ಚುನಾವಣೆ ಆಯೋಗದ ಎಸ್​ಐಆರ್ ಬಗ್ಗೆ ಟಿಎಂಸಿಗೆ ಭಯ ಇರಬಹುದು, ನಮಗಿಲ್ಲ; ನಿತಿನ್ ನವೀನ್ | Nitin Nabin

ಕೋಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ಭಾರತೀಯ ಚುನಾವಣೆ ಆಯೋಗ ನಡೆಸಿದ ಮತದಾರ ಪಟ್ಟಿಯ ವಿಶೇಷ ಪರಿಷ್ಕರಣೆಯಿಂದ(SIR) ಆಡಳಿತರೂಢ ತೃಣಮೂಲ ಕಾಂಗ್ರೆಸ್​ ಭಯಗೊಂಡಿರಬಹುದು, ನಮಗೆ ಯಾವುದೇ ಭಯ ಇಲ್ಲ ಎಂದು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ನವೀನ್(Nitin Nabin) ಹೇಳಿದ್ದಾರೆ.

ಬಂಗಾಳ ವಿಧಾನಸಭೆ ಚುನಾವಣೆಯ ಮೊದಲ ಹಂತದ ಮತದಾನ ನಡೆಯುತ್ತಿರುವಾದ ಎನ್​ಡಿಟಿವಿ ಸಂಪಾದಕರ ಜೊತೆ ಮಾತನಾಡಿರುವ ಅವರು, ರಾಜ್ಯದಲ್ಲಿ ಅಕ್ರಮ ವಲಸೆಯೇ ಬಹುದೊಡ್ಡ ಸಮಸ್ಯೆ. ಎಸ್​ಐಆರ್ ಬಗ್ಗೆ ಟಿಎಂಸಿಗೆ ಆತಂಕವಿರಬಹುದು ಎಂದು ತಿಳಿಸಿದ್ದಾರೆ.

ಬಂಗಾಳವು ಗಡಿ ಪ್ರದೇಶ. ಚುನಾವಣಾ ಆಯೋಗದ ನಿರ್ಧಾರವು ಸ್ಥಳೀಯ ಅಧಿಕಾರಿಗಳ ಮೂಲ ಮಾಹಿತಿಯನ್ನು ಆಧರಿಸಿದೆ. ಆದರೆ ಮಮತಾ ಬ್ಯಾನರ್ಜಿ ಎಸ್​ಐಆರ್ ವಿರುದ್ಧ ನಾಟಕವಾಡುತ್ತಿದ್ದಾರೆ. ಬಾಂಗ್ಲಾದೇಶದ ಜನರಿಗೆ ಮತದಾನದ ಹಕ್ಕನ್ನು ನೀಡಬೇಕೇ? ಎಸ್​ಐಆರ್ ಬಂಗಾಳದ ಜನರಿಗೆ ಪ್ರಯೋಜನವಾಗುವ ನಿರ್ಧಾರ ಎಂದಿದ್ದಾರೆ.

ಚುನಾವಣಾ ಆಯೋಗದ ವಿರುದ್ಧ ತೃಣಮೂಲ ಕಾಂಗ್ರೆಸ್ ಆರೋಪಗಳನ್ನು ತಳ್ಳಿ ಹಾಕಿರುವ ಅವರು, ಬಿಹಾರದಲ್ಲಿ ನಡೆದಂತೆ ಬಂಗಾಳದಲ್ಲಿ ಎಸ್​ಐಆರ್ ಅನ್ನು ನಡೆಸಿದೆ. ಆಯೋಗವು ಇಡೀ ಪ್ರಕ್ರಿಯೆಯಲ್ಲಿ ಎಲ್ಲರಿಗೂ ತಮ್ಮ ವಾದವನ್ನು ಮಂಡಿಸಲು ಸಮಯವನ್ನು ನೀಡುತ್ತದೆ. ತಮಿಳುನಾಡು, ಕೇರಳ ಮತ್ತು ಇತರ ರಾಜ್ಯಗಳಲ್ಲಿ ಚುನಾವಣೆಗಳಿವೆ ಮತ್ತು ಅಲ್ಲಿ ಎಸ್​ಐಆರ್​ ಬಗ್ಗೆ ಯಾವುದೇ ಸಮಸ್ಯೆ ಇಲ್ಲ ಎಂದು ಕಿಡಿಕಾರಿದ್ದಾರೆ.

ರಾಜ್ಯದಲ್ಲಿ ಮಮತಾ ಬ್ಯಾನರ್ಜಿ ಸರ್ಕಾರವು ಅರಾಜಕತೆಯನ್ನು ಸೃಷ್ಟಿಸಿದ್ದು, ಅಭಿವೃದ್ಧಿಯನ್ನು ಉತ್ತೇಜಿಸುವ ಬದಲು, ನುಸುಳುಕೋರರಿಗೆ ಪ್ರೋತ್ಸಾಹ ನೀಡಿದೆ ಎಂದು ಆರೋಪಿಸಿದ ಅವರು, ಟಿಎಂಸಿ ನಾಯಕರು ಹತಾಶರಾಗಿದ್ದು, ಆಯೋಗದ ವಿರುದ್ಧ ಆರೋಪಗಳನ್ನು ಮಾಡಿ ಈ ಕಾರಣಕ್ಕಾಗಿ ನಾವು ಸೋಲುತ್ತಿದ್ದೇವೆ ಎನ್ನುತ್ತಿದ್ದಾರೆ ಎಂದು ವಾಗ್ದಾಳಿ ನಡೆಸಿದ್ದಾರೆ (ಏಜೆನ್ಸೀಸ್).