ತಮಿಳುನಾಡು ಚುನಾವಣೆ: ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ ಮಾಡಿದ ಡಿಎಂಕೆ; ಯಾರಿಗೆ ಯಾವ ಕ್ಷೇತ್ರ?..Tamil Nadu Assembly polls

ಚೆನ್ನೈ: ಏಪ್ರಿಲ್ 23 ರಂದು ಒಂದೇ ಹಂತದಲ್ಲಿ ನಡೆಯಲಿರುವ ತಮಿಳುನಾಡು ವಿಧಾನಸಭೆ ಚುನಾವಣೆಗೆ(Tamil Nadu Legislative Assembly election) ಅಖಾಡ ರಂಗೇರಿದೆ. ಚುನಾವಣೆಗೂ ಮುನ್ನ ಡಿಎಂಕೆ ಅಧಿಕೃತವಾಗಿ ತನ್ನ ಅಭ್ಯರ್ಥಿಗಳು ಯಾವ್ಯಾವ ಕ್ಷೇತ್ರದಲ್ಲಿ ಸ್ಪರ್ಧಿಸಲಿದ್ದಾರೆ ಎನ್ನುವ ಪಟ್ಟಿಯನ್ನು ಬಿಡುಗಡೆ ಮಾಡಿದೆ.

ಮಿತ್ರಪಕ್ಷಗಳೊಂದಿಗೆ ಸಮತೋಲಿತ ಒಪ್ಪಂದ ಮಾಡಿಕೊಳ್ಳಲು ತಾಳ್ಮೆಯ ಚರ್ಚೆ ಅಗತ್ಯವಿತ್ತು, ಹೀಗಾಗಿ ಸಮಯ ತೆಗೆದುಕೊಂಡಿದ್ದೇವೆ ಎಂದು ಸೀಟು ಹಂಚಿಕೆ ವಿಳಂಬದ ಬಗ್ಗೆ ಮುಖ್ಯಮಂತ್ರಿ ಸ್ಟಾಲಿನ್​ ಸ್ಪಷ್ಟಪಡಿಸಿದರು.

ಸೀಟು ಹಂಚಿಕೆ ಅಧಿಕೃತ ಪಟ್ಟಿ ಮಾಹಿತಿ ಪ್ರಕಾರ ಎಂಕೆ ಸ್ಟಾಲಿನ್​ ಅವರು ಕೊಳತ್ತೂರು ಕ್ಷೇತ್ರದಿಂದ ಸ್ಪರ್ಧಿಸಲಿದ್ದಾರೆ. ಇನ್ನು ಉಪಮುಖ್ಯಮಂತ್ರಿ ಉದಯನಿಧಿ ಅವರು ಚೆಪಾಕ್-ತಿರುವಲ್ಲಿಕೇಣಿ ಕ್ಷೇತ್ರದಿಂದ ಕಣಕ್ಕಿಳಿಯಲಿದ್ದಾರೆ.ಸಚಿವ ಸೆಂಥಿಲ್ ಬಾಲಾಜಿ ಅವರು ಕರೂರ್‌ನಿಂದ ಕೊಯಮತ್ತೂರು ದಕ್ಷಿಣಕ್ಕೆ ಸ್ಥಳಾಂತರಗೊಂಡಿದ್ದು, ಇದು ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.

ಡಿಎಂಕೆ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ 60ಕ್ಕೂ ಹೆಚ್ಚು ಮಂದಿ ಹೊಸಬರಿಗೆ ಅವಕಾಶ ನೀಡಲಾಗಿದೆ. 60ಕ್ಕೂ ಹೆಚ್ಚು ಮಂದಿ ಮೊದಲ ಬಾರಿಗೆ ಚುನಾವಣಾ ಅಖಾಡಕ್ಕೆ ಇಳಿಯುತ್ತಿದ್ದಾರೆ. ಇದರಲ್ಲಿ 29 ಜನ ವಕೀಲರು, 17 ಜನ ಎಂಜಿನಿಯರ್‌ಗಳು ಹಾಗೂ 15 ವೈದ್ಯರು ಮತ್ತು 7 ಪಿಎಚ್‌ಡಿ ಪದವೀಧರರಿದ್ದಾರೆ. 18 ಜನ ಮಹಿಳೆಯರಿಗೆ ಟಿಕೆಟ್ ನೀಡಲಾಗಿದೆ.

ತಮಿಳುನಾಡು ವಿಧಾನಸಭೆ ಚುನಾವಣೆಗೆ ಕಾಂಗ್ರೆಸ್​ ಪ್ರಮುಖ ಪಾತ್ರವಹಿಸಿರುವ ಹಿನ್ನೆಲೆ, 28 ಕ್ಷೇತ್ರಗಳಲ್ಲಿ ಕಾಂಗ್ರೆಸ್​ ಸ್ಪರ್ಧಿಸಲಿದೆ. ಡಿಎಂಡಿಕೆಗೆ 10 ಸ್ಥಾನ, ವಿಸಿಕೆ 8 ಕ್ಷೇತ್ರದಲ್ಲಿ ಸ್ಪರ್ಧಿಸಲಿದೆ. ಇನ್ನು ಸಿಪಿಐಗೆ 5 ಸ್ಥಾನ ಹಾಗೂ ಸಿಪಿಐ-ಎಂಗೆ 5 ಸ್ಥಾನ ನೀಡಲಾಗಿದೆ. ಎಂಡಿಎಂಕೆ 4 ಸ್ಥಾನ ಉಳಿದ ಸ್ಥಾನಗಳನ್ನು ಸಣ್ಣ ಪಕ್ಷಗಳಿಗೆ ಹಂಚಿಕೆ ಮಾಡಲಾಗಿದೆ.

ಡಿಎಂಕೆ ಮೈತ್ರಿಕೂಟಕ್ಕೆ ಎದುರಾಗಿ ಎಐಎಡಿಎಂಕೆ ನೇತೃತ್ವದ ಎನ್’ಡಿಎ ಮೈತ್ರಿಕೂಟ ಸಜ್ಜಾಗಿದೆ. ಎಐಎಡಿಎಂಕೆ 169 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದರೆ, ಬಿಜೆಪಿ 27 ಸ್ಥಾನಗಳಲ್ಲಿ ಕಣಕ್ಕಿಳಿಯಲಿದೆ. ಪಿಎಂಕೆ 18 ಮತ್ತು ಎಎಂಎಂಕೆಗೆ 11 ಸ್ಥಾನಗಳನ್ನು ನೀಡಲಾಗಿದೆ, (ಏಜೆನ್ಸೀಸ್).