ಟಿವಿಕೆ ದಿಗ್ವಿಜಯಕ್ಕೆ ದಳಪತಿ ಅಷ್ಟೇ ಅಲ್ಲದೇ, ಈ ಐವರು ನಾಯಕರೇ ಗೆಲುವಿನ ಅಸಲಿ ಗೇಮ್ ಚೇಂಜರ್ಸ್! | TVK

TVK: 2026ರ ತಮಿಳುನಾಡು ವಿಧಾನಸಭೆ ಚುನಾವಣೆಯಲ್ಲಿ ಸೂಪರ್ ಸ್ಟಾರ್ ದಳಪತಿ ವಿಜಯ್ ನೇತೃತ್ವದ ತಮಿಳಿಗ ವೆಟ್ರಿ ಕಳಗಂ ಪಕ್ಷವೂ 108 ಸ್ಥಾನಗಳನ್ನು ಪಡೆಯುವ ಮೂಲಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿ ಸರ್ಕಾರ ರಚಿಸಲು ಮುಂದಾಗಿರುವುದು ನಮಗೆಲ್ಲಾ ಗೊತ್ತಿದೆ. ಸಿನಿಮಾ ಹಿನ್ನೆಲೆಯ ವಿಜಯ್ ಅವರ ವರ್ಚಸ್ಸು ಟಿವಿಕೆಯ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದೆ ಎಂಬುದರಲ್ಲಿ ಯಾವುದೇ ಮಾತಿಲ್ಲ. ಆದರೆ ಅದರ ಜೊತೆ ಟಿವಿಕೆಯ ಗೆಲುವಿನ ಹಿಂದೆ ಮತ್ತೊಂದು ತಂಡದ ಪಾತ್ರವೂ ಇದೆ. 

ವಿಜಯ್ ಪಕ್ಷದ ಸೇನಾ ನಾಯಕನಾಗಿ ಮುಂಚೂಣಿಯಲ್ಲಿ ನಿಂತು ಗೆಲುವಿಗೆ ಕಾರಣರಾದ್ರೆ, ಡಿಎಂಕೆ ಮತ್ತು ಎಐಎಡಿಎಂಕೆಯ ಪ್ರಭಾವವನ್ನು ಮುರಿಯಲು ವಿಜಯ್​ಗೆ ಸಹಾಯ ಮಾಡಲು, ಟಿವಿಕೆಯನ್ನು ಸಂಘಟಿಸಲು, ಸೋಷಿಯಲ್ ಮೀಡಿಯಾ ಅಭಿಯಾನ, ಜನರ ಮಧ್ಯ ಸಂದೇಶ ಹರಡಲು ಕೆಲಸ ಮಾಡಿ ಗೆಲುವಿನಲ್ಲಿ ಐವರು ಪ್ರಮುಖ ರೂವಾರಿಗಳ ತಂಡವೊಂದಿದೆ. ಆ ನಾಯಕರ ಸಂಕ್ಷಿಪ್ತ ವಿವರಗಳು ಇಲ್ಲಿವೆ.

ಎನ್​ ಆನಂದ್ ಟಿವಿಕೆಯ ಸಂಘಟನಾ ಕಾರ್ಯದರ್ಶಿ, 2006ರಲ್ಲಿ ಪುದುಚೇರಿಯ ಬುಸ್ಸಿ ಕ್ಷೇತ್ರದಿಂದ ಶಾಸಕರಾದ ನಂತರ  ಅವರನ್ನು ಬುಸ್ಸಿ ಆನಂದ್ ಎಂದು ಕರೆಯಲಾಗುತ್ತಿದೆ. ಇವರು ವಿಜಯ್ ಅವರ ಆನ್-ಗ್ರೌಂಡ್ ಮ್ಯಾನ್ ಆಗಿದ್ದಾರೆ. ವಿಜಯ್ ಅವರನ್ನು 'ದಳಪತಿ' ಎಂದು ಸಂಬೋಧಿಸುವ ಆನಂದ್ ಅವರ ಕಟ್ಟಾ ಅಭಿಮಾನಿಯಾಗಿದ್ದು, ಅವರ ಅಭಿಮಾನಿ ಸಂಘವಾದ ವಿಜಯ್ ಮಕ್ಕಳ್ ಇಯಕ್ಕಂ ಅನ್ನು ಇಂದಿನ ಟಿವಿಕೆ ಆಗಿ ಪರಿವರ್ತಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಈಗ ಅವರು ಟಿ ನಗರ ಕ್ಷೇತ್ರದಿಂದ ಗೆದ್ದಿದ್ದಾರೆ.

ಅನುಭವಿ ನಾಯಕರಾಗಿರುವ ಸೆಂಗೋಟ್ಟೈಯನ್, ಒಂಬತ್ತು ಬಾರಿ ಎಐಎಡಿಎಂಕೆಯಿಂದ ಗೋಬಿಚೆಟ್ಟಿಪಾಳಯಂ ಕ್ಷೇತ್ರದಿಂದ ಗೆದ್ದಿದ್ದಾರೆ. ಎಂಜಿ ರಾಮಚಂದ್ರನ್ ಅವರೊಂದಿಗೆ ನಿಕಟ ಸಂಬಂಧ ಹೊಂದಿದ್ದರು. ಮತ್ತು ಜಯಲಲಿತಾ ಅವರ ಕಟ್ಟಾ ಬೆಂಬಲಿಗರಾಗಿದ್ದರು. ಅವರ ಮರಣದ ನಂತರ ಎಡಪ್ಪಾಡಿ ಕೆ ಪಳನಿಸ್ವಾಮಿ ಜೊತೆಗಿನ ಭಿನ್ನಾಭಿಪ್ರಾಯದಿಂದ 2025ರಲ್ಲಿ ಟಿವಿಕೆ ಸೇರ್ಪಡೆಗೊಂಡರು. ಟಿವಿಕೆ ಮತ್ತು ವಿಜಯ್​ಗೆ ತಮ್ಮ ರಾಜಕೀಯ ಅನುಭವ, ಸಂಘಟನೆಯಲ್ಲಿ ಮಾರ್ಗದರ್ಶನ ಮಾಡಿದ್ದಾರೆ. 

ಅರುಣ್ ರಾಜ್, ಮಾಜಿ ಐಆರ್​ಎಸ್​ ಅಧಿಕಾರಿಯಾಗಿದ್ದು, ವಿಜಯ್ ಅವರ ರಾಜಕೀಯ ಪ್ರಯಾಣದಲ್ಲಿ ಸೇರಲು ಸ್ವಯಂಪ್ರೇರಿತ ನಿವೃತ್ತಿ ಪಡೆದಿದ್ದಾರೆ. ಎಂಬಿಬಿಎಸ್ ಪದವಿ ಪಡೆದಿರುವ ಅವರು ಟಿವಿಕೆಗೆ ಆಡಳಿತಾತ್ಮಕ ಪರಿಣತಿ ರೂಪಿಸಿದವರಾಗಿದ್ದಾರೆ. ಡಿಎಂಕೆಯ ತೀವ್ರ ವಿಮರ್ಶಕರಾಗಿದ್ದ ಅರುಣ್ ಅವರು ಈ ಬಾರಿ ತಿರುಚೆಂಗೋಡ್‌ನಿಂದ ಗೆದ್ದಿದ್ದಾರೆ.

ನಿರ್ಮಲ್ ಕುಮಾರ್, ಟಿವಿಕೆಯ ಡೇಟಾ ಝಾರ್ ಮತ್ತು ಸಾಮಾಜಿಕ ಮಾಧ್ಯಮ ತಜ್ಞರಾಗಿದ್ದಾರೆ. 2025ರಲ್ಲಿ ಟಿವಿಕೆಗೆ ಸೇರುವ ಮೊದಲು ಬಿಜೆಪಿಯಲ್ಲಿದ್ದರು. ಆಗಿನ ಬಿಜೆಪಿ ರಾಜ್ಯ ಮುಖ್ಯಸ್ಥ ಅಣ್ಣಾಮಲೈ ಅವರೊಂದಿಗೆ ಭಿನ್ನಾಭಿಪ್ರಾಯದಿಂದ ಬಿಜೆಪಿಯನ್ನು ತೊರೆದು ಎಐಎಡಿಎಂಕೆ ಸೇರಿದ್ದರು. ಬಳಿಕ ಟಿವಿಕೆ ಸೇರಿದ್ದಾರೆ.

ಟಿವಿಕೆಯಲ್ಲಿ ನಿರ್ಮಲ್ ಕುಮಾರ್ ಸಮೀಕ್ಷೆಗಳು, ಮತದಾರರ ದತ್ತಾಂಶ ಮತ್ತು ಬೂತ್ ಮಟ್ಟದ ವಿಶ್ಲೇಷಣೆಯ ಮೇಲೆ ಕೆಲಸ ಮಾಡಿದ್ದಾರೆ. ಟಿವಿಕೆ ಚುನಾವಣೆಯಲ್ಲಿ ಶೇ. 30% ಮತಗಳನ್ನು ಪಡೆಯುತ್ತೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದರು. ಆದರೆ ಟಿವಿಕೆ ಅವರೇಳಿದ್ದಕ್ಕಿಂದ ಹೆಚ್ಚು ಅಂದ್ರೆ, ಶೇ. 35ರಷ್ಟು ಪಡೆದಿದೆ. ಈ ಬಾರಿ ತಿರುಪರನಕುಂದ್ರಂನಿಂದ ಗೆದ್ದಿದ್ದಾರೆ.

ಆಧವ್ ಅರ್ಜುನ್, ಟಿವಿಕೆಯ ಅತ್ಯಂತ ಪ್ರಮುಖ ನಾಯಕರಲ್ಲಿ ಒಬ್ಬರು. ಭಾರತದ ಲಾಟರಿ ರಾಜ ಎಂದು ಕರೆಯಲ್ಪಡುವ ಸ್ಯಾಂಟಿಯಾಗೊ ಮಾರ್ಟಿನ್ ಅವರ ಅಳಿಯ ಆಗಿದ್ದಾರೆ. ಅವರು ತಮ್ಮ ರಾಜಕೀಯ ಸಲಹಾ ಸಂಸ್ಥೆ ವಾಯ್ಸ್ ಆಫ್ ಕಾಮನ್ಸ್ ಅನ್ನು ಪ್ರಾರಂಭಿಸುವ ರಾಜಕೀಯ ಆರಂಭಿಸಿದ್ದರು. ಆರಂಭದಲ್ಲಿ 2021ರಲ್ಲಿ ಡಿಎಂಕೆ ಸೇರಿದ್ದರು. ಬಳಿಕ ವಿಸಿಕೆ ಸೇರ್ಪಡೆಗೊಂಡಿದ್ದರು. ಟಿವಿಕೆಗೆ ನಿರೂಪಣಾ ಕೌಶಲ್ಯವನ್ನು ನೀಡಿದವರು. ವಿಲ್ಲಿವಕ್ಕಂನಿಂದ ಗೆದ್ದಿದ್ದಾರೆ (ಏಜೆನ್ಸೀಸ್).