ಬಣ್ಣ ಬದಲಿಸುತ್ತಿದೆ ಅಂತರ್ಜಾಲ ಕಾವಲುಗಾರನ ಕೋಲು

ಇನ್ನೇನು ಸ್ಟೇಷನ್ನಿಗೆ ಹತ್ತು ನಿಮಿಷ ದೂರವಿರುವಾಗ ಎದುರುಗಡೆ ಟ್ರಾಫಿಕ್ ಪೋಲಿಸರ ‘ಇಂಟರ್​ಸೆಪ್ಟರ್’ ಗಾಡಿಯು ಆತುರದಲ್ಲಿ ವೇಗವಾಗಿ ಬರುತ್ತಿದ್ದ ನನ್ನ ಗಾಡಿಯನ್ನು ಗುರುತಿಸಿ ನಿಲ್ಲಿಸಿತು. ಧುತ್ತನೆ ಬ್ರೇಕ್ ಒತ್ತಿ ವಾಸ್ತವಲೋಕಕ್ಕೆ ಬಂದ ನನಗೆ ಅತಿವೇಗವಾಗಿ ಗಾಡಿ ಚಲಾಯಿಸುತ್ತಿದ್ದ ಕಾರಣಕ್ಕೆ ಪೋಲಿಸರು ಹರಿದ ದಂಡದ ಚೀಟಿ ಕಾಣಿಸಿತು. ತಪ್ಪಿನ ಅರಿವಾಗಿ ದಂಡ ತೆತ್ತು ಪ್ರಾಯಶ್ಚಿತ್ತಪಡುತ್ತ ಈ ಬಾರಿ ಸಾವಕಾಶವಾಗಿ ಕಾರು ಚಲಾಯಿಸಿಕೊಂಡು ನಿಲ್ದಾಣಕ್ಕೆ ಬಂದಿಳಿದ ನನಗೆ ಅಮ್ಮನ ಟ್ರೈನು ಇನ್ನೂ ನಿಲ್ದಾಣ ತಲುಪದಿರುವ ವಿಷಯ ಗಮನಕ್ಕೆ ಬಂತು.

ಇಂದಿನ ವೇಗದ ಜಮಾನಾದಲ್ಲಿ ನಮ್ಮೆಲ್ಲರ ಬಳಿ ಎಲ್ಲವೂ ಇದೆ- ತಾಳ್ಮೆಯೊಂದನ್ನು ಬಿಟ್ಟು. ಎಲ್ಲವೂ ಫಟಾಫಟ್ ಅಂತ ಆಗಬೇಕೆಂಬ ನಿರೀಕ್ಷೆಯನ್ನು ಇಟ್ಟುಕೊಂಡಿರುವ ನಾವು, ಪಾಲಿಸಬೇಕಾದ ಕನಿಷ್ಠ ಕಟ್ಟಳೆಗಳನ್ನೂ ಗಾಳಿಗೆ ತೂರಿ ಎಡವಟ್ಟು ಮಾಡಿಕೊಳ್ಳುತ್ತೇವೆ. ಅವತ್ತು ಅಮ್ಮನನ್ನು ರೈಲ್ವೆ ಸ್ಟೇಷನ್ನಿನಿಂದ ಕರೆತರಲು ಹೋದಾಗ ನಾನು ಮಾಡಿದ್ದ ತಪ್ಪೂ ಅದೇ. ಅಂತರ್ಜಾಲವನ್ನು ಬಳಸುವಾಗಲೂ ಹೀಗೆಯೇ ಆಗಿರುತ್ತದೆ. ಹೀಗೊಮ್ಮೆ ಊಹಿಸಿ ನೋಡಿ. ಎರಡು ತಿಂಗಳಿನ ನಂತರ ನೀವು ಹೋಗಬೇಕಾಗಿರುವ ಸ್ಥಳವೊಂದಕ್ಕೆ ಭೇಟಿ ನೀಡಲು ಸ್ಕೆಚ್ ಹಾಕುವಾಗ ಟ್ರೈನುಗಳ ವಿವರ ತಿಳಿಯಲು ಸಂಬಂಧಿತ ಜಾಲತಾಣವೊಂದಕ್ಕೆ ಲಾಗಿನ್ ಆಗಿರುತ್ತೀರಿ.

ನಿಮಗೆ ಪುರುಸೊತ್ತಿಲ್ಲದ ಕಾರಣ ಅಂತರ್ಜಾಲದಲ್ಲಿ ನಿಮ್ಮ ಆ ಜಾಲತಾಣದ ಬಳಕೆದಾರರ ಹೆಸರು ಮತ್ತು ಪಾಸವರ್ಡ್ ಅದಾಗಲೇ ಶೇಖರಿಸಿ ಇರಲಾಗುತ್ತದೆ. ಸರಿ, ಮುಂದೆ ಹೋಗಬೇಕೆನಿಸುವಷ್ಟರಲ್ಲಿ ‘ನೀವು ರೋಬಾಟ್ ಅಲ್ಲ ತಾನೇ?’ ಎಂಬ ಪ್ರಶ್ನೆಯೊಂದಿಗೆ ಆ ಜಾಲತಾಣವು ಕ್ಯಾಪ್ಚಾ ಎಂಬ ಹಣೆಪಟ್ಟಿ ಅಂಟಿಸಿಕೊಂಡಿರುವ, ವಾಷಿಂಗ್ ಮಷೀನಿನಲ್ಲಿ ಹಿಂಡಿ ಎಸೆದಿರುವ ಬಟ್ಟೆಗಳ ಸ್ಥಿತಿಯಲ್ಲಿರುವ ಕೆಲವು ಅಕ್ಷರಗಳನ್ನು ನಿಮಗೆ ತೋರಿಸಿ ಅವುಗಳನ್ನು ಸರಿಯಾಗಿ ಗುರುತಿಸಿ ಬರೆಯಲು ಕೇಳುತ್ತದೆ. ಮೊಸರಿನಲ್ಲಿ ಕಲ್ಲು ಸಿಕ್ಕಿದ ರೀತಿ ಕೆರಳಿದ ನೀವು ಅದೇನೋ ಟೈಪಿಸುತ್ತೀರಿ.

ಊಹೂಂ ನಿಮ್ಮ ಕೋಪದಿಂದ ಆ ಜಾಲತಾಣಕ್ಕೇನೂ ಫರಕು ಬೀಳುವುದಿಲ್ಲ. ಅಷ್ಟೇ ಕೂಲ್ ಆಗಿ ಮತ್ತೆ ನಾಲ್ಕು ಹೊಸ ತಿರುಪಿದ ಅಕ್ಷರಗಳನ್ನು ಆಫರ್ ಮಾಡುವ ಅದು ಮತ್ತೊಮ್ಮೆ ನಿಮ್ಮ ತಾಳ್ಮೆಗೆ ಟಕ್ಕರ್ ಕೊಡುತ್ತದೆ. ಈ ಬಾರಿ ವಾಸ್ತವವನ್ನು ಅರಿತ ನೀವು ನಿಮ್ಮ ಚಷ್ಮಾ ಸರಿಪಡಿಸಿಕೊಳ್ಳುತ್ತ ಕಣ್ಣು ದೊಡ್ಡದಾಗಿಸಿಕೊಂಡು ನೋಡಿ ಸರಿಯಾಗಿ ಗುರುತಿಸಿ ತಿಳಿಸುತ್ತೀರಿ. ಅಲ್ಲಿಗೆ ಖುಷ್ ಆದ ಕ್ಯಾಪ್ಚಾ ಗೇಟ್ ಕೀಪರ್ ಜಾಲತಾಣದ ಬಾಗಿಲನ್ನು ನಿಮಗಾಗಿ ತೆರೆಯುತ್ತಾನೆ. ಆ ಕ್ಷಣದಲ್ಲಿ ನಿಮ್ಮ ಗರ್ವಕ್ಕೆ ಲೈಟಾಗಿ ಡ್ಯಾಮೇಜ್ ಆದರೂ ಅದನ್ನು ತೋರ್ಪಡಿಸದೇ ಜಾಲತಾಣವನ್ನು ರೂಪಿಸಿರುವ ಭೂಪನನ್ನು ಹಳಿಯುತ್ತ ಮತ್ತೆ ಮುಂದುವರೆಯುತ್ತೀರಿ.

ಅಂತರ್ಜಾಲವನ್ನು ಬಳಸುವ ಎಲ್ಲರಿಗೂ ಈ ಕ್ಯಾಪ್ಚಾ ಎಂಬ ಅನಪೇಕ್ಷಿತ ಅತಿಥಿಯ ಪರಿಚಯವಿದ್ದೇ ಇರುತ್ತದೆ. ಬಳಕೆದಾರರಿಗೆ ತ್ರಾಸು ಕೊಡಲೆಂದೇ ಹುಟ್ಟಿಸಿರುವ ರೀತಿಯ ಫೀಲು ಕೊಡುವ ಈ ಭೂಪನನ್ನು ಹುಟ್ಟಿಸಿರುವ ಹಿನ್ನೆಲೆ ಕೂಡ ಗಮ್ಮತ್ತಾಗಿದೆ. 2000ನೇ ಇಸವಿಯ ಆಸುಪಾಸಿನಲ್ಲಿ ಕಾರ್ನೆಗೀ ಮೆಲನ್ ವಿಶ್ವವಿದ್ಯಾಲಯದ ಸಂಶೋಧಕರಾದ ಲೂಯಿಸ್ ಆಹ್ನ್ ಎಂಬ 21 ವರ್ಷದ ತರುಣ ಮತ್ತವರ ತಂಡವು ಈ ಸ್ವಯಂಚಾಲಿತ ಪರೀಕ್ಷೆಯನ್ನು ಅಭಿವೃದ್ಧಿಪಡಿಸಿದಾಗ ಅವರ ಮೂಲ ಉದ್ದೇಶ ಬಳಕೆದಾರ ಕಂಪ್ಯೂಟರೇ ಅಥವಾ ಮನುಷ್ಯನೇ ಎಂದು ಗುರುತಿಸುವುದಾಗಿತ್ತು.

ಅಸಲಿಗೆ ಕ್ಯಾಪ್ಚಾ ಅಥವಾ Completely Automated Public Turing test to tell Computers and Humans Apart ಎನ್ನುವುದರ ಪೂರ್ಣಾರ್ಥ ಕೂಡ ಅದುವೇ. ಯಾವುದೇ ತಂತ್ರಜ್ಞಾನವನ್ನು ರೂಪಿಸುವಾಗ ಮೊದಲಿಗೆ ಅದರಿಂದ ಬಳಕೆದಾರರಿಗೆ ಹೇಗೆ ಅತ್ಯುತ್ತಮ ಸೇವೆ ಹಾಗೂ ಸವಲತ್ತುಗಳನ್ನು ನೀಡಬಹುದು ಎಂಬ ನಿಟ್ಟಿನಲ್ಲೇ ಹೆಚ್ಚು ಯೋಚಿಸಿ ಒಂದಿಷ್ಟು ಮೂಲಭೂತ ಸುರಕ್ಷಾ ಸೌಲಭ್ಯಗಳನ್ನು ಅಳವಡಿಸಲಾಗಿರುತ್ತದೆ. ತದನಂತರ ಅದು ಬಳಕೆದಾರರ ಕೈಗೆ ಸಿಕ್ಕ ಮೇಲೆ ದುರುಪಯೋಗದ ದೂರುಗಳನ್ನು ಆಧರಿಸಿ ಅವುಗಳನ್ನು ಸರಿಪಡಿಸುವ ನಿಟ್ಟಿನಲ್ಲಿ ಅಗತ್ಯ ಮಾರ್ಪಾಡುಗಳನ್ನು ಮಾಡಲಾಗುತ್ತದೆ. ಅಂತರ್ಜಾಲ ಕೂಡ ಈ ನಿಯಮಕ್ಕೆ ಅಪವಾದವಲ್ಲ.

1990ರ ದಶಕದ ಅಂತ್ಯದಷ್ಟರಲ್ಲಿ ಇ ಮೇಲ್ ಎನ್ನುವುದು ಜನಸಾಮಾನ್ಯರಿಗೆ ನೂತನ ಸಂಪರ್ಕ ಸಾಧನವಾಗುವುದರ ಜತೆಯಲ್ಲಿ ಅವರ ವೈಯಕ್ತಿಕ ಡಿಜಿಟಲ್ ವಿಳಾಸವಾಗಿ ಹೊರಹೊಮ್ಮಿತ್ತು. ಅಂದಿನ ದಿನಗಳಲ್ಲಿ ಉಚಿತವಾಗಿ ಈ ಸೇವೆಯನ್ನು ಒದಗಿಸುವಲ್ಲಿ ಯಾಹೂ ಮತ್ತು ಹಾಟ್​ವೆುೕಲ್ ನಂತಹ ಸಂಸ್ಥೆಗಳು ಮುಂಚೂಣಿಯಲ್ಲಿದ್ದವು. ಬಳಕೆದಾರರು ಅತ್ಯಂತ ಸರಳ ರೀತಿಯಲ್ಲಿ ಉಪಯೋಗಿಸುವಂತೆ ರೂಪಿಸಿದ್ದ ಈ ಸೇವೆಯ ಸರಳತೆಯೇ ನಂತರದ ದಿನಗಳಲ್ಲಿ ಅವುಗಳಿಗೆ ಕುತ್ತಾಯಿತು. ಈ ಸೇವೆಗಳ ದುರುಪಯೋಗ ಪಡೆಯುವ ನಿಟ್ಟಿನಲ್ಲಿ ರೂಪಿಸಲಾಗಿದ್ದ ಸ್ವಯಂಚಾಲಿತ (ಕು)ತಂತ್ರಾಂಶ ಅರ್ಥಾತ್ ಬಾಟ್​ಗಳ ಹಾವಳಿ ಅಂತರ್ಜಾಲದಲ್ಲಿ ಹೆಚ್ಚಿದ ಕಾರಣ ಅಸಲಿ ಮತ್ತು ನಕಲಿ ಖಾತೆಗಳನ್ನು ಗುರುತಿಸುವುದೇ ದೊಡ್ಡ ಸವಾಲಾಗಿ ಪರಿಣಮಿಸಿತು. ಮನುಷ್ಯರಿಗಿಂತ ಹಲವು ಪಟ್ಟು ವೇಗವಾಗಿ ಕೆಲಸ ಮಾಡುತ್ತಿದ್ದ ಈ ಬಾಟ್​ಗಳು ಸಾವಿರಾರು ನಕಲಿ ಇಮೇಲ್ ಖಾತೆಗಳನ್ನು ತೆರೆಯುವುದು, ಕಾಮೆಂಟ್ ವಿಭಾಗಗಳಲ್ಲಿ ಜಾಹೀರಾತು ತುಂಬುವುದು, ಸೆಕೆಂಡುಗಳಲ್ಲಿ ಸಾವಿರಾರು ಸಿನಿಮಾ ಅಥವಾ ರೈಲು ಟಿಕೆಟ್​ಗಳನ್ನು ಬುಕ್ ಮಾಡಿ ಸಾಮಾನ್ಯ ಜನರಿಗೆ ಸಿಗದಂತೆ ಮಾಡುವುದು, ವೆಬ್​ಸೈಟ್​ಗಳಿಂದ ಮಾಹಿತಿಯನ್ನು ಅಕ್ರಮವಾಗಿ ಕದಿಯುವಂತಹ ಕುತಂತ್ರಗಳನ್ನು ಮಾಡತೊಡಗಿದವು.

ಹೆಚ್ಚಿನ ಬಾರಿ ಇಂತಹ ಕೆಲಸ ಮಾಡುವ ಬಾಟ್​ಗಳು ಯಾರೋ ಕಂಪ್ಯೂಟರ್ ಅಥವಾ ತಂತ್ರಾಂಶದ ಮೇಧಾವಿಗಳ ಯೋಜನೆಯಾಗಿರದೇ ಒಂದಿಷ್ಟು ಮಾಮೂಲು ಟ್ರಿಕ್​ಗಳನ್ನು ಅರಗಿಸಿಕೊಂಡಿರುವ ಎಳಸುಗಳ ಕೈಚಳಕವಾಗಿರುತ್ತಿತ್ತು. ಈ ವಿಷಯ ಇಂತಹ ಸೇವೆಗಳನ್ನು ಒದಗಿಸುತ್ತಿದ್ದ ಯಾಹೂ ಮತ್ತು ಹಾಟ್​ಮೇಲ್​ನಂತಹ ಸಂಸ್ಥೆಗಳ ಗಮನಕ್ಕೆ ಬರುವಷ್ಟರಲ್ಲಿ ಸಾಕಷ್ಟು ಘಾಸಿ ಉಂಟುಮಾಡಿದ್ದವು. ಈ ತೊಂದರೆಗೆ ಕಡಿವಾಣ ಹಾಕಲು ಸೂಕ್ತ ಕಾವಲುಗಾರನೊಬ್ಬನ ಅಗತ್ಯತೆ ಎಲ್ಲರಿಗೂ ಆ ಸಮಯದಲ್ಲಿ ಕಂಡುಬಂತು. ಆಗ ಅಖಾಡಕ್ಕಿಳಿದ ಲೂಯಿಸ್ ಆಹ್ನ್ ಮತ್ತವರ ತಂಡವು ನಡೆಸಿದ ಸಂಶೋಧನೆಯ ಪರಿಣಾಮ ಹುಟ್ಟಿದ್ದು ಈ ಕ್ಯಾಪ್ಚಾ.

ತಮ್ಮ ಜಾಲತಾಣಗಳ ಮಾಲೀಕರು ಬಳಕೆದಾರರಿಗೆ ಅನುಮತಿ ನೀಡುವ ಮಾರ್ಗಮಧ್ಯದಲ್ಲಿ ಕ್ಯಾಪ್ಚಾ ಎಂಬ ಹೊಸ ಕಾವಲುಗಾರನನ್ನು ನಿಲ್ಲಿಸಿದ ಕೂಡಲೇ ವಿಷಯ ಮುಗಿಯಲಿಲ್ಲ. ತಂತ್ರಜ್ಞಾನ ಅಭಿವೃದ್ಧಿಗೊಡಂತೇ ಬಾಟ್​ಗಳೂ ಸ್ಮಾರ್ಟ್ ಆಗತೊಡಗಿದವು. ಅವುಗಳೂ ಸೊಟ್ಟಗಿರುವ ಅಕ್ಷರಗಳನ್ನು ಓದುವ ಕ್ಷಮತೆಯನ್ನು ಬೆಳೆಸಿಕೊಂಡವು. ಈ ಕಾರ್ಯದಲ್ಲಿ ಆಗಷ್ಟೇ ಪರಿಚಯಿಸಲ್ಪಟ್ಟ ಆಪ್ಟಿಕಲ್ ಕ್ಯಾರೆಕ್ಟರ್ ರಿಕಗ್ನಿಷನ್ ತಂತ್ರಜ್ಞಾನವು ಬಾಟ್​ಗಳಿಗೆ ವರದಾನವಾಯಿತು. ಬಾಟ್​ಗಳ ಈ ಹೊಸ ಪಟ್ಟಿಗೆ ಚಿತ್ ಮಾಡಲು ಕ್ಯಾಪ್ಚಾ ಪ್ರತಿತಂತ್ರವನ್ನು ಅಳವಡಿಸಿಕೊಳ್ಳುವುದು ಅನಿವಾರ್ಯವಾಯಿತು. ಈ ಬಾರಿ ಮತ್ತೆ ನೆರವಿಗೆ ಬಂದ ಲೂಯಿಸ್ ಆಹ್ನ್ ಮತ್ತವರ ತಂಡವು ಈ ಬಾರಿ ತಮ್ಮ ತಂತ್ರಗಾರಿಕೆಯನ್ನು ಬದಲಿಸಿ ಸೊಟ್ಟಗಿರುವ ಅಕ್ಷರಗಳ ಬದಲಿಗೆ ಕೆಲವು ಚಿತ್ರಗಳನ್ನು ಕೊಟ್ಟು ಅವುಗಳ ಮೇಲೆ ಬಳಕೆದಾರರಿಗೆ ಪ್ರಶ್ನೆಗಳನ್ನು ಕೇಳಿ ಅವರು ನೀಡುವ ಉತ್ತರದ ಆಧಾರದ ಮೇಲೆ ಮುಂದುವರೆಯಲು ಅನುಮತಿ ನೀಡುವ ನೂತನ ಕ್ಯಾಪ್ಚಾ ವಿಧಾನವನ್ನು ರೂಪಿಸಿದರು. ಉದಾಹರಣೆಗೆ ರಸ್ತೆಯ ಒಂದಿಷ್ಟು ಚಿತ್ರಗಳನ್ನು ತೋರಿಸಿ ಅವುಗಳಲ್ಲಿ ಟ್ರಾಫಿಕ್ ಸಿಗ್ನಲ್​ಗಳಿರುವ ಚಿತ್ರಗಳನ್ನು ಗುರುತಿಸುವಂತೆ ಕೇಳಲಾಗುತ್ತಿತ್ತು. ಸರಿಯುತ್ತರ ನೀಡಿದರಷ್ಟೆ ನಿಮ್ಮ ಮುಂದಿನ ದಾರಿ ಸುಗಮ.

ಇಲ್ಲವೆಂದರೆ ಮತ್ತಷ್ಟು ಹೊಸ ಚಿತ್ರಗಳು ಮತ್ತೆ ಹೊಸ ಪ್ರಶ್ನೆಗಳು. ಬಾಟ್​ಗಳಿಗೆ ಈ ಚಿತ್ರಗಳು ಗೂಗ್ಲಿಯಾಗಿ ಪರಿಣಮಿಸಿ ನಿರುತ್ತರವಾದವು. ಇಲ್ಲಿ ಮಜವೇನು ಗೊತ್ತೇ? ಆ ಚಿತ್ರಗಳನ್ನು ನೋಡುತ್ತಾ ‘ಇದೆಂಥ ಕರ್ಕರೆ’ ಎಂದು ಶಪಿಸಿ ನಾವು ನೀವುಗಳೆಲ್ಲ ಈ ಕಂಪ್ಯೂಟರ್​ಗೆ ನೀಡುತ್ತಿದ್ದ ಆ ಉತ್ತರಗಳೇ ನಂತರದ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆಯನ್ನು ರೂಪಿಸಲು ಅತ್ಯಗತ್ಯವಾಗಿದ್ದ ದತ್ತಾಂಶವಾಗಿ ರೂಪುಗೊಂಡವು. ಅಂದರೆ ನಾವು ನೀಡಿದ ಉತ್ತರಗಳಿಂದಲೇ ಆ ಚಿತ್ರಗಳನ್ನು ನೋಡಿ ಇದು ಬಸ್ಸು ಎಂದೋ ಅಥವಾ ಇದು ಲಾರಿಯಲ್ಲವೆಂದು ಗುರುತಿಸುವ ವಿವೇಚನೆಯನ್ನು ಕೃತಕ ಬುದ್ಧಿಮತ್ತೆಯು ಬೆಳೆಸಿಕೊಂಡಿತು. ಚಿತ್ರಗಳನ್ನು ತೋರಿಸಿ ಚೆಕ್​ಮೇಟ್ ಮಾಡುವುದರ ಮೂಲಕ ಆದರೆ ಬಾಟ್​ಗಳಿಗಾದ ಹಿನ್ನಡೆ ಅಲ್ಪಾವಧಿಗಷ್ಟೆ ಸೀಮಿತವಾಯಿತು. ಮತ್ತೆ ಅಪ್ಡೇಟ್ ಆಗಿ ಬಂದ ಬಾಟ್​ಗಳು ಚಿತ್ರಗಳನ್ನೂ ಅರಗಿಸಿಕೊಳ್ಳುವ ಕಲೆಯನ್ನು ಕಲಿತುಕೊಂಡವು. ಹೀಗಾಗಿ ಕ್ಯಾಪ್ಚಾ ಮತ್ತು ಬಾಟ್​ಗಳ ಹಾವು ಏಣಿಯಾಟ ಒಂದು ಸರಣಿಯಾಟವಾಗಿ ಮಾರ್ಪಟ್ಟಿದೆ. ಬಾಟ್​ಗಳು ಅಪ್ಡೇಟ್ ಆಗಿ ಚಾಪೆಯ ಕೆಳಗೆ ನುಸುಳಲು ಪ್ರಯತ್ನಿಸಿದರೆ ಕ್ಯಾಪ್ಚಾ ಸವ್ವಾಸೇರು ಕೊಡಲು ಹೊಸ ವೇಷದಲ್ಲಿ ಬರುತ್ತಿದೆ. ಇದೇ ಕಾರಣಕ್ಕೆ ಕ್ಯಾಪ್ಚಾವಿನ ಹೊಸ ಹೊಸ ರೂಪಗಳನ್ನು ನಾವು ಇತ್ತೀಚಿನ ದಿನಗಳಲ್ಲಿ ನೋಡುತ್ತಿದ್ದೇವೆ.

2018ರಲ್ಲಿ ಗೂಗಲ್ ಪರಿಚಯಿಸಿದ ‘ರಿಕ್ಯಾಪ್ಚಾ ವಿ 3’ ಎಂಬ ತಂತ್ರಾಂಶವು ಬಳಕೆದಾರರಿಗೆ ಪ್ರಶ್ನೆಗಳನ್ನು ಕೇಳುತ್ತ ಕಿರಿಕಿರಿ ಮಾಡುವ ವಿಧಾನಕ್ಕೆ ಇತಿಶ್ರೀ ಹಾಡಿ ನೂತನ ವಿಧಾನವೊಂದನ್ನು ಜಾರಿಗೆ ತಂದಿತು. ಅದರ ಪ್ರಕಾರ ರಿಕ್ಯಾಪ್ಚಾ ಕಂಪ್ಯೂಟರ್ ಕೀಲಿಮಣೆ ಮತ್ತು ಮೌಸ್​ಗಳನ್ನು ಬಳಸುವ ಶೈಲಿಯನ್ನು ಗಮನಿಸಿ ಬಳಕೆದಾರನು ಮನುಷ್ಯನೇ? ಅಥವಾ ಕಂಪ್ಯೂಟರೇ? ಎಂದು ನಿರ್ಧರಿಸುತ್ತಿತ್ತು. ಆದರೆ ಇಲ್ಲೂ ಕೂಡ ಹೆಚ್ಚಿನ ಖಾಸಗಿ ಗೌಪ್ಯತೆಯನ್ನು ಹೊಂದಿರುವ ಕೆಲ ಸುಧಾರಿತ ಬ್ರೌಸರ್​ಗಳನ್ನು ಬಳಸುವಾಗ ತಂತ್ರಾಂಶವು ಸರಿಯಾಗಿ ಕೆಲಸ ಮಾಡದೆ ಕಿರಿಕಿರಿಯ ಕಂಪ್ಲೇಂಟುಗಳನ್ನು ಕಂಪನಿಯು ಎದುರಿಸಬೇಕಾಯಿತು. ಈ ಬೆಳವಣಿಗೆಯ ನಡುವೆ ಬಾಟ್​ಗಳೂ ಹೊಸ ಕೌಶಲ್ಯಗಳನ್ನು ಕಲಿತುಕೊಂಡು ರಿಕ್ಯಾಪ್ಚಾಗೂ ಸವಾಲನ್ನು ಎಸೆಯುವ ರೀತಿಯಲ್ಲಿ ಅಭಿವೃದ್ಧಿಗೊಂಡಿವೆ.

ಇದೇ ಸಮಯಕ್ಕೆ ಕೃತಕ ಬುದ್ಧಿಮತ್ತೆಯು ಫೀಲ್ಡಿಗೆ ಎಂಟ್ರಿ ಕೊಟ್ಟು ಕಾವಲುಗಾರ ಮತ್ತು ಕಳ್ಳರಿಬ್ಬರ ಕೈಯಲ್ಲಿರುವ ಹೊಸ ಅಸ್ತ್ರವಾಗಿ ಪರಿಣಮಿಸಿದೆ. ಈ ಸವಾಲನ್ನು ಎದುರಿಸಲು ಬರುವ ದಿನಗಳಲ್ಲಿ ಮುಖ ಗುರುತಿಸುವಿಕೆ, ಬೆರಳಚ್ಚು ಅಥವಾ ಡಿಜಿಟಲ್ ಐಡೆಂಟಿಟಿ ಮೂಲಕ ಮನುಷ್ಯರನ್ನು ದೃಢೀಕರಿಸುವ ವಿಧಾನಗಳು ಪರಿಚಯಿಸಲ್ಪಡುವ ಲಕ್ಷಣಗಳು ದಟ್ಟವಾಗಿವೆ. ಅರ್ಥಾತ್ ಕ್ಯಾಪ್ಚಾ ಎಂಬ ಕಾವಲುಗಾರನ ಕೈಯಲ್ಲಿನ ಲಾಠಿಯು ಮತ್ತಷ್ಟು ಬಣ್ಣವನ್ನು ಬದಲಿಸಲಿದೆ. ಯಾವುದಕ್ಕೂ ಇನ್ನಷ್ಟು ಕಿರಿಕಿರಿಗೆ ತಯಾರಾಗಿರಿ.