ಜಗತ್ತಿಗೆ ಮತ್ತೆ ಯುದ್ಧದ ಭೀತಿ: ಅಮೆರಿಕ ವಿರುದ್ಧ ಇರಾನ್ ರಣಕಹಳೆ! ಸೇನಾ ಮುಖ್ಯಸ್ಥರ ಸ್ಪೋಟಕ ಹೇಳಿಕೆಯ ಹಿಂದಿನ ಮರ್ಮವೇನು? Iran-US Conflict

ಇರಾನ್‌ನ ಮಿಲಿಟರಿ ಪ್ರಧಾನ ಕಚೇರಿಯ ಉಪ ಮುಖ್ಯಸ್ಥ ಮೊಹಮ್ಮದ್ ಜಾಫರ್ ಅಸಾದಿ ಅವರು ಫಾರ್ಸ್' ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿ, ಅಮೆರಿಕದ ಇತ್ತೀಚಿನ ನಡೆಗಳು ಸಂಘರ್ಷಕ್ಕೆ ತುಪ್ಪ ಸುರಿಯುತ್ತಿವೆ ಎಂದು ಕಿಡಿಕಾರಿದ್ದಾರೆ.

ಅಮೆರಿಕದ ಅಧಿಕಾರಿಗಳ ಹೇಳಿಕೆಗಳು ಕೇವಲ ಮಾಧ್ಯಮ ಪ್ರಚಾರಕ್ಕಾಗಿ ಮಾತ್ರ. ಅವರ ಉದ್ದೇಶ ಬೇರೆಯೇ ಇದೆ. ಮೊದಲನೆಯದಾಗಿ ತೈಲ ಬೆಲೆಗಳು ಕುಸಿಯದಂತೆ ತಡೆಯುವುದು, ಎರಡನೆಯದಾಗಿ ತಾವು ಸೃಷ್ಟಿಸಿದ ಗೊಂದಲದ ಗೂಡಿನಿಂದ ತಾವೇ ಹೇಗಾದರೂ ಮಾಡಿ ಪಾರಾಗುವುದು. ಆದರೆ ಅಮೆರಿಕನ್ನರ ಯಾವುದೇ ಮೂರ್ಖತನದ ಸಾಹಸಕ್ಕೆ ತಕ್ಕ ಉತ್ತರ ನೀಡಲು ಇರಾನ್ ಸೈನ್ಯ ಸರ್ವಸನ್ನದ್ಧವಾಗಿದೆ ಎಂದು ಅಸಾದಿ ಗುಡುಗಿದ್ದಾರೆ.

ಇತ್ತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ಇತ್ತೀಚೆಗೆ ಸಲ್ಲಿಸಿದ ಸಂಧಾನದ ಪ್ರಸ್ತಾವನೆಯನ್ನು ಸಾರಾಸಗಟಾಗಿ ತಿರಸ್ಕರಿಸಿದ್ದಾರೆ. ವೈಟ್ ಹೌಸ್‌ನಿಂದ ಫ್ಲೋರಿಡಾಕ್ಕೆ ತೆರಳುವ ಮುನ್ನ ಸುದ್ದಿಗಾರರೊಂದಿಗೆ ಮಾತನಾಡಿದ ಟ್ರಂಪ್, ಇರಾನ್ ಒಪ್ಪಂದ ಮಾಡಿಕೊಳ್ಳಲು ಬಯಸುತ್ತಿದೆ ನಿಜ, ಆದರೆ ಅವರು ಕೇಳುತ್ತಿರುವ ರಿಯಾಯಿತಿಗಳನ್ನು ನೀಡಲು ನಾನು ಸಿದ್ಧನಿಲ್ಲ. ಅವರ ಪ್ರಸ್ತಾವನೆಯಿಂದ ನನಗೆ ತೃಪ್ತಿಯಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಅಷ್ಟೇ ಅಲ್ಲದೆ, ಇರಾನ್ ನಾಯಕತ್ವವು ಪ್ರಸ್ತುತ ಎರಡು-ಮೂರು ಗುಂಪುಗಳಾಗಿ ಸೀಳಲ್ಪಟ್ಟಿದ್ದು, ಅಲ್ಲಿ ಸಮನ್ವಯದ ಕೊರತೆಯಿದೆ ಎಂದು ಟ್ರಂಪ್ ಲೇವಡಿ ಮಾಡಿದ್ದಾರೆ.

ಇರಾನ್ ವಿರುದ್ಧದ ಯುದ್ಧದ ಬಗ್ಗೆ ಮಾತನಾಡುತ್ತಾ ಟ್ರಂಪ್ ಮತ್ತೊಮ್ಮೆ ಆಕ್ರಮಣಕಾರಿ ಧಾಟಿ ಅನುಸರಿಸಿದ್ದಾರೆ. ನಾವು ಯುದ್ಧದ ಸ್ಥಿತಿಯಲ್ಲಿರಲು ಪ್ರಮುಖ ಕಾರಣವೆಂದರೆ, ಹುಚ್ಚರ ಕೈಗೆ ಪರಮಾಣು ಅಸ್ತ್ರಗಳನ್ನು ಸಿಗದಂತೆ ಮಾಡುವುದು. ಈ ಮಾತನ್ನು ನೀವೆಲ್ಲರೂ ಒಪ್ಪುತ್ತೀರಿ ಎಂದು ಭಾವಿಸುತ್ತೇನೆ ಎಂದು ಸಾರ್ವಜನಿಕ ಸಮಾವೇಶವೊಂದರಲ್ಲಿ ಹೇಳಿದ್ದಾರೆ.

ಕದನ ವಿರಾಮ ಜಾರಿಯಲ್ಲಿದ್ದರೂ ಸಹ, ಟ್ರಂಪ್ ಅವರು ಅಮೆರಿಕದ ವಾರ್ ಪವರ್ಸ್ ರೆಸಲ್ಯೂಶನ್ ಅನ್ನು ಅಸಂವಿಧಾನಿಕ ಎಂದು ಕರೆದಿದ್ದಾರೆ. ಮೇ 1ರ ಗಡುವು ಮುಗಿಯುತ್ತಿದ್ದರೂ ಕಾಂಗ್ರೆಸ್ ಯಾವುದೇ ಕ್ರಮ ಕೈಗೊಳ್ಳದ ಕಾರಣ, ಅಧ್ಯಕ್ಷರಿಗೆ ಯುದ್ಧದ ವಿಷಯದಲ್ಲಿ ಹೆಚ್ಚಿನ ಅಧಿಕಾರ ಸಿಕ್ಕಂತಾಗಿದೆ.

ತೈಲ ಮಾರುಕಟ್ಟೆಯ ಆತಂಕ: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ವಾತಾವರಣ ನಿರ್ಮಾಣವಾದರೆ ಜಾಗತಿಕ ಮಟ್ಟದಲ್ಲಿ ತೈಲ ಸರಬರಾಜಿಗೆ ಧಕ್ಕೆಯಾಗುವ ಭೀತಿ ಇದೆ.

ಪರಮಾಣು ರಾಜತಾಂತ್ರಿಕತೆ: ಇರಾನ್ ತನ್ನ ಪರಮಾಣು ಕಾರ್ಯಕ್ರಮವನ್ನು ಮುಂದುವರಿಸುತ್ತಿರುವುದು ಅಮೆರಿಕ ಮತ್ತು ಇಸ್ರೇಲ್‌ಗೆ ನುಂಗಲಾರದ ತುತ್ತಾಗಿದೆ.

ಅಧಿಕಾರಗಳ ಸಂಘರ್ಷ: ಅಮೆರಿಕದ ಒಳಗಡೆ ಯುದ್ಧ ಘೋಷಿಸುವ ಅಧಿಕಾರ ಅಧ್ಯಕ್ಷರಿಗಿದೆಯೇ ಅಥವಾ ಸಂಸತ್ತಿಗಿದೆಯೇ ಎಂಬ ಸಾಂವಿಧಾನಿಕ ಬಿಕ್ಕಟ್ಟು ತಲೆದೋರಿದೆ.

ಇರಾನ್‌ನ ಸಶಸ್ತ್ರ ಪಡೆಗಳು ಈಗ ಹೈ ಅಲರ್ಟ್​ನಲ್ಲಿವೆ. ಯಾವುದೇ ಕ್ಷಣದಲ್ಲಿ ಅಮೆರಿಕ ಅಥವಾ ಇಸ್ರೇಲ್ ಕಡೆಯಿಂದ ದಾಳಿ ನಡೆದರೆ ತಿರುಗೇಟು ನೀಡಲು ಇರಾನ್ ಕ್ಷಿಪಣಿಗಳನ್ನು ಸನ್ನದ್ಧಗೊಳಿಸಿದೆ ಎಂಬ ವರದಿಗಳಿವೆ. ಅಂತಾರಾಷ್ಟ್ರೀಯ ಸಮುದಾಯವು ಈ ಬಿಕ್ಕಟ್ಟನ್ನು ಶಮನಗೊಳಿಸಲು ಪ್ರಯತ್ನಿಸುತ್ತಿದ್ದರೂ, ಎರಡೂ ಕಡೆಯ ನಾಯಕರ ಹೇಳಿಕೆಗಳು ಯುದ್ಧದ ಮುನ್ಸೂಚನೆಯನ್ನೇ ನೀಡುತ್ತಿವೆ.

ಒಪ್ಪಂದಗಳು ಮುರಿದುಬಿದ್ದಿರುವುದು ಮತ್ತು ಮಾತುಕತೆಗಳು ವಿಫಲವಾಗಿರುವುದು ಜಾಗತಿಕ ಮಾರುಕಟ್ಟೆಯ ಮೇಲೆ ಕೆಟ್ಟ ಪರಿಣಾಮ ಬೀರುವ ಸಾಧ್ಯತೆಯಿದೆ. ಒಂದು ವೇಳೆ ಯುದ್ಧ ಪುನರಾರಂಭಗೊಂಡರೆ, ಅದು ಕೇವಲ ಎರಡು ದೇಶಗಳ ನಡುವಿನ ಸಂಘರ್ಷವಾಗಿ ಉಳಿಯದೆ ಇಡೀ ವಿಶ್ವದ ಆರ್ಥಿಕತೆಯ ಮೇಲೆ ಪ್ರಭಾವ ಬೀರಲಿದೆ,(ಏಜೆನ್ಸೀಸ್).