ಈ 2 ಗ್ರಾಮಗಳಲ್ಲಿ ಹನುಮನ ದೇಗುಲಕ್ಕಿಲ್ಲ ಜಾಗ! ಮಾರುತಿ ಹೆಸರಿನ ಕಾರುಗಳ ಬಳಕೆಗೂ ನಿಷೇಧ | Lord Hanuman

ಮಹಾರಾಷ್ಟ್ರ: ನಮ್ಮ ದೇಶದಲ್ಲಿ ದೇವರಿಗೆ ವಿಶೇಷ ಸ್ಥಾನಮಾನ, ಗೌರವ, ನಂಬಿಕೆ, ಪೂಜೆ-ಪುನಸ್ಕಾರ ಸಲ್ಲುತ್ತದೆ. ನಮ್ಮ ದೈನಂದಿನ ಕೆಲಸಗಳಲ್ಲಿ ಯಾವುದೇ ಅಡೆ-ತಡೆಗಳು ಎದುರಾಗದೆ ಇರಲಿ ಎಂದು ಶುರುವಾಗುವ ಪ್ರಾರ್ಥನೆಗಳು, ನಮ್ಮ ಇಷ್ಟಾರ್ಥಗಳನ್ನು ಸಿದ್ಧಿಸಿಕೊಳ್ಳುವ ತನಕ ಇರುತ್ತದೆ. ಬಹುತೇಕ ವಿಷಯಗಳಲ್ಲಿ ದೇವರ ಮೊರೆ ಹೋಗುವ ನಮ್ಮ ಜನ, ಸಾಗುವ ದಾರಿ ಮಧ್ಯೆ ಸಿಗುವ ಒಂದಲ್ಲ ಒಂದು ದೇವಸ್ಥಾನಕ್ಕೆ ಕೈಮುಗಿದು, ಭಕ್ತಿಪೂರ್ವಕಾಗಿ ನಮಿಸಿ ಮುಂದೆ ಸಾಗುತ್ತಾರೆ. ಹೀಗಿದ್ದ ಮೇಲೆ, ಈ ಎರಡು ಗ್ರಾಮಗಳಲ್ಲಿ ಮಾತ್ರ ಶ್ರೀರಾಮನ ಬಂಟ ಹನುಮನ ದೇಗುಲಕ್ಕೆ ಜಾಗವಿಲ್ಲ ಎಂಬ ಸಂಗತಿ ನಿಜಕ್ಕೂ ಹಲವರ ಅಚ್ಚರಿಗೆ ಕಾರಣವಾಗಿದೆ.

ಇದೇ ರೀತಿ ಮಹಾರಾಷ್ಟ್ರದಲ್ಲಿಯೂ ಒಂದು ಗ್ರಾಮವಿದೆ. ಅಲ್ಲಿನ ಜನರು ದೈತ್ಯ ರಾಕ್ಷಸನನ್ನು ದೇವರಾಗಿ ಪೂಜಿಸುತ್ತಾರೆ. ಇದರಿಂದಾಗಿ, ಆ ಗ್ರಾಮದಲ್ಲಿ ಒಂದೇ ಒಂದು ಹನುಮ ದೇವಾಲಯಗಳಿಲ್ಲ. ಇನ್ನೊಂದು ಅಚ್ಚರಿ ವಿಷಯವೆಂದರೆ, ಈ ಗ್ರಾಮದಲ್ಲಿ ಮಾರುತಿ ಸಂಸ್ಥೆಯ ಯಾವುದೇ ಕಾರುಗಳು ಸಹ ಕಾಣಿಸುವುದಿಲ್ಲ. ಕಾರಣ, ಮಾರುತಿ ಎಂಬ ಹೆಸರು! ಅಸಲಿಗೆ, ಮಾರುತಿ ಅನ್ನೋ ಹೆಸರು ಮಾರುತ್ (ಗಾಳಿ) ಎಂಬ ಸಂಸ್ಕೃತ ಪದವಾಗಿದೆ. ಇದು ವಾಯುವಿನ ಮಗ ಹನುಮನ ಹೆಸರೇಳುವ ಕಾರಣ, ಇಲ್ಲಿನ ಗ್ರಾಮಸ್ಥರು ಆಂಜನೇಯನನ್ನು ಆರಾಧಿಸುತ್ತಿಲ್ಲ. ಅಷ್ಟಕ್ಕೂ, ಈ ಹಳ್ಳಿಯೂ ಮಹಾರಾಷ್ಟ್ರದ ನಂದೂರ್ ನಿಂಬ ದೈತ್ಯ. ಇದು ಅಹ್ಮದ್‌ನಗರ ಜಿಲ್ಲೆಯ ಪಠಾರ್ಡಿ ತಾಲ್ಲೂಕಿನಲ್ಲಿದೆ.

ಎರಡನೇ ಗ್ರಾಮ ದ್ರೋಣಗಿರಿ. ಇದು ಉತ್ತರಾಖಂಡದ ಚಮೋಲಿ ಜಿಲ್ಲೆಯಲ್ಲಿ ಸಮುದ್ರ ಮಟ್ಟದಿಂದ ಸುಮಾರು 11 ಸಾವಿರ ಅಡಿ ಎತ್ತರದಲ್ಲಿರುವ ಒಂದು ಕುಗ್ರಾಮ. ಮೊದಲ ನೋಟದಲ್ಲಿ, ಇದು ಬೆಟ್ಟಗಳಲ್ಲಿ ನೆಲೆಗೊಂಡಿರುವ ಸಾಮಾನ್ಯ ಹಳ್ಳಿಯಂತೆ ಕಾಣುತ್ತದೆ. ಬೆಟ್ಟ-ಗುಡ್ಡ, ಹಸಿರು ವನ, ಶಾಂತ ವಾತಾವರಣದಿಂದ ಕೂಡಿರುವ ಈ ಊರಿನಲ್ಲಿ ತಲೆಮಾರುಗಳಿಂದ ಒಂದು ಕಥೆಯನ್ನು ಅನುಸರಿಸಿಕೊಂಡು ಬರಲಾಗಿದೆ. ಅದು ಈ ಗ್ರಾಮವನ್ನು ಇಂದಿಗೂ ವಿಭಿನ್ನವಾಗಿಟ್ಟಿದೆ. ಇದು ಭಾರತದ ಅತ್ಯಂತ ಅಪರೂಪದ ಹಳ್ಳಿಗಳಲ್ಲಿ ಒಂದು ಎನ್ನಲಾಗಿದೆ.

ನಂದೂರ್ ನಿಂಬ ದೈತ್ಯ ಗ್ರಾಮದಂತೆಯೇ ಇಲ್ಲಿಯೂ ಹನುಮನನ್ನು ಆರಾಧಿಸುವುದಿಲ್ಲ. ಈ ನಂಬಿಕೆಗೆ ನೂರಾರು ವರ್ಷಗಳ ಇತಿಹಾಸವಿದೆ. ರಾಮಾಯಣದ ಪ್ರಕಾರ, ಲಂಕಾ ಯುದ್ಧದಲ್ಲಿ ಲಕ್ಷ್ಮಣ ಗಂಭೀರವಾಗಿ ಗಾಯಗೊಂಡಾಗ, ಅವನ ಜೀವ ಉಳಿಸಲು ಸಂಜೀವಿನಿ ಅಗತ್ಯವಿತ್ತು. ಇದು ಹಿಮಾಲಯದಲ್ಲಿ ಮಾತ್ರ ಲಭ್ಯವಿದೆ ಎಂದು ತಿಳಿದ ಶ್ರೀರಾಮ, ಹನುಮನನ್ನು ಅಲ್ಲಿಗೆ ಕಳುಹಿಸಿದನು. ಹನುಮಂತ ಹಿಮಾಲಯವನ್ನು ತಲುಪಿದಾಗ, ಅವನಿಗೆ ಯಾವುದೇ ಸಂಜೀವಿನಿ ಸಸ್ಯ ಸಿಗಲಿಲ್ಲ. ನಂತರ ಅವನು ಇಡೀ ಪರ್ವತವನ್ನು ಹೊತ್ತುಕೊಂಡು ಅದನ್ನು ಹೊತ್ತನು. ಈ ಕಥೆಯನ್ನು ಹನುಮನ ಶಕ್ತಿ ಮತ್ತು ಭಕ್ತಿಗೆ ಉದಾಹರಣೆಯಾಗಿ ಹೇಳಲಾಗುತ್ತದೆ. ಆದರೆ, ದ್ರೋಣಗಿರಿ ಗ್ರಾಮದಲ್ಲಿ, ಈ ಕಥೆಯನ್ನು ವಿಭಿನ್ನವಾಗಿ ಅರ್ಥೈಸಿಕೊಳ್ಳಲಾಗಿದೆ.

ಹನುಮಂತ ಎತ್ತಿದ ಪರ್ವತವು ದ್ರೋಣಗಿರಿ ಪರ್ವತ ಎಂದು ಅಲ್ಲಿನ ಜನರು ನಂಬುತ್ತಾರೆ. ಆಂಜನೇಯ ಪರ್ವತದ ಒಂದು ಭಾಗವನ್ನು ಕಸಿದುಕೊಂಡಿದ್ದರಿಂದ ಅವರ ಪವಿತ್ರ ಪರ್ವತಕ್ಕೆ ಹಾನಿಯಾಗಿದೆ ಎಂದು ಅಲ್ಲಿನವರು ಭಾವಿಸಿದ್ದಾರೆ. ಆ ಪರ್ವತವು ಆಧ್ಯಾತ್ಮಿಕ ಶಕ್ತಿಯನ್ನು ಹೊಂದಿದೆ ಮತ್ತು ಜೀವದಿಂದ ತುಂಬಿದೆ ಎಂದು ಬಲವಾಗಿ ನಂಬಿದ್ದಾರೆ. ಹನುಮಂತ ಆ ಪರ್ವತವನ್ನು ಎತ್ತೊಯ್ದಿದ್ದು ಅನ್ಯಾಯವೆಂದು ಪರಿಗಣಿಸಲಾಗಿದೆ. ಈ ಕಾರಣಕ್ಕಾಗಿ, ಈ ಗ್ರಾಮದಲ್ಲಿ ಹನುಮನನ್ನು ಪೂಜಿಸುವುದಿಲ್ಲ. ಯಾರಾದರೂ ಹನುಮನನ್ನು ಪೂಜಿಸಲು ಬಯಸಿದರೆ, ಅವರನ್ನು ಗ್ರಾಮದಿಂದ ಹೊರಗಿಡುತ್ತಾರೆ ಎನ್ನಲಾಗಿದೆ,(ಏಜೆನ್ಸೀಸ್).