ಸಂಪಾದಕೀಯ: ಸಾರ್ವಭೌಮತ್ವಕ್ಕೆ ಧಕ್ಕೆ

ವಿಶ್ವಸಂಸ್ಥೆಯ ನಿಯಮಾವಳಿ (ಚಾರ್ಟರ್) ಮತ್ತು ಅಂತಾರಾಷ್ಟ್ರೀಯ ಒಪ್ಪಂದಗಳ ಪ್ರಕಾರ, ಯಾವುದೇ ದೇಶ ತನ್ನ ಆಂತರಿಕ ರಾಜಕೀಯ ಬಿಕ್ಕಟ್ಟುಗಳನ್ನು ಅಥವಾ ಆಡಳಿತಾತ್ಮಕ ಸಮಸ್ಯೆಗಳನ್ನು ಆ ರಾಷ್ಟ್ರದ ಸಂವಿಧಾನ ಮತ್ತು ಪ್ರಜೆಗಳ ಆಶೋತ್ತರಗಳ ಅನ್ವಯವೇ ಬಗೆಹರಿಸಿಕೊಳ್ಳಬೇಕು. ಒಂದು ವೇಳೆ ನೆರೆಯ ದೇಶಗಳಿಗೆ ಅಥವಾ ಜಾಗತಿಕ ಸಮುದಾಯಕ್ಕೆ ಅದರಿಂದ ಅಪಾಯವಿದ್ದಲ್ಲಿ, ವಿಶ್ವಸಂಸ್ಥೆಯ ಮೂಲಕ ಬಹುಪಕ್ಷೀಯ ಸಂವಾದಕ್ಕೆ ಮುಂದಾಗಬೇಕೇ ಹೊರತು, ಸೇನಾಬಲ ಪ್ರದರ್ಶನ ಮಾಡುವಂತಿಲ್ಲ. ಅಮೆರಿಕದ ಈ ‘ದೊಡ್ಡಣ್ಣ’ನ ಪ್ರವೃತ್ತಿ ಅಪಾಯಕಾರಿ ಸಂಪ್ರದಾಯಕ್ಕೆ ನಾಂದಿ ಹಾಡಿದೆ. ಭವಿಷ್ಯದಲ್ಲಿ ಇತರ ಬಲಿಷ್ಠ ರಾಷ್ಟ್ರಗಳೂ ತಮ್ಮ ಹಿತಾಸಕ್ತಿಗೆ ವಿರುದ್ಧವಾಗಿರುವ ಸಣ್ಣ ರಾಷ್ಟ್ರಗಳ ಮೇಲೆ ಇಂತಹುದೇ ದಾಳಿ ನಡೆಸಲು ಇದರಿಂದ ಪ್ರೇರಣೆಯಾಗಬಹುದು.

ಅಮೆರಿಕ-ವೆನೆಜುವೆಲಾ ಸಮಸ್ಯೆಯ ಪರಿಣಾಮ ಕೇವಲ ರಾಜಕೀಯಕ್ಕೆ ಸೀಮಿತವಾಗಿಲ್ಲ. ಇದು ಜಾಗತಿಕ ಆರ್ಥಿಕತೆಯ ಮೇಲೂ ಭಾರಿ ಹೊಡೆತ ನೀಡಬಹುದು. ವೆನೆಜುವೆಲಾ ವಿಶ್ವದ ಅತಿದೊಡ್ಡ ತೈಲ ನಿಕ್ಷೇಪಗಳನ್ನು ಹೊಂದಿರುವ ದೇಶ. ಅಲ್ಲಿನ ರಾಜಕೀಯ ಅಸ್ಥಿರತೆಯಿಂದಾಗಿ ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ತೈಲ ಬೆಲೆಗಳು ಏರುಪೇರಾಗಬಹುದು. ಇದು ಅಭಿವೃದ್ಧಿಶೀಲ ರಾಷ್ಟ್ರಗಳ ಮೇಲೆ ನೇರವಾದ ವ್ಯತಿರಿಕ್ತ ಪರಿಣಾಮವನ್ನು ಬೀರಲಿದೆ. ಇಂಧನ ಅಗತ್ಯಗಳಿಗಾಗಿ ವೆನೆಜುವೆಲಾ ಮೇಲೆ ಅವಲಂಬಿತವಾಗಿರುವ ದೇಶಗಳಿಗೆ ಇದರಿಂದ ತೀವ್ರ ತೊಂದರೆಯಾಗುತ್ತದೆ. ಆತುರದ ಮಿಲಿಟರಿ ಕ್ರಮಗಳು ತೈಲಪೂರೈಕೆ ಸರಪಳಿಗೂ ಸಮಸ್ಯೆ ತಂದೊಡ್ಡುತ್ತವೆ. ಇದರಿಂದ ಹಣದುಬ್ಬರ ಮತ್ತು ಆರ್ಥಿಕ ಮುಗ್ಗಟ್ಟು ತಲೆದೋರುವ ಅಪಾಯವೂ ಇರುತ್ತದೆ.

ಭಾರತ ಮೊದಲಿನಿಂದಲೂ ತನ್ನ ವಿದೇಶಾಂಗ ನೀತಿಯಲ್ಲಿ ತಟಸ್ಥ ಧೋರಣೆ ಮತ್ತು ಸಾರ್ವಭೌಮತ್ವದ ಗೌರವವನ್ನು ಎತ್ತಿ ಹಿಡಿದಿದೆ. ಹಿಂಸೆ ಅಥವಾ ಸೇನಾ ಬಲಕ್ಕಿಂತ ಶಾಂತಿಯುತ ಸಂವಾದವೇ ಯಾವುದೇ ಜಟಿಲ ಬಿಕ್ಕಟ್ಟಿಗೆ ಇರುವ ಏಕೈಕ ಶಾಶ್ವತ ಪರಿಹಾರ ಎಂಬುದು ಭಾರತದ ಸ್ಪಷ್ಟ ನಿಲುವು. ವೆನೆಜುವೆಲಾದ ಆಂತರಿಕ ಬಿಕ್ಕಟ್ಟುಗಳನ್ನು ಅಲ್ಲಿನ ಜನರೇ ಬಗೆಹರಿಸಿಕೊಳ್ಳಲು ಪೂರಕವಾಗಿ ಅಗತ್ಯವಿರುವ ಕ್ರಮಗಳನ್ನು ಅಮೆರಿಕ ಕೈಗೊಳ್ಳಬೇಕಿತ್ತು. ಅದನ್ನು ಬಿಟ್ಟು, ಅಮೆರಿಕ ಸೇನಾ ಹಸ್ತಕ್ಷೇಪದ ಮೂಲಕ ಆಡಳಿತ ಬದಲಾವಣೆ ಮಾಡಿರುವುದು ಪ್ರಜಾಪ್ರಭುತ್ವದ ಮೌಲ್ಯಗಳಿಗೆ ವಿರುದ್ಧವಾಗಿದೆ. ಅಮೆರಿಕ ಬೇರೆ ದುರ್ಬಲ ರಾಷ್ಟ್ರಗಳ ಮೇಲೂ ಇಂತಹುದೇ ಕ್ರಮಕ್ಕೆ ಮುಂದಾಗುವ ಸಾಧ್ಯತೆ ಇದೆ. ಜಾಗತಿಕ ಸಮುದಾಯ ಈಗ ಒಗ್ಗಟ್ಟಾಗಿ ನಿಂತು ಸಾರ್ವಭೌಮತ್ವದ ರಕ್ಷಣೆಗಾಗಿ ಧ್ವನಿ ಎತ್ತಬೇಕಿದೆ.