YouTuber: ತಮಿಳುನಾಡು ಮೂಲದ ರೀಲ್ಸ್, ಯೂಟ್ಯೂಬರ್ ಆದ ಮಧುಮಿತಾ ಅವರ ಮನೆಯಲ್ಲಿ 1 ಕೋಟಿ ರೂ. ಕಳ್ಳತನವಾಗಿದ್ದು, ಖದೀಮರ ಕೈಚಳಕದಿಂದ ಅಕ್ಷರಶಃ ಕಂಗಾಲಾಗಿರುವ ರೀಲ್ಸ್ ರಾಣಿ ಇದೀಗ ಪೊಲೀಸ್ ಠಾಣೆಯಲ್ಲಿ ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ಪತಿ ವಿನೋದ್ಕುಮಾರ್ ಮತ್ತು ಮಗುವಿನೊಂದಿಗೆ ಕನ್ಯಾಕುಮಾರಿ ಜಿಲ್ಲೆಯ ಧಮ್ಮತು ಕೋಣಂ ಪ್ರದೇಶದ ವಿಐಪಿ ಗಾರ್ಡನ್ನಲ್ಲಿ ವಾಸವಿರುವ ಮಧುಮಿತಾ, ತಮ್ಮ ಬಹುತೇಕ ವಿಡಿಯೋಗಳಲ್ಲಿ ಕೋಟಿ ರೂ. ಬೆಲೆ ಬಾಳುವ ದುಬಾರಿ ಚಿನ್ನಾಭರಣ ಮತ್ತು ನಗದನ್ನು ಮುಂದಿಟ್ಟು ರೀಲ್ಸ್ ಮಾಡುತ್ತಿದ್ದರು. ತಾನು ಸಿರಿವಂತೆ ಎಂದು ತೋರಿಸಿದ್ದಕ್ಕಿಂತ ಆಕೆ ನೀಡಿದ ಮಾಹಿತಿಗಳೇ ಇಂದು ಮನೆಯಲ್ಲಿನ ಒಡೆವಗಳ ಲೂಟಿಗೆ ಮುಖ್ಯ ಕಾರಣವಾಗಿದೆ.
ಚಿನ್ನದ ಆಭರಣ, ಕ್ಯಾಶ್ ಅನ್ನು ಮುಂದಿಟ್ಟು ರೀಲ್ಸ್ ಮತ್ತು ವಿಡಿಯೋಗಳನ್ನು ಹಂಚಿಕೊಳ್ಳುತ್ತಿದ್ದ ಮಹಿಳೆ, ಇದರಲ್ಲಿ ತಾನು ಯಾವ ಜಾಗದಲ್ಲಿದ್ದೇನೆ ಮತ್ತು ಸಮಯ ಎಷ್ಟಾಗಿದೆ ಎಂಬುದನ್ನೂ ತೋರಿಸಿದ್ದೇ 118 ಪೌಂಡ್ ಚಿನ್ನ, ವಜ್ರಗಳು ಮತ್ತು 1 ಕೋಟಿ ರೂ. ಮೌಲ್ಯದ ನಗದು ದರೋಡೆ ಆಗಿರುವುದಕ್ಕೆ ದೊಡ್ಡ ಕಾರಣ ಎನ್ನಲಾಗಿದೆ.
