ಟ್ರಂಪ್ ಸುಂಕದ ಬರೆ!; ಭಾರತದ ರಫ್ತು ಉದ್ಯಮಕ್ಕೆ ಶೇ. 12.5 ಟ್ಯಾರಿಫ್​ ಭೀತಿ! ಇದು ಅಂತಿಮ ತೀರ್ಪಲ್ಲ ಎಂದು ಭಾರತ ಖಡಕ್ ಕೌಂಟರ್! US- India Tariff War

ಭಾರತ ಸೇರಿದಂತೆ ಚೀನಾ, ಜಪಾನ್ ಮತ್ತು ಬ್ರಿಟನ್ ಒಳಗೊಂಡಂತೆ ಒಟ್ಟು 54 ದೇಶಗಳ ಮೇಲೆ ಈ ಸುಂಕದ ಕತ್ತಿ ನೇತಾಡುತ್ತಿದೆ. ಇತ್ತ ಭಾರತೀಯ ಸಂಧಾನಕಾರರು ಅಮೆರಿಕಾದೊಂದಿಗೆ ಮಹತ್ವದ ವಾಣಿಜ್ಯ ಮಾತುಕತೆಯಲ್ಲಿ ನಿರತರಾಗಿರುವಾಗಲೇ ವಾಷಿಂಗ್ಟನ್ ಈ ಪ್ರಕಟಣೆ ಹೊರಡಿಸಿರುವುದು ಭಾರತಕ್ಕೆ ಭಾರಿ ಆಘಾತ ನೀಡಿದೆ.

ಅಮೆರಿಕದ ವ್ಯಾಪಾರ ಪ್ರತಿನಿಧಿ (USTR) ಕಚೇರಿ ನೀಡಿರುವ ವರದಿಯ ಪ್ರಕಾರ, ಭಾರತ ಸೇರಿದಂತೆ ೫೪ ದೇಶಗಳು ತಮ್ಮ ಮಣ್ಣಿನಲ್ಲಿ ಬಲವಂತದ ಕಾರ್ಮಿಕ ಪದ್ಧತಿಯಿಂದ ಉತ್ಪಾದನೆಯಾಗುವ ಸರಕುಗಳ ಆಮದು ಮತ್ತು ಬಳಕೆಯನ್ನು ಸಂಪೂರ್ಣವಾಗಿ ಕಾನೂನುಬದ್ಧವಾಗಿ ನಿಷೇಧಿಸಲು ವಿಫಲವಾಗಿವೆ.

ಅಮೆರಿಕದ ಈ ಆಕ್ರಮಣಕಾರಿ ನಡೆಯ ವಿರುದ್ಧ ಭಾರತದ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ತಕ್ಷಣವೇ ಪ್ರತಿಕ್ರಿಯಿಸಿದೆ. ಅಮೆರಿಕ ಪ್ರಸ್ತಾಪಿಸಿರುವ ಸುಂಕಗಳು ಇನ್ನು ಅಂತಿಮಗೊಂಡಿಲ್ಲ. ಸೆಕ್ಷನ್ 301 ರ ಪ್ರಕ್ರಿಯೆಯ ಭಾಗವಾಗಿ ಭಾರತವು ಅಮೆರಿಕದೊಂದಿಗೆ ನಿರಂತರ ಸಂಪರ್ಕದಲ್ಲಿದೆ. 2026ರ ಫೆಬ್ರವರಿ 2ರಂದು ಪ್ರಕಟಿಸಲಾದ ಮತ್ತು ಫೆಬ್ರವರಿ 7ರ ಜಂಟಿ ಹೇಳಿಕೆಗೆ ಅನುಗುಣವಾಗಿ ಉಭಯ ದೇಶಗಳ ನಡುವೆ ಫ್ರೇಮ್‌ವರ್ಕ್ ಒಪ್ಪಂದವನ್ನು ಅಂತಿಮಗೊಳಿಸಲು ಭಾರತ ಸತತವಾಗಿ ಶ್ರಮಿಸುತ್ತಿದೆ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.

ಇದೊಂದು ಪ್ರಸ್ತಾಪ ಮಾತ್ರವಾಗಿದ್ದು, ಸಂಬಂಧಪಟ್ಟ ಉದ್ಯಮಿಗಳು ಮತ್ತು ಸ್ಟೇಕ್‌ಹೋಲ್ಡರ್‌ಗಳು 2026ರ ಜೂನ್ 22 ರೊಳಗೆ ಸಾರ್ವಜನಿಕ ವಿಚಾರಣೆಯಲ್ಲಿ ಭಾಗವಹಿಸಲು ವಿನಂತಿಸಬಹುದು. ಲಿಖಿತ ಆಕ್ಷೇಪಣೆಗಳನ್ನು ಸಲ್ಲಿಸಲು ಜುಲೈ 6 ರವರೆಗೆ ಕಾಲಾವಕಾಶವಿದೆ. ಜುಲೈ 7 ರಂದು ನಡೆಯಲಿರುವ ಸಾರ್ವಜನಿಕ ವಿಚಾರಣೆಯ ನಂತರವಷ್ಟೇ ಅಮೆರಿಕ ಅಂತಿಮ ನಿರ್ಧಾರ ತೆಗೆದುಕೊಳ್ಳಲಿದೆ. ಜುಲೈ 24 ರಂದು ಪ್ರಸ್ತುತ ಜಾರಿಯಲ್ಲಿರುವ ಶೇ. 10 ರಷ್ಟು ಜಾಗತಿಕ ಸುಂಕದ ಗಡುವು ಮುಗಿಯಲಿದ್ದು, ಅದಕ್ಕೂ ಮುನ್ನ ಈ ಹೊಸ ಸುಂಕ ಜಾರಿಗೆ ಬರುವ ಸಾಧ್ಯತೆಯಿದೆ.

ರಕ್ಷಣಾ ಮತ್ತು ಆರ್ಥಿಕ ತಜ್ಞರ ಪ್ರಕಾರ, ಅಮೆರಿಕಾ ಬಳಸುತ್ತಿರುವ ‘ಸೆಕ್ಷನ್ 301’ ಕಾಯ್ದೆಯು ಪವರ್‌ಫುಲ್ ಆಯುಧವಾಗಿದೆ. ಡೊನಾಲ್ಡ್ ಟ್ರಂಪ್ ಆಡಳಿತವು ಈ ಹಿಂದೆ ಬಳಸಿದ್ದ ಸುಂಕದ ಒಪ್ಪಂದಗಳನ್ನು ಅಮೆರಿಕದ ಸುಪ್ರೀಂಕೋರ್ಟ್ ಕಳೆದ ಫೆಬ್ರವರಿಯಲ್ಲಿ ವಜಾಗೊಳಿಸಿದ ನಂತರ, ಈಗ ಈ ಹೊಸ ಕಾನೂನಿನ ಅಡಿಯಲ್ಲಿ ಹೊಸ ಒಪ್ಪಂದಗಳಿಗೆ ಕಾನೂನುಬದ್ಧ ಮುದ್ರೆ ಒತ್ತಲು ಅಮೆರಿಕ ಮುಂದಾಗಿದೆ.

ಅತಿ ದೊಡ್ಡ ಆತಂಕದ ವಿಷಯವೆಂದರೆ, ಅಮೆರಿಕ ಮಾರ್ಚ್ ತಿಂಗಳಿನಲ್ಲಿ ಎರಡು ವಿಭಿನ್ನ ವಿಭಾಗಗಳ ಅಡಿಯಲ್ಲಿ ತನಿಖೆ ಆರಂಭಿಸಿತ್ತು. ಮೊದಲನೆಯದು ಬಲವಂತದ ಕಾರ್ಮಿಕ ಪದ್ಧತಿ (60 ದೇಶಗಳ ವಿರುದ್ಧ) ಮತ್ತು ಎರಡನೆಯದು ಹೆಚ್ಚುವರಿ ಉತ್ಪಾದನಾ ಸಾಮರ್ಥ್ಯ. ಭಾರತವು ಈ ಎರಡೂ ಕಪ್ಪು ಪಟ್ಟಿಗಳಲ್ಲಿ ಸ್ಥಾನ ಪಡೆದಿದೆ. ಇದರ ಅರ್ಥ, ಸದ್ಯ ಪ್ರಕಟಿಸಲಾಗಿರುವ ಶೇ. 12.5 ಸುಂಕದ ಮೇಲಿಂದ ಭಾರತದ ಮೇಲೆ ಮತ್ತೊಂದು ಸುಂಕದ ದಾಳಿ ನಡೆಯುವ ಸಾಧ್ಯತೆ ದಟ್ಟವಾಗಿದೆ.

ಹಿನ್ರಿಚ್ ಫೌಂಡೇಶನ್‌ನ ವ್ಯಾಪಾರ ನೀತಿ ಮುಖ್ಯಸ್ಥರಾದ ಡೆಬೊರಾ ಎಲ್ಮ್ಸ್ ಅವರ ಪ್ರಕಾರ, ಸೆಕ್ಷನ್ 301 ರ ಅಡಿಯಲ್ಲಿ ಅಮೆರಿಕ ಅಧ್ಯಕ್ಷರಿಗೆ ಗರಿಷ್ಠ ಅಧಿಕಾರ ಸಿಗಲಿದ್ದು, ಕೋರ್ಟ್‌ಗಳು ಕೂಡ ಇದರಲ್ಲಿ ಹಸ್ತಕ್ಷೇಪ ಮಾಡುವುದು ಕಷ್ಟ. ಪ್ರಸ್ತುತ ನಡೆಯುತ್ತಿರುವ 4 ದಿನಗಳ ಭಾರತ-ಯುಎಸ್ ಮಾತುಕತೆಯಲ್ಲಿ ಭಾರತ ತನ್ನ ಹಿತರಕ್ಷಣೆಯನ್ನು ಹೇಗೆ ಕಾಯ್ದುಕೊಳ್ಳಲಿದೆ ಎಂಬುದರ ಮೇಲೆ ದೇಶದ ರಫ್ತು ಉದ್ಯಮದ ಭವಿಷ್ಯ ನಿಂತಿದೆ,(ಏಜೆನ್ಸೀಸ್​).