ಇವರೆಲ್ಲ ನನ್ನ ಉಸಿರು ನಿಲ್ಲಿಸ್ತಾರೆ... ಈ ಆಸ್ಪತ್ರೆಯಲ್ಲಿ ಡೆಲಿವರಿ ಬೇಡವೆಂದು ಕಣ್ಣೀರಿಟ್ಟ ಯುವತಿ ಕೊನೆಗೂ ದುರಂತ ಸಾವು | Delivery Death

ಮಧ್ಯಪ್ರದೇಶ: ನನ್ನನ್ನು ಇಲ್ಲಿಂದ ಮೊದಲು ಕರೆದುಕೊಂಡು ಹೋಗಿ. ಈ ಆಸ್ಪತ್ರೆಯಲ್ಲಿ ಡೆಲಿವರಿ ಮಾಡಿಸೋದು ಬೇಡ. ಇಲ್ಲಿರುವವರ ಚಿಕಿತ್ಸೆಯಿಂದ ನಾನು ಮತ್ತು ನನ್ನ ಮಗು ಬದುಕುಳಿಯಲ್ಲ ಎಂದು ಮಗಳು (Kalpana Mishra ) ಗೊಗರೆದು, ಅಂಗಲಾಚಿ ಬೇಡಿಕೊಂಡರೂ ಕೇಳದ ಕುಟುಂಬಸ್ಥರು ಕಡೆಗೂ ಆಕೆಯನ್ನು ಕಳೆದುಕೊಂಡ ದುರ್ಘಟನೆ ಮಧ್ಯಪ್ರದೇಶದ ರೇವಾದಲ್ಲಿ ವರದಿಯಾಗಿದೆ. 

ಹೆರಿಗೆಗೂ ಕೆಲವೇ ಗಂಟೆಗಳ ಮುನ್ನ ಯುವತಿ, ತನ್ನ ಕುಟುಂಬದವರ ಬಳಿ ಇಲ್ಲಿ ಮಾತ್ರ ಚಿಕಿತ್ಸೆ ಬೇಡವೆಂದು ಕಣ್ಣೀರಾಕಿದಳು. ಇಷ್ಟಾದರೂ, ಹೆದರಬೇಡ ಮಗಳೆ ಎಂದು ಡೆಲಿವರಿಗೆ ಕಳುಹಿಸಿದ ಬಳಿಕ ಆಕೆ ಹೇಳಿದಂತೆ ಕೊನೆಗೂ ಬದುಕುಳಿಯಲು ಸಾಧ್ಯವಾಗಿಲ್ಲ. ಶಿಶುವಿನ ಜತೆ ತಾಯಿಯೂ ಮೃತಪಟ್ಟ ಸುದ್ದಿ ಕೇಳಿ ಹೆತ್ತವರು ಈಗ ಕಣ್ಣೀರಿಟ್ಟಿದ್ದಾರೆ. ಆಪರೇಷನ್​ಗೂ ಮುನ್ನ ನಡೆದ ಹೃದಯವಿದ್ರಾವಕ ದೃಶ್ಯ ಸ್ಥಳೀಯರೊಬ್ಬರ ಮೊಬೈಲ್​ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.

ಮೃತ ದುರ್ದೈವಿಯನ್ನು ಕಲ್ಪನಾ ಮಿಶ್ರಾ (25) ಎಂದು ಗುರುತಿಸಲಾಗಿದೆ. ವರದಿಗಳ ಪ್ರಕಾರ, ಯುವತಿಯನ್ನು ಮಂಗಳವಾರ (ಆ.25) ರೇವಾದ ಸಂಜಯ್ ಗಾಂಧಿ ಸ್ಮಾರಕ ಆಸ್ಪತ್ರೆಗೆ ದಾಖಲಿಸಲಾಯಿತು. ಮರುದಿನ ಆಕೆಗೆ ಸಿಸೇರಿಯನ್ ಮಾಡಲಾಯಿತು. ಈ ವೇಳೆ, ತಾಯಿ ಮತ್ತು ಮಗು ಇಬ್ಬರೂ ದಾರುಣವಾಗಿ ಸಾವಿಗೀಡಾಗಿದ್ದಾರೆ. ಈ ಮಧ್ಯೆ, ಆಪರೇಷನ್​ಗೂ ಮುನ್ನ ಕಲ್ಪನಾ ತೋಡಿಕೊಂಡ ಅಳಲು ವಿಡಿಯೋದಲ್ಲಿ ಸೆರೆಯಾಗಿದೆ. ಅದೇ ಈಗ ಹಲವರ ಆಕ್ರೋಶಕ್ಕೆ ಕಾರಣವಾಗಿದೆ. 

ಹೆರಿಗೆಗೂ ಮುನ್ನ ಕಲ್ಪನಾ ತೀವ್ರ ಭಯದಿಂದ ಆಸ್ಪತ್ರೆಯ ಸಿಬ್ಬಂದಿ ವಿರುದ್ಧ ಆತಂಕ ವ್ಯಕ್ತಪಡಿಸಿದ್ದರು. ತನ್ನನ್ನು ಬೇರೆಡೆ ಕರೆದುಕೊಂಡು ಹೋಗುವಂತೆ ಕುಟುಂಬಸ್ಥರಲ್ಲಿ ಬೇಡಿಕೊಂಡಿದ್ದರು. ಆದರೂ, ಆಪರೇಷನ್​ ಮಾಡಿಸಿದ ನಂತರ ತಾಯಿ-ಮಗು ಇಬ್ಬರೂ ಮೃತಪಟ್ಟಿದ್ದಾರೆ. ಆಸ್ಪತ್ರೆಯ ವೈದ್ಯರು ಮತ್ತು ನರ್ಸ್​ಗಳ ತೀವ್ರ ನಿರ್ಲಕ್ಷ್ಯವೇ ಎರಡು ಜೀವಗಳ ಬಲಿಗೆ ಕಾರಣ ಎಂದು ಕುಟುಂಬಸ್ಥರು ಗಂಭೀರ ಆರೋಪ ಹೊರಿಸಿದ್ದಾರೆ. 

ಕಲ್ಪನಾ ತಮ್ಮ ಆರೋಗ್ಯದ ಸಮಸ್ಯೆ ಬಗ್ಗೆ ಪದೇ ಪದೇ ಹೇಳಿಕೊಂಡರೂ ವೈದ್ಯರು ಸರಿಯಾಗಿ ಸ್ಪಂದಿಸಲಿಲ್ಲ ಎಂಬ ಆರೋಪ ಕೇಳಿಬಂದಿದೆ. ಚಿಕಿತ್ಸೆ ನೀಡುವ ಬದಲು ಆಸ್ಪತ್ರೆಯ ವೈದ್ಯರು ಹಾಗೂ ನರ್ಸ್​ಗಳು ಕಲ್ಪನಾ ಮತ್ತು ಆಕೆಯ ಹೆತ್ತವರೊಂದಿಗೆ ಬೇಕಾಬಿಟ್ಟಿಯಾಗಿ ವರ್ತಿಸಿದ್ದಾರೆ ಎಂದು ಕುಟುಂಬಸ್ಥರು ದೂರಿದ್ದಾರೆ.

ದುರಂತದ ವಿಷಯ ತಿಳಿಯುತ್ತಿದ್ದಂತೆ ಕುಟುಂಬಸ್ಥರು ಮತ್ತು ಸಂಬಂಧಿಕರು ಆಸ್ಪತ್ರೆಯ ಎದುರು ಹೆಚ್ಚಿನ ಸಂಖ್ಯೆಯಲ್ಲಿ ಜಮಾಯಿಸಿ, ವೈದ್ಯರು ಮತ್ತು ಸಿಬ್ಬಂದಿಗಳು ತೋರಿದ ಬೇಜವಾಬ್ದಾರಿ ವಿರುದ್ಧ ಪ್ರತಿಭಟನೆ ನಡೆಸಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಆಸ್ಪತ್ರೆಯ ಡೀನ್ ಸುನಿಲ್ ಅಗರ್‌ವಾಲ್ ಹಾಗೂ ಸೂಪರಿಂಟೆಂಡೆಂಟ್ ರಾಹುಲ್ ಮಿಶ್ರಾ, ಕುಟುಂಬಸ್ಥರೊಂದಿಗೆ ಮಾತನಾಡಿ ನಿಷ್ಪಕ್ಷಪಾತ ತನಿಖೆಯ ಭರವಸೆ ನೀಡಿದ್ದಾರೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).