ತಮಿಳುನಾಡು ಚುನಾವಣೆ: ಅಣ್ಣಾಮಲೈಗೆ ಕೊಕ್, ಪ್ರಮುಖರಿಗೆ ಮಣೆ! ಬಿಜೆಪಿ ಪಟ್ಟಿಯಲ್ಲಿ ಅಡಗಿದೆ ಯಾರೂ ಊಹಿಸದ ಟ್ವಿಸ್ಟ್! Annamalai

ಕೆ. ಅಣ್ಣಾಮಲೈ ಅವರ ಸ್ಪರ್ಧೆಯ ಬಗ್ಗೆ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗಳಿದ್ದವು. ಆದರೆ, ಈಗ ಬಿಡುಗಡೆಯಾಗಿರುವ ಪಟ್ಟಿಯಲ್ಲಿ ಅವರ ಹೆಸರನ್ನು ಕೈಬಿಡಲಾಗಿದೆ. ಇದು ಪಕ್ಷದ ಒಳಗಿನ ಭಿನ್ನಮತ ಅಥವಾ ಕಾರ್ಯತಂತ್ರದ ಭಾಗವೇ ಎಂಬ ಪ್ರಶ್ನೆ ಈಗ ಮೂಡಿದೆ. ಇನ್ನುಳಿದಂತೆ ಪಕ್ಷದ ಪ್ರಮುಖ ನಾಯಕರಿಗೆ ಮಣೆ ಹಾಕಲಾಗಿದ್ದು, ಪ್ರಮುಖ ಕ್ಷೇತ್ರಗಳ ಅಭ್ಯರ್ಥಿಗಳು ಈ ಕೆಳಗಿನಂತಿದ್ದಾರೆ.

ಮೈಲಾಪುರ: ತಮಿಳಿಸೈ ಸೌಂದರರಾಜನ್

ಕೊಯಮತ್ತೂರು (ಉತ್ತರ): ವನತಿ ಶ್ರೀನಿವಾಸನ್

ಅವನಾಶಿ (SC): ಎಲ್. ಮುರುಗನ್

ಸತ್ತೂರು: ನೈನಾರ್ ನಾಗೇಂದ್ರನ್

ಬಿಜೆಪಿ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ರಾಜ್ಯದ ವಿವಿಧ ಭಾಗಗಳಿಗೆ ಪ್ರಾತಿನಿಧ್ಯ ನೀಡಲು ಪ್ರಯತ್ನಿಸಲಾಗಿದೆ. ಅವಡಿ ಕ್ಷೇತ್ರದಿಂದ ಎಂ. ರಾಜಸಿಂಹ ಮಹೇಂದ್ರ, ತಿರುವಣ್ಣಾಮಲೈನಿಂದ ಸಿ. ಏಳುಮಲೈ ಮತ್ತು ನಾಗರ್‌ಕೋಯಿಲ್‌ನಿಂದ ಎಂ.ಆರ್. ಗಾಂಧಿ ಅವರಿಗೆ ಟಿಕೆಟ್ ನೀಡಲಾಗಿದೆ.

ಇತ್ತೀಚೆಗಷ್ಟೇ ಕಾಂಗ್ರೆಸ್ ತೊರೆದು ಬಿಜೆಪಿ ಸೇರಿದ್ದ ವಿಜಯಧರಣಿ ಅವರಿಗೆ ವಿಲವಂಕೋಡ್ ಕ್ಷೇತ್ರದಿಂದ ಟಿಕೆಟ್ ಘೋಷಿಸಲಾಗಿದೆ. ಪದ್ಮನಾಭಪುರಂನಿಂದ ಪಿ. ರಮೇಶ್ ಮತ್ತು ತಿರುಚೆಂದೂರಿನಿಂದ ಕೆ.ಆರ್.ಎಂ. ರಾಧಾಕೃಷ್ಣನ್ ಕಣಕ್ಕಿಳಿಯಲಿದ್ದಾರೆ.

ಈ ಪಟ್ಟಿ ಬಿಡುಗಡೆಯಾಗುವ ಮುನ್ನ ಚೆನ್ನೈನ ಬಿಜೆಪಿ ಪ್ರಧಾನ ಕಚೇರಿಯ ಮುಂದೆ ಭಾರಿ ಹೈಡ್ರಾಮಾ ನಡೆದಿತ್ತು. ಕೆಲವು ಕ್ಷೇತ್ರಗಳನ್ನು ಮೈತ್ರಿಕೂಟದ ಪಕ್ಷಗಳಿಗೆ ಬಿಟ್ಟುಕೊಟ್ಟಿರುವುದನ್ನು ವಿರೋಧಿಸಿ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದ್ದರು. ವಿಶೇಷವಾಗಿ ಅಣ್ಣಾಮಲೈ ಅವರ ಬೆಂಬಲಿಗರು ಅವರಿಗೆ ಟಿಕೆಟ್ ಸಿಗದಿರುವುದನ್ನು ಕಂಡು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ ಎನ್ನಲಾಗಿದೆ.

ತಮಿಳುನಾಡಿನಲ್ಲಿ ಡಿಎಂಕೆ ಮತ್ತು ಎಐಎಡಿಎಂಕೆ ನಡುವಿನ ಸಾಂಪ್ರದಾಯಿಕ ಹೋರಾಟದ ನಡುವೆ ತನ್ನ ಅಸ್ತಿತ್ವ ಕಂಡುಕೊಳ್ಳಲು ಬಿಜೆಪಿ ಹರಸಾಹಸ ಪಡುತ್ತಿದೆ. ಅಣ್ಣಾಮಲೈ ಅವರಂತಹ ಫೈರ್‌ಬ್ರ್ಯಾಂಡ್ ನಾಯಕನನ್ನು ಕಣದಿಂದ ಹೊರಗಿಟ್ಟಿರುವುದು ಪಕ್ಷಕ್ಕೆ ವರವಾಗಲಿದೆಯೇ ಅಥವಾ ಶಾಪವಾಗಲಿದೆಯೇ ಎಂಬುದು ಫಲಿತಾಂಶದ ನಂತರವಷ್ಟೇ ತಿಳಿಯಲಿದೆ. ಅಣ್ಣಾಮಲೈ ಅವರನ್ನು ಕೇವಲ ಚುನಾವಣಾ ಪ್ರಚಾರಕ್ಕೆ ಸೀಮಿತಗೊಳಿಸುವ ಉದ್ದೇಶ ಹೈಕಮಾಂಡ್‌ಗೆ ಇರಬಹುದು ಎಂಬ ಚರ್ಚೆಯೂ ನಡೆಯುತ್ತಿದೆ,(ಏಜೆನ್ಸೀಸ್).