ನಾಗರ ಪಂಚಮಿ ಬಂದ್ರೆ ಸಾಕು... ಎಮ್ಮೆಯಾಗುತ್ತಾನೆ 70ರ ವೃದ್ಧ! ಹುಲ್ಲು ತಿನ್ನೋ ದೃಶ್ಯ ವೈರಲ್ | An old man acts like a buffalo

ಉತ್ತರ ಪ್ರದೇಶ: ನಾಗರ ಪಂಚಮಿ ಅಂದ್ರೆ ನಾಗದೇವರ ಪೂಜೆ, ಹಬ್ಬದ ಸಂಭ್ರಮ. ಆದ್ರೆ ಈ ದಿನದಂದು ವ್ಯಕ್ತಿಯೊಬ್ಬ ಎಮ್ಮೆಯಂತೆ ವರ್ತಿಸುತ್ತಾನೆ. ಆತ ಕೊಣನಂತೆ ಹುಲ್ಲು, ಬೂಸಾ ತಿನ್ನುವ ವಿಚಿತ್ರ ಆಚರಣೆ ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.

ಉತ್ತರ ಪ್ರದೇಶದಲ್ಲಿ ಮಹಾರಾಜ್‌ಗಂಜ್ ಜಿಲ್ಲೆಯ ರುದ್ರಾಪುರ ಶಿವನಾಥ್ ಗ್ರಾಮದಲ್ಲಿ ಈ ವಿಲಕ್ಷಣ ಘಟನೆ ನಡೆದಿದೆ. ಗ್ರಾಮದ 70 ವರ್ಷದ ನಿವೃತ್ತ ರೋಡ್‌ವೇಸ್ ಉದ್ಯೋಗಿ ಬುದ್ಧಿರಾಮ್ ಮೈ ಮೇಲೆ ಮೂರು ವರ್ಷಕ್ಕೊಮ್ಮೆ ‘ಮಹಿಷಾಸುರ’ ಮೈಮೇಲೆ ಬರುತ್ತಾನಂತೆ. ಆ ದಿನ ಪೂರ್ತಿ ಆತ ಕೋಣದಂತೆ ವರ್ತಿಸುತ್ತಾನೆ ಎಂದು ಹೇಳಲಾಗುತ್ತದೆ.

ಗ್ರಾಮಸ್ಥರ ಪ್ರಕಾರ, ಪ್ರತಿ ಮೂರು ವರ್ಷಕ್ಕೊಮ್ಮೆ ನಾಗರ ಪಂಚಮಿ ದಿನ ಬುದ್ಧಿರಾಮ್ ದೇಹದಲ್ಲಿ ಮಹಿಷಾಸುರ ಬರುತ್ತಾನೆ. ಸ್ಥಳೀಯರು ಈ ಮಹಿಷಾಸುರನನ್ನು ‘ಬಾಬಾ ಭೈಂಸಾಸುರ’ ಅಂತಲೂ ಕರೆಯುತ್ತಾರೆ. ಮಹಿಷಾಸುರ ಮೈಮೇಲೆ ಬಂದಾಗ ಬುದ್ಧಿರಾಮ್ ವರ್ತನೆಯೇ ಬದಲಾಗುತ್ತೆ ಅನ್ನೋದು ಗ್ರಾಮಸ್ಥರ ನಂಬಿಕೆ. ಅವರು ಎಮ್ಮೆಯಂತೆ ಧ್ವನಿ ಕೂಗುತ್ತಾ ಗ್ರಾಮದ ಮಾತಾ ದೇವಸ್ಥಾನದ ಬಳಿಯಿರುವ ಭೈಂಸಾಸುರನ ಮೂರ್ತಿ ಬಳಿ ಹೋಗುತ್ತಾರೆ.

ಇನ್ನು, ದೇವಸ್ಥಾನಕ್ಕೆ ಹೋದ ಬಳಿಕ ದನಗಳಿಗೆ ನೀಡುವ ಹಸಿರು ಹುಲ್ಲು, ಒಣ ಮೇವು, ಭೂಸಾವನ್ನು ಬುದ್ಧಿರಾಮ್ ನೇರವಾಗಿ ಬಾಯಿಂದಲೇ ತಿನ್ನುತ್ತಾನೆ. ಭಕ್ತರು ಬುದ್ಧಿರಾಮ್​ಗೆ ಹೂವಿನ ಹಾರ ಹಾಕಿ, ತಟ್ಟೆಯಲ್ಲಿ ಹುಲ್ಲು, ಬಾಳೆಹಣ್ಣು, ಲಡ್ಡು ಸೇರಿದಂತೆ ವಿವಿಧ ತಿನಿಸುಗಳನ್ನು ನೀಎಇ ಆಶೀರ್ವಾದ ಪಡೆಯುತ್ತಾರೆ. ಈ ದೃಶ್ಯ ನೋಡಲು ಸುತ್ತಮುತ್ತಲಿನ ಗ್ರಾಮಗಳಷ್ಟೇ ಅಲ್ಲದೆ ದೂರದ ಊರುಗಳಿಂದಲೂ ಜನ ಬರುತ್ತಾರೆ.

ಈ ವಿಚಿತ್ರ ಆಚರಣೆ ಇತ್ತೀಚಿನದ್ದಲ್ಲ. 1975ರಿಂದಲೇ ನಾಗರ ಪಂಚಮಿ ದಿನ ಈ ಸಂಪ್ರದಾಯ ನಡೆದುಕೊಂಡು ಬರುತ್ತಿದೆ. ವಿಶೇಷ ಅಂದ್ರೆ, ನಾಗರ ಪಂಚಮಿ ಹೊರತುಪಡಿಸಿ ಉಳಿದ ದಿನಗಳಲ್ಲಿ ಬುದ್ಧಿರಾಮ್ ಸಾಮಾನ್ಯ ಜೀವನ ನಡೆಸುತ್ತಾರೆ. ಗ್ರಾಮಸ್ಥರಿಗೆ ಇದು ಹಲವು ವರ್ಷಗಳಿಂದ ನಡೆದುಕೊಂಡು ಬಂದಿರುವ ಧಾರ್ಮಿಕ ನಂಬಿಕೆಯಷ್ಟೆ. ಆದರೆ ಬುದ್ಧಿರಾಮ್ ಅವರ ದೇಹದಲ್ಲಿ ನಿಜವಾಗಿಯೂ ‘ಮಹಿಷಾಸುರ’ ಪ್ರವೇಶಿಸುತ್ತಾನೆ ಎಂಬುದಕ್ಕೆ ಯಾವುದೇ ವೈಜ್ಞಾನಿಕ ಪುರಾವೆ ಇಲ್ಲ. ಈ ವಿಚಿತ್ರ ಆಚರಣೆ ಬಗ್ಗೆ ನೆಟ್ಟಿಗರಲ್ಲಿ ಭಾರೀ ಕುತೂಹಲ ಮೂಡಿಸಿದೆ.