ನನ್ನಿಂದಲೇ ಬೆಳೆದ ದ್ರೋಹಿ ಈಗ ಶತ್ರುಗಳ ಜೊತೆ ಸೇರಿಕೊಂಡಿದ್ದಾನೆ! ಸಿಎಂ ಸುವೇಂದು ವಿರುದ್ಧ ಗುಡುಗಿದ ದೀದಿ! Mamata Banerjee

ಕೋಲ್ಕತ್ತಾದ ಎಸ್‌ಪ್ಲನೇಡ್‌ನ ‘ವೈ-ಚಾನೆಲ್ ವೃತ್ತದಲ್ಲಿ ಮಮತಾ ತಮ್ಮ ಹಿರಿಯ ನಾಯಕರೊಂದಿಗೆ ಧರಣಿ ಕುಳಿತಿದ್ದಾರೆ. ಮೊದಲು ರಾಣಿ ರಾಶ್ಮೋನಿ ರಸ್ತೆಯಲ್ಲಿ ಪ್ರತಿಭಟನೆಗೆ ಪ್ಲಾನ್ ಮಾಡಲಾಗಿತ್ತಾದರೂ, ಕೋಲ್ಕತ್ತಾ ಪೊಲೀಸರು ಇದಕ್ಕೆ ಕಟ್ಟುನಿಟ್ಟಿನ ಅನುಮತಿ ನಿರಾಕರಿಸಿದ್ದರು. ಪೊಲೀಸರ ಕ್ರಮಕ್ಕೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ ಮಮತಾ, ವಿಧಾನಸಭೆ ಚುನಾವಣೆ ಮುಗಿದ ಮೇಲೆ ನಮ್ಮ ೧೨ ಜನ ಟಿಎಂಸಿ ಕಾರ್ಯಕರ್ತರನ್ನು ಭೀಕರವಾಗಿ ಕೊಲೆ ಮಾಡಲಾಗಿದೆ. ಸಹಸ್ರಾರು ಜನರನ್ನು ಜೈಲಿಗಟ್ಟಲಾಗಿದ್ದು, ಸಾವಿರಾರು ಕಾರ್ಯಕರ್ತರು ಪ್ರಾಣಭಯದಿಂದ ಮನೆ ಬಿಟ್ಟು ಓಡಿಹೋಗಿದ್ದಾರೆ. ಇಂತಹ ಕಷ್ಟದ ಸಮಯದಲ್ಲಿ ನನ್ನ ಕಾರ್ಯಕರ್ತರನ್ನು ನಾನು ಕೈಬಿಡುವುದಿಲ್ಲ. ಪ್ರಜಾಪ್ರಭುತ್ವದ ಪ್ರತಿಭಟನೆಗಳನ್ನು ಹತ್ತಿಕ್ಕಲಾಗುತ್ತಿದೆ. ನಮ್ಮನ್ನು ಎಲ್ಲಿ ತಡೆಯುತ್ತಾರೋ ಅಲ್ಲೇ ರಸ್ತೆ ಮಧ್ಯೆ ಕುಳಿತುಕೊಳ್ಳುತ್ತೇನೆ, ಬೇಕಿದ್ದರೆ ನನ್ನನ್ನು ಅರೆಸ್ಟ್ ಮಾಡಲಿ ಎಂದು ಸವಾಲು ಹಾಕಿದ್ದಾರೆ.

ತಮ್ಮ ಭಾಷಣದುದ್ದಕ್ಕೂ ಬಿಜೆಪಿ ಹಾಗೂ ಪ್ರಸ್ತುತ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ವಿರುದ್ಧ ವೈಯಕ್ತಿಕ ಹಾಗೂ ರಾಜಕೀಯ ವಾಗ್ದಾಳಿ ನಡೆಸಿದ ದೀದಿ, ನನ್ನ ಇಡೀ ಜೀವನದಲ್ಲಿ ಯಾರಿಗೆಲ್ಲಾ ನಾನು ರಾಜಕೀಯ ಆಶ್ರಯ ಕೊಟ್ಟು ಬೆಳೆಸಿದೆನೋ, ಅವರೆಲ್ಲಾ ಈಗ ದ್ರೋಹಿಗಳಾಗಿ ಶತ್ರುಗಳೊಂದಿಗೆ ಕೈಜೋಡಿಸಿರುವುದು ನನ್ನ ಜೀವನದ ಅತಿ ದೊಡ್ಡ ದುರಂತ. ನಾನು ಆ ನಾಯಕನ ತಂದೆ ಮತ್ತು ಕುಟುಂಬವನ್ನು ದಶಕಗಳಿಂದ ಬಲ್ಲವಳಾಗಿದ್ದರಿಂದಲೇ ಆತನಿಗೆ ರಾಜಕೀಯದಲ್ಲಿ ಉನ್ನತ ಸ್ಥಾನ ಮತ್ತು ಟಿಕೆಟ್ ನೀಡಿದ್ದೆ. ಈಗ ನನ್ನ ಸೋದರಳಿಯ ಅಭಿಷೇಕ್ ಬ್ಯಾನರ್ಜಿಯನ್ನು ಸಂಘಟನೆಯಿಂದ ಹೊರಹಾಕಿದರೆ ಕೆಲವು ನಾಯಕರು ಮತ್ತೆ ಟಿಎಂಸಿಗೆ ಮರಳುತ್ತಾರೆ ಎಂಬ ಸಂದೇಶವನ್ನು ನನಗೆ ಕಳುಹಿಸಲಾಗುತ್ತಿದೆ. ಆದರೆ ಯಾವುದೇ ಬ್ಲ್ಯಾಕ್‌ಮೇಲ್‌ಗೆ ನಾನು ಬಗ್ಗುವುದಿಲ್ಲ ಎಂದು ದೀದಿ ಗುಡುಗಿದ್ದಾರೆ.

ಈ ಸತ್ಯಾಗ್ರಹದಲ್ಲಿ ಮಮತಾ ಅವರೊಂದಿಗೆ ಪಕ್ಷದ ಹಳೆಯ ಆಪ್ತ ವಲಯದ ಘಟಾನುಘಟಿ ನಾಯಕರಾದ ಫಿರ್ಹಾದ್ ಹಕೀಮ್, ಮದನ್ ಮಿತ್ರಾ, ಡೆರೆಕ್ ಒಬ್ರಿಯನ್, ಕಲ್ಯಾಣ್ ಬ್ಯಾನರ್ಜಿ ಮತ್ತು ಡೋಲಾ ಸೇನ್ ಭುಜಕ್ಕೆ ಭುಜ ಕೊಟ್ಟು ಕುಳಿತಿದ್ದರು. ಆದರೆ, ಇತ್ತೀಚಿನ ಚುನಾವಣೆಯಲ್ಲಿ ಟಿಎಂಸಿ ಟಿಕೆಟ್‌ನಿಂದ ಗೆದ್ದಿದ್ದ ಬಹುತೇಕ ಹೊಸ ಮುಖಗಳು ಮತ್ತು ಯುವ ಶಾಸಕರು ಈ ಪ್ರತಿಭಟನೆಯಿಂದ ದೂರ ಉಳಿದಿರುವುದು ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.

ಕಳೆದ ಶನಿವಾರ ಸಂಸದ ಅಭಿಷೇಕ್ ಬ್ಯಾನರ್ಜಿ ಮೇಲಾದ ಭೀಕರ ಮೊಟ್ಟೆ ಹಲ್ಲೆ, ಬೀದಿಬದಿ ವ್ಯಾಪಾರಿಗಳ ಪುನರ್ವಸತಿ ರಹಿತ ಒಕ್ಕಲೆಬ್ಬಿಸುವಿಕೆ ಹಾಗೂ ದೇಶಾದ್ಯಂತ ಸದ್ದು ಮಾಡುತ್ತಿರುವ ನೀಟ್ ಪರೀಕ್ಷೆಯ ಅಕ್ರಮಗಳ ವಿರುದ್ಧವೂ ಈ ಧರಣಿ ಮುಂದುವರಿಯಲಿದ್ದು, ಸಂಜೆಯವರೆಗೂ ದೀದಿ ರಸ್ತೆಯಲ್ಲೇ ಇರಲಿದ್ದಾರೆ ಎಂದು ಪಕ್ಷ ಪ್ರಕಟಿಸಿದೆ. ಬಂಗಾಳ ಮತ್ತು ಕೋಲ್ಕತ್ತಾವನ್ನು ಈಗ ಗೂಂಡಾಗಳ ಕೈಗೆ ಒಪ್ಪಿಸಲಾಗಿದೆ ಎಂದು ಮಮತಾ ತೀವ್ರ ಆತಂಕ ಹೊರಹಾಕಿದ್ದಾರೆ.

ಪಶ್ಚಿಮ ಬಂಗಾಳದಲ್ಲಿ ದಶಕಗಳ ನಂತರ ಅಧಿಕಾರ ಕಳೆದುಕೊಂಡಿರುವ ಟಿಎಂಸಿ, ಈಗ ಬೀದಿ ಹೋರಾಟದ ಮೂಲಕವೇ ಬಿಜೆಪಿಯ ಹೊಸ ಸರ್ಕಾರಕ್ಕೆ ಆಘಾತ ನೀಡಲು ರಣತಂತ್ರ ರೂಪಿಸುತ್ತಿದ್ದು, ಬಂಗಾಳದಾದ್ಯಂತ ಹೈ ಅಲರ್ಟ್ ಘೋಷಿಸಲಾಗಿದೆ,(ಏಜೆನ್ಸೀಸ್​).