ಬರಿಗಣ್ಣಿಗೆ ಕಾಣದ ವಿಸ್ಮಯ: ವಿಶ್ವದ ಅತಿ ಸಣ್ಣ QR ಕೋಡ್ ಈಗ ಗಿನ್ನೆಸ್ ರೆಕಾರ್ಡ್‌ಗೆ ಎಂಟ್ರಿ! QR Code

ಆದಾಗ್ಯೂ, TU ವೀನ್‌ನ ಸಂಶೋಧನಾ ತಂಡವು ಡೇಟಾ ಸ್ಟೋರೇಜ್ ಕಂಪನಿ 'ಸೆರಾಬೈಟ್' ನೊಂದಿಗೆ ಸೇರಿ, ಜಗತ್ತಿನ ಅತಿ ಸಣ್ಣ QR ಕೋಡ್ ಅನ್ನು ಅಭಿವೃದ್ಧಿಪಡಿಸುವ ಮೂಲಕ ಗಿನ್ನೆಸ್ ಬುಕ್ ಆಫ್ ರೆಕಾರ್ಡ್ಸ್‌ಗೆ ಲಗ್ಗೆ ಇಟ್ಟಿದೆ.

QR ಕೋಡ್ ಕೇವಲ 1.98 ಚದರ ಮೈಕ್ರೋಮೀಟರ್‌ಗಳ ವಿಸ್ತೀರ್ಣವನ್ನು ಒಳಗೊಂಡಿದ್ದು, ಇದು ಬ್ಯಾಕ್ಟೀರಿಯಾಗಳಿಗಿಂತ ಚಿಕ್ಕದಾಗಿದೆ. ಸಾಮಾನ್ಯ ಮನುಷ್ಯನ ಕೂದಲಿನ ಎಳೆಗಿಂತಲೂ ನೂರಾರು ಪಟ್ಟು ಚಿಕ್ಕದಾದ ಈ ಕೋಡ್ ಅನ್ನು ಬರಿಗಣ್ಣಿನಿಂದ ನೋಡುವುದು ಅಸಾಧ್ಯದ ಮಾತು. ಇದನ್ನು ನೋಡಲು ಅಥವಾ ಸ್ಕ್ಯಾನ್ ಮಾಡಲು ಅತ್ಯಾಧುನಿಕ ಎಲೆಕ್ಟ್ರಾನ್ ಮೈಕ್ರೋಸ್ಕೋಪ್ ಅಗತ್ಯವಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

ಈ ತಂತ್ರಜ್ಞಾನವು ದೀರ್ಘಕಾಲೀನ ದತ್ತಾಂಶ ಸಂಗ್ರಹಣೆಗೆ ಅಗಾಧ ಸಾಮರ್ಥ್ಯವನ್ನು ಹೊಂದಿವೆ. ಕಾಂತೀಯ ಅಥವಾ ಎಲೆಕ್ಟ್ರಾನಿಕ್ ದತ್ತಾಂಶ ಸಂಗ್ರಹ ವ್ಯವಸ್ಥೆಗಳು ಕೆಲವೇ ವರ್ಷಗಳ ಜೀವಿತಾವಧಿಯನ್ನು ಹೊಂದಿದ್ದರಿಂದ ಅವುಗಳಿಗೆ ಸೆರಾಮಿಕ್ಸ್​ ವಸ್ತುಗಳನ್ನು ಸೇರಿಸಲಾಗಿದೆ ಹಾಗಾಗಿ ಇದು ಸಹಸ್ರಮಾನಗಳವರೆಗೆ ಉಳಿಯುತ್ತದೆ ಎಂದು ಹೇಳಿದ್ದಾರೆ.

ಪ್ರಸ್ತುತ ನಾವು ಬಳಸುವ ಹಾರ್ಡ್ ಡಿಸ್ಕ್ ಅಥವಾ ಮೆಮೊರಿ ಚಿಪ್‌ಗಳು ಕೇವಲ 10-20 ವರ್ಷಗಳ ಜೀವಿತಾವಧಿ ಹೊಂದಿರುತ್ತವೆ. ಹಾಗಾಗಿ ನಾವು ಈ ಸೆರಾಮಿಕ್ ತಂತ್ರಜ್ಞಾನವನ್ನು ಬಳಸಿದಾಗ ಇದು ಮಾಹಿತಿಯನ್ನು ಸಹಸ್ರಮಾನಗಳವರೆಗೆ ಕಾಪಾಡಬಲ್ಲದು. ಆದಾಗ್ಯೂ, ಹೆಚ್ಚಿನ ಕಾರ್ಯಕ್ಷಮತೆಯ ಉಪಕರಣಗಳಿಗೆ ಬಳಸುವ ಈ ವಸ್ತುಗಳು ವಿಪರೀತ ಪರಿಸ್ಥಿತಿಗಳಲ್ಲಿಯೂ ಸ್ಥಿರವಾಗಿರುತ್ತವೆ ಮತ್ತು ಬಾಳಿಕೆ ಬರುತ್ತವೆ. ಇದೇ ಕಾರಣಕ್ಕೆ ಡೇಟಾ ಸಂಗ್ರಹಣೆಗೆ ಅತ್ಯಂತ ಸೂಕ್ತವಾಗಿವೆ ಎಂದು ಎರ್ವಿನ್ ಪೆಕ್ ಮತ್ತು ಬಾಲಿಂಟ್ ಹಜಾಸ್ ವಿವರಿಸಿದ್ದಾರೆ.

ತಂಡವು ಕೇಂದ್ರೀಕೃತ ಅಯಾನ್ ಕಿರಣಗಳನ್ನು ಬಳಸಿ, QR ಕೋಡ್ ಅನ್ನು ತೆಳುವಾದ ಸೆರಾಮಿಕ್ ಪದರಕ್ಕೆ ಮಿಲ್ ಮಾಡಿತು. ಪ್ರತ್ಯೇಕ ಪಿಕ್ಸಲ್​ ಕೇವಲ 49 ನ್ಯಾನೋಮೀಟರ್​ಗಳಷ್ಟು ಗಾತ್ರದಲ್ಲಿರುತ್ತದೆ. ಗೋಚರ ಬೆಳಕಿನ ತರಂಗಾಂತರಕ್ಕಿಂತ ಸರಿಸುಮಾರು ಹತ್ತು ಪಟ್ಟು ಚಿಕ್ಕದಾಗಿರುತ್ತವೆ. ಈ ಕಾರಣದಿಂದ ಕೋಡ್​ ಸಂಪೂರ್ಣ ಅಗೋಚರವಾಗುತ್ತದೆ. ಆದರಿಂದ ಎಲೆಕ್ಟ್ರಾನ್ ಸೂಕ್ಷ್ಮದರ್ಶಕದಿಂದ ಪರೀಕ್ಷಿಸಿದಾಗ, QR ಕೋಡ್ ಅನ್ನು ನಿಜವಾಗಿಯೂ ವಿಶ್ವಾಸಾರ್ಹವಾಗಿ ಓದಬಹುದು ಎಂದಿದ್ದಾರೆ.

ವಿಯೆನ್ನಾ ವಿಶ್ವವಿದ್ಯಾಲಯವು ಈ ಇಡೀ ಪ್ರಯೋಗಕ್ಕೆ ಸ್ವತಂತ್ರ ಪರಿಶೀಲಕರಾಗಿ ಕಾರ್ಯನಿರ್ವಹಿಸಿ, ದತ್ತಾಂಶದ ಸತ್ಯಾಸತ್ಯತೆಯನ್ನು ದೃಢಪಡಿಸಿತು. ಅತಿಸೂಕ್ಷ್ಮ QR ಕೋಡ್ ಅನ್ನು ಓದಲು USTEM ನ ಅತ್ಯಾಧುನಿಕ ಹೈಟೆಕ್ ಎಲೆಕ್ಟ್ರಾನ್ ಸೂಕ್ಷ್ಮದರ್ಶಕಗಳನ್ನು ಬಳಸಿದರು. ಸಾಧಾರಣ ಮೈಕ್ರೋಸ್ಕೋಪ್‌ಗಳು ಸೋಲುವ ಜಾಗದಲ್ಲಿ ಈ ಯಂತ್ರಗಳು ಕೋಡ್ ಅನ್ನು ನಿಖರವಾಗಿ ಸ್ಕ್ಯಾನ್ ಮಾಡಿತು. ಈ ಎಲ್ಲಾ ಹಂತಗಳನ್ನು ಕೂಲಂಕುಷವಾಗಿ ಪರಿಶೀಲಿಸಿದ ನಂತರ ಗಿನ್ನಿಸ್​ ವರ್ಲ್ಡ್​ ಸಂಸ್ಥೆಯು ಅಧಿಕೃತವಾಗಿ "ವಿಶ್ವದ ಅತಿ ಸಣ್ಣ QR ಕೋಡ್" ಎಂದು ಘೋಷಿಸಿದೆ.

ಈಗ ದೃಢಪಟ್ಟಿರುವ ವಿಶ್ವ ದಾಖಲೆಯು ಬಹಳ ಭರವಸೆಯ ಬೆಳವಣಿಗೆಯ ಆರಂಭವನ್ನು ಸೂಚಿಸುತ್ತದೆ ಎಂದು ಸಂಶೋಧಕ ಅಲೆಕ್ಸಾಂಡರ್ ಕಿರ್ನ್‌ಬೌರ್ ಹೇಳುತ್ತಾರೆ. ಆದಾಗ್ಯೂ, ನಾವು ಇತರ ವಸ್ತುಗಳನ್ನು ಬಳಸುವುದು, ಬರವಣಿಗೆಯ ವೇಗವನ್ನು ಹೆಚ್ಚಿಸುವುದು ಮತ್ತು ಸ್ಕೇಲೆಬಲ್ ಉತ್ಪಾದನಾ ಪ್ರಕ್ರಿಯೆಗಳನ್ನು ಅಭಿವೃದ್ಧಿಪಡಿಸುವ ಗುರಿಯನ್ನು ಹೊಂದಿದ್ದೇವೆ. ಇದರಿಂದ ಸೆರಾಮಿಕ್ ಡೇಟಾ ಸಂಗ್ರಹಣೆಯನ್ನು ಪ್ರಯೋಗಾಲಯಗಳಲ್ಲಿ ಮಾತ್ರವಲ್ಲದೇ ಕೈಗಾರಿಕಾ ಅನ್ವಯಿಕೆಗಳಲ್ಲಿಯೂ ಬಳಸಬಹುದು. ಅದೇ ರೀತಿ ಕೇವಲ ಒಂದು ಲಿಂಕ್ ಅಥವಾ ಸಣ್ಣ ಪಠ್ಯವನ್ನು ಹೊಂದಿರುವ QR ಕೋಡ್‌ಗಳ ಬದಲಿಗೆ, ಬೃಹತ್ ಪ್ರಮಾಣದ ಬೈನರಿ ಡೇಟಾವನ್ನು ಈ ಸೆರಾಮಿಕ್ ಪದರಗಳಲ್ಲಿ ಅಡಗಿಸುವತ್ತ ಸಂಶೋಧನೆ ನಡೆಯುತ್ತಿದೆ ಎಂದು ತಿಳಿಸಿದ್ದಾರೆ (ಏಜೆನ್ಸೀಸ್​).