Serial Killer: ಜೈಲಿನಿಂದ ಎಸ್ಕೇಪ್ ಆಗಿದ್ದ ಭೂಪ: ಬರೋಬ್ಬರಿ 21 ಕೊಲೆ, ದರೋಡೆ ಪ್ರಕರಣಗಳ ಕುಖ್ಯಾತ ಸರಣಿ ಹಂತಕ ಅರೆಸ್ಟ್!

ವಿಶ್ವನಾಥ್ ಅಲಿಯಾಸ್ ಪ್ರಶಾಂತ್ ಅಲಿಯಾಸ್ ಅಜೀಜ್ ಬಂಧಿತ ಆರೋಪಿ. ಈತನ ಜೊತೆಗೆ ಈತನಿಗೆ ಆಶ್ರಯ ನೀಡಿ ದರೋಡೆಗೆ ಸಾಥ್ ನೀಡುತ್ತಿದ್ದ ರಾಜಮ್ಮ ಎಂಬಾಕೆಯನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಕರ್ನಾಟಕ, ಕೇರಳ ಹಾಗೂ ಆಂಧ್ರಪ್ರದೇಶದ ವಿವಿಧ ಜಿಲ್ಲೆಗಳಲ್ಲಿ ಈತ ತನ್ನ ಕ್ರೌರ್ಯ ಮೆರೆದಿದ್ದ.

ತಿರುಪತಿ ಪೊಲೀಸರ ಮಾಹಿತಿ ಪ್ರಕಾರ, ವಿಶ್ವನಾಥ್ ಅತ್ಯಂತ ಚಾಣಾಕ್ಷನಾಗಿದ್ದ. ಈತ ಮೊದಲು ಒಂಟಿ ಮಹಿಳೆಯರಿರುವ ಮನೆಗಳನ್ನು ಗುರುತಿಸುತ್ತಿದ್ದ. ಬಳಿಕ ಯಾವುದಾದರೂ ನೆಪವೊಡ್ಡಿ ಅವರ ವಿಶ್ವಾಸ ಗಳಿಸಿ ಮನೆಗೆ ನುಗ್ಗುತ್ತಿದ್ದ. ಅವರ ನಂಬಿಕೆ ಗಳಿಸಿದ ನಂತರವೇ ತನ್ನ ಅಸಲಿ ರೂಪ ತೋರಿಸುತ್ತಿದ್ದ ಈತ, ಮಹಿಳೆಯರನ್ನು ಬರ್ಬರವಾಗಿ ಕೊಲೆ ಮಾಡಿ ಅವರು ಧರಿಸಿದ್ದ ಚಿನ್ನಾಭರಣಗಳೊಂದಿಗೆ ಪರಾರಿಯಾಗುತ್ತಿದ್ದ. ಈ ಕ್ರಿಮಿನಲ್ ಕೃತ್ಯಕ್ಕೆ ಈತ 'ಆಟೋ ರಿಕ್ಷಾ'ವನ್ನು ಬಳಸುತ್ತಿದ್ದ ಎಂಬುದು ತನಿಖೆಯಲ್ಲಿ ಬಹಿರಂಗವಾಗಿದೆ.

ರಾಮಚಂದ್ರಾಪುರಂನಲ್ಲಿ ನಡೆದ ಮುನೀಶ್ವರಿ ಎಂಬ ಮಹಿಳೆಯ ಹತ್ಯೆ ಪ್ರಕರಣ ಪೊಲೀಸರಿಗೆ ಈತನ ಸುಳಿವು ನೀಡಿತು. ಸಿಸಿಟಿವಿ ದೃಶ್ಯಾವಳಿಗಳು, ತಾಂತ್ರಿಕ ಕಣ್ಗಾವಲು ಹಾಗೂ ಖಚಿತ ಮಾಹಿತಿ ಮೇರೆಗೆ ಪೊಲೀಸರು ಕಾರ್ಯಾಚರಣೆ ನಡೆಸಿದಾಗ ಒಂದು ನಿರ್ದಿಷ್ಟ ಆಟೋ ರಿಕ್ಷಾ ಮೇಲೆ ಅನುಮಾನ ವ್ಯಕ್ತವಾಯಿತು. ತನಿಖೆ ತೀವ್ರಗೊಳಿಸಿದಾಗ ವಿಶ್ವನಾಥ್ ಅಸಲಿ ಮುಖವಾಡ ಬಯಲಾಗಿದೆ. ಬಂಧಿತನಿಂದ ಬರೋಬ್ಬರಿ 20 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಈ ವಿಶ್ವನಾಥ್ ಸಾಮಾನ್ಯ ಅಪರಾಧಿಯಲ್ಲ. 2018ರಲ್ಲಿ ಕೇರಳದಲ್ಲಿ ನಡೆದ ಕೊಲೆ ಪ್ರಕರಣವೊಂದರಲ್ಲಿ ಈತನಿಗೆ ಶಿಕ್ಷೆಯಾಗಿತ್ತು. ಆದರೆ ಅಲ್ಲಿಂದ ಪರಾರಿಯಾಗಿದ್ದ ಈತ, ಅಂದಿನಿಂದ ತಲೆಮರೆಸಿಕೊಂಡಿದ್ದ. ಕೇರಳ ಪೊಲೀಸರು ಈತನ ಸುಳಿವು ನೀಡಿದವರಿಗೆ 2 ಲಕ್ಷ ರೂಪಾಯಿ ಇನಾಮು ಕೂಡ ಘೋಷಿಸಿದ್ದರು. ಕಳೆದ ಹಲವು ವರ್ಷಗಳಿಂದ ನಕಲಿ ಆಧಾರ್ ಕಾರ್ಡ್‌ ಹಾಗೂ ವಿವಿಧ ಹೆಸರುಗಳನ್ನು ಬಳಸಿಕೊಂಡು ಈತ ಪೊಲೀಸರ ಕಣ್ಣಿಗೆ ಮಣ್ಣೆರಚುತ್ತಿದ್ದ.

ಈ ಹಂತಕನ ಬಂಧನದಿಂದ ತಿರುಪತಿ ಸೇರಿದಂತೆ ನೆರೆಯ ರಾಜ್ಯಗಳ ಜನತೆ ನಿಟ್ಟುಸಿರು ಬಿಟ್ಟಿದ್ದಾರೆ. ಸದ್ಯ ಪೊಲೀಸರು ಈತನನ್ನು ಹೆಚ್ಚಿನ ವಿಚಾರಣೆಗೆ ಒಳಪಡಿಸಿದ್ದು, ಇನ್ನು ಎಷ್ಟು ಕೊಲೆಗಳನ್ನು ಈತ ಮಾಡಿದ್ದಾನೆ ಎಂಬುದು ಹೊರಬರಬೇಕಿದೆ,(ಏಜೆನ್ಸೀಸ್).