ಡ್ರ್ಯಾಗನ್ ನಾಶಕ್ಕೆ ಸಿದ್ಧವಾಯ್ತು ಭಾರತದ ಈ ಅಸ್ತ್ರ! ಫಿಲಿಪೈನ್ಸ್ ಸೇನಾ ಮುಖ್ಯಸ್ಥರ ಈ ಮಾತು ಚೀನಾಕ್ಕೆ ನಡುಕ ಹುಟ್ಟಿಸಿದ್ದು ಏಕೆ..? BrahMos Missile

ಈ ಸಂದರ್ಶನವೊದರಲ್ಲಿ ಮಾತನಾಡಿದ ಬ್ರಾವ್ನರ್, ಚೀನಾದ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದ್ದಾರೆ.

ವಿಶ್ವದ ಗಮನ ಈಗ ರಷ್ಯಾ-ಯುಕ್ರೇನ್ ಮತ್ತು ಅಮೆರಿಕ-ಇಸ್ರೇಲ್-ಇರಾನ್ ಯುದ್ಧಗಳ ಮೇಲಿದೆ. ಆದರೆ ಇಂಡೋ-ಪೆಸಿಫಿಕ್ ವಲಯದಲ್ಲಿ ನಾವು ಚೀನಾದಂತಹ ಮಹಾಶಕ್ತಿಯ ವಿರುದ್ಧ ನಿರಂತರ ಸಂಘರ್ಷ ಎದುರಿಸುತ್ತಿದ್ದೇವೆ ಎಂದು ಜನರಲ್ ಬ್ರಾವ್ನರ್ ಹೇಳಿದ್ದಾರೆ.

ದೌರ್ಜನ್ಯದ ಪಟ್ಟಿ: ಚೀನಾ ನಮ್ಮ ಮೀನುಗಾರರನ್ನು ಓಡಿಸುತ್ತಿದೆ, ನಮ್ಮ ಕೋಸ್ಟ್ ಗಾರ್ಡ್ ಹಡಗುಗಳ ಮೇಲೆ ವಾಟರ್ ಕ್ಯಾನನ್ ಪ್ರಯೋಗಿಸುತ್ತಿದೆ.

ನೈನ್-ಡ್ಯಾಶ್ ಲೈನ್ ವಿವಾದ: ಚೀನಾದ ಅಕ್ರಮ 'ನೈನ್-ಡ್ಯಾಶ್ ಲೈನ್' ನಮ್ಮ ಆರ್ಥಿಕ ವಲಯದೊಳಗೆ ನುಗ್ಗುತ್ತಿದೆ. ಅಂತಾರಾಷ್ಟ್ರೀಯ ನ್ಯಾಯಾಲಯ ಫಿಲಿಪೈನ್ಸ್ ಪರವಾಗಿ ತೀರ್ಪು ನೀಡಿದ್ದರೂ ಚೀನಾ ಅದನ್ನು ಒಪ್ಪುತ್ತಿಲ್ಲ ಎಂದು ಬ್ರಾವ್ನರ್ ಬೇಸರ ವ್ಯಕ್ತಪಡಿಸಿದರು.

ಭಾರತದಿಂದ ಈಗಾಗಲೇ ಬ್ರಹ್ಮೋಸ್ ಕ್ಷಿಪಣಿಗಳನ್ನು ಪಡೆದುಕೊಂಡಿರುವ ಫಿಲಿಪೈನ್ಸ್, ಈಗ ಮತ್ತಷ್ಟು ಕ್ಷಿಪಣಿಗಳ ಖರೀದಿಗೆ ಮುಂದಾಗಿದೆ.

ಬ್ರಹ್ಮೋಸ್ ಪಡೆದ ಭಾರತದ ಹೊರಗಿನ ಮೊದಲ ರಾಷ್ಟ್ರ ನಮ್ಮದು. ಈ ಕ್ಷಿಪಣಿ ವ್ಯವಸ್ಥೆಯು ನಮ್ಮ ದೇಶವನ್ನು ಆಕ್ರಮಿಸಲು ಅಥವಾ ನಮ್ಮ ಸಮುದ್ರವನ್ನು ನಿಯಂತ್ರಿಸಲು ಬರುವ ಯಾವುದೇ ದೇಶಕ್ಕೆ ಬಲವಾದ ಎಚ್ಚರಿಕೆಯಾಗಿದೆ. ನಮ್ಮನ್ನು ನೋಡಿ ಇಂಡೋನೇಷ್ಯಾದಂತಹ ದೇಶಗಳೂ ಬ್ರಹ್ಮೋಸ್ ಖರೀದಿಗೆ ಆಸಕ್ತಿ ತೋರಿಸುತ್ತಿವೆ ಎಂದು ಜನರಲ್ ಹೆಮ್ಮೆಯಿಂದ ನುಡಿದರು. ಈಗಾಗಲೇ ಬ್ರಹ್ಮೋಸ್‌ನ ಮೂರನೇ ಬ್ಯಾಚ್ ವಿತರಣೆಗೆ ಸಿದ್ಧವಾಗಿದೆ.

ಭಾರತದ ರಕ್ಷಣಾ ಪಡೆಗಳ ಮುಖ್ಯಸ್ಥ (CDS) ಜನರಲ್ ಅನಿಲ್ ಚೌಹಾಣ್ ಅವರೊಂದಿಗೆ ನಡೆಸಿದ ಮಾತುಕತೆಯನ್ನು ಸ್ಮರಿಸಿದ ಬ್ರಾವ್ನರ್, ದಕ್ಷಿಣ ಚೀನಾ ಸಮುದ್ರದಲ್ಲಿ ಭಾರತದ ಯುದ್ಧನೌಕೆಗಳು ಫಿಲಿಪೈನ್ಸ್ ನೌಕೆಗಳೊಂದಿಗೆ ಜಂಟಿಯಾಗಿ ಸಂಚರಿಸಬೇಕು ಎಂದು ಕೋರಿದ್ದಾರೆ. ಈ ಕೋರಿಕೆಗೆ ಸ್ಪಂದಿಸಿದ ಭಾರತದ ಯುದ್ಧನೌಕೆಗಳು ಕೇವಲ ನಾಲ್ಕು ತಿಂಗಳಲ್ಲೇ ಅಲ್ಲಿಗೆ ಆಗಮಿಸಿರುವುದು ಉಭಯ ದೇಶಗಳ ಸ್ನೇಹಕ್ಕೆ ಸಾಕ್ಷಿಯಾಗಿದೆ. ಅಷ್ಟೇ ಅಲ್ಲದೆ, ಫಿಲಿಪೈನ್ಸ್ ಸೇನಾ ಅಧಿಕಾರಿಗಳಿಗೆ ಭಾರತದ ತರಬೇತಿ ಸಂಸ್ಥೆಗಳಲ್ಲಿ ವಿಶೇಷ ಸ್ಥಾನ ನೀಡಲಾಗಿದೆ.

ವಿಶ್ವದ ಇತರ ಭಾಗಗಳಲ್ಲಿ ನಡೆಯುತ್ತಿರುವ ಯುದ್ಧಗಳು ಚೀನಾಕ್ಕೆ ಧೈರ್ಯ ತುಂಬಬಹುದು ಎಂದು ಜನರಲ್ ಆತಂಕ ವ್ಯಕ್ತಪಡಿಸಿದ್ದಾರೆ. ಯುದ್ಧಗಳ ಲಾಭ ಪಡೆದು ಚೀನಾ ತೈವಾನ್ ಮೇಲೆ ದಾಳಿ ಮಾಡುವ ಸಾಧ್ಯತೆಯಿದೆ. ಆದರೆ, ಅಮೆರಿಕವು ಇರಾನ್ ಮತ್ತು ವೆನೆಜುವೆಲಾ ವಿರುದ್ಧ ಕೈಗೊಂಡಿರುವ ಕ್ಷಿಪ್ರ ಕ್ರಮಗಳನ್ನು ನೋಡಿ ಚೀನಾ ಸ್ವಲ್ಪ ಮಟ್ಟಿಗೆ ಅಂಜಬಹುದು ಎಂದು ಅವರು ವಿಶ್ಲೇಷಿಸಿದ್ದಾರೆ.

ಒಟ್ಟಾರೆಯಾಗಿ, ದಕ್ಷಿಣ ಚೀನಾ ಸಮುದ್ರದಲ್ಲಿ ಚೀನಾದ ಏಕಸ್ವಾಮ್ಯವನ್ನು ಮುರಿಯಲು ಫಿಲಿಪೈನ್ಸ್ ಈಗ ಭಾರತದ ಬ್ರಹ್ಮೋಸ್ ಅಸ್ತ್ರವನ್ನು ನಂಬಿಕೊಂಡಿದೆ. ಇದು ಕೇವಲ ಕ್ಷಿಪಣಿಯಲ್ಲ, ಬದಲಿಗೆ ಇಂಡೋ-ಪೆಸಿಫಿಕ್ ವಲಯದ ಸುರಕ್ಷತೆಯ ಕವಚವಾಗಿದೆ,(ಏಜೆನ್ಸೀಸ್).