ದೇಶ

ವಿಜಯ್‌ಗೆ ದಿನಕರನ್ ‘ಚೆಕ್-ಮೇಟ್’: ಸಿಎಂ ಗಾದಿಯ ಅಂಚಿನಲ್ಲಿ ದಳಪತಿಗೆ ಬಿಗ್ ಶಾಕ್! Thalapathy Vijay

Thalapathy Vijay (ಚಿತ್ರ X)
Thalapathy Vijay (ಚಿತ್ರ X)
ಭಾನುಪ್ರಿಯ ಡಿ.ಕೆ
Published on: 

ಪ್ರಮುಖ ಮುಖ್ಯಾಂಶಗಳು

  • ತಮಿಳುನಾಡು ರಾಜಕೀಯದಲ್ಲಿ ಕಳೆದ ಕೆಲವು ದಿನಗಳಿಂದ ನಡೆಯುತ್ತಿರುವ ಬೆಳವಣಿಗೆಗಳು ರೋಚಕ ತಿರುವು ಪಡೆದುಕೊಂಡಿವೆ
  • ವಿಜಯ್ (Thalapathy Vijay) ಸರ್ಕಾರ ರಚಿಸಲು ಅಗತ್ಯವಾದ ಸಂಖ್ಯಾಬಲವನ್ನು ಸಾಬೀತುಪಡಿಸಲು ವಿಫಲರಾಗಿದ್ದಾರೆ
  • ಮೂರು ದಿನಗಳಲ್ಲಿ ಮೂರನೇ ಬಾರಿಗೆ ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಅವರನ್ನು ಭೇಟಿಯಾದ ವಿಜಯ್
  • , ಯಾವುದೇ ಸಕಾರಾತ್ಮಕ ಫಲಿತಾಂಶವಿಲ್ಲದೆ ನಿರಾಶೆಯಿಂದ ರಾಜಭವನದಿಂದ ಹೊರಬಂದ ವಿಜಯ್
ಚೆನ್ನೈ: ತಮಿಳುನಾಡು ರಾಜಕೀಯದಲ್ಲಿ ಕಳೆದ ಕೆಲವು ದಿನಗಳಿಂದ ನಡೆಯುತ್ತಿರುವ ನಾಟಕೀಯ ಬೆಳವಣಿಗೆಗಳು ಶುಕ್ರವಾರ ರಾತ್ರಿ ಮತ್ತೊಂದು ರೋಚಕ ತಿರುವು ಪಡೆದುಕೊಂಡಿವೆ. ಸಸ್ಪೆನ್ಸ್ ಥ್ರಿಲ್ಲರ್ ಚಿತ್ರದ ಸನ್ನಿವೇಶಗಳನ್ನು ನೆನಪಿಸುವಂತೆ, ವಿಜಯ್ (Thalapathy Vijay) ಸರ್ಕಾರ ರಚಿಸಲು ಅಗತ್ಯವಾದ ಸಂಖ್ಯಾಬಲವನ್ನು ಸಾಬೀತುಪಡಿಸಲು ವಿಫಲರಾಗಿದ್ದಾರೆ. ಮೂರು ದಿನಗಳಲ್ಲಿ ಮೂರನೇ ಬಾರಿಗೆ ರಾಜ್ಯಪಾಲ ರಾಜೇಂದ್ರ ಅರ್ಲೇಕರ್ ಅವರನ್ನು ಭೇಟಿಯಾದ ವಿಜಯ್, ಯಾವುದೇ ಸಕಾರಾತ್ಮಕ ಫಲಿತಾಂಶವಿಲ್ಲದೆ ನಿರಾಶೆಯಿಂದ ರಾಜಭವನದಿಂದ ಹೊರಬಂದಿರುವುದು ರಾಜ್ಯ ರಾಜಕಾರಣದಲ್ಲಿ ತಲ್ಲಣ ಮೂಡಿಸಿದೆ.
ಎಎಂಎಂಕೆಯ ಏಕೈಕ ಶಾಸಕ ಎಸ್. ಕಾಮರಾಜ್ ಟಿವಿಕೆಗೆ ಬೆಂಬಲ ನೀಡಿದ್ದಾರೆ ಎಂಬ ಸುದ್ಧಿ ಹರಡಿತ್ತು. ಆದರೆ, ಕೆಲವೇ ಗಂಟೆಗಳಲ್ಲಿ ಕಾಮರಾಜ್ ಅಂತಹ ಯಾವುದೇ ಅಧಿಕೃತ ಬೆಂಬಲ ಪತ್ರಕ್ಕೆ ಸಹಿ ಹಾಕಿಲ್ಲ ಅಥವಾ ಮೈತ್ರಿ ಮಾತುಕತೆ ಇನ್ನೂ ಅಂತಿಮವಾಗಿಲ್ಲ ಎಂದು ಮೂಲಗಳು ತಿಳಿಸಿದವು.
ಆದಾಗ್ಯೂ, ಟಿವಿಕೆ ಕಾಮರಾಜ್​ ಅವರ ಬೆಂಬಲವನ್ನು ಪ್ರದರ್ಶಿಸುತ್ತಿದ್ದರೆ, ಎಎಂಎಂಕೆ ಇದು "ಸೃಷ್ಟಿಸಿದ ಸುಳ್ಳು ದಾಖಲೆ" ಎಂದು ವಾದಿಸುತ್ತಿದೆ. ಅಧಿಕಾರಕ್ಕಾಗಿ ನಮ್ಮ ಶಾಸಕರ ಹೆಸರನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ರಾಜ್ಯಪಾಲರಿಗೆ ದೂರು ಸಲ್ಲಿಸಿದ್ದಾರೆ.

ಜಟಿಲವಾದ ಸಂಖ್ಯೆಗಳ ಆಟ!

234 ಸದಸ್ಯ ಬಲದ ತಮಿಳುನಾಡು ವಿಧಾನಸಭೆಯಲ್ಲಿ ಟಿವಿಕೆ 108 ಸ್ಥಾನಗಳನ್ನು ಗಳಿಸಿದ್ದು, ಕಾಂಗ್ರೆಸ್‌ನ 5 ಶಾಸಕರು ಬೆಂಬಲ ನೀಡಲು ಮುಂದಾಗಿದ್ದಾರೆ. ಆದಾಗ್ಯೂ, ಬಹುಮತಕ್ಕೆ 118 ಸ್ಥಾನಗಳನ್ನು ತಲುಪಲು ಪಕ್ಷಕ್ಕೆ 6 ಶಾಸಕರ ಬೆಂಬಲ ಬೇಕಾಗುತ್ತದೆ. ಏಕೆಂದರೆ, ವಿಜಯ್​ ಗೆದ್ದ ಎರಡು ಕ್ಷೇತ್ರಗಳಲ್ಲಿ ಒಂದನ್ನು ಬಿಡಬೇಕಾಗುತ್ತದೆ.
ಟಿವಿಕೆಗೆ ಬೆಂಬಲ ನೀಡುವಂತೆ ವಿಜಯ್ ವಿಸಿಕೆ, ಎಎಂಎಂಕೆ ಮತ್ತು ಐಯುಎಂಎಲ್ ಶಾಸಕರನ್ನು ಸಂಪರ್ಕಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಆದಾಗ್ಯೂ, ರಾಜ್ಯಪಾಲರೊಂದಿಗೆ ಸಭೆ ನಡೆಸುವಾಗ ಅವರಿಗೆ ಅಗತ್ಯವಿರುವ ಸಂಖ್ಯೆಗಳನ್ನು ಪಡೆಯಲು ಸಾಧ್ಯವಾಗಲಿಲ್ಲ. ಪ್ರಸ್ತುತ ಪಕ್ಷದ ಬಲ 116 ಶಾಸಕರಾಗಿದ್ದು, ಬಹುಮತಕ್ಕೆ ಇಬ್ಬರು ಶಾಸಕರ ಕೊರತೆಯಿದ್ದು, ಎಎಂಎಂಕೆ ಶಾಸಕರು ಸಹ ಹಿಂದೆ ಸರಿಯುವುದರಿಂದ ಸಂಖ್ಯೆ 115 ಕ್ಕೆ ಇಳಿದಿದೆ.

ಟಿವಿಕೆ ವಾದಕ್ಕೆ ಸಾಕ್ಷ್ಯದ ಕೊರತೆ!

ಲೋಕ ಭವನದಲ್ಲಿ ವಿಜಯ್ ಮತ್ತೊಮ್ಮೆ ರಾಜ್ಯಪಾಲರನ್ನು ಭೇಟಿಯಾಗಿ, ತಮ್ಮ ಪಕ್ಷಕ್ಕೆ ಎಎಂಎಂಕೆಯ ಶಾಸಕ ಕಾಮರಾಜ್ ಬೆಂಬಲ ಇದೆ ಎಂದು ಹೇಳಿಕೊಂಡಿದ್ದರು. ಈ ವಿಚಾರ ರಾಜಕೀಯದಲ್ಲಿ ಭಾರೀ ಸಂಚಲನ ಮೂಡಿಸಿತ್ತು. ಶೀಘ್ರದಲ್ಲೇ, ಟಿಟಿವಿ ದಿನಕರನ್ ರಾಜಭವನಕ್ಕೆ ಧಾವಿಸಿ, ರಾಜ್ಯಪಾಲರನ್ನು ಭೇಟಿಯಾಗಿ ತಮ್ಮ ಪಕ್ಷದ ನಾಯಕರು ಕಾಣೆಯಾಗಿದ್ದಾರೆ ಎಂದು ಆರೋಪ ಮಾಡಿದ್ದು, ಪಕ್ಷದ ನಿಲುವಿಗೆ ಕಾಮರಾಜ್ ಎಐಎಡಿಎಂಕೆಗೆ ತಮ್ಮ ಬೆಂಬಲವನ್ನು ಸೂಚಿಸುವ ಪತ್ರವನ್ನು ಹೊಂದಿದ್ದಾರೆ ಎಂದರು.

ಕಾಮರಾಜ್ ಒಪ್ಪಿಗೆಯ ವಿಡಿಯೋ ಬಿಡುಗಡೆ ಮಾಡಿದ ಟಿವಿಕೆ
ಇಷ್ಟೆಲ್ಲಾ ಆರೋಪಗಳು ಕೇಳಿಬಂದ ನಂತರ ಟಿವಿಕೆ ವಿಡಿಯೋವೊಂದನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ ಶಾಸಕ ಎಸ್. ಕಾಮರಾಜ್ ಅವರೇ ಕಾಣಿಸಿಕೊಂಡಿದ್ದು, ತಾವೇ ಸ್ವತಃ ಬೆಂಬಲ ಪತ್ರವನ್ನು ಬರೆಯುತ್ತಿರುವುದು ಮತ್ತು ವಿಜಯ್​ಗೆ ಬೆಂಬಲ ನೀಡುವುದರ ಬಗ್ಗೆ ಮಾತನಾಡುತ್ತಿರುವುದು ಕಂಡುಬಂದಿದೆ. ಆದರೆ, ದಿನಕರನ್ ಆ ವಿಡಿಯೋವನ್ನು ನಕಲಿ ಎಂದು ತಳ್ಳಿಹಾಕಿದ್ದು, ಈ ವಿಷಯ ತನಿಖೆಯಲ್ಲಿದೆ ಎಂದು ಸಮರ್ಥಿಸಿಕೊಂಡಿದ್ದಾರೆ.

ತಮಿಳುನಾಡು ರಾಜಕೀಯದ ಸಾರಾಂಶ

ವಿಜಯ್ ಅವರು ಮುಖ್ಯಮಂತ್ರಿ ಹುದ್ದೆಗೆ ಅತ್ಯಂತ ಹತ್ತಿರದಲ್ಲಿದ್ದರೂ, ಈ "ಸಹಿಯ ವಿವಾದ" ಮತ್ತು "ರೆಸಾರ್ಟ್ ರಾಜಕೀಯ" ಅವರ ಹಾದಿಯನ್ನು ಮುಳ್ಳಿನ ಹಾದಿಯನ್ನಾಗಿ ಮಾಡಿದೆ. ಶನಿವಾರದ ಅಂತ್ಯದ ವೇಳೆಗೆ ವಿಸಿಕೆ ಪತ್ರ ಸಲ್ಲಿಸಿದರೆ ಮಾತ್ರ ವಿಜಯ್ ಅವರ ಪ್ರಮಾಣವಚನದ ಹಾದಿ ಸುಗಮವಾಗಲಿದೆ. ಅಲ್ಲಿಯವರೆಗೂ ತಮಿಳುನಾಡಿನಲ್ಲಿ "ಯಾರು ಸಿಎಂ?" ಎಂಬ ಸಸ್ಪೆನ್ಸ್ ಮುಂದುವರಿಯಲಿದೆ (ಏಜೆನ್ಸೀಸ್​).
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net