ಶೋರೂಮ್‌ಗೆ ನುಗ್ಗಿ ಸ್ನಾನ ಮಾಡಿ ಕಾಫಿ ಕುಡಿದು ಮ್ಯೂಸಿಕ್ ಹಾಕಿ ಕುಣಿದು ಕುಪ್ಪಳಿಸಿ ಕೊನೆಗೆ 4 ಲಕ್ಷದ KTM ಬೈಕ್ ಕದ್ದು ಕಳ್ಳ ಪರಾರಿ! Thief

ಲಖನೌ: ಉತ್ತರ ಪ್ರದೇಶದ ವಾರಣಾಸಿಯಲ್ಲಿ ನಡೆದ ವಿಚಿತ್ರ ಕಳ್ಳತನದ ಪ್ರಕರಣವೊಂದರಲ್ಲಿ, ಖದೀಮನೊಬ್ಬ ( Thief ) ಒಟ್ಟು ನಾಲ್ಕು ಗಂಟೆಗಳಿಗೂ ಹೆಚ್ಚು ಕಾಲ ಶೋರೂಮ್‌ನಲ್ಲೇ ಬಿಡಾರ ಹೂಡಿ, ಕೊನೆಗೆ ಲಕ್ಷಾಂತರ ರೂಪಾಯಿ ಮೌಲ್ಯದ ಐಷಾರಾಮಿ ಕೆಟಿಎಂ ಬೈಕನ್ನು ಕಳವು ಮಾಡಿಕೊಂಡು ಪರಾರಿಯಾಗಿರುವ ಘಟನೆ ಇಡೀ ಪೊಲೀಸ್ ಇಲಾಖೆಯನ್ನೇ ಅಚ್ಚರಿ ಪಡುವಂತೆ ಮಾಡಿದೆ. ಸದ್ಯ ಕಳ್ಳನ ಚೆಲ್ಲಾಟದ ಸಿಸಿಟಿವಿ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ.

ವಾರಣಾಸಿಯ ಮಂದುವಾದಿಹ್ ಪ್ರದೇಶದಲ್ಲಿರುವ ಬೈಕ್​ ಶೋರೂಮ್‌ ಒಂದರಲ್ಲಿ ಈ ವಿಚಿತ್ರ ಕಳ್ಳತನ ನಡೆದಿದೆ. ಕಳ್ಳನೊಬ್ಬ ಕೇವಲ ಬೈಕ್ ಕಳವು ಮಾಡುವುದಷ್ಟೇ ಅಲ್ಲದೆ, ಶೋರೂಮ್ ಒಳಗೆ ನಾಲ್ಕು ಗಂಟೆಗಳಿಗೂ ಹೆಚ್ಚು ಕಾಲ ವಿಚಿತ್ರವಾಗಿ ವರ್ತಿಸಿರುವ ಸಿಸಿಟಿವಿ ದೃಶ್ಯಗಳು ಪೊಲೀಸರನ್ನೇ ದಂಗಾಗಿಸಿವೆ.

ಈ ಪ್ರಕರಣದ ಸಂಪೂರ್ಣ ವಿವರಣೆಗೆ ಬರುವುದಾದರೆ, ಮಂಗಳವಾರ ಮುಂಜಾನೆ ಶೋರೂಮ್ ಮ್ಯಾನೇಜರ್​ ರೋಹಿತ್ ಕುಮಾರ್ ಸಿಂಗ್ ಅವರಿಗೆ ಸೆಕ್ಯುರಿಟಿ ಗಾರ್ಡ್‌ನಿಂದ ಕರೆ ಬಂದಿತು. ಶೋರೂಮ್​ನ ಮುಖ್ಯ ಬಾಗಿಲು ಹಾನಿಗೊಳಗಾಗಿರುವುದಾಗಿ ಮ್ಯಾನೇಜರ್​ಗೆ ತಿಳಿಸಲಾಯಿತು. ಕೂಡಲೇ ಸ್ಥಳಕ್ಕೆ ಧಾವಿಸಿ ಪರಿಶೀಲಿಸಿದಾಗ, ಬಾಗಿಲಿನ ಗಾಜು ಒಡೆದು ಚೆಲ್ಲಾಪಿಲ್ಲಿಯಾಗಿ ಬಿದ್ದಿರುವುದು ಕಂಡುಬಂದಿತು. ಅಲ್ಲದೆ, ಶೋರೂಮ್‌ನಲ್ಲಿದ್ದ ದುಬಾರಿ ಕೆಟಿಎಂ ಅಡ್ವೆಂಚರ್ 390 ಎಸ್ ಬೈಕ್ ನಾಪತ್ತೆಯಾಗಿರುವುದು ಕೂಡ ಬೆಳಕಿಗೆ ಬಂದಿತು.

ಇದಾದ ಬಳಿಕ ಸಿಸಿಟಿವಿ ದೃಶ್ಯಾವಳಿಗಳನ್ನು ಚೆಕ್​ ಮಾಡಿದಾಗ ಇನ್ನಷ್ಟು ಆಘಾತಕಾರಿ ಸಂಗತಿಗಳು ಹೊರಬಂದವು. ರಾತ್ರಿ ಸುಮಾರು 11:30 ರ ಸುಮಾರಿಗೆ ಬಿಳಿ ಶರ್ಟ್ ಮತ್ತು ಜೀನ್ಸ್ ಧರಿಸಿ, ದೇವತೆಯ ಚಿತ್ರವೊಂದನ್ನು ಹಿಡಿದು ಶೋರೂಮ್ ಹೊರಗೆ ಬಂದ ಕಳ್ಳ, ಮೊದಲು ಬಾಗಿಲನ್ನು ಕತ್ತರಿಸಲು ಯತ್ನಿಸಿದ್ದಾನೆ. ಬಳಿಕ ಜೋರು ಮಳೆ ಬಂದಾಗ ಹಿಂಬದಿಗೆ ತೆರಳಿ ಬ್ಯಾನರ್ ಒಂದನ್ನು ಮೈಗೆ ಸುತ್ತಿಕೊಂಡು ಕುಳಿತು, ಮಳೆ ನಿಂತ ಬಳಿಕ ಮತ್ತೆ ಬಾಗಿಲು ಕತ್ತರಿಸುವ ಕೆಲಸ ಮುಂದುವರಿಸಿದ್ದಾನೆ.

ರಾತ್ರಿ 12:06 ರ ಸುಮಾರಿಗೆ ಶೋರೂಮ್ ಒಳಗೆ ನುಗ್ಗಿದ ಆ ವ್ಯಕ್ತಿ, ರಿಸೆಪ್ಷನ್‌ನಲ್ಲಿದ್ದ ಕಂಪ್ಯೂಟರ್ ಆನ್ ಮಾಡಿ ಕುರ್ಚಿಯಲ್ಲಿ ಕುಳಿತು ಗಿರಕಿ ಹೊಡೆದಿದ್ದಾನೆ. ಬಳಿಕ ಮಿನಿ ಫ್ರಿಡ್ಜ್‌ನಿಂದ ನೀರು ಕುಡಿದು, ಅಲ್ಲಿದ್ದ ಕಾಫಿ ಯಂತ್ರದ ಸಹಾಯದಿಂದ ಸ್ವತಃ ತಾನೇ ಕಾಫಿ ಮಾಡಿಕೊಂಡು ಕುಡಿದಿದ್ದಾನೆ. ಅಷ್ಟೇ ಅಲ್ಲದೆ, ಶೋರೂಮ್‌ನ ವಾಶ್‌ರೂಮ್‌ಗೆ ತೆರಳಿ ಸ್ನಾನ ಮಾಡಿರುವ ಆ ಕಳ್ಳ, ತನ್ನ ಬಟ್ಟೆಗಳನ್ನು ಬೈಕ್ ಮೇಲೆ ಒಣಗಿಸಿ, ಬೈಕ್ ಕವರ್ ಹರಿದು ಲುಂಗಿಯಂತೆ ಧರಿಸಿಕೊಂಡಿದ್ದಾನೆ. ನಂತರ ಶೋರೂಮ್‌ನಲ್ಲಿ ಜೋರಾಗಿ ಕುಣಿದು ಕುಪ್ಪಳಿಸಿ, ಸಂಗೀತಕ್ಕೆ ತಕ್ಕಂತೆ ನೃತ್ಯ ಮಾಡಿ ಸಂಭ್ರಮಿಸಿದ್ದಾನೆ.

ಅಂತಿಮವಾಗಿ ಶೋರೂಮ್‌ನಲ್ಲಿದ್ದ ಹೊಸ ಬ್ರಾಂಡೆಡ್ ಟೀ-ಶರ್ಟ್ ಮತ್ತು ಕ್ಯಾಪನ್ನು ಧರಿಸಿಕೊಂಡ ಆತ, ಒಟ್ಟು 4.71 ಲಕ್ಷ ರೂಪಾಯಿ ಮೌಲ್ಯದ ಕೆಟಿಎಂ ಅಡ್ವೆಂಚರ್ 390 ಎಸ್ ಬೈಕನ್ನು ಕದ್ದು ಶೋರೂಮ್‌ನಿಂದ ಹೊರಟು ಹೋಗಿದ್ದಾನೆ. ಈ ಕುರಿತು ಪ್ರಕರಣ ದಾಖಲಿಸಿಕೊಂಡಿರುವ ಮಂದುವಾದಿಹ್ ಠಾಣೆಯ ಪೊಲೀಸರು, ಫೋರೆನ್ಸಿಕ್ ತಂಡದ ಸಹಾಯದಿಂದ ಸಾಕ್ಷ್ಯ ಸಂಗ್ರಹಿಸಿದ್ದು, ತಲೆಮರೆಸಿಕೊಂಡಿರುವ ಕಳ್ಳನಿಗಾಗಿ ತೀವ್ರ ಹುಡುಕಾಟ ನಡೆಸುತ್ತಿದ್ದಾರೆ, (ಏಜೆನ್ಸೀಸ್​).