ಭಾರತದಲ್ಲೂ ಟ್ರಂಪ್ ಜನಪ್ರಿಯತೆ ಕುಸಿತ; ಕೇವಲ 39% ಜನರಿಗೆ ಮಾತ್ರ ವಿಶ್ವಾಸ: ಪ್ಯೂ ಸಮೀಕ್ಷೆ

ಕಳೆದ 20 ವರ್ಷಗಳಿಂದ ಅಮೆರಿಕದ ಬಗ್ಗೆ ಜಾಗತಿಕ ಸಾರ್ವಜನಿಕ ಅಭಿಪ್ರಾಯವನ್ನು ಅಧ್ಯಯನ ಮಾಡುತ್ತಿರುವ ಪ್ಯೂ ಸಂಶೋಧನಾ ಕೇಂದ್ರವು ಈ ಬಾರಿ 36 ದೇಶಗಳಲ್ಲಿ ಸಮೀಕ್ಷೆ ನಡೆಸಿದೆ. ಸಮೀಕ್ಷೆಯ ಪ್ರಕಾರ, ಟ್ರಂಪ್ ಅವರ ವಿದೇಶಾಂಗ ನೀತಿ ಮತ್ತು ಜಾಗತಿಕ ವಿಚಾರಗಳನ್ನು ನಿರ್ವಹಿಸುವ ಕ್ರಮಕ್ಕೆ ಹೆಚ್ಚಿನ ದೇಶಗಳಲ್ಲಿ ಬೆಂಬಲ ಸಿಗಲಿಲ್ಲ. ವಿಶೇಷವಾಗಿ ಇರಾನ್ ವಿಷಯವನ್ನು ಟ್ರಂಪ್ ನಿರ್ವಹಿಸಿದ ರೀತಿಯನ್ನು ಸಮೀಕ್ಷೆಯಲ್ಲಿ ಭಾಗವಹಿಸಿದವರಲ್ಲಿ ಶೇಕಡಾ 74 ಮಂದಿ ಒಪ್ಪಿಲ್ಲ.

ಟ್ರಂಪ್ ಅವರ ಸುಂಕ (ಟ್ಯಾರಿಫ್) ನೀತಿಗೂ ಹಲವು ದೇಶಗಳಲ್ಲಿ ವಿರೋಧ ವ್ಯಕ್ತವಾಗಿದೆ. ಭಾರತದಲ್ಲಿ ಕೇವಲ 18 ಶೇಕಡ ಜನರು ಮಾತ್ರ ಟ್ರಂಪ್ ಅವರ ವ್ಯಾಪಾರ ನೀತಿಯನ್ನು ಬೆಂಬಲಿಸಿದ್ದಾರೆ. ಯುಕೆಯಲ್ಲಿ ಇದು 27 ಶೇಕಡ, ಕೆನಡಾದಲ್ಲಿ 17 ಶೇಕಡ, ಜಪಾನ್‌ನಲ್ಲಿ 15 ಶೇಕಡ, ದಕ್ಷಿಣ ಕೊರಿಯಾದಲ್ಲಿ 14 ಶೇಕಡ, ಮೆಕ್ಸಿಕೊದಲ್ಲಿ 11 ಶೇಕಡ ಹಾಗೂ ಜರ್ಮನಿಯಲ್ಲಿ ಕೇವಲ 8 ಶೇಕಡ ಜನರು ಮಾತ್ರ ಬೆಂಬಲ ವ್ಯಕ್ತಪಡಿಸಿದ್ದಾರೆ. ಇದಕ್ಕೆ ವಿರುದ್ಧವಾಗಿ, ಇಸ್ರೇಲ್‌ನಲ್ಲಿ ಅಮೆರಿಕದ ಬಗ್ಗೆ 81 ಶೇಕಡದಷ್ಟು ಅನುಕೂಲಕರ ಅಭಿಪ್ರಾಯ ದಾಖಲಾಗಿದೆ. ಕೆಲವು ಆಫ್ರಿಕಾ ರಾಷ್ಟ್ರಗಳಲ್ಲೂ ಅಮೆರಿಕದ ಇಮೇಜ್ ಉತ್ತಮವಾಗಿದೆ ಎಂದು ವರದಿ ತಿಳಿಸಿದೆ.

ಭಾರತದಲ್ಲಿ 2025ರಲ್ಲಿ ಟ್ರಂಪ್ ಮೇಲೆ 51 ಶೇಕಡ ಜನರು ವಿಶ್ವಾಸ ಹೊಂದಿದ್ದರು. ಆದರೆ 2026ರ ಸಮೀಕ್ಷೆಯಲ್ಲಿ ಈ ಪ್ರಮಾಣ 39 ಶೇಕಡಕ್ಕೆ ಇಳಿದಿದೆ. ಜಾಗತಿಕ ಮಟ್ಟದಲ್ಲಿಯೂ ಅಮೆರಿಕದ ವಿಶ್ವಾಸಾರ್ಹತೆ ಕೆಲವು ದೇಶಗಳಲ್ಲಿ ಕುಸಿದಿದೆ. ವಿಶೇಷವಾಗಿ ಕೆನಡಾದಲ್ಲಿ ಈ ಬದಲಾವಣೆ ಹೆಚ್ಚು ಕಂಡುಬಂದಿದೆ. ಮಾಜಿ ಅಧ್ಯಕ್ಷ ಜೋ ಬೈಡನ್ ಅವಧಿಯಲ್ಲಿ ಅಮೆರಿಕವನ್ನು ವಿಶ್ವಾಸಾರ್ಹ ಮಿತ್ರ ರಾಷ್ಟ್ರ ಎಂದು 83 ಶೇಕಡ ಕೆನಡಿಯನ್ನರು ಭಾವಿಸಿದ್ದರು. ಈಗ ಈ ಪ್ರಮಾಣ 35 ಶೇಕಡಕ್ಕೆ ಇಳಿದಿದೆ.

ಯುರೋಪಿನ ಫ್ರಾನ್ಸ್, ಜರ್ಮನಿ, ಸ್ವೀಡನ್, ನೆದರ್ಲ್ಯಾಂಡ್ಸ್ ಮತ್ತು ಇಟಲಿಯಂತಹ ದೇಶಗಳಲ್ಲಿಯೂ ಟ್ರಂಪ್ ಬಗ್ಗೆ ಬಹುತೇಕ ಜನರು ನಕಾರಾತ್ಮಕ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಜರ್ಮನಿಯಲ್ಲಿ ಅಮೆರಿಕದ ಮೇಲಿನ ವಿಶ್ವಾಸ 83 ಶೇಕಡದಿಂದ 39 ಶೇಕಡಕ್ಕೆ ಹಾಗೂ ಸ್ವೀಡನ್‌ನಲ್ಲಿ 83 ಶೇಕಡದಿಂದ 31 ಶೇಕಡಕ್ಕೆ ಕುಸಿದಿದೆ.

ಅಮೆರಿಕದಲ್ಲಿಯೂ ಟ್ರಂಪ್ ಅವರ ಜನಪ್ರಿಯತೆ ಹೆಚ್ಚಿಲ್ಲ ಎಂದು ವರದಿ ತಿಳಿಸಿದೆ. ನೇಟ್ ಸಿಲ್ವರ್ ಅವರ ಮತದಾನ ವಿಶ್ಲೇಷಣೆಯ ಪ್ರಕಾರ, ಟ್ರಂಪ್ ಅವರ ನಿವ್ವಳ ಅನುಮೋದನೆ ಪ್ರಮಾಣ ಮೊದಲ ಅವಧಿಯ ಇದೇ ಹಂತಕ್ಕಿಂತ ಕಡಿಮೆಯಾಗಿದೆ. ಒಂದು ಸಮೀಕ್ಷೆಯಲ್ಲಿ ಅವರ ಅನುಮೋದನೆ ಪ್ರಮಾಣ ಕೇವಲ 30 ಶೇಕಡಕ್ಕೆ ಇಳಿದಿದೆ. ಆರ್ಥಿಕ ನಿರ್ವಹಣೆಯ ವಿಷಯದಲ್ಲಿಯೂ ಕೇವಲ 26 ಶೇಕಡ ಜನರು ಮಾತ್ರ ತೃಪ್ತಿ ವ್ಯಕ್ತಪಡಿಸಿದ್ದು, 70 ಶೇಕಡ ಜನರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಆದಾಗ್ಯೂ, ಅಮೆರಿಕ ಇನ್ನೂ ವಿಶ್ವದ ಅತಿದೊಡ್ಡ ಆರ್ಥಿಕ ಶಕ್ತಿಯಾಗಿಯೂ, ಬಲಿಷ್ಠ ಮಿಲಿಟರಿ ಮತ್ತು ಜಾಗತಿಕ ಮೈತ್ರಿಕೂಟಗಳನ್ನು ಹೊಂದಿದ ರಾಷ್ಟ್ರವಾಗಿಯೂ ಮುಂದುವರಿದಿದೆ. ಆದರೆ ಜಾಗತಿಕ ಶಕ್ತಿ ಹೊಂದಿರುವುದಕ್ಕೂ ಜನಪ್ರಿಯತೆ ಹೊಂದಿರುವುದಕ್ಕೂ ವ್ಯತ್ಯಾಸವಿದೆ ಎಂಬುದನ್ನು ಈ ಸಮೀಕ್ಷೆ ಸ್ಪಷ್ಟಪಡಿಸಿದೆ,(ಏಜೆನ್ಸೀಸ್​).