ತೆಲಂಗಾಣ ನಮ್ಮ ಆಸ್ತಿಯೇ!; ಸಹೋದರನಾಗಿ ಮನೆಗೆ ಬಂದ್ರೆ ಹೈದರಾಬಾದ್ ಬಿರಿಯಾನಿ; ರಾಜಕೀಯ ಪ್ರಾಬಲ್ಯ ಅಂದ್ರೆ ಸಹಿಸಲ್ಲ: ಪವನ್​ ಕಲ್ಯಾಣ್​ ಗೆ ಕೆಟಿಆರ್ ಕೌಂಟರ್ | KTR

ಹೈದರಾಬಾದ್​: ತೆಲಂಗಾಣ ಈ ನೆಲದಲ್ಲಿ ಹುಟ್ಟಿದ ಪುತ್ರರಾದ ನಮ್ಮ ಆಸ್ತಿಯೇ, ಪವನ್ ಕಲ್ಯಾಣ್​ ಸಹೋದರನಾಗಿ ಮನೆಗೆ ಬಂದ್ರೆ ಹೈದರಾಬಾದ್ ಬಿರಿಯಾನಿ ಬಡಿಸುತ್ತೇವೆ, ನಮ್ಮ ಮೇಲೆ ಮತ್ತೆ ರಾಜಕೀಯ ಪ್ರಾಬಲ್ಯ ಸಾಧಿಸುತ್ತೇವೆ ಅಂದ್ರೆ ಸಹಿಸಲ್ಲ ಎಂದು ಆಂಧ್ರ ಡಿಸಿಎಂ ಪವನ್ ಕಲ್ಯಾಣ್ ವಿರುದ್ಧ ಬಿಆರ್​ಎಸ್ ಕಾರ್ಯಧ್ಯಕ್ಷ ಕೆಟಿಆರ್(KTR) ತಿರುಗೇಟು ನೀಡಿದ್ದಾರೆ.

ತೆಲಂಗಾಣ ರಾಜ್ಯ ರಚನೆಯ ದಿನ ಜನಸೇನಾ ವತಿಯಿಂದ ಸಭೆ ನಡೆಸಲು ಅನುಮತಿ ನೀಡದ ರಾಜ್ಯ ಕಾಂಗ್ರೆಸ್ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದ ಪವನ್ ಕಲ್ಯಾಣ್ ತೆಲಂಗಾಣ ನಿಮ್ಮಪ್ಪಂದಿರ ಆಸ್ತಿಯೇ? ಎಂಬ ಟೀಕಿಸಿದ್ದರು. ಮತ್ತು ಮುಂದಿನ ಚುನಾವಣೆಯಲ್ಲಿ ಜನಸೇನಾ ಇಲ್ಲಿ ಸ್ಪರ್ಧಿಸಲಿದೆ ಎಂದು ಘೋಷಣೆ ಮಾಡಿದ್ದರು.

ಬುಧವಾರ(ಜೂ. 03) ಹೈದರಾಬಾದ್​​ನ ಪ್ರೆಸ್ ಕ್ಲಬ್‌ನಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಕೆಟಿಆರ್, ಪವನ್ ಕಲ್ಯಾಣ್​ಗೆ ತಿರುಗೇಟು ನೀಡಿದ್ದು, ತೆಲಂಗಾಣವು ಈ ನೆಲದ ಪುತ್ರರ ಭೂಮಿ. ನಾವು ಅವರನ್ನು ನಟನಾಗಿ ಮೆಚ್ಚುತ್ತೇವೆ. ಸಹೋದರನಾಗಿ ಮನೆಗೆ ಬಂದರೆ ಹೈದರಾಬಾದ್ ಬಿರಿಯಾನಿ ಬಡಿಸುತ್ತೇವೆ. ಆದರೆ ನಮ್ಮ ರಾಜಕೀಯದಲ್ಲಿ ಪ್ರಾಬಲ್ಯ ಸಾಧಿಸುತ್ತೇವೆ ಅಂದ್ರೆ ಸುಮ್ಮನಿರಲ್ಲ. ತುಂಬಾ ಕಷ್ಟಪಟ್ಟು ಬಳಿಕ ನಾವು ಬೇರೆಯಾಗಿದ್ದೇವೆ? ಮತ್ತೆ ಯಾಕೆ ಪ್ರಾಬಲ್ಯ ಸಾಧಿಸಲು ಬರುತ್ತಿದ್ದೀರಿ ಎಂದು ಪ್ರಶ್ನಿಸಿದ್ದಾರೆ.

ದೇಶದ ಯಾವುದೇ ಭಾಗದಲ್ಲಿ ಯಾರಾದರೂ ಪಕ್ಷ ರಚಿಸಬಹುದು. ಜನಸೇನಾ ಹೊಸ ದೃಷ್ಟಿಕೋನದಿಂದ ತೆಲಂಗಾಣದಲ್ಲಿ ಸ್ಪರ್ಧಿಸಲಿದೆ ಎಂದು ಪವನ್ ಕಲ್ಯಾಣ್ ಹೇಳ್ತಿದ್ದಾರೆ. 2023ರ ಚುನಾವಣೆಯಲ್ಲಿ ಪವನ್ ಬಿಜೆಪಿಯೊಂದಿಗೆ ಸ್ಪರ್ಧಿಸಿದ್ದರು. ಅಂದು ಅವರನ್ನು ನಾವ್ಯಾರೂ ತಡೆಯಲಿಲ್ಲ. ಜನರೇ ತಡೆದರು ಎಂದು ವ್ಯಂಗ್ಯವಾಡಿದ್ದಾರೆ.

ಇದೇ ವೇಳೆ ಪ್ರಾದೇಶಿಕತೆ ಭಯೋತ್ಪಾದನೆಗಿಂತ ಅಪಾಯಕಾರಿ ಎಂಬ ಪವನ್ ಕಲ್ಯಾಣ್ ಹೇಳಿಕೆ ವಿರುದ್ಧ ಕಿಡಿಕಾರಿದ ಕೆಟಿಆರ್, ಪವನ್ ಕಲ್ಯಾಣ್ ಅವರಿಂದ ದೇಶಭಕ್ತಿ ಮತ್ತು ಹೋರಾಟಗಳ ಬಗ್ಗೆ ನಾವು ಕಲಿಯಬೇಕಾಗಿಲ್ಲ. ಆಂಧ್ರಪ್ರದೇಶವನ್ನು ಮದ್ರಾಸ್‌ನಿಂದ ಬೇರ್ಪಡಿಸಲು ಪೊಟ್ಟಿ ಶ್ರೀರಾಮುಲು 58 ದಿನಗಳ ಕಾಲ ಉಪವಾಸ ಮಾಡಿ ತಮ್ಮ ಪ್ರಾಣವನ್ನೇ ತ್ಯಾಗ ಮಾಡಿದ್ದಾರೆ ಅದು ಪ್ರಾದೇಶಿಕತೆ ಅಲ್ಲವೇ ಎಂದು ಪ್ರಶ್ನಿಸಿದ್ದಾರೆ.

ಪ್ರಾದೇಶಿಕತೆ ಎಂದರೆ ತೆಲಂಗಾಣಕ್ಕೆ ಬರಬೇಕಾದ ಹೂಡಿಕೆಗಳನ್ನು ಗುಜರಾತ್‌ನಲ್ಲಿ ಹೂಡಿಕೆ ಮಾಡಲಾಗುತ್ತಿದೆ. ರಾಷ್ಟ್ರೀಯತೆಯ ಸೋಗಿನಲ್ಲಿ ಅಲ್ಲಿ ಮಾಡುತ್ತಿರುವ ಹೂಡಿಕೆ ಪ್ರಾದೇಶಿಕತೆ ಅಲ್ಲವೇ?, ಪ್ರಧಾನಿ ಮೋದಿ ಗುಜರಾತ್‌ನ ಪ್ರಧಾನಿಯಾಗಿ ಮಾತ್ರ ಕಾರ್ಯನಿರ್ವಹಿಸುವುದು ಸರಿಯೇ ಎಂದು ವಾಗ್ದಾಳಿ ನಡೆಸಿದ್ದಾರೆ (ಏಜೆನ್ಸೀಸ್).