ನವ ದೆಹಲಿ: 'ದೇವರೇ ಈ ದೇಶವನ್ನು ಕಾಪಾಡಬೇಕು. ಇಂದು ನಾನು ಐದು ಗಂಟೆ ರೈಲಿನಲ್ಲಿ ಪ್ರಯಾಣಿಸಿದೆ. ಇದೊಂದು ಅಘಾತಕಾರಿಯಾಗಿ ಮಾರ್ಪಟ್ಟಿತ್ತು. ನಾವು ಸಾರ್ವಜನಿಕ ಸ್ಥಳದಲ್ಲಿ ನಮ್ಮ ವರ್ತನೆಯಲ್ಲಿ ಬದಲಾವಣೆಯನ್ನು ಎಂದು ಕಂಡು ಕೊಳ್ಳುತ್ತೇವೆಯೋ ಎನ್ನುವುದನ್ನು ಕಾದು ನೋಡಬೇಕು' ಹೀಗೆಂದು ಎಕ್ಸ್ನಲ್ಲಿ ಬರೆದುಕೊಂಡಿದ್ದು ಬೆಂಗಳೂರು ದಕ್ಷಿಣ ವಿಭಾಗದ ಸಂಸದ ತೇಜಸ್ವಿ ಸೂರ್ಯ ಅವರ ಪತ್ನಿ ಹಾಗೂ ಗಾಯಕಿ ಶಿವಶ್ರೀ ಸ್ಕಂದ ಪ್ರಸಾದ್ ರೈಲು ಪ್ರಯಾಣ ಕೆಟ್ಟ ಅನುಭವದ ಬಗ್ಗೆ ಮಾಹಿತಿ ಹಂಚಿಕೊಂಡು ಬೇಸರ ವ್ಯಕ್ತಪಡಿಸಿದ್ದಾರೆ.
ಗಾಯಕಿ ಶಿವಶ್ರೀ ಸ್ಕಂದ ಪ್ರಸಾದ್ ಅವರು ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಹೆಚ್ಚಾಗಿ ಆಕ್ಟಿವ್ ಇರುತ್ತಾರೆ. ಅವರು ಅತಿ ವೇಗದಲ್ಲಿ ಕನ್ನಡ ಕಲಿತ ಪರಿ, ಮಾದೇವನ ಹಾಡು ಕನ್ನಡಿಗರಿಂದ ಸಾಕಷ್ಟು ಮೆಚ್ಚುಗೆಯನ್ನು ಗಳಿಸಿತ್ತು. ಸದ್ಯ ಅವರು ಎಕ್ಸ್ನಲ್ಲಿ ರೈಲು ಪ್ರಯಾಣ ಮತ್ತು ಬೋಗಿಗಳಲ್ಲಿ ಜನ ಸಾಮಾನ್ಯರ ನಡೆತೆಯೂ ಹೇಗಿತ್ತು ಎನ್ನುವ ಬಗ್ಗೆ ಬರೆದುಕೊಂಡಿದ್ದಾರೆ. ಅವರ ಈ ಪೋಸ್ಟ್ಗೆ ಹಲವರು ಜೊತೆಯಾಗಿದ್ದು, ಗಾಯಕಿಯ ಮಾತು ಸರಿ ಎಂದು ಒಪ್ಪಿಕೊಂಡಿದ್ದಾರೆ.
ಶಿವಶ್ರೀ ಅವರ ಪೋಸ್ಟ್ನಲ್ಲಿ ಏನಿದೆ?
ಇಂದು ನನಗೆ ಅಘಾತಕಾರಿ ರೈಲು ಪ್ರಯಾಣದ ಅನುಭವವಾಯ್ತು. ನಾವಿರುವ ಸಾರ್ವಜನಿಕ ಸ್ಥಳದಲ್ಲಿ ಇತರಿಗೆ ಸಮಸ್ಯೆಯನ್ನುಂಟು ಮಾಡಬಾರದು. ಕೂಗಬಾರದು. ಜೋರಾಗಿ ಮಾತನಾಡಬಾರದು. ಸಹ ಪ್ರಯಾಣಿಕರಿಗೆ ತೊಂದರೆಯಾಗುವುದನ್ನು ತಡೆಯಬೇಕು. ಪ್ರತಿ ವ್ಯಕ್ತಿಯ ಸ್ವಾತಂತ್ರ್ಯಕ್ಕೆ ಧಕ್ಕೆ ತರಕೂಡದು. ಸಾರ್ವಜನಿಕ ಸ್ಥಳದಲ್ಲಿ ಜವಾಬ್ದಾರಿಯುತವಾಗಿ ನಡೆದುಕೊಳ್ಳಬೇಕು ಎನ್ನುವ ವಿಚಾರವೂ ತಿಳಿಯದೇ ಇರುವುದು ವಿಷಾದನೀಯ ಎಂದಿದ್ದಾರೆ ಶಿವಶ್ರೀ ಸ್ಕಂದ ಪ್ರಸಾದ್.
ಮುಂದುವರೆದು, ಕಲಾವಿದರಾದ ನಾವು ಹೆಚ್ಚು ಶಾಂತ ವಾತಾವರಣವನ್ನು ಇಷ್ಟಪಡುತ್ತೇವೆ, ಮನಸ್ಸಲ್ಲಿ ನೂರೆಂಟು ಯೋಚನೆ, ಚಿಂತನೆ, ಸೃಜನಾಶೀಲಾತ್ಮಕ ಆಲೋಚನೆಗಳು ಥಟ್ಟನೆ ಹಾದುಹೋಗುತ್ತಿರುತ್ತದೆ. ಇದನ್ನು ಮನನ ಮಾಡಲು ನಮಗೆ ಪ್ರಶಾಂತವಾದ ವಾತಾವರಣದ ಅಗತ್ಯವಿರುತ್ತದೆ. ಆದರೆ, ನಾನು ಪ್ರಯಾಣಿಸುತ್ತಿದ್ದ ಬೋಗಿಯಲ್ಲಿದ್ದ ಜನರ ವರ್ತನೆ ನನ್ನ ಶಾಂತಿಯುತ ಪ್ರಯಾಣದ ನಂಬಿಕೆಯನ್ನು ಸುಳ್ಳಾಗಿಸಿತ್ತು ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
