ರೈಲು ಪ್ರಯಾಣಿಕರ ಗಮನಕ್ಕೆ: ಇಂದಿನಿಂದ ಆಧಾರ್ ಲಿಂಕ್ ಆದವರಿಗೆ ಮಾತ್ರ ಟಿಕೆಟ್ ಬುಕಿಂಗ್ ಲಭ್ಯ! | Aadhaar

ಹೊಸ ನಿಯಮದ ಪ್ರಕಾರ, ರೈಲು ಟಿಕೆಟ್ ಬುಕಿಂಗ್ ಆರಂಭವಾಗುವ ಮೊದಲ ದಿನದಂದು ಬೆಳಿಗ್ಗೆ 8:00 ರಿಂದ ಮಧ್ಯಾಹ್ನ 12:00 ಗಂಟೆಯವರೆಗೆ ಕೇವಲ ಆಧಾರ್ ದೃಢೀಕರಿಸಲ್ಪಟ್ಟ (Aadhaar Authenticated) ಬಳಕೆದಾರರು ಮಾತ್ರ ಆನ್‌ಲೈನ್ ಟಿಕೆಟ್ ಬುಕ್ ಮಾಡಲು ಅವಕಾಶವಿರುತ್ತದೆ. ಆಧಾರ್ ಲಿಂಕ್ ಮಾಡದ ಸಾಮಾನ್ಯ ಬಳಕೆದಾರರು ಮಧ್ಯಾಹ್ನ 12:00 ಗಂಟೆಯ ನಂತರವಷ್ಟೇ ಟಿಕೆಟ್ ಬುಕ್ ಮಾಡಲು ಸಾಧ್ಯವಾಗುತ್ತದೆ.

ರೈಲ್ವೆ ಮಂಡಳಿಯು ಈ ನಿಯಮವನ್ನು ಮೂರು ಹಂತಗಳಲ್ಲಿ ವಿಸ್ತರಿಸಲು ನಿರ್ಧರಿಸಿದ್ದು, ಟಿಕೆಟ್ ಬುಕ್ ಮಾಡುವ ಸಮಯದಲ್ಲಿ ಮಹತ್ವದ ಬದಲಾವಣೆ ಮಾಡಲಾಗಿದೆ.

ಡಿಸೆಂಬರ್ 29 ರಿಂದ ಬೆಳಿಗ್ಗೆ 8 ರಿಂದ ಮಧ್ಯಾಹ್ನ 12 ಗಂಟೆಯವರೆಗೆ ಆಧಾರ್ ಬಳಕೆದಾರರಿಗೆ ಸೀಮಿತ.

ಜನವರಿ 5 (2026) ರಿಂದ ಈ ಸಮಯವನ್ನು ಬೆಳಿಗ್ಗೆ 8 ರಿಂದ ಸಂಜೆ 4 ರವರೆಗೆ ವಿಸ್ತರಿಸಲಾಗುವುದು.

ಜನವರಿ 12 (2026) ರಿಂದ ಬೆಳಿಗ್ಗೆ 8 ರಿಂದ ಮಧ್ಯರಾತ್ರಿ 12 ರವರೆಗೆ ಇಡೀ ದಿನ ಆಧಾರ್ ದೃಢೀಕೃತ ಬಳಕೆದಾರರಿಗೆ ಮಾತ್ರ ಆದ್ಯತೆ ಇರಲಿದೆ.

ಸಾಮಾನ್ಯವಾಗಿ ಟಿಕೆಟ್ ಬುಕಿಂಗ್ ಆರಂಭವಾದ ಮೊದಲ ಕೆಲವು ಗಂಟೆಗಳಲ್ಲಿ ದಲ್ಲಾಳಿಗಳು ಸಾಫ್ಟ್‌ವೇರ್‌ಗಳ ಮೂಲಕ ಸಗಟು ಟಿಕೆಟ್ ಬುಕ್ ಮಾಡುವುದನ್ನು ತಡೆಯುವುದು ಈ ಕ್ರಮದ ಮುಖ್ಯ ಉದ್ದೇಶವಾಗಿದೆ. ಆಧಾರ್ ಲಿಂಕ್ ಮಾಡುವುದರಿಂದ ಸಾಮಾನ್ಯ ಪ್ರಯಾಣಿಕರಿಗೆ ಕನ್ಫರ್ಮ್ ಟಿಕೆಟ್ ಸಿಗುವ ಸಾಧ್ಯತೆ ಹೆಚ್ಚಾಗಲಿದೆ. ಈ ನಿಯಮವು ಕೇವಲ IRCTC ವೆಬ್‌ಸೈಟ್ ಮತ್ತು ಆ್ಯಪ್ ಮೂಲಕ ಮಾಡುವ ಆನ್‌ಲೈನ್ ಬುಕಿಂಗ್‌ಗೆ ಮಾತ್ರ ಅನ್ವಯಿಸುತ್ತದೆ. ರೈಲ್ವೆ ಸ್ಟೇಷನ್ ಕೌಂಟರ್‌ಗಳಲ್ಲಿ (PRS) ಟಿಕೆಟ್ ಪಡೆಯುವ ವಿಧಾನದಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ.

ಪರಿಶೀಲನೆ ಡ್ರೈವ್ ಪೂರ್ಣಗೊಂಡ ನಂತರ, ನಿಷ್ಕ್ರಿಯಗೊಳಿಸಲಾದ ಒಟ್ಟು ನಕಲಿ ಖಾತೆಗಳ ಸಂಖ್ಯೆ ಸುಮಾರು 6 ಕೋಟಿ ತಲುಪುವ ನಿರೀಕ್ಷೆಯಿದೆ. ಆಧಾರ್ ಆಧಾರಿತ ದೃಢೀಕರಣವು ನಿಜವಾದ ಬಳಕೆದಾರರ ಗುರುತನ್ನು ಖಚಿತಪಡಿಸಲು ಸಹಾಯ ಮಾಡುತ್ತದೆ ಮತ್ತು ನಕಲಿ ಪ್ರೊಫೈಲ್‌ಗಳ ಮೂಲಕ ಸ್ವಯಂಚಾಲಿತ ಅಥವಾ ಬೃಹತ್ ಬುಕಿಂಗ್‌ಗಳನ್ನು ತಡೆಯುತ್ತದೆ ಎಂದು ಹಿರಿಯ ರೈಲ್ವೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.(ಏಜೆನ್ಸೀಸ್​).