ಗೊಂದಲಕ್ಕೆ ತೆರೆ ಎಳೆದ ಥಾಯ್ಲೆಂಡ್ ಸರ್ಕಾರ: ಭಾರತೀಯ ಪ್ರವಾಸಿಗರಿಗೆ ಇಲ್ಲಿದೆ ಗುಡ್​ ನ್ಯೂಸ್​...Indian Tourists

Indian Tourists : ಸುಂದರ ಕಡಲತೀರಗಳು, ಸಾಂಸ್ಕೃತಿಕ ಶ್ರೀಮಂತಿಕೆ ಹಾಗೂ ರೋಮಾಂಚಕ ನೈಟ್‌ಲೈಫ್‌ಗೆ ಹೆಸರಾಗಿರುವ ಪ್ರವಾಸಿಗರ ಸ್ವರ್ಗ ಥಾಯ್ಲೆಂಡ್​ಗೆ​ ಪ್ರವಾಸ ಹೋಗಬೇಕೆಂದು ಬಯಸುವ ಭಾರತೀಯರಿಗೆ ಇಲ್ಲಿದೆ ಒಂದು ಅತ್ಯಂತ ಸಿಹಿ ಸುದ್ದಿ! ಕಳೆದ ಕೆಲವು ತಿಂಗಳುಗಳಿಂದ ವೀಸಾ ನಿಯಮಗಳ ಗೊಂದಲದಿಂದಾಗಿ ಥಾಯ್ಲೆಂಡ್​ ಪ್ರವಾಸವನ್ನು ಮುಂದೂಡುತ್ತಿದ್ದ ಪ್ರವಾಸಿಗರಿಗೆ ಅಲ್ಲಿನ ಸರ್ಕಾರ ಭರ್ಜರಿ ಕೊಡುಗೆ ನೀಡಿದೆ. ಭಾರತೀಯ ಪ್ರವಾಸಿಗರಿಗೆ ಯಾವುದೇ ವೀಸಾ ಇಲ್ಲದೆ ಬರೋಬ್ಬರಿ 30 ದಿನಗಳ ಕಾಲ ದೇಶ ಪ್ರವೇಶಿಸಲು ಥಾಯ್ಲೆಂಡ್​ ಕ್ಯಾಬಿನೆಟ್ ಅಧಿಕೃತವಾಗಿ ಅನುಮೋದನೆ ನೀಡಿದ್ದು, ಪ್ರವಾಸ ಪ್ರಿಯರಲ್ಲಿ ಹೊಸ ಸಂಚಲನ ಮೂಡಿಸಿದೆ.

ಇತ್ತೀಚೆಗೆ ವೀಸಾ ರಹಿತ ಪ್ರವೇಶವನ್ನು ಹಿಂಪಡೆಯುವ ಸರ್ಕಾರದ ಗೊಂದಲದ ನಿರ್ಧಾರದಿಂದಾಗಿ ಭಾರತೀಯ ಪ್ರವಾಸಿಗರ ಸಂಖ್ಯೆಯಲ್ಲಿ ಗಣನೀಯ ಕುಸಿತ ಕಂಡುಬಂದಿತ್ತು ಎಂದು ಥಾಯ್ಲೆಂಡ್​ ಪ್ರವಾಸೋದ್ಯಮ ಸಚಿವ ಸುರಸಕ್ ಫಾಂಚರೋಯೆನ್ವೊರಾಕುಲ್ ತಿಳಿಸಿದ್ದಾರೆ. ಭಾರತೀಯ ಪ್ರವಾಸಿಗರ ಪ್ರಯಾಣದ ಮಾದರಿಯನ್ನು ಗಮನದಲ್ಲಿಟ್ಟುಕೊಂಡು ಕ್ಯಾಬಿನೆಟ್ ಈ 30 ದಿನಗಳ ವೀಸಾ ರಹಿತ ಪ್ರವೇಶವನ್ನು ಮರು-ಅನುಮೋದಿಸಿದೆ. ಭವಿಷ್ಯದಲ್ಲಿ ಈ ನೀತಿಯಿಂದ ಯಾವುದೇ ತೊಂದರೆಗಳು ಎದುರಾದರೆ ಸರ್ಕಾರ ಅದನ್ನು ಮರುಪರಿಶೀಲಿಸಲಿದೆ ಎಂದು ಸಚಿವರು ಸ್ಪಷ್ಟಪಡಿಸಿದ್ದಾರೆ.

ವಾಸ್ತವವಾಗಿ, ಕಳೆದ ಮೇ ತಿಂಗಳಲ್ಲಿ ಥಾಯ್ಲೆಂಡ್​ ಕ್ಯಾಬಿನೆಟ್ ಭಾರತ ಸೇರಿದಂತೆ 93 ದೇಶಗಳಿಗೆ ನೀಡಲಾಗಿದ್ದ 60 ದಿನಗಳ ವೀಸಾ ರಹಿತ ಪ್ರವೇಶವನ್ನು ಕೊನೆಗೊಳಿಸಲು ನಿರ್ಧರಿಸಿತ್ತು. ಅದರ ಬದಲಾಗಿ ಕೇವಲ 54 ದೇಶಗಳಿಗೆ ಮಾತ್ರ 30 ದಿನಗಳ ವೀಸಾ ವಿನಾಯಿತಿ ನೀಡಲು ಯೋಜಿಸಲಾಗಿತ್ತು. ಆದರೆ, ಈ ಕುರಿತು ಅಂತಿಮ ಆದೇಶ ಜಾರಿಯಾಗದಿದ್ದರೂ, ಭಾರತೀಯ ಪ್ರವಾಸಿಗರಲ್ಲಿ ತೀವ್ರ ಗೊಂದಲ ಸೃಷ್ಟಿಯಾಗಿತ್ತು. ಇದು ಥಾಯ್ಲೆಂಡ್​ಗೆ ಭೇಟಿ ನೀಡುವ ಭಾರತೀಯರ ಸಂಖ್ಯೆ ದಿಢೀರ್ ಕಡಿಮೆಯಾಗಲು ಪ್ರಮುಖ ಕಾರಣವಾಗಿತ್ತು ಎಂದು ಸಚಿವರು ವಿಶ್ಲೇಷಿಸಿದ್ದಾರೆ.

ಥಾಯ್ಲೆಂಡ್​ ಪ್ರವಾಸೋದ್ಯಮ ಮಾರುಕಟ್ಟೆಯಲ್ಲಿ ಭಾರತಕ್ಕೆ ಅತ್ಯಂತ ಪ್ರಮುಖ ಸ್ಥಾನವಿದೆ. ಪ್ರಸ್ತುತ ವರ್ಷದಲ್ಲಿ ಚೀನಾ ಮತ್ತು ಮಲೇಷ್ಯಾ ದೇಶಗಳ ನಂತರ ಥಾಯ್ಲೆಂಡ್​ಗೆ ಅತಿ ಹೆಚ್ಚು ಭೇಟಿ ನೀಡುವ ವಿದೇಶಿ ಪ್ರವಾಸಿಗರಲ್ಲಿ ಭಾರತ ಮೂರನೇ ಸ್ಥಾನದಲ್ಲಿದೆ. ಸರ್ಕಾರದ ಈ ಹೊಸ ವೀಸಾ ವಿನಾಯಿತಿ ನಿರ್ಧಾರದಿಂದಾಗಿ ಮುಂಬರುವ ದಿನಗಳಲ್ಲಿ ಭಾರತದಿಂದ ಬರುವ ಪ್ರವಾಸಿಗರ ಸಂಖ್ಯೆ ಮತ್ತೆ ಗಣನೀಯವಾಗಿ ಹೆಚ್ಚಾಗಲಿದೆ ಎಂದು ಅಲ್ಲಿನ ಸರ್ಕಾರ ಬಲವಾಗಿ ವಿಶ್ವಾಸ ವ್ಯಕ್ತಪಡಿಸಿದೆ.

ಇನ್ನು ಥಾಯ್ಲೆಂಡ್​ ಸರ್ಕಾರದ ಈ ವೀಸಾ ಮುಕ್ತ ಯೋಜನೆಯು ಕೇವಲ ಭಾರತಕ್ಕೆ ಮಾತ್ರ ಸೀಮಿತವಾಗಿರದೆ, ಯುರೋಪಿಯನ್ ಯೂನಿಯನ್‌ನ (EU) ಎಲ್ಲಾ 27 ಸದಸ್ಯ ರಾಷ್ಟ್ರಗಳನ್ನೂ ಒಳಗೊಂಡಿದೆ. ಇದರಿಂದಾಗಿ ಥಾಯ್ಲೆಂಡ್​ ಪಾಸ್‌ಪೋರ್ಟ್ ಹೊಂದಿರುವವರಿಗೆ ಯುರೋಪ್ ಪ್ರವಾಸಕ್ಕೆ ಶೆಂಗೆನ್ ವೀಸಾ (Schengen Visa) ವಿನಾಯಿತಿ ಪಡೆಯಲು ನಡೆಸಲಾಗುತ್ತಿರುವ ಮಾತುಕತೆಗಳಿಗೆ ಹೆಚ್ಚಿನ ಬಲ ಸಿಗಲಿದೆ ಎಂದು ಸರ್ಕಾರ ಭಾವಿಸಿದೆ. ಒಟ್ಟಾರೆಯಾಗಿ, ಈ ನಿರ್ಧಾರವು ಥಾಯ್ಲೆಂಡ್​ ಪ್ರವಾಸೋದ್ಯಮಕ್ಕೆ ಹೊಸ ಚೈತನ್ಯ ತುಂಬುವುದರಲ್ಲಿ ಯಾವುದೇ ಸಂಶಯವಿಲ್ಲ, (ಏಜೆನ್ಸೀಸ್​).