ದ್ರಾವಿಡ ದಂಗಲ್‌ನಲ್ಲಿ ಬದಲಾವಣೆಯ ಮಂತ್ರ

ಕರ್ನಾಟಕ ಹಾಗೂ ಆಂಧ್ರಪ್ರದೇಶ ಗಡಿಗೆ ಹೊಂದಿಕೊಂಡ ವಿಧಾನಸಭಾ ಕ್ಷೇತ್ರದ ಗ್ರಾಮೀಣ ಮತ್ತು ನಗರ ಪ್ರದೇಶದ ಹತ್ತಾರು ಮತದಾರರನ್ನು 'ವಿಜಯವಾಣಿ' ಮಾತಿಗೆಳೆದಾಗ, ಬದಲಾವಣೆಯ ಮನ್ವಂತರಕ್ಕೆ ಕಾಯುತ್ತಿದ್ದಾನೆ ಎಂಬಂತೆ ಕಾಣಿಸುತ್ತದೆಯಾದರೂ ಮತದಾರನ ನಿಲುವು ಅಸ್ಪಷ್ಟ.

ಆಡಳಿತಾರೂಢ ಡಿಎಂಕೆ ಸರ್ಕಾರದ ವಿರುದ್ಧ ಬೀಸುತ್ತಿರುವ ‘ಆಡಳಿತ ವಿರೋಧಿ ಅಲೆ’ ವೇಗ ಕಳೆದುಕೊಂಡಿದೆ ಎಂಬುದು ಮೇಲ್ನೋಟಕ್ಕೆ ಗೋಚರಿಸುತ್ತಿದೆ. ಆದರೆ, ಈ ತೆಳು ಅಲೆಯ ಹಿಂದೆ ಒಂದು ರೀತಿಯ ಅತೃಪ್ತಿಯ ನಿಶ್ಯಬ್ದವಂತೂ ಅಡಗಿದೆ. ಸರ್ಕಾರ ಜಾರಿಗೆ ತಂದ ಜನಪ್ರಿಯ ಯೋಜನೆಗಳು ಜನರಿಗೆ ತಲುಪಿವೆಯಾದರೂ, ಸ್ಥಳೀಯ ಮಟ್ಟದ ಆಡಳಿತದ ವೈಫಲ್ಯಗಳು, ಅನಗತ್ಯ ರಾಜಕಾರಣದ ನಡೆಗಳು ಸಮಾಧಾನವಿಲ್ಲದ ಸ್ಥಿತಿಯನ್ನು ನಿರ್ಮಿಸಿವೆ.

ತಮಿಳು ದಾರ್ಶನಿಕರೊಬ್ಬರು ಹೇಳಿದಂತೆ, ‘ಮಾಡಬಾರದ ಕೆಲಸ ಮಾಡುವುದರಿಂದ ಕೆಡುಕು, ಮಾಡಬೇಕಾದ ಕೆಲಸ ಮಾಡದೆ ಬಿಡುವುದರಿಂದಲೂ ಕೆಡುಕು’ ಎಂಬ ಮಾತು ಈ ಹಂತದಲ್ಲಿ ತಮಿಳುನಾಡು ರಾಜಕಾರಣಕ್ಕೆ ಒಗ್ಗುತ್ತದೆ. ಅಂದರೆ, ಆಡಳಿತ ಜನಪರವಾಗಿದ್ದರೂ ಪ್ರಜೆಯ ನಿರೀಕ್ಷೆಗಳು ಮುಗಿಲು ಮುಟ್ಟಿರುವಾಗ ಆಡಳಿತಾರೂಢ ಪಕ್ಷದ ಸಣ್ಣ ತಪ್ಪುಗಳೂ ಮುಳುವಾಗುವ ಸಾಧ್ಯತೆಯಿದೆ. ಇನ್ನು ವಿರೋಧ ಪಕ್ಷದ ಪಾಳಯದಲ್ಲಿ ಗಟ್ಟಿ ನಾಯಕತ್ವದ ಕೊರತೆ ಎದ್ದು ಕಾಣುತ್ತಿದೆ. ಗುಂಪುಗಾರಿಕೆಯೂ ವಿಪರೀತವಾಗಿದೆ. ಜಯಲಲಿತಾ ಅವರ ನಿಧನದ ನಂತರ ಎಐಎಡಿಎಂಕೆ ಚದುರಿಹೋಗಿದ್ದು, ತೂತುಬಿದ್ದ ದೋಣಿಯಂತಾಗಿದೆ. ಆದರೆ ಎನ್‌ಡಿಎ ಸೇರಿಕೊಂಡಿದ್ದು ಮತ್ತು ಬಿಜೆಪಿ ಹೊಸ ತಲೆಮಾರಿನ ನಾಯಕ ಅಣ್ಣಾಮಲೈ ಬಿರುಸಿನ ಓಡಾಟ ಸ್ಪಷ್ಟ ಅಲೆ ಎಬ್ಬಿಸುತ್ತಿದೆ.

ಈ ಬಾರಿಯ ವಿಶೇಷವೆಂದರೆ, ದ್ರಾವಿಡ ಪಕ್ಷಗಳ ನಡುವೆ ಮೂರನೇ ಶಕ್ತಿಯಾಗಿ ನಟ ವಿಜಯ್ ಅವರ ‘ತಮಿಳಗ ವೆಟ್ರಿ ಕಳಗಂ’ (ಟಿವಿಕೆ) ಪ್ರವೇಶಿಸಿರುವುದು. ಸಾಂಪ್ರದಾಯಿಕ ಮತಬ್ಯಾಂಕ್‌ಗಳಿಗೆ ಲಗ್ಗೆ ಇಡುವ ಇವರ ಪ್ರಯತ್ನವು ಯುವ ಸಮೂಹವನ್ನು ಸೆಳೆಯುತ್ತಿದೆ. ಆದರೆ, ಇದು ಮತವಾಗಿ ಪರಿವರ್ತನೆಯಾಗುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ. ಫಲಿತಾಂಶದ ಮೇಲೆ ಹೊಸ ಪಕ್ಷ ಯಾವ ರೀತಿ ಪರಿಣಾಮ ಬೀರಲಿದೆ ಎಂಬುದಷ್ಟೇ ಕುತೂಹಲ. ತಮಿಳುನಾಡಿನ ಅಸ್ಮಿತೆ ಮತ್ತು ಭಾಷಾಪ್ರೇಮ ಎಂದಿಗೂ ಇಲ್ಲಿನ ಚುನಾವಣೆಯ ಮುಖ್ಯ ಅಸ್ತ್ರ. ಕೇಂದ್ರ ಸರ್ಕಾರದ ನೀತಿಗಳು ಮತ್ತು ರಾಜ್ಯ ಹಕ್ಕುಗಳ ನಡುವಿನ ಸಂಘರ್ಷವನ್ನು ಆಡಳಿತಾರೂಢ ಪಕ್ಷವು ‘ಒಕ್ಕೂಟ ವ್ಯವಸ್ಥೆಯ ಉಳಿವು’ ಎಂಬ ಭಾವನಾತ್ಮಕ ನೆಲೆಯಲ್ಲಿ ಬಳಸಿಕೊಳ್ಳುತ್ತಿದೆ. ಆದರೆ, ಸಾಮಾನ್ಯ ಮತದಾರನಿಗೆ ಮೂಲಭೂತ ಸಮಸ್ಯೆಗಳೇ ಆದ್ಯತೆಯಾಗಿ ಕಾಣಿಸಿದೆ. ಭಾವನೆ ಮತ್ತು ಬದುಕಿನ ನಡುವಿನ ಈ ಹಗ್ಗಜಗ್ಗಾಟದಲ್ಲಿ ಮತದಾರ ಯಾರ ಪರವಾಗಿ ವಾಲಿದ್ದಾನೆ ಎಂಬುದು ಇನ್ನೂ ನಿಗೂಢವಾಗಿದೆ. ಸ್ಥಳೀಯ ರಾಜಕೀಯ ವಿಶ್ಲೇಷಕರ ಪ್ರಕಾರ, ಈ ಬಾರಿ ‘ತಟಸ್ಥ ಮತದಾರರು’ ನಿರ್ಣಾಯಕ ಪಾತ್ರ ವಹಿಸಲಿದ್ದಾರೆ. ಇವರು ಯಾವುದೇ ಪಕ್ಷದ ನಿಷ್ಠಾವಂತ ಕೇಡರ್ ಆಗಿರದೆ, ಕೇವಲ ಆಡಳಿತದ ಗುಣಮಟ್ಟವನ್ನು ನೋಡಿ ಮತ ಚಲಾಯಿಸುವವರಾಗಿದ್ದಾರೆ. ಇವರ ಸಂಖ್ಯೆಯೇ ಫಲಿತಾಂಶದ ಮೇಲೆ ಅಂತಿಮ ಮುದ್ರೆ ಒತ್ತಲಿದೆ. ಮತದಾರರ ಅಭಿಪ್ರಾಯ ಕೇಳಿದರೆ ‘ಕ್ಲೋಸ್ ಫೈಟ್’ ಎಂಬುದು ಸರ್ವೇಸಾಮಾನ್ಯ ಉತ್ತರ. ‘ಒನ್ ಸೈಡ್’ ಅಲ್ಲವೇ ಅಲ್ಲ ಎಂಬುದು ಸ್ಪಷ್ಟ.

ಒಟ್ಟಾರೆ ತಮಿಳುನಾಡು ಚುನಾವಣೆಯು ಈಗ ಸಂಕೀರ್ಣ ಹಾದಿಯಲ್ಲಿದೆ. ಇದು ಹಳಬರ ಉಳಿವಿನ ಹೋರಾಟವೋ ಅಥವಾ ಹೊಸಬರ ಉದಯದ ಹಾದಿಯೋ ಎಂಬುದು ಶೀಘ್ರದಲ್ಲೇ ಸ್ಪಷ್ಟವಾಗಲಿದೆ. ಅಲ್ಲಿಯವರೆಗೆ ತಮಿಳು ರಾಜಕೀಯದ ಈ ಚದುರಂಗದಾಟದಲ್ಲಿ ಪ್ರತಿಯೊಂದು ನಡೆಯೂ ರೋಚಕವಾಗಿರಲಿದೆ.

ಹೊಸೂರಿನಲ್ಲಿ ವಿಮಾನ ನಿಲ್ದಾಣ ಹಾಗೂ ನಾಲೆಡ್ಜ್ ಸಿಟಿ ಮಾಡಲು ತಮಿಳುನಾಡು ಸರ್ಕಾರ ಸಾವಿರಾರು ಎಕರೆ ಭೂಸ್ವಾಧೀನಕ್ಕೆ ಮುಂದಾಗಿರುವುದು ಈ ಭಾಗದ ರೈತರನ್ನು ಕೆರಳಿಸಿದೆ. ಈಗಾಗಲೇ ಹೊಸೂರು ಭಾಗದಲ್ಲಿ ಶೇಕಡ 70ರಷ್ಟು ಭೂಮಿ ಕೈಗಾರಿಕೆಗೆ ಬಳಸಿದ್ದು, ಮತ್ತೂ ಭೂಸ್ವಾಧೀನ ಸರಿಯಲ್ಲ ಎಂದು ಹೋರಾಟ ನಡೆಸಿದ್ದು, ಇದರ ಬಿಸಿ ಡಿಎಂಕೆಗೆ ಸ್ಪಷ್ಟವಾಗಿ ತಟ್ಟಿದೆ. 20 ಸಾವಿರ ಕುಟುಂಬಗಳು ಸಂತ್ರಸ್ತರಾಗುವುದರಿಂದ ಮೂರು ವಿಧಾನಸಭಾ ಕ್ಷೇತ್ರಗಳಲ್ಲಿ ಇದೇ ಪ್ರಧಾನ ರಾಜಕೀಯ ವಿಷಯವಾದಂತೆ ಕಾಣಿಸಿದೆ.