ಫೈನಲ್​ ಪಂದ್ಯ ರಾತ್ರಿ 7:30ಕ್ಕೇ ಮುಗಿದಿತ್ತು! ಸ್ಯಾಂಟ್ನರ್ ಮಾಡಿದ ಆ ಒಂದು ಎಡವಟ್ಟಿನಿಂದ ಪಂದ್ಯ ಕಿವೀಸ್ ಕೈ ತಪ್ಪಿತು ಎಂದ​ ದಾದಾ..? Sourav Ganguly

ಭಾರತದ ಈ ಭರ್ಜರಿ ಜಯದ ಬಳಿಕ ಮಾತನಾಡಿದ ದಾದಾ, ನ್ಯೂಜಿಲೆಂಡ್ ನಾಯಕ ಸ್ಯಾಂಟ್ನರ್ ಅವರ ನಿರ್ಧಾರವನ್ನು ಕಟುವಾಗಿ ಟೀಕಿಸಿದ್ದಾರೆ. ಅಲ್ಲದೆ, ಪಂದ್ಯ ಆರಂಭವಾದ ಅರ್ಧ ಗಂಟೆಯಲ್ಲೇ ನ್ಯೂಜಿಲೆಂಡ್ ಸೋಲು ಖಚಿತವಾಗಿತ್ತು ಎಂದಿದ್ದಾರೆ.

ರಾತ್ರಿ 7:30ಕ್ಕೇ ನ್ಯೂಜಿಲೆಂಡ್ ವಿಶ್ವಕಪ್ ಸೋತಿತ್ತು. ಇಂತಹ ಬಲಿಷ್ಠ ಭಾರತೀಯ ತಂಡಕ್ಕೆ ಮೊದಲು ಬ್ಯಾಟಿಂಗ್ ಮಾಡಲು ಯಾವ ತಂಡ ತಾನೇ ಅವಕಾಶ ನೀಡುತ್ತದೆ. ಅಲ್ಲದೆ, ಇದು ವಿನಾಶಕ್ಕೆ ನೀವೇ ಬರೆದುಕೊಂಡ ವಿಧಿ ಆಗಿತ್ತು. ಪಂದ್ಯ ಶುರುವಾಗಿದ್ದು 7 ಗಂಟೆಗೆ, ಆದರೆ ಫಲಿತಾಂಶ 7:30ಕ್ಕೇ ನಿರ್ಧಾರವಾಗಿತ್ತು ಎಂದು ಗಂಗೂಲಿ ಸಂದರ್ಶನವೊಂದರಲ್ಲಿ ಕುಟುಕಿದ್ದಾರೆ.

ಗಂಗೂಲಿ ಭಾರತದ ಬ್ಯಾಟಿಂಗ್ ಲೈನ್-ಅಪ್ ಅನ್ನು ವಿವರಿಸುತ್ತಾ, ಇಶಾನ್, ಅಭಿಷೇಕ್, ಸಂಜು, ಸೂರ್ಯ, ಶಿವಂ ದುಬೆ, ತಿಲಕ್ ವರ್ಮಾ, ಹಾರ್ದಿಕ್ ಪಾಂಡ್ಯ ಮತ್ತು ಅಕ್ಷರ್ ಪಟೇಲ್​ರಂತಹ ಆಟಗಾರರಿರುವಾಗ ಅವರನ್ನು ಬ್ಯಾಟಿಂಗ್‌ಗೆ ಕರೆಯುವುದು ಆತ್ಮಹತ್ಯೆಗೆ ಸಮಾನ. ಇನ್ನು ಬೌಲಿಂಗ್‌ನಲ್ಲಿ ನಮ್ಮಲ್ಲಿ ಜಸ್ಪ್ರೀತ್ ಬುಮ್ರಾ ಎಂಬ ಅತಿಮಾನುಷ ಶಕ್ತಿ ಇದ್ದಾರೆ ಎಂದು ಪ್ರಶಂಸಿಸಿದ್ದಾರೆ.

ಭಾರತೀಯ ಕ್ರಿಕೆಟ್‌ನ ಆಳ ಮತ್ತು ಅಗಲದ ಬಗ್ಗೆ ಮಾತನಾಡಿದ ಗಂಗೂಲಿ, ಪ್ರಸ್ತುತ ತಂಡದಲ್ಲಿಲ್ಲದ ಆಟಗಾರರ ಪಟ್ಟಿಯನ್ನು ನೀಡುವ ಮೂಲಕ ವಿಶ್ವಕ್ಕೆ ಎಚ್ಚರಿಕೆ ನೀಡಿದರು.

ಶ್ರೇಯಸ್ ಅಯ್ಯರ್ ಅವರಂತಹ ವೈಟ್-ಬಾಲ್ ಶ್ರೇಷ್ಠ ಆಟಗಾರನಿಗೇ ತಂಡದಲ್ಲಿ ಜಾಗವಿಲ್ಲ ಎಂದರೆ ಭಾರತದ ಬೆಂಚ್ ಸ್ಟ್ರೆಂತ್ ಎಷ್ಟಿರಬಹುದು ಎಂದು ಊಹಿಸಿ. ಶುಭ್ಮನ್​ ಗಿಲ್ ಹೊರಗಿದ್ದಾರೆ, ಜೈಸ್ವಾಲ್ ಕುಳಿತಿದ್ದಾರೆ, ಸೂರ್ಯವಂಶಿ ಅವರಂತಹ ಪ್ರತಿಭೆಗಳು ಕಾಯುತ್ತಿದ್ದಾರೆ. ಭಾರತ ಸುಲಭವಾಗಿ ಎರಡು ಸಮಾನ ಶಕ್ತಿಯುಳ್ಳ ತಂಡಗಳನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಣಕ್ಕಿಳಿಸಬಲ್ಲದು ಎಂದು ಭಾರತದ ಪ್ರತಿಭಾನ್ವಿತ ಆಟಗಾರರ ಬಗ್ಗೆ ಹೆಮ್ಮೆಯಿಂದ ನುಡಿದಿದ್ದಾರೆ.

ಟಾಸ್ ಗೆದ್ದ ನ್ಯೂಜಿಲೆಂಡ್ ನಾಯಕ ಮಿಚೆಲ್ ಸ್ಯಾಂಟ್ನರ್ ಭಾರತವನ್ನು ಬ್ಯಾಟಿಂಗ್‌ಗೆ ಆಹ್ವಾನಿಸಿದರು. ಆದರೆ ಈ ನಿರ್ಧಾರ ಕಿವೀಸ್ ತಂಡಕ್ಕೆ ಡೆತ್ ವಾರಂಟ್ ಆಗಿ ಪರಿಣಮಿಸಿತು. ಭಾರತದ ಅಗ್ರ ಕ್ರಮಾಂಕದ ಬ್ಯಾಟರ್‌ಗಳು ನ್ಯೂಜಿಲೆಂಡ್ ಬೌಲರ್‌ಗಳನ್ನು ಮೈದಾನದ ಮೂಲೆ ಮೂಲೆಗೂ ಅಟ್ಟಾಡಿಸಿದರು.

ಸಂಜು ಸ್ಯಾಮ್ಸನ್: 89 ರನ್‌ಗಳ ಅಮೋಘ ಇನಿಂಗ್ಸ್ ಆಡಿ ಜಯದ ಬುನಾದಿ ಹಾಕಿದರು.

ಅಭಿಷೇಕ್ ಶರ್ಮಾ (52) ಮತ್ತು ಇಶಾನ್ ಕಿಶನ್ (54) ಬಿರುಸಿನ ಅರ್ಧಶತಕ ಸಿಡಿಸಿ ಕಿವೀಸ್ ಪಡೆಯನ್ನು ಕಂಗೆಡಿಸಿದರು.

ಅಂತಿಮವಾಗಿ ಭಾರತ 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 255 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ನ್ಯೂಜಿಲೆಂಡ್, ಭಾರತದ ಬೌಲಿಂಗ್ ದಾಳಿಗೆ ತತ್ತರಿಸಿ ಕೇವಲ 159 ರನ್‌ಗಳಿಗೆ ಆಲೌಟ್ ಆಯಿತು.

ಸೂರ್ಯಕುಮಾರ್ ಯಾದವ್ ಅವರ ನಾಯಕತ್ವದಲ್ಲಿ ಭಾರತೀಯ ಕ್ರಿಕೆಟ್ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಗಂಗೂಲಿ ಅವರ ಮಾತುಗಳು ಕೇವಲ ಟೀಕೆಯಲ್ಲ, ಬದಲಿಗೆ ಇಡೀ ವಿಶ್ವ ಕ್ರಿಕೆಟ್‌ಗೆ ಭಾರತ ಈಗ ಅಜೇಯ ಎಂಬ ಸಂದೇಶವನ್ನು ರವಾನಿಸಿವೆ. ನ್ಯೂಜಿಲೆಂಡ್ ಮಾಡಿದ ಆ ಒಂದು ಸಣ್ಣ ತಪ್ಪು ಅವರನ್ನು ರನ್ನರ್-ಅಪ್ ಸ್ಥಾನಕ್ಕೆ ತಳ್ಳಿದರೆ, ಭಾರತವನ್ನು ವಿಶ್ವದ ಚಾಂಪಿಯನ್ ಪಟ್ಟಕ್ಕೇರಿಸಿದೆ,(ಏಜೆನ್ಸೀಸ್).