ಇದು ಮೋದಿ ನಿರ್ಮಿತ ಕೃತಕ ಬಿಕ್ಕಟ್ಟು, ಬಡವರ ರಕ್ತ ಹೀರುತ್ತಿದೆ ಬಿಜೆಪಿ: 11 ದಿನಗಳಲ್ಲಿ 7 ರೂಪಾಯಿ ಏರಿಕೆ ವಿರುದ್ಧ ಮಲ್ಲಿಕಾರ್ಜುನ ಖರ್ಗೆ ಆಕ್ರೋಶ! Mallikarjun Kharge

ಚುನಾವಣಾ ಫಲಿತಾಂಶಗಳು ಪ್ರಕಟಗೊಂಡ ಬೆನ್ನಲ್ಲೇ ಕೇಂದ್ರ ಸರ್ಕಾರವು ಜಾರಿಗೊಳಿಸಿರುವ ಈ ಇಂಧನ ದರ ಏರಿಕೆಯು ತೀವ್ರ ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವ ಜನಸಾಮಾನ್ಯರ ಮೇಲೆ ಎಸಗಿರುವ ದ್ರೋಹ ಎಂದು ಕಾಂಗ್ರೆಸ್, ಸಿಪಿಐ(ಎಂ) ಮತ್ತು ಸಮಾಜವಾದಿ ಪಕ್ಷಗಳು ಜಂಟಿಯಾಗಿ ಕಿಡಿಕಾರಿವೆ.

ದೇಶದ ಆರ್ಥಿಕತೆ ಸಂಪೂರ್ಣವಾಗಿ ಕುಸಿಯುತ್ತಿದೆ ಎಂದು ಆತಂಕ ವ್ಯಕ್ತಪಡಿಸಿರುವ ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ಈ ಇಂಧನ ಲೂಟಿಗೆ ಪ್ರಧಾನಿ ಮೋದಿಯವರೇ ನೇರ ಹೊಣೆ ಎಂದು ಆರೋಪಿಸಿದ್ದಾರೆ. ಹಿಂದಿನ ಯುಪಿಎ ಸರ್ಕಾರದ ಅವಧಿಯಲ್ಲಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಗಗನಕ್ಕೇರಿದ್ದರೂ, ಮಾಜಿ ಪ್ರಧಾನಿ ಡಾ. ಮನ್‌ಮೋಹನ್ ಸಿಂಗ್ ಅವರು ಜನಸಾಮಾನ್ಯರ ಮೇಲೆ ಆರ್ಥಿಕ ಹೊರೆ ಬೀಳದಂತೆ ಸಬ್ಸಿಡಿ ನೀಡಿ ದೇಶದ ನಾಗರಿಕರನ್ನು ರಕ್ಷಿಸಿದ್ದರು. ಆದರೆ ಪ್ರಸ್ತುತ ಎನ್‌ಡಿಎ ಸರ್ಕಾರವು ಸಾರ್ವಜನಿಕರನ್ನು ಕೇವಲ ಸುಲಿಗೆ ಮಾಡಲು ಮಾತ್ರ ಸೀಮಿತವಾಗಿದೆ ಎಂದು ದೂರಿದ್ದಾರೆ. ಅಗತ್ಯ ವಸ್ತುಗಳ ಬೆಲೆ ದಿನದಿಂದ ದಿನಕ್ಕೆ ದುಬಾರಿಯಾಗುತ್ತಿರುವುದರಿಂದ ಬಡವರು ಒಂದು ಹೊತ್ತಿನ ಊಟಕ್ಕೂ ಪರದಾಡುವಂತಾಗಿದೆ ಎಂದು ಖರ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.

ಮೂರು ದಿನಗಳ ಕಾಲ ನಡೆದ ತನ್ನ ಕೇಂದ್ರ ಸಮಿತಿ ಸಭೆಯ ಮುಕ್ತಾಯದ ನಂತರ ಕಠಿಣ ಪ್ರಕಟಣೆ ಹೊರಡಿಸಿರುವ ಸಿಪಿಐ(ಎಂ), ಸರ್ಕಾರದ ಕಠಿಣ ಮಿತವ್ಯಯದ ಕ್ರಮಗಳು ಮತ್ತು ಇಂಧನ ದರ ಏರಿಕೆಯು ಜನರ ಮೇಲೆ ಜವರಾಯನಂತೆ ಮುಗಿಬಿದ್ದಿದೆ ಎಂದಿದೆ. ಕಳೆದ 11 ದಿನಗಳಲ್ಲಿ ಬರೋಬ್ಬರಿ 7 ರೂಪಾಯಿಗಿಂತಲೂ ಹೆಚ್ಚು ದರ ಹೆಚ್ಚಿಸಲಾಗಿದೆ. ನಮ್ಮ ಇಂಧನ ಸಂಪನ್ಮೂಲಗಳ ಕಾರ್ಯತಂತ್ರದ ಭದ್ರತೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ ಕೇಂದ್ರ ಸರ್ಕಾರ ಸಂಪೂರ್ಣವಾಗಿ ವಿಫಲವಾಗಿದೆ. ಸರ್ಕಾರದ ಈ ಸಾರ್ವಜನಿಕ ವಿರೋಧಿ ನೀತಿಗಳ ವಿರುದ್ಧ ನಾವು ದೇಶಾದ್ಯಂತ ಜನರನ್ನು ಸಂಘಟಿಸಿ ತೀವ್ರ ಪ್ರತಿಭಟನೆ ಹಮ್ಮಿಕೊಳ್ಳಲಿದ್ದೇವೆ ಎಂದು ಎಡಪಕ್ಷ ಎಚ್ಚರಿಸಿದೆ.

ಮತ್ತೊಂದೆಡೆ, ಸಮಾಜವಾದಿ ಪಕ್ಷವು X ಖಾತೆಯಲ್ಲಿ ಪೋಸ್ಟ್ ಹಾಕಿ ಬಿಜೆಪಿಯ ಅಮೃತ ಕಾಲದ ಭಾಷಣವನ್ನು ಅಣಕಿಸಿದೆ. ಬಿಜೆಪಿಯ ಹಣದುಬ್ಬರದ ದಾಳಿ ನಿಲ್ಲುವ ಲಕ್ಷಣಗಳೇ ಕಾಣುತ್ತಿಲ್ಲ. ಕೇವಲ 10 ದಿನಗಳಲ್ಲಿ 4 ಬಾರಿ ಪೆಟ್ರೋಲ್-ಡೀಸೆಲ್ ಬೆಲೆ ಏರಿಸಲಾಗಿದೆ. ಪೆಟ್ರೋಲ್ ಲೀಟರ್‌ಗೆ 2.61 ರೂ. ಮತ್ತು ಡೀಸೆಲ್ 2.71 ರೂ. ಹೆಚ್ಚಳವಾಗಿದೆ. ಬಡವರ ಹೊಟ್ಟೆಯ ಮೇಲೆ ಹೊಡೆಯುವ ಈ ಕಾಲಕ್ಕೆ ಬಿಜೆಪಿ ಅಮೃತ ಕಾಲ ಎಂದು ಹೆಸರಿಟ್ಟಿದೆ. ನಮಗೆ ಇಂತಹ ವಿನಾಶಕಾರಿ ಬಿಜೆಪಿ ಸರ್ಕಾರ ಬೇಡವೇ ಬೇಡ ಎಂದು ಅಖಿಲೇಶ್ ಯಾದವ್ ನೇತೃತ್ವದ ಪಕ್ಷ ಆಕ್ರೋಶ ಹೊರಹಾಕಿದೆ.

ದೇಶದಲ್ಲಿ ನಿರುದ್ಯೋಗದ ಪ್ರಮಾಣ ಗರಿಷ್ಠ ಮಟ್ಟ ತಲುಪಿರುವ ಬೆನ್ನಲ್ಲೇ ಜಾರಿಯಾಗಿರುವ ಈ ಇಂಧನ ದರ ಏರಿಕೆಯು ಆಡಳಿತ ಪಕ್ಷ ಹಾಗೂ ವಿರೋಧ ಪಕ್ಷಗಳ ನಡುವಿನ ರಾಜಕೀಯ ಸಂಘರ್ಷವನ್ನು ಮತ್ತಷ್ಟು ತೀವ್ರಗೊಳಿಸಿದ್ದು, ಸಂಸತ್ತಿನ ಮುಂಬರುವ ಅಧಿವೇಶನದಲ್ಲೂ ಈ ಇಂಧನ ಸಮರ ಭಾರಿ ಸದ್ದು ಮಾಡುವುದು ಖಚಿತವಾಗಿದೆ,(ಏಜೆನ್ಸೀಸ್​​).