ಒಂದೇ ಒಂದು ಕ್ಲಿಯರೆನ್ಸ್ ಬದಲಿಸಿತು ಸ್ಟೋರಿ! ಪಾಕ್​ಗೆ ಕಾಲಿಡಬೇಕಿದ್ದ ಸಿಇಒ ಈಗ ಏರ್ ಇಂಡಿಯಾಗೆ ಬಾಸ್​

ನವದೆಹಲಿ: ಟಾಟಾ ಒಡೆತನದ ಬೃಹತ್​ ಸಂಸ್ಥೆಯಾದ ಏರ್ ಇಂಡಿಯಾದ ನೂತನ ಸಿಇಒ (Air India CEO) ಮತ್ತು ವ್ಯವಸ್ಥಾಪಕ ನಿರ್ದೇಶಕರಾಗಿ ಟೆವೊಲ್ಡೆ ಗೆಬ್ರೆಮರಿಯಮ್ ಅಧಿಕಾರ ವಹಿಸಿಕೊಂಡಿರುವುದು ಬಹುತೇಕರಿಗೆ ಗೊತ್ತೇ ಇದೆ. ಆದರೆ, ಈ ಮಧ್ಯೆ ಅಚ್ಚರಿಯ ಸಂಗತಿಯೊಂದು ಬೆಳಕಿಗೆ ಬಂದಿರುವುದು ಸದ್ಯ ಹಲವರ ಹುಬ್ಬೇರಿಸಿದೆ.

ಮೂಲತಃ ಪಾಕಿಸ್ತಾನ್ ಇಂಟರ್ನ್ಯಾಷನಲ್ ಏರ್​ಲೈನ್ಸ್​ಗೆ (ಪಿಐಎ) ಸಿಇಒ ಆಗಿ ಹೋಗಬೇಕಿದ್ದ ಟೆವೊಲ್ಡೆ ಅವರನ್ನು ಭದ್ರತಾ ಅನುಮತಿ ಪೂರ್ಣಗೊಂಡ ಬಳಿಕವೇ ಪಿಐಎ ಅವರ ಹೆಸರನ್ನು ಪ್ರಸ್ತಾಪಿಸಲು ಬಯಸಿತ್ತು. ಆದ್ರೆ, ಅಷ್ಟರೊಳಗೆ ಏರ್ ಇಂಡಿಯಾ ತನ್ನ ಸಂಸ್ಥೆಗೆ ಟೆವೊಲ್ಡೆ ಅವರನ್ನೇ ಹೊಸ ಸಿಇಒ ಆಗಿ ನೇಮಕ ಮಾಡಿಕೊಂಡಿರುವುದು ಸದ್ಯ ಸಾಕಷ್ಟು ಗೊಂದಲಕ್ಕೆ ಕಾರಣವಾಗಿದೆ.

ಪಾಕಿಸ್ತಾನವು ಭಾರಿ ನಷ್ಟದಲ್ಲಿದ್ದ ಪಿಐಎಯನ್ನು ಖಾಸಗೀಕರಣಗೊಳಿಸಿತು. ಕಂಪನಿಯನ್ನು ಲಾಭದಾಯಕವಾಗಿ ಪರಿವರ್ತಿಸುವ ಜವಾಬ್ದಾರಿಯನ್ನು ಟೆವೊಲ್ಡೆಗೆ ಹಸ್ತಾಂತರಿಸಲು ಯೋಜನೆ ಕೂಡ ಹಾಕಿಕೊಂಡಿತ್ತು. ಪಿಐಎ ತನ್ನ ವಿಮಾನಗಳ ಆಧುನೀಕರಣ, ಅಂತಾರಾಷ್ಟ್ರೀಯ ಮಾರ್ಗಗಳ ವಿಸ್ತರಣೆ ಮತ್ತು ಕಾರ್ಯಾಚರಣೆಯ ಸುಧಾರಣೆಗಳೊಂದಿಗೆ ಅದನ್ನು ಪುನರುಜ್ಜೀವನಗೊಳಿಸಲು ಬಯಸಿತ್ತು. ಆದಾಗ್ಯೂ, ಅಪೂರ್ಣ ಭದ್ರತಾ ಅನುಮತಿಗಳಿಂದಾಗಿ (ಸೆಕ್ಯೂರಿಟಿ ಕ್ಲಿಯರೆನ್ಸ್​) ನೇಮಕಾತಿಯನ್ನು ಅಧಿಕೃತವಾಗಿ ಘೋಷಿಸಲು ಸಾಧ್ಯವಾಗಲಿಲ್ಲ ಎಂದು ವರದಿ ತಿಳಿಸಿದೆ.

ಅದೇ ಸಮಯದಲ್ಲಿ, ಏರ್ ಇಂಡಿಯಾ ಕಾರ್ಯತಂತ್ರದ ನಡೆಯನ್ನು ಕೈಗೊಂಡಿದೆ ಮತ್ತು ಟೆವೊಲ್ಡೆಯನ್ನು ಹೊಸ ಸಿಇಒ ಆಗಿ ನೇಮಕ ಮಾಡಿಕೊಂಡಿದೆ. ಟೆವೊಲ್ಡೆ ವಿಶ್ವದ ಅತಿದೊಡ್ಡ ಮತ್ತು ಅತ್ಯಂತ ಲಾಭದಾಯಕ ವಿಮಾನಯಾನ ಸಂಸ್ಥೆಗಳಲ್ಲಿ ಒಂದಾದ ಆಫ್ರಿಕಾದ ಇಥಿಯೋಪಿಯನ್ ಏರ್​​ಲೈನ್ಸ್​ ಗ್ರೂಪ್ ಸಿಇಒ ಆಗಿ ಸೇವೆ ಸಲ್ಲಿಸಿದ್ದಾರೆ. 2011ರಿಂದ 2022 ರವರೆಗೆ ವಿಮಾನಯಾನ ಸಂಸ್ಥೆಯ ಬೆಳವಣಿಗೆಗೆ ಅವರು ಮಹತ್ವದ ಕೊಡುಗೆ ನೀಡಿದ್ದಾರೆ ಎನ್ನಲಾಗಿದೆ.

ಇಥಿಯೋಪಿಯನ್ ರಾಜಧಾನಿ ಅಡಿಸ್ ಅಬಾಬಾವನ್ನು ಆಫ್ರಿಕಾದ ಪ್ರಮುಖ ವಾಯುಯಾನ ಕೇಂದ್ರವಾಗಿ ಅಭಿವೃದ್ಧಿಪಡಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದು, ವಿಮಾನಗಳ ಸಂಖ್ಯೆ, ಅಂತಾರಾಷ್ಟ್ರೀಯ ಮಾರ್ಗಗಳು ಮತ್ತು ಕಾರ್ಯಾಚರಣೆಯ ಸಾಮರ್ಥ್ಯಗಳನ್ನು ಗಮನಾರ್ಹವಾಗಿ ವಿಸ್ತರಿಸಲು ಕಾರಣರಾಗಿದ್ದಾರೆ. ಆರೋಗ್ಯ ಕಾರಣಗಳಿಂದಾಗಿ ಅವರು 2022ರಲ್ಲಿ ನಿವೃತ್ತಿ ಪಡೆದರು. ಆದರೀಗ, ಏರ್ ಇಂಡಿಯಾಗೆ ಜಂಪ್ ಹೊಡೆದಿರುವ ಅವರು, ಇನ್ಮುಂದೆ ಟಾಟಾ ಒಡೆತನದ ಸಂಸ್ಥೆಯನ್ನು ಸಿಇಒ ಆಗಿ ಮುನ್ನಡೆಸಲಿದ್ದಾರೆ.

ಸಿಇಒ ನೇಮಕದ ಕುರಿತು ಮಾತನಾಡಿರುವ ಅವರು, ಏರ್ ಇಂಡಿಯಾವನ್ನು ಮುನ್ನಡೆಸುವುದು ಒಂದು ದೊಡ್ಡ ಗೌರವ ಹಾಗೂ ಜವಾಬ್ದಾರಿ. ಕಂಪನಿಯನ್ನು ಹೆಚ್ಚು ವಿಶ್ವಾಸಾರ್ಹ, ಲಾಭದಾಯಕ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕ ವಿಮಾನಯಾನ ಸಂಸ್ಥೆಯನ್ನಾಗಿ ಮಾಡುವುದಾಗಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ,(ಏಜೆನ್ಸೀಸ್).