ನಿಮ್ಮ ಬೆರಳ ತುದಿಯಲ್ಲೇ ಇದೆ ಸಾವಿನ ಸುಳಿ! ಡ್ರಗ್ಸ್‌ಗಿಂತಲೂ ಭಯಾನಕ: ನಿಮ್ಮ ಮೆದುಳನ್ನು ನಿಧಾನವಾಗಿ ಕೊಲ್ಲುತ್ತಿದೆ ರೀಲ್ಸ್ ಕ್ರೇಜ್ | Reel Addiction

ಬಿಡುವಿನ ವೇಳೆಯಲ್ಲಿ ಅಥವಾ ರಾತ್ರಿ ಮಲಗುವ ಮುನ್ನ ಮೊಬೈಲ್ ಹಿಡಿದು ಗಂಟೆಗಟ್ಟಲೆ ಒಂದಾದ ನಂತರ ಒಂದರಂತೆ ರೀಲ್‌ಗಳನ್ನು ನೋಡುತ್ತಾ ಹೋಗುವುದನ್ನೇ ಮೈಂಡ್‌ಲೆಸ್ ಸ್ಕ್ರೋಲಿಂಗ್ ಎನ್ನಲಾಗುತ್ತದೆ. ಇದರಲ್ಲಿ ಸಮಯ ಹೋದದ್ದೇ ತಿಳಿಯುವುದಿಲ್ಲ. ಇದು ಕೇವಲ ಸಮಯ ವ್ಯರ್ಥ ಮಾಡುವುದಲ್ಲ, ಬದಲಾಗಿ ನಿಮ್ಮ ಮೆದುಳಿನ ಮೇಲೆ ನೇರ ದಾಳಿ ಮಾಡುತ್ತದೆ.

ನಾವು 30 ಸೆಕೆಂಡಿನ ವಿಡಿಯೋಗಳನ್ನು ನೋಡುತ್ತಿರುವಾಗ ನಮ್ಮ ಮೆದುಳು ಅತ್ಯಂತ ಉತ್ಸಾಹಗೊಳ್ಳುತ್ತದೆ ಮತ್ತು ಡೋಪಮೈನ್ ಎಂಬ ಸಂತೋಷದ ಹಾರ್ಮೋನ್ ಅನ್ನು ಬಿಡುಗಡೆ ಮಾಡುತ್ತದೆ. ಇದರಿಂದ ನಮಗೆ ಸತತವಾಗಿ ಸಂತೋಷದ ಅನುಭವವಾಗುತ್ತದೆ. ಆದರೆ ಮೊಬೈಲ್ ಪಕ್ಕಕ್ಕಿಟ್ಟ ತಕ್ಷಣ ಈ ಡೋಪಮೈನ್ ಮಟ್ಟ ಕುಸಿಯುತ್ತದೆ. ಇದರಿಂದಾಗಿ ವ್ಯಕ್ತಿಗೆ ಬೇರೆ ಯಾವುದೇ ಕೆಲಸದಲ್ಲಿ ಗಮನ ಹರಿಸಲು ಸಾಧ್ಯವಾಗುವುದಿಲ್ಲ.

ಏಕಾಗ್ರತೆಯ ಕೊರತೆ: ನಿರಂತರವಾಗಿ ರೀಲ್ಸ್ ನೋಡುವ ವ್ಯಕ್ತಿಯ ಮೆದುಳು ಸಣ್ಣ ವಿಷಯಗಳಿಗೆ ಮಾತ್ರ ಪ್ರತಿಕ್ರಿಯಿಸಲು ಅಭ್ಯಾಸವಾಗುತ್ತದೆ. ಇದರಿಂದ ದೀರ್ಘಕಾಲದ ಕೆಲಸಗಳ ಮೇಲೆ ಗಮನ ಹರಿಸಲು ಸಾಧ್ಯವಾಗದೆ, ಏಕಾಗ್ರತೆ ಶೂನ್ಯವಾಗುತ್ತದೆ.

ಮಾನಸಿಕ ಬಳಲಿಕೆ ಮತ್ತು ಖಿನ್ನತೆ: ದಿನವಿಡೀ ಮೊಬೈಲ್ ಪರದೆಯನ್ನು ನೋಡುವುದರಿಂದ ದೈಹಿಕ ಶ್ರಮವಿಲ್ಲದಿದ್ದರೂ ಮೆದುಳು ತೀವ್ರವಾಗಿ ಬಳಲುತ್ತದೆ. ಇದು ಕ್ರಮೇಣ ಕಿರಿಕಿರಿ, ಆತಂಕ ಮತ್ತು ಖಿನ್ನತೆಗೆ ದಾರಿ ಮಾಡಿಕೊಡುತ್ತದೆ.

ನಿದ್ರಾಹೀನತೆ: ಹೆಚ್ಚಿನವರು ರಾತ್ರಿ ನಿದ್ದೆ ಬರುವವರೆಗೆ ವಿಡಿಯೋ ನೋಡುತ್ತೇವೆ ಎಂದುಕೊಳ್ಳುತ್ತಾರೆ. ಆದರೆ ಮೊಬೈಲ್‌ನಿಂದ ಹೊರಬರುವ ನೀಲಿ ಬೆಳಕು ಮತ್ತು ನಿರಂತರ ದೃಶ್ಯಗಳು ಮೆದುಳನ್ನು ಎಚ್ಚರವಾಗಿರಿಸುತ್ತವೆ. ಇದರಿಂದ ನಿದ್ದೆ ಕಡಿಮೆಯಾಗಿ ನೆನಪಿನ ಶಕ್ತಿ ಮತ್ತು ಮಾನಸಿಕ ಸ್ಥಿರತೆಯ ಮೇಲೆ ಪರಿಣಾಮ ಬೀರುತ್ತದೆ.

ವರ್ತನೆಯಲ್ಲಿ ಬದಲಾವಣೆ: ವಿಶೇಷವಾಗಿ ಮಕ್ಕಳ ಮೇಲೆ ಇದು ಕೆಟ್ಟ ಪರಿಣಾಮ ಬೀರುತ್ತದೆ. ಮೊಬೈಲ್ ಕಿತ್ತುಕೊಂಡರೆ ಮಕ್ಕಳು ಹಿಂಸಾತ್ಮಕವಾಗಿ ವರ್ತಿಸುವುದು, ಅತಿಯಾದ ಹಠ ಮಾಡುವುದು ಈ ವ್ಯಸನದ ಲಕ್ಷಣಗಳು

ಆರೋಗ್ಯ ತಜ್ಞರ ಪ್ರಕಾರ, ಈ ವ್ಯಸನದಿಂದ ಹೊರಬರಲು ಈ ಕೆಳಗಿನ ಕ್ರಮಗಳನ್ನು ಅನುಸರಿಸುವುದು ಅನಿವಾರ್ಯವಾಗಿದೆ.

ಸಮಯ ನಿಗದಿಪಡಿಸಿ: ಸೋಶಿಯಲ್ ಮೀಡಿಯಾ ಬಳಸಲು ದಿನದಲ್ಲಿ ಇಂತಿಷ್ಟೇ ಸಮಯ ಎಂದು ಫಿಕ್ಸ್ ಮಾಡಿ.

ಫ್ಯಾಮಿಲಿ ಟೈಮ್: ಊಟದ ಸಮಯದಲ್ಲಿ ಅಥವಾ ಸಂಜೆ ಕುಟುಂಬದೊಂದಿಗೆ ಇರುವಾಗ ಮೊಬೈಲ್ ಬಳಸಬೇಡಿ.

ವಾರಕ್ಕೊಂದು ದಿನ ರಜೆ: ವಾರದಲ್ಲಿ ಒಂದು ದಿನ ಮೊಬೈಲ್‌ನಿಂದ ಸಂಪೂರ್ಣ ದೂರವಿರಿ.

ಹವ್ಯಾಸ ಬದಲಿಸಿ: ಮೊಬೈಲ್ ಬದಲಿಗೆ ಪುಸ್ತಕ ಓದುವುದು ಅಥವಾ ದೈಹಿಕ ಕ್ರೀಡೆಗಳಲ್ಲಿ ತೊಡಗಿಸಿಕೊಳ್ಳಿ.

ಕೊನೆಯ ಮಾತು: ನೀವು ಮೊಬೈಲ್ ಅನ್ನು ಬಳಸುತ್ತಿದ್ದೀರೋ ಅಥವಾ ಮೊಬೈಲ್ ನಿಮ್ಮನ್ನು ಬಳಸುತ್ತಿದೆಯೋ ಎಂದು ಒಮ್ಮೆ ಯೋಚಿಸಿ. ನಿಮ್ಮ ಜೀವನದ ನಿಯಂತ್ರಣ ನಿಮ್ಮ ಕೈಲಿರಲಿ, ಮೊಬೈಲ್ ಸ್ಕ್ರೀನ್ ಕೈಲಲ್ಲ,(ಏಜೆನ್ಸೀಸ್).