ಇನ್ಮುಂದೆ ಆಧಾರ್ ಇಲ್ಲದೆ ರೈಲು ಟಿಕೆಟ್ ಬುಕ್ಕಿಂಗ್ ಕಷ್ಟ: ಭಾರತೀಯ ರೈಲ್ವೆಯಿಂದ ಹೊಸ ಆದೇಶ! | Indian Railways

ಜನವರಿ 12 ರಿಂದ ಜಾರಿಗೆ ಬಂದಿರುವಂತೆ, ಮುಂಗಡ ಕಾಯ್ದಿರಿಸುವಿಕೆ ಪ್ರಾರಂಭವಾಗುವ ಮೊದಲ ದಿನದಂದು ಸಾಮಾನ್ಯ ಮೀಸಲಾತಿ ಟಿಕೆಟ್‌ಗಳನ್ನು ಬುಕ್ ಮಾಡಲು IRCTC ಖಾತೆಗೆ ಆಧಾರ್ ಲಿಂಕ್ ಆಗಿರಲೇಬೇಕು.

ಈ ಹಿಂದೆ ಆಧಾರ್ ದೃಢೀಕೃತ ಬಳಕೆದಾರರಿಗೆ ಬೆಳಿಗ್ಗೆ 8 ರಿಂದ ಸಂಜೆ 4 ರವರೆಗೆ ಮಾತ್ರ ಆದ್ಯತೆ ಇತ್ತು. ಆದರೆ ಈಗ ಹೊಸ ನಿಯಮದಂತೆ, ಮೊದಲ ದಿನ ಬೆಳಿಗ್ಗೆ 8 ರಿಂದ ಮಧ್ಯರಾತ್ರಿ 12 ರವರೆಗೆ ಕೇವಲ ಆಧಾರ್ ಪರಿಶೀಲಿಸಿದ ಬಳಕೆದಾರರು ಮಾತ್ರ ಟಿಕೆಟ್ ಬುಕ್ ಮಾಡಬಹುದು.

ಆನ್‌ಲೈನ್ ತತ್ಕಾಲ್ ಟಿಕೆಟ್ ಬುಕ್ಕಿಂಗ್‌ಗೂ ಸಹ ಆಧಾರ್ ಆಧರಿತ OTP ದೃಢೀಕರಣವನ್ನು ಈಗಾಗಲೇ ಕಡ್ಡಾಯಗೊಳಿಸಲಾಗಿದೆ.

ರೈಲ್ವೆ ನಿಲ್ದಾಣದ ಕೌಂಟರ್‌ಗಳಲ್ಲಿ (PRS) ಟಿಕೆಟ್ ಪಡೆಯುವವರಿಗೆ ಈ ಹೊಸ ಆನ್‌ಲೈನ್ ನಿಯಮ ಅನ್ವಯಿಸುವುದಿಲ್ಲ. ಅವರು ಎಂದಿನಂತೆ ತಮ್ಮ ಗುರುತಿನ ಚೀಟಿ ತೋರಿಸಿ ಟಿಕೆಟ್ ಪಡೆಯಬಹುದು.

ನಕಲಿ ಸಾಫ್ಟ್‌ವೇರ್ ಮತ್ತು ಬಾಟ್‌ಗಳ ಮೂಲಕ ದಲ್ಲಾಳಿಗಳು ಕೆಲವೇ ಸೆಕೆಂಡುಗಳಲ್ಲಿ ಟಿಕೆಟ್‌ಗಳನ್ನು ಕಬಳಿಸುವುದನ್ನು ತಡೆಯುವುದು ಈ ನಿಯಮದ ಮುಖ್ಯ ಉದ್ದೇಶ. ಇದರಿಂದ ಸಾಮಾನ್ಯ ಪ್ರಯಾಣಿಕರಿಗೆ, ಅದರಲ್ಲೂ ಹಿರಿಯ ನಾಗರಿಕರಿಗೆ ಮತ್ತು ತುರ್ತು ಪ್ರಯಾಣಿಕರಿಗೆ ನ್ಯಾಯಯುತವಾಗಿ ಟಿಕೆಟ್ ಸಿಗಲು ಸಹಕಾರಿಯಾಗಲಿದೆ.

ನೀವು ರೈಲು ಪ್ರಯಾಣ ಯೋಜಿಸುತ್ತಿದ್ದರೆ, ಕೂಡಲೇ ನಿಮ್ಮ IRCTC ಪ್ರೊಫೈಲ್‌ಗೆ ಹೋಗಿ ಆಧಾರ್ ಕೆವೈಸಿ (KYC) ಪೂರ್ಣಗೊಳಿಸಿ. ಆಧಾರ್ ಸಂಖ್ಯೆಯನ್ನು ನಮೂದಿಸಿ, ಮೊಬೈಲ್‌ಗೆ ಬರುವ OTP ಮೂಲಕ ಅದನ್ನು ದೃಢೀಕರಿಸಿದರೆ, ನೀವು ಯಾವುದೇ ಅಡೆತಡೆಯಿಲ್ಲದೆ ಟಿಕೆಟ್ ಬುಕ್ ಮಾಡಬಹುದು.ಪ್ರಯಾಣದ ಸಮಯದಲ್ಲಿ ಆಧಾರ್ ಕಾರ್ಡ್ ಮಾತ್ರವಲ್ಲದೆ, ಮತದಾರರ ಗುರುತಿನ ಚೀಟಿ, ಪ್ಯಾನ್ ಕಾರ್ಡ್ ಅಥವಾ ಡ್ರೈವಿಂಗ್ ಲೈಸೆನ್ಸ್‌ನಂತಹ ಮೂಲ ದಾಖಲೆಗಳನ್ನು ಕೊಂಡೊಯ್ಯುವುದನ್ನು ಮರೆಯಬೇಡಿ,(ಏಜೆನ್ಸೀಸ್​).