ಇಂಡೋನೇಷ್ಯಾ ಸಂಸತ್ತಿನಲ್ಲಿ ಒಡಿಶಾ ಮಾಜಿ ಸಿಎಂ ಹೆಸರು!...ಮೋದಿ ನೆನೆದ ಪಟ್ನಾಯಕ್ ಅವರ ಆ ರೋಮಾಂಚನಕಾರಿ ಇತಿಹಾಸದ ಕಥೆ ಏನು ಗೊತ್ತಾ..? | Biju Patnaik

ಒಡಿಶಾದ ಮುಖ್ಯಮಂತ್ರಿಯಾಗುವ ಮೊದಲು ಬಿಜು ಪಟ್ನಾಯಕ್ ಅವರು ಪೈಲಟ್ ಆಗಿದ್ದರು. 1946ರಲ್ಲಿ ಡಚ್ಚರು ಇಂಡೋನೇಷ್ಯಾದ ಜಾವಾ ಮೇಲೆ ಆಕ್ರಮಣ ಮಾಡಿದಾಗ, ಅಲ್ಲಿನ ನಾಯಕರನ್ನು ರಕ್ಷಿಸಲು ಅಂದಿನ ಭಾರತದ ಪ್ರಧಾನಿ ಜವಾಹರಲಾಲ್ ನೆಹರು ಅವರು ಬಿಜು ಪಟ್ನಾಯಕ್ ಅವರ ಸಹಾಯ ಕೋರಿದ್ದರು. ನೆಹರು ಮನವಿಯನ್ನು ತಕ್ಷಣ ಒಪ್ಪಿದ ಪಟ್ನಾಯಕ್, ಯುದ್ಧ ಪೀಡಿತ ಪ್ರದೇಶಕ್ಕೆ ತೆರಳಿದ್ದರು ಎನ್ನಲಾಗಿದೆ.

ಇಂಡೋನೇಷ್ಯಾ ಸ್ವಾತಂತ್ರ್ಯ ಘೋಷಿಸಿದ ನಂತರ, ಡಚ್ಚರು ಅಲ್ಲಿನ ಅಧ್ಯಕ್ಷ ಸುಕರ್ನೋ ಅವರನ್ನು ಗೃಹಬಂಧನದಲ್ಲಿಟ್ಟಿದ್ದರು. ಏಷ್ಯಾದ ವಿಮೋಚನಾ ಹೋರಾಟಕ್ಕೆ ಇಂಡೋನೇಷ್ಯಾದ ಸ್ವಾತಂತ್ರ್ಯ ಮುಖ್ಯ ಎಂದು ಭಾವಿಸಿದ್ದ ನೆಹರು, ನಾಯಕರನ್ನು ಸ್ಥಳಾಂತರಿಸುವ ಜವಾಬ್ದಾರಿಯನ್ನು ಪಟ್ನಾಯಕ್‌ಗೆ ವಹಿಸಿದ್ದರು.

1947 ರ ಜುಲೈ 21 ರಂದು ಬಿಜು ಪಟ್ನಾಯಕ್ ಮತ್ತು ಅವರ ಪತ್ನಿ ಜ್ಞಾನ್ ಪಟ್ನಾಯಕ್ ಅವರು ಡೌಗ್ಲಾಸ್ ಡಕೋಟಾ ಎಂಬ ಅವಳಿ ಇಂಜಿನ್ ವಿಮಾನದಲ್ಲಿ ಈ ರಕ್ಷಣಾ ಕಾರ್ಯಾಚರಣೆಯನ್ನು ಕೈಗೊಂಡರು. ವಿಶೇಷವೆಂದರೆ, ಲಾಹೋರ್ ಮೂಲದ ಜ್ಞಾನ್ ಪಟ್ನಾಯಕ್ ಅವರು ಕಮರ್ಷಿಯಲ್ ಪೈಲಟ್ ಲೈಸೆನ್ಸ್ ಪಡೆದ ಮೊದಲ ಭಾರತೀಯ ಮಹಿಳೆಯಾಗಿದ್ದರು. ಮಗ ಹುಟ್ಟಿದ ಕೇವಲ 14 ದಿನಗಳಲ್ಲೇ ಈ ದಂಪತಿ ಇಂತಹ ಅಪಾಯಕಾರಿ ಮಿಷನ್‌ಗೆ ಕೈ ಹಾಕಿದ್ದರು ಎಂದು ತಿಳಿದುಬಂದಿದೆ.

ಸಿಂಗಾಪುರದಿಂದ ಜಾವಾ ದ್ವೀಪಗಳಿಗೆ ಹೋಗುವ ದಾರಿಯಲ್ಲಿ, ಅವರ ವಿಮಾನವನ್ನು ಹೊಡೆದು ಉರುಳಿಸುವುದಾಗಿ ಡಚ್ ಪಡೆಗಳು ಬೆದರಿಕೆ ಹಾಕಿದ್ದವು. ಆದರೆ, ಕಳಿಂಗ ಬುಲ್ ಎಂದೇ ಖ್ಯಾತರಾಗಿದ್ದ ಪಟ್ನಾಯಕ್ ಅದಕ್ಕೆ ಹೆದರದೆ, ಇಂಡೋನೇಷ್ಯಾದ ಪ್ರಧಾನಿ ಸಜಹ್ರೀರ್ ಮತ್ತು ಉಪಾಧ್ಯಕ್ಷ ಹಟ್ಟಾ ಅವರನ್ನು ಸುರಕ್ಷಿತವಾಗಿ ಸಿಂಗಾಪುರ ಮಾರ್ಗವಾಗಿ ಭಾರತಕ್ಕೆ ಕರೆತರುವಲ್ಲಿ ಯಶಸ್ವಿಯಾದರು.

ಬಿಜು ಪಟ್ನಾಯಕ್ ಅವರ ಈ ಅದ್ಭುತ ಧೈರ್ಯ ಮತ್ತು ಸೇವೆಯನ್ನು ಗೌರವಿಸಿ ಜಕಾರ್ತ ಸರ್ಕಾರವು 1955 ರಲ್ಲೇ ಅವರಿಗೆ ತನ್ನ ಅತ್ಯುನ್ನತ ನಾಗರಿಕ ಪ್ರಶಸ್ತಿಗಳಲ್ಲಿ ಒಂದಾದ ಬೀಟಾಂಗ್ ಜಸಾ ಉತಮಾ (ಫರ್ಸ್ಟ್ ಕ್ಲಾಸ್ ಆಫ್ ಸ್ಟಾರ್ ಆಫ್ ಸರ್ವಿಸ್) ನೀಡಿ ಗೌರವಿಸಿತ್ತು.

ಇದಾದ ಆರು ವರ್ಷಗಳ ನಂತರ, ಅಂದರೆ 1961 ರಲ್ಲಿ ಬಿಜು ಪಟ್ನಾಯಕ್ ಒಡಿಶಾದ 4 ನೇ ಮುಖ್ಯಮಂತ್ರಿಯಾದರು. ಆ ನಂತರ 1990 ರಿಂದ 1995 ರವರೆಗೆ ಎರಡನೇ ಬಾರಿಗೆ ಒಡಿಶಾದ ಸಿಎಂ ಆಗಿ ಸೇವೆ ಸಲ್ಲಿಸಿದರು. ಭಾರತೀಯ ಸ್ವಾತಂತ್ರ್ಯ ಚಳವಳಿ, ಇಂಡೋನೇಷ್ಯಾ ಸ್ವಾತಂತ್ರ್ಯ ಹೋರಾಟ ಮತ್ತು 1962 ರ ಭಾರತ-ಚೀನಾ ಯುದ್ಧದಲ್ಲೂ ಪ್ರಮುಖ ಪಾತ್ರ ವಹಿಸಿದ್ದ ಪಟ್ನಾಯಕ್ ಅವರ ಇತಿಹಾಸವನ್ನು ಪ್ರಧಾನಿ ಮೋದಿ ಈಗ ಜಾಗತಿಕ ವೇದಿಕೆಯಲ್ಲಿ ಮತ್ತೊಮ್ಮೆ ಅನಾವರಣಗೊಳಿಸಿದ್ದಾರೆ(ಏಜೆನ್ಸೀಸ್​).