ಯುವತಿಗೆ ಕಿರುಕುಳ ಕೊಟ್ಟ ಪುಂಡರಿಗೆ ತುರಿಕೆ ಸೊಪ್ಪಿನ ಬಿಸಿ! ಗ್ರಾಮಸ್ಥರ ಏಟಿಗೆ ವಿಲವಿಲ ಒದ್ದಾಡಿದ ಯುವಕರು

ಉತ್ತರಾಖಂಡ: ಯುವತಿಗೆ ಪದೇ ಪದೇ ಚುಡಾಯಿಸಿ, ಕಿರುಕುಳ ಕೊಟ್ಟ ಇಬ್ಬರು ಯುವಕರಿಗೆ ವಿಭಿನ್ನ ರೀತಿಯಲ್ಲಿ ಸತೋಲಿ ಗ್ರಾಮಸ್ಥರು ಚಳಿ ಬಿಡಿಸಿದ ಘಟನೆ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ. 

ಪುಂಡರ ಮುಖಕ್ಕೆ ಮಸಿ ಬಳಿದು, ಬಳಿಕ 'ಬಿಚ್ಛು ಬೂಟಿ' ಅಥವಾ ಸ್ಟಿಂಗಿಂಗ್ ನೆಟಲ್ ಎಂಬ ಗಿಡದಿಂದ ಹೊಡೆದಿದ್ದು, ಚರ್ಮಕ್ಕೆ ಬಿದ್ದ ಏಟಿಗೆ ಬಿದ್ದು ಉರುಳಾಡಿದ ಯುವಕರಿಗೆ ಗ್ರಾಮಸ್ಥರು ತಕ್ಕ ಶಾಸ್ತಿಯನ್ನೇ ಮಾಡಿದ್ದಾರೆ ಎಂದು ನೆಟ್ಟಿಗರು ಕಮೆಂಟ್​ ಮಾಡಿದ್ದಾರೆ. ಅಸಲಿಗೆ, ಈ ಸಸಿಯ ಎಲೆಗಳು ಮತ್ತು ಕಾಂಡದ ಮೇಲಿರುವ ಸೂಕ್ಷ್ಮ ರೋಮಗಳು, ಯಾವುದೇ ಚರ್ಮಕ್ಕೆ ತಾಗಿದರೆ ತೀವ್ರ ಉರಿ, ತುರಿಕೆ ದಿಢೀರ್​ ಶುರುವಾಗುತ್ತೆ. ಇದನ್ನೇ ಶಿಕ್ಷೆಗೆ ಸೂಕ್ತ ಎಂದು ತಿಳಿದ ಸ್ಥಳೀಯ ಮಹಿಳೆಯೊಬ್ಬರು, ಈ ಸೊಪ್ಪನ್ನು ಕೈಯಿಂದ ಮುಟ್ಟದೇ ಬಟ್ಟೆಯಿಂದ ಹಿಡಿದು ಕಿರುಕುಳ ನೀಡಿದವರಿಗೆ ಹೊಡೆಯುತ್ತಿರುವುದು ದೃಶ್ಯದಲ್ಲಿ ಸೆರೆಯಾಗಿದೆ. 

ಸತೋಲಿ ಗ್ರಾಮದಲ್ಲಿ ನಡೆದ ಘಟನೆ ಎನ್ನಲಾದ ವಿಡಿಯೋದಲ್ಲಿ ಕಿರುಕುಳಕ್ಕೆ ಒಳಗಾದ ಹೆಣ್ಣುಮಕ್ಕಳು ಅದೇ ಊರಿನವರು ಎನ್ನಲಾಗಿದೆ. ಯುವತಿಯರು ಮತ್ತು ಪುಂಡರ ನಡುವೆ ಮಾತಿನ ಚಕಮಕಿ ಜೋರಾದ ಬೆನ್ನಲ್ಲೇ ಗ್ರಾಮಸ್ಥರು ಸುತ್ತುವರೆದು, ಈ ತುರಿಕೆ ಸೊಪ್ಪಿನಿಂದ ಮನಬಂದಂತೆ ಥಳಿಸಿದ್ದಾರೆ. ಘಟನೆ ಬಗ್ಗೆ ಮಾಹಿತಿ ಪಡೆದ ಪೊಲೀಸರು, ಆರೋಪಿಗಳು ಎಂದು ತೋರಿಸುವ ವೈರಲ್​ ವಿಡಿಯೋಗಳನ್ನು ಸೂಕ್ಷ್ಮವಾಗಿ ಗಮನಿಸಿದ್ದು, ಸೂಕ್ತ ವಿಚಾರಣೆ ನಡೆಸಿ ಕ್ರಮ ಕೈಗೊಳ್ಳುವುದಾಗಿ ಹೇಳಿದ್ದಾರೆ,(ಏಜೆನ್ಸೀಸ್).