4 ದಿನ, ನಾಲ್ಕನೇ ಬಾರಿ... ಹಕ್ಕು ಮಂಡಿಸುವಲ್ಲಿ ಕೊನೆಗೂ 'ಜನ ನಾಯಗನ್​' ಯಶಸ್ವಿ! ನಾಳೆ ಪ್ರಮಾಣವಚನ ಸ್ವೀಕಾರ

TVK Vijay: ಹೊಸ ಸರ್ಕಾರ ರಚನೆಗೆ ಮೂರು ಬಾರಿ ಬಹುಮತ ತೋರಿಸಿ ಎಂದು ತಮಿಳುನಾಡು ಚುನಾವಣೆಯಲ್ಲಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ ಟಿವಿಕೆ ನಾಯಕ ವಿಜಯ್​ರನ್ನು ವಾಪಾಸ್​ ಕಳುಹಿಸಿದ್ದ ರಾಜ್ಯಪಾಲರು, ಕಡೆಗೂ ನಾಲ್ಕನೇ ಭೇಟಿಯಲ್ಲಿ ದಳಪತಿ ಮ್ಯಾಜಿಕ್​ ನಂಬರ್​ ದಾಟಿದ್ದನ್ನು ಸಾಬೀತುಪಡಿಸಿದ ಬೆನ್ನಲ್ಲೇ ಸರ್ಕಾರ ರಚನೆಗೆ ಅಸ್ತು ಎಂದಿದ್ದಾರೆ.

ನಾಳೆ (ಮೇ.10) ಮಧ್ಯಾಹ್ನ 3.15ಕ್ಕೆ ಚೆನ್ನೈನ ನೆಹರು ಸ್ಟೇಡಿಯಂನಲ್ಲಿ ವಿಜಯ್​ ತಮಿಳುನಾಡಿನ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ. ಕಡೆಗೂ ರಾಜ್ಯಪಾಲರ ಎದುರು ಹಕ್ಕು ಮಂಡಿಸಿದ ವಿಜಯ್​ರನ್ನು ನೋಡಿ ಟಿವಿಕೆ ಪಕ್ಷದ ಕಾರ್ಯಕರ್ತರು, ಅಭಿಮಾನಿಗಳು ದಳಪತಿ​ ನಿವಾಸದ ಮುಂದೆ ಕುಣಿದು ಕುಪ್ಪಳಿಸಿದ್ದಾರೆ.

ತಮಿಳುನಾಡಿನ ಚುನಾವಣೆಯಲ್ಲಿ ದಾಖಲೆಯ ಗೆಲ್ಲುವ ನೋಡುವ ಮೂಲಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿರುವ ಟಿವಿಕೆಗೆ ಪಟ್ಟ ಸಿಗಲು ಭಾರೀ ವಿಳಂಬ ಎದುರಾಯಿತು. ಈಗ ರಾಜ್ಯಪಾಲರ ಜೊತೆಗಿನ ನಾಲ್ಕನೇ ಭೇಟಿಯಲ್ಲಿ ಸರ್ಕಾರ ರಚನೆಗೆ ಗ್ರೀನ್​ ಸಿಗ್ನಲ್​ ಪಡೆದಿರುವ ವಿಜಯ್​, ನಾಳೆಯಿಂದಲೇ ತಮಿಳುನಾಡಿನಲ್ಲಿ ತಮ್ಮ ದರ್ಬಾರ್​ ಆರಂಭಿಸಲಿದ್ದಾರೆ. ಇದು ಪಕ್ಷದ ಕಾರ್ಯಕರ್ತರಿಗೆ ದೊಡ್ಡ ಗೆಲುವು ಒಲಿದಂತಾಗಿದೆ. ಕಡೆಗೂ ವಿಜಯ್ ನಂಬರ್​ ಗೇಮ್​ ಕೈಹಿಡಿದಿದೆ. 

ನಾಳೆ ನಡೆಯಲಿರುವ ಪ್ರಮಾಣ ವಚನಕ್ಕೆ 'ಕೈ' ನಾಯಕ ರಾಹುಲ್ ಗಾಂಧಿ ಮತ್ತು ಪಕ್ಷದ ಮುಖ್ಯಸ್ಥ ಮಲ್ಲಿಕಾರ್ಜುನ ಖರ್ಗೆ ಆಗಮಿಸುವ ಸಾಧ್ಯತೆಗಳಿವೆ. ಕಾಂಗ್ರೆಸ್ (5)​, ಎಡ ಪಕ್ಷಗಳಾದ ಸಿಪಿಐ (2), ಸಿಪಿಐ (ಎಂ)- 2, ವಿಸಿಕೆ (2) ಮತ್ತು ಐಯುಎಂಎಲ್​ (2) ತಮ್ಮ ಬೆಂಬಲವನ್ನು ಟಿವಿಕೆಗೆ ನೀಡುವ ಮೂಲಕ ತಮಿಳುನಾಡಿನಲ್ಲಿ ವಿಜಯ್​ ಸಿಎಂ ಆಗಿ ಅಧಿಕಾರದ ಚುಕ್ಕಾಣಿ ಹಿಡಿಯಲು ದೊಡ್ಡ ಕಾರಣವಾಗಿವೆ.