Thalapathy; ಸಿಎಂ ಆಗಿ ವಿಜಯ್ ಪದಗ್ರಹಣ: ಪತ್ನಿ-ಮಕ್ಕಳ ಗೈರುಹಾಜರಿ, ನಟಿ ತ್ರಿಶಾ ಉಪಸ್ಥಿತಿ ಬಗ್ಗೆ ನೆಟ್ಟಿಗರ ಚರ್ಚೆ!

ವಿಜಯ್ ಅವರ ತಂದೆ ಎಸ್.ಎ. ಚಂದ್ರಶೇಖರ್ ಮತ್ತು ತಾಯಿ ಶೋಭಾ ಚಂದ್ರಶೇಖರ್ ಸಮಾರಂಭದಲ್ಲಿ ಭಾಗಿಯಾಗಿ ಮಗನನ್ನು ಹರಸಿದರು. ಆದರೆ, ಪತ್ನಿ ಸಂಗೀತಾ ಸೊರ್ನಲಿಂಗಂ ಮತ್ತು ಮಕ್ಕಳಾದ ಜೇಸನ್ ಸಂಜಯ್ ಹಾಗೂ ದಿವ್ಯಾ ಸಾಶಾ ಸಮಾರಂಭದಲ್ಲಿ ಕಾಣಿಸಿಕೊಳ್ಳದಿರುವುದು ಅಭಿಮಾನಿಗಳಲ್ಲಿ ಬೇಸರ ಮೂಡಿಸಿದೆ. ಇದೇ ವೇಳೆ, ವಿಜಯ್ ಅವರೊಂದಿಗೆ ಡೇಟಿಂಗ್ ವದಂತಿಯಲ್ಲಿರುವ ನಟಿ ತ್ರಿಶಾ ಕೃಷ್ಣನ್ ಸಮಾರಂಭದಲ್ಲಿ ಕಾಣಿಸಿಕೊಂಡಿದ್ದು ಚರ್ಚೆಗೆ ಮತ್ತಷ್ಟು ತುಪ್ಪ ಸುರಿದಿದೆ.

ವಿಜಯ್ ಮತ್ತು ಸಂಗೀತಾ ಅವರ 27 ವರ್ಷಗಳ ದಾಂಪತ್ಯ ಜೀವನದಲ್ಲಿ ಬಿರುಕು ಮೂಡಿರುವುದು ಈಗ ಬಹಿರಂಗವಾಗಿದೆ. ಸಂಗೀತಾ ಅವರು ಫೆಬ್ರವರಿಯಲ್ಲಿ ಚೆಂಗಲ್ಪಟ್ಟು ಕೌಟುಂಬಿಕ ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ. ವಿಜಯ್ ಅವರ ಪರಪುರುಷ ಸಂಬಂಧ ಮತ್ತು ಮಾನಸಿಕ ಕಿರುಕುಳವೇ ವಿಚ್ಛೇದನಕ್ಕೆ ಕಾರಣ ಎಂದು ಅರ್ಜಿಯಲ್ಲಿ ಉಲ್ಲೇಖಿಸಲಾಗಿದೆ. "ಪ್ರತಿಕ್ರಿಯೆದಾರರು (ವಿಜಯ್) ಸಾರ್ವಜನಿಕವಾಗಿ ಬೇರೆ ನಟಿಯರೊಂದಿಗೆ ಕಾಣಿಸಿಕೊಳ್ಳುತ್ತಿರುವುದು ನನಗೆ ಮತ್ತು ಮಕ್ಕಳಿಗೆ ಅಪಮಾನ ಉಂಟುಮಾಡುತ್ತಿದೆ" ಎಂದು ಸಂಗೀತಾ ನೋವು ತೋಡಿಕೊಂಡಿದ್ದಾರೆ. 2021 ರಿಂದಲೇ ದಂಪತಿಗಳ ನಡುವೆ ಸಮಸ್ಯೆಗಳು ಶುರುವಾಗಿದ್ದವು ಎಂದು ವರದಿಯಾಗಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತು ಪರ-ವಿರೋಧ ಚರ್ಚೆಗಳು ನಡೆಯುತ್ತಿವೆ. "ಹೊಸ ಸಿಎಂ, ಹೊಸ ರಾಣಿ?" ಎಂದು ಕೆಲವರು ತ್ರಿಶಾ ಅವರ ಉಪಸ್ಥಿತಿಯನ್ನು ವ್ಯಂಗ್ಯವಾಡಿದ್ದರೆ, "ಇಂತಹ ಸುದಿನದಂದು ಪತ್ನಿ-ಮಕ್ಕಳು ಜೊತೆಗಿಲ್ಲದಿರುವುದು ವಿಷಾದನೀಯ" ಎಂದು ಅನೇಕರು ಕಮೆಂಟ್ ಮಾಡಿದ್ದಾರೆ. ಪ್ರಮಾಣ ವಚನ ಸ್ವೀಕಾರದಂತಹ ಪ್ರಮುಖ ಕಾರ್ಯಕ್ರಮದಲ್ಲಿ ಪತ್ನಿಯ ಗೈರುಹಾಜರಿಯು ವಿಚ್ಛೇದನದ ವದಂತಿಗಳಿಗೆ ಅಧಿಕೃತ ಮುದ್ರೆ ಒತ್ತಿದಂತಿದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ.

ಮುಂದಿನ ವಿಚಾರಣೆಯು ಜೂನ್ 15ಕ್ಕೆ ನಿಗದಿಯಾಗಿದ್ದು, ವಿಜಯ್ ಅವರ ರಾಜಕೀಯ ಜೀವನದ ಏಳಿಗೆಯ ನಡುವೆಯೇ ಅವರ ಖಾಸಗಿ ಬದುಕು ಕವಲು ಹಾದಿಯಲ್ಲಿ ನಿಂತಿದೆ,(ಏಜೆನ್ಸೀಸ್​).