ಮದ್ಯದ ಚಟಕ್ಕೆ ಬೇಸತ್ತು ಮಗನ ಹತ್ಯೆ: ಆತ್ಮಹತ್ಯೆ ಕಥೆ ಹೆಣೆದ ತಂದೆ-ತಾಯಿ!

ಈ ಘಟನೆ ಜೂನ್ 30ರಂದು ರಾಜ್‌ಕೋಟ್ ಜಿಲ್ಲೆಯ ಗೊಂಡಲ್ ತಾಲ್ಲೂಕಿನ ಗುಂಡಾಲಾ ಗ್ರಾಮದಲ್ಲಿ ನಡೆದಿದೆ. ಮೃತಪಟ್ಟ ಯುವಕನನ್ನು ರಾಮ್ ಬಾಬುಭಾಯಿ ಬಂಭವಾ ಎಂದು ಗುರುತಿಸಲಾಗಿದೆ. ಆರಂಭದಲ್ಲಿ ಆತ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಹೇಳಲಾಗಿತ್ತು. ಆದರೆ ವಿವರವಾದ ಮರಣೋತ್ತರ ಪರೀಕ್ಷೆಯಲ್ಲಿ ವಿಷಪ್ರಾಶನ ಮತ್ತು ಕುತ್ತಿಗೆ ಬಿಗಿದ ಪರಿಣಾಮ ಸಾವಾಗಿದೆ ಎಂಬುದು ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪೊಲೀಸರ ಪ್ರಕಾರ, ರಾಮ್‌ಗೆ ತೀವ್ರ ಮದ್ಯದ ಚಟವಿದ್ದು, ಇದೇ ವಿಚಾರವಾಗಿ ತಂದೆ ಬಾಬುಭಾಯಿ ಅಲಿಯಾಸ್ ಅತುಲ್‌ಭಾಯಿ ಘುಗಾಭಾಯಿ ಬಂಭವಾ ಮತ್ತು ತಾಯಿ ಮನೀಷಾಬೆನ್ ಅಲಿಯಾಸ್ ಮೋತಿಬೆನ್ ಅವರೊಂದಿಗೆ ಆಗಾಗ ಜಗಳವಾಗುತ್ತಿತ್ತು.

ಘಟನೆ ನಡೆದ ದಿನವೂ ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಜಗಳ ನಡೆದಿದ್ದು, ಅದು ತೀವ್ರ ಸ್ವರೂಪ ಪಡೆದಿದೆ ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.

ತನಿಖೆಯ ಪ್ರಕಾರ, ಜಗಳದ ವೇಳೆ ತಾಯಿ ರಾಮ್‌ಗೆ ಬಲವಂತವಾಗಿ ಆ್ಯಸಿಡ್ ಕುಡಿಸಿದ್ದು, ಬಳಿಕ ತಂದೆ ಹಲ್ಲೆ ನಡೆಸಿ ಕುತ್ತಿಗೆ ಬಿಗಿದು ಕೊಲೆ ಮಾಡಿದ್ದಾನೆ ಎಂದು ಆರೋಪಿಸಲಾಗಿದೆ.

ಕೊಲೆ ನಡೆದ ಬಳಿಕ ಪ್ರಕರಣವನ್ನು ಆತ್ಮಹತ್ಯೆ ಎಂದು ಬಿಂಬಿಸಲು ಕುಟುಂಬದವರು ಯತ್ನಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಪ್ರಕರಣವನ್ನು ಮುಚ್ಚಿಹಾಕುವ ಉದ್ದೇಶದಿಂದ ಮೃತನ ತಂದೆ ಸ್ಥಳೀಯ ರಾಜಕೀಯ ಮುಖಂಡರನ್ನು ಸಂಪರ್ಕಿಸಿ, ಯಾವುದೇ ಅನುಮಾನ ಮೂಡದಂತೆ ಗೊಂಡಲ್ ಸಿವಿಲ್ ಆಸ್ಪತ್ರೆಯಲ್ಲಿ ತ್ವರಿತ ಪ್ಯಾನೆಲ್ ಮರಣೋತ್ತರ ಪರೀಕ್ಷೆ ನಡೆಸುವಂತೆ ಅಧಿಕಾರಿಗಳ ಮೇಲೆ ಒತ್ತಡ ಹೇರುವ ಪ್ರಯತ್ನ ನಡೆಸಿದ್ದಾನೆ ಎಂದು ಪೊಲೀಸರು ಆರೋಪಿಸಿದ್ದಾರೆ.

ಆದರೆ ಪೊಲೀಸರು ನಡೆಸಿದ ಸಮಗ್ರ ತನಿಖೆ ಮತ್ತು ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ ಇದು ಕೊಲೆ ಎಂಬುದು ಬಹಿರಂಗವಾಗಿದೆ.

ಮೃತ ರಾಮ್ ಅವರೊಂದಿಗೆ ನಾಲ್ಕು ತಿಂಗಳ ಹಿಂದಷ್ಟೇ ವಿವಾಹವಾಗಿದ್ದ ಪತ್ನಿ ಬನ್ಶಿಬೆನ್ ಬಂಭವಾ ನೀಡಿದ ದೂರಿನ ಮೇರೆಗೆ ಗೊಂಡಲ್ ಪೊಲೀಸರು ಕೊಲೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಪ್ರಕರಣ ಸಂಬಂಧ ತಂದೆ ಬಾಬುಭಾಯಿ ಹಾಗೂ ತಾಯಿ ಮನೀಷಾಬೆನ್ ಅವರನ್ನು ಬಂಧಿಸಲಾಗಿದ್ದು, ಹೆಚ್ಚಿನ ತನಿಖೆ ಮುಂದುವರಿದಿದೆ.

ಪೊಲೀಸರ ಪ್ರಕಾರ, ಮೃತ ರಾಮ್ ನಾಲ್ವರು ಸಹೋದರ-ಸಹೋದರಿಯರಲ್ಲಿ ಹಿರಿಯನಾಗಿದ್ದು, ಆತನ ತಂದೆ ಸ್ಥಳೀಯವಾಗಿ ಚಹಾ ಅಂಗಡಿ ನಡೆಸುತ್ತಿದ್ದರು,(ಏಜೆನ್ಸೀಸ್​).