ತಿರುಪನಕುಂದ್ರಂ ದೀಪಂ ವಿವಾದ; ಮದ್ರಾಸ್ ಹೈಕೋರ್ಟ್ ಆದೇಶ ಪ್ರಶ್ನಿಸಿ ಸುಪ್ರೀಂ ಮೊರೆ: ಸಚಿವ ಎಸ್.ರೇಗುಪತಿ | S. Regupathy

ಚೆನ್ನೈ: ತಮಿಳುನಾಡಿನ ತಿರುಪನಕುಂದ್ರಂ ಬೆಟ್ಟದ ಮೇಲಿನ ದೀಪಥೂನ್ ಮೇಲೆ ದೀಪ ಹಚ್ಚುವಂತೆ ಆದೇಶ ನೀಡಿದ್ದ ಮಧುರೈ ಹೈಕೋರ್ಟ್ ಏಕಸದಸ್ಯ ಪೀಠದ ಆದೇಶವನ್ನು ಎತ್ತಿ ಹಿಡಿದಿದ್ದ ಮದ್ರಾಸ್ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂಕೋರ್ಟ್ ಮೊರೆ ಹೋಗಲು ಆಡಳಿತರೂಢ ಡಿಎಂಕೆ ಸರ್ಕಾರ ಮುಂದಾಗಿದೆ.

ಈ ಕುರಿತು ಮಂಗಳವಾರ ಮಾತನಾಡಿರುವ ಗಣಿ & ಖನಿಜ ಸಂಪನ್ಮೂಲ ಸಚಿವ ಎಸ್​.ರೇಗುಪತಿ, ತಿರುಪನಕುಂದ್ರಂ ಬೆಟ್ಟದ ಮೇಲಿನ ದೀಪಥೂನ್ ಮೇಲೆ ದೀಪ ಹಚ್ಚಲು ಅವಕಾಶ ನೀಡುವ ಆದೇಶವನ್ನು ಎತ್ತಿ ಹಿಡಿದ ನ್ಯಾ. ಜಿ ಜಯಚಂದ್ರನ್ ಮತ್ತು ಕೆ ಕೆ ರಾಮಕೃಷ್ಣನ್ ಅವರನ್ನೊಳಗೊಂಡ ದ್ವಿಸದಸ್ಯ ಪೀಠದ ಆದೇಶ ಕಾನೂನುಬದ್ಧವಾಗಿ ತಪ್ಪಾಗಿದೆ. ರಾಜ್ಯ ಸರ್ಕಾರವು ಈ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂಕೋರ್ಟ್ ಮೊರೆ ಹೋಗಲಿದೆ ಎಂದು ಹೇಳಿದ್ದಾರೆ.

ನ್ಯಾಯಾಧೀಶರು ಹಿಂದಿನ ವರ್ಷಗಳಲ್ಲಿ ಅಲ್ಲಿ ದೀಪ ಹಚ್ಚಲಾಗಿದೆಯೇ ಎಂದು ದೃಢಪಡಿಸಿದ ನಂತರವೇ ದೀಪ ಬೆಳಗಿಸಲು ಅವಕಾಶ ನೀಡಬೇಕಿತ್ತು. ಹಿಂದೆ ಮಾಜಿ ಸಿಎಂಗಳಾದ ರಾಜಾಜಿ, ಕೆ ಕಾಮರಾಜ್, ಎಂ ಕರುಣಾನಿಧಿ ಹಾಗೂ ಎಂ ಜಿ ರಾಮಚಂದ್ರನ್ ಅವರ ಆಳ್ವಿಕೆಯಲ್ಲಿ ಅಂತಹ ಯಾವುದೇ ಪುರಾವೆಗಳು ಇರಲಿಲ್ಲ. ಜೆ.ಜಯಲಲಿತಾ ಅವರ ಅವಧಿಯಲ್ಲಿ ದೀಪ ಹಚ್ಚುವಂತೆ ಬೇಡಿಕೆ ಬಂದಿತ್ತು. ಅದಕ್ಕೆ ಅನುಮತಿ ನಿರಾಕರಿಸಲಾಗಿತ್ತು. ಇಂದಿನ ತೀರ್ಪು ಕಾನೂನಿಗೆ ವಿರುದ್ಧವಾಗಿದೆ ಎಂದು ಪ್ರತಿಪಾದಿಸಿದ್ದಾರೆ.

ನ್ಯಾಯಾಲಯವು ತಮಿಳರ ಸಂಸ್ಕೃತಿ ಮತ್ತು ಸಂಪ್ರದಾಯವನ್ನು ರಕ್ಷಿಸಬೇಕು. ಆದರೆ ನ್ಯಾಯಾಲಯವು ಹೊಸ ಪದ್ದತಿಯನ್ನು ನಮ್ಮ ಮೇಲೆ ಏರಲಾಗುತ್ತಿದೆ ಎಂದು ತಮಿಳು ಜನ ಮಾತನಾಡ್ತಿದ್ದಾರೆ. ಇಲ್ಲಿಯವರೆಗೆ ಅಸ್ತಿತ್ವದಲ್ಲಿಲ್ಲದ ಪದ್ಧತಿಯನ್ನು ನ್ಯಾಯಾಲಯಗಳ ಮೂಲಕ ಪರಿಚಯಿಸುವುದು ದುರುದ್ದೇಶದಿಂದ ನಡೆಸಲ್ಪಡುತ್ತಿರುವಂತೆ ತೋರುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ದ್ವಿಸದಸ್ಯ ಪೀಠದ ಆದೇಶ ತಮಿಳು ಜನರ ಭಾವನೆಗಳಿಗೆ ವಿರುದ್ಧವಾಗಿದೆ. ಕೆಲವು ಪಟ್ಟಭದ್ರ ಹಿತಾಸಕ್ತಿಗಳು ಈ ವಿಷಯದಲ್ಲಿ ನುಸುಳಲು ಮತ್ತು ಕಿಡಿಗೇಡಿತನ ಆಡಲು ಪ್ರಯತ್ನಿಸುತ್ತಿವೆ. ಇದಕ್ಕೆಲ್ಲಾ ನ್ಯಾಯಾಲಯ ಅವಕಾಶ ನೀಡಬಾರದು. ಇಂಥ ವಿಷಯದಲ್ಲಿ ಕಾನೂನು ಪರಿಹಾರ ಪಡೆಯಲು ನಮಗೆ ಹಕ್ಕಿದೆ. ಹಾಗಾಗಿ ಸುಪ್ರೀಂ ಮೊರೆ ಹೋಗುತ್ತೇವೆ ಎಂದು ಹೇಳಿದ್ದಾರೆ (ಏಜೆನ್ಸೀಸ್).