ಅಂದು ವಿಚಿತ್ರ ಟಿಕ್​ಟಾಕ್​ ವಿಡಿಯೋದಿಂದಲೇ ಸಖತ್​ ಸದ್ದು ಮಾಡಿದ್ದ ಈ ಬಾಲಕ ಇಂದು ಹೇಗಿದ್ದಾನೆ ನೋಡಿ...RCB Fan Sagar Goswami

RCB Fan Sagar Goswami : ಇಂದು ಹೆಚ್ಚಿನ ಮಂದಿಗೆ ಗೊತ್ತಿರುವುದು ಎರಡೇ, ಒಂದು ಇನ್​ಸ್ಟಾಗ್ರಾಂ ರೀಲ್ಸ್​, ಮತ್ತೊಂದು ಯೂಟ್ಯೂಬ್​ ಶಾರ್ಟ್ಸ್​. ಆದರೆ, ಇವೆರೆಡು ಬರುವುದಕ್ಕೂ ಮುಂಚೆ ಅನೇಕ ಮಂದಿ ಡಬ್​ಸ್ಮ್ಯಾಶ್​ ಮೂಲಕ ಜನರನ್ನು ರಂಜಿಸುತ್ತಿದ್ದರು. ಆರಂಭದಲ್ಲಿ ಸಿನಿಮಾ ಡೈಲಾಗ್​ಗಳಿಗೆ ಲಿಪ್​ ಸಿಂಕ್​ ಮಾಡಿ ವಿಡಿಯೋ ಮಾಡುತ್ತಿದ್ದರು. ಈ ಪ್ರಕ್ರಿಯೆ ಸ್ವಲ್ಪ ಕಷ್ಟವಾಗುತ್ತಿತ್ತು. ಆದರೆ, ಯಾವಾಗ ಟಿಕ್​ಟಾಕ್​ ಪರಿಚಯವಾಯಿತೋ ಆಗ ಎಲ್ಲವೂ ಸರಳವಾಯಿತು. ಒಂದೇ ಸೂರಿನಲ್ಲಿ ಎಲ್ಲವೂ ಲಭ್ಯವಾಯಿತು ಮತ್ತು ವಿಡಿಯೋ ಮಾಡುವುದು ತುಂಬಾ ಸರಳವಾಯಿತು. ಈ ಸಂದರ್ಭದಲ್ಲಿ ಅನೇಕ ಯುವ ಪ್ರತಿಭೆಗಳು ಬೆಳಕಿಗೆ ಬಂದವು. ಅವರಲ್ಲಿ ಸಾಗರ್​ ಗೋಸ್ವಾಮಿ ಕೂಡ ಒಬ್ಬರು.

ಅಂದು ಸಖತ್​ ವೈರಲ್​ ವಿಡಿಯೋದಲ್ಲಿ ಆತನ ಆಕರ್ಷಕ ಕೇಶವಿನ್ಯಾಸ ಎಲ್ಲರ ಗಮನ ಸೆಳೆಯಿತು. ಅಷ್ಟೇ ಅಲ್ಲದೆ, ನಗುವಿನ ಮುಖಭಾವದೊಂದಿಗೆ ತೇರಿ ಪ್ಯಾರಿ ಪ್ಯಾರಿ ದೋ ಅಂಖಿಯಾ ಹಾಡಿಗೆ ಲಿಪ್​ ಸಿಂಕ್​ ಮಾಡುವ ಸಾಗರ್,​ ಹಾಡಿನ ಕೊನೆಯಲ್ಲಿ ವಿಚಿತ್ರವಾಗಿ ಅಳುವ ಮುಖಭಾವ ಪ್ರದರ್ಶಿಸುತ್ತಾರೆ. ನೋಡುಗರಿಗೆ ಒಂದು ರೀತಿಯಲ್ಲಿ ವಿಚಿತ್ರ ಎನಿಸಿದರು ಕೂಡ ಸಾಗರ್​ ನಟನೆ ಮಾತ್ರ ಎಲ್ಲರ ಗಮನ ಸೆಳೆಯಿತು. ಈ ವಿಡಿಯೋ ಮಾಡುವಾಗ ಸಾಗರ್​ ಇನ್ನೂ ಬಾಲಕ. ಆದರೆ, ಇಂದು ಯುವಕನಾಗಿರುವ ಸಾಗರ್​ ಮತ್ತೊಮ್ಮೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದ್ದಾರೆ.

ನವೀನ್​ ಯಾದವ್​ ಎಂಬುವವರು ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಅಂದು ಮತ್ತು ಇಂದು ಎಂಬ ಶೀರ್ಷಿಕೆ ಅಡಿಯಲ್ಲಿ ಸಾಗರ್​ ಗೋಸ್ವಾಮಿ ಅವರ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ಮೂಲಕ ಅಂದು ಫೇಮಸ್​ ಆಗಿದ್ದ ಸಾಗರ್​ ಇಂದು ಹೇಗಿದ್ದಾರೆ ನೋಡಿ ಎಂದು ಮುಖ ಪರಿಚಯ ಮಾಡಿದ್ದಾರೆ. ನವೀನ್​ ಹಂಚಿಕೊಂಡಿರುವ ವಿಡಿಯೋ ಈವರೆಗೂ 69 ಸಾವಿರಕ್ಕೂ ಅಧಿಕ ವೀಕ್ಷಣೆ ಕಂಡಿದ್ದು, ಸಾಗರ್​ ಗೋಸ್ವಾಮಿಯ ಇಂದಿನ ಅವತಾರ ಕಂಡು ಹುಬ್ಬೇರಿಸಿದ್ದಾರೆ. ಎಷ್ಟೊಂದು ಬದಲಾಗಿದ್ದಾರೆ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ.

ಸಾಗರ್​ ಗೋಸ್ವಾಮಿ ಅವರು sagar_goswami89 ಹೆಸರಿನ ತಮ್ಮ ಇನ್​ಸ್ಟಾಗ್ರಾಂನಲ್ಲಿ 9 ಲಕ್ಷಕ್ಕೂ ಅಧಿಕ ಫಾಲೋವರ್ಸ್​ ಹೊಂದಿದ್ದಾರೆ. ಅವರ ಪ್ರೋಫೈಲ್​ ಪ್ರಕಾರ ಅವರೊಬ್ಬ ನಟನಾಗಿದ್ದು, ಜಾರ್ಖಂಡ್​ನ ಕೊಡೆರ್ಮಾ​ ಮೂಲದವರು. ಅವರ ಇನ್​ಸ್ಟಾಗ್ರಾಂ ನೋಡಿದರೆ ಅವರೊಬ್ಬ ಫಿಟ್​ನೆಸ್​ ಪ್ರೇಮಿ ಅನ್ನೋದು ಗೊತ್ತಾಗುತ್ತದೆ.

ಅಂದಹಾಗೆ, ಸಾಗರ್​ ಅವರು ವಿರಾಟ್​ ಕೊಹ್ಲಿ ಹಾಗೂ ಆರ್​ಸಿಬಿ ಅಭಿಮಾನಿ ಕೂಡ ಹೌದು. ಆರ್​ಸಿಬಿ ಪಂದ್ಯಗಳನ್ನು ವೀಕ್ಷಿಸಿದ ಫೋಟೋಗಳನ್ನು ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ ಮತ್ತು ಆ ಫೋಟೋಗಳಿಗೆ ವಿರಾಟ್​ ಕೊಹ್ಲಿ ಎಂಬ ಹ್ಯಾಶ್​ಟ್ಯಾಗ್​ ಕೂಡ ಬಳಸಿದ್ದಾರೆ. ಅದನ್ನು ನೋಡಿದರೆ ಸಾಗರ್​ ಆರ್​ಸಿಬಿ ಅಭಿಮಾನಿ ಅನ್ನೋದ ಸ್ಪಷ್ಟವಾಗಿ ಗೋಚರವಾಗುತ್ತದೆ, (ಏಜೆನ್ಸೀಸ್​).