಣವಾದ ನಾವಿಕ! ರಷ್ಯಾ ದಾಳಿಗೆ ಕೇರಳದ ಯುವಕ ಬಲಿ.. Russia Ukraine War

ಉಕ್ರೇನ್‌ನ ಒಡೆಸಾ ಬಂದರಿನಿಂದ ಯೂಕ್ರೇನಿಯನ್ ಜೋಳವನ್ನು ಹೊತ್ತು ಸಾಗುತ್ತಿದ್ದ ಎಮ್‌ವಿ ಗೋಲ್ಡನ್ ಲಿಯೋ ಎಂಬ ಸರಕು ನೌಕೆಯ ಮೇಲೆ ರಷ್ಯಾ ಪಡೆಗಳು (ಜು.19) ಭಾನುವಾರ ದಾಳಿ ನಡೆಸಿದ್ದವು. ಗಿನಿ-ಬಿಸ್ಸಾವ್ ದೇಶದ ಧ್ವಜವನ್ನು ಹೊಂದಿದ್ದ ಈ ಹಡಗಿನಲ್ಲಿ ಒಟ್ಟು 10 ಮಂದಿ ಸಿಬ್ಬಂದಿ ಮೃತಪಟ್ಟಿದ್ದು, ಇದರಲ್ಲಿ ಐವರು ಸಿರಿಯಾ ದೇಶದ ನಾವಿಕರಾಗಿದ್ದಾರೆ. ಘಟನೆಯಲ್ಲಿ ಹಡಗಿನಲ್ಲಿದ್ದ ಎಂಟು ಮಂದಿಯನ್ನು ರಕ್ಷಿಸಲಾಗಿದೆ ಎಂದು ವಿದೇಶಿ ಮಾಧ್ಯಮಗಳು ಹಾಗೂ ಉಕ್ರೇನ್‌ನ ಸಮುದ್ರ ಬಂದರು ಪ್ರಾಧಿಕಾರ ದೃಢಪಡಿಸಿದೆ.

ಕಳೆದ ಆರು ವರ್ಷಗಳಿಂದ ಮರ್ಚೆಂಟ್ ನೇವಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅಖಿಲ್, ಗೋಲ್ಡನ್ ಲಿಯೋ ಹಡಗಿನಲ್ಲಿ ನಾವಿಕನಾಗಿದ್ದರು. ಕೇವಲ 19ನೇ ವಯಸ್ಸಿಗೆ ಈ ವೃತ್ತಿಗೆ ಕಾಲಿಟ್ಟಿದ್ದ ಅವರು, ಶೀಘ್ರದಲ್ಲೇ ಉತ್ತಮ ಭವಿಷ್ಯಕ್ಕಾಗಿ ಬೇರೆ ಕೆಲಸಕ್ಕೆ ಬದಲಾಯಿಸುವ ಯೋಚನೆಯಲ್ಲಿದ್ದರು. ಮೂರು ತಿಂಗಳ ಹಿಂದೆಯಷ್ಟೇ ತಮ್ಮ ನಿಶ್ಚಿತಾರ್ಥಕ್ಕಾಗಿ ಊರಿಗೆ ಬಂದಿದ್ದ ಅಖಿಲ್, ಒಂದು ತಿಂಗಳ ಹಿಂದೆ ಕರ್ತವ್ಯಕ್ಕಾಗಿ ಹಾಜರಾಗಿದ್ದರು.

ಆಲಪ್ಪುಳ ಮೂಲದ ಯುವತಿಯೊಂದಿಗೆ ಅವರ ವಿವಾಹ ನಿಶ್ಚಯವಾಗಿತ್ತು. ವಿದ್ಯುತ್ ಅಂಗಡಿಯಲ್ಲಿ ಕೆಲಸ ಮಾಡುವ ತಂದೆ ಜೋಯನ್ ಹಾಗೂ ಇನ್ಶೂರೆನ್ಸ್ ಏಜೆಂಟ್ ಆಗಿರುವ ತಾಯಿ ಸ್ಯಾಲಿ ಅವರ ಏಕೈಕ ಪುತ್ರನಾಗಿದ್ದ ಅಖಿಲ್, ಕುಟುಂಬಕ್ಕೆ ಬಲವಾದ ಆಧಾರಸ್ತಂಭವಾಗಿದ್ದರು.

ಸೋಮವಾರ ಸಾಯಂಕಾಲ ಹಡಗು ಕಂಪನಿಯು ಇಮೇಲ್ ಮೂಲಕ ಮಾಹಿತಿ ನೀಡಿದಾಗಷ್ಟೇ ಅಖಿಲ್ ಅವರ ಅಗಲಿಕೆ ಕುಟುಂಬಸ್ಥರಿಗೆ ತಿಳಿದುಬಂದಿದೆ. ಪ್ರಸ್ತುತ ಅಖಿಲ್​ ಅವರ ಮೃತ ದೇಹವನ್ನು ಭಾರತಕ್ಕೆ ಕರೆತರಲು ಕುಟುಂಬಸ್ಥರು ಸ್ಥಳೀಯ ಜನಪ್ರತಿನಿಧಿಗಳ ನೆರವು ಕೋರಿದ್ದಾರೆ. ಆದಾಗ್ಯೂ, ಈ ಘಟನೆಯ ತೀವ್ರತೆಯನ್ನು ಅರಿತು ಕೇರಳ ಮುಖ್ಯಮಂತ್ರಿಗಳ ಕಚೇರಿಯು ತಕ್ಷಣವೇ ಕಾರ್ಯಪ್ರವೃತ್ತರಾಗಲು ನೋರ್ಕಾ ಇಲಾಖೆಗೆ ಸೂಚಿಸಿದೆ. ವಿದೇಶಾಂಗ ಸಚಿವಾಲಯ ಹಾಗೂ ರಷ್ಯಾದ ರಾಯಭಾರ ಕಚೇರಿಯೊಂದಿಗೆ ಸಂಪರ್ಕ ಸಾಧಿಸಿ, ಮೃತದೇಹವನ್ನು ತಾಯ್ನಾಡಿಗೆ ತರಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ (ಏಜೆನ್ಸೀಸ್​).