ಬಂಗಾಳದ ಅಖಾಡದಲ್ಲಿ ಸುವೇಂದು ಅಬ್ಬರ: ಟಿಎಂಸಿ ಗೂಂಡಾಗಳಿಗೆ ಶಿಕ್ಷೆ ಗ್ಯಾರಂಟಿ ಎಂದ ಬಿಜೆಪಿ ನಾಯಕ | Suvendu Adhikari

ಈ ಬಗ್ಗೆ ತಮ್ಮ ರಾಜಕೀಯ ಶಕ್ತಿಯ ಕೇಂದ್ರವಾದ ನಂದಿಗ್ರಾಮದಲ್ಲಿ ನಿಂತು ಮಾತನಾಡಿದ ಸುವೇಂದು ಅಧಿಕಾರಿ, ಎರಡು ಕ್ಷೇತ್ರಗಳ ಗೆಲುವಿನ ಕುರಿತು ಭಾವನಾತ್ಮಕ ಮತ್ತು ರಾಜಕೀಯ ಸಮತೋಲನದ ಮಾತುಗಳನ್ನಾಡಿದರು. ನಂದಿಗ್ರಾಮವನ್ನು ಅವರು ತಮ್ಮ ಭದ್ರಾಸನ ಎಂದು ಕರೆಯುತ್ತಾರೆ. 2007ರಲ್ಲಿ ನಡೆದ ಭೂಸ್ವಾಧೀನ ವಿರೋಧಿ ಚಳವಳಿಯ ಮೂಲಕ ಮಾಸ್ ಲೀಡರ್ ಆಗಿ ಬೆಳೆದ ಅಧಿಕಾರಿಗೆ ನಂದಿಗ್ರಾಮ ಕೇವಲ ಕ್ಷೇತ್ರವಲ್ಲ, ಅದು ಅವರ ರಾಜಕೀಯ ಅಸ್ತಿತ್ವದ ಬೇರಾಗಿದೆ.

ಚುನಾವಣೋತ್ತರ ಹಿಂಸಾಚಾರದ ಕುರಿತು ಟಿಎಂಸಿ ಮಾಡುತ್ತಿರುವ ಆರೋಪಗಳನ್ನು ಅಧಿಕಾರಿ ಸಾರಾಸಗಟಾಗಿ ತಳ್ಳಿಹಾಕಿದರು. ನಾನು ಯಾವುದೇ ಹಿಂಸೆಯನ್ನು ಬೆಂಬಲಿಸುವುದಿಲ್ಲ. ಆದರೆ ಟಿಎಂಸಿ ಆಡಳಿತದ ದೌರ್ಜನ್ಯಕ್ಕೆ ಹೋಲಿಸಿದರೆ ಈಗಿನ ಘಟನೆಗಳು ಏನೇನೂ ಅಲ್ಲ ಎಂದರು.

ಗವರ್ನರ್ ಮಧ್ಯಪ್ರವೇಶ: ಅಂದಿನ ರಾಜ್ಯಪಾಲ ಜಗದೀಪ್ ಧಂಖರ್ ಅವರು ಅಸ್ಸಾಂಗೆ ಭೇಟಿ ನೀಡಿ ನಿರಾಶ್ರಿತರ ಸ್ಥಿತಿಯನ್ನು ನೋಡಬೇಕಾಯಿತು.

ಈಗ ಡಿಜಿಪಿ ಅವರು 50-60 ಸಣ್ಣಪುಟ್ಟ ದೂರುಗಳು ಬಂದಿವೆ ಎಂದು ಹೇಳಿದ್ದಾರೆ. ನೂರು ಎಫ್‌ಐಆರ್ ಕೂಡ ದಾಖಲಾಗಿಲ್ಲ. ಬಿಜೆಪಿ ಹಿಂಸೆಯಲ್ಲಿ ನಂಬಿಕೆ ಇಟ್ಟಿಲ್ಲ. ನಮಗೆ ಶೇ. 46ರಷ್ಟು ಮತಗಳು ಸಿಕ್ಕಿವೆ, ಮುಂದಿನ ಚುನಾವಣೆಯಲ್ಲಿ ಇದು ಶೇ. 60ಕ್ಕೆ ಏರಲಿದೆ ಎಂದು ಸುವೇಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

2011ರಲ್ಲಿ ಟಿಎಂಸಿ ಅಧಿಕಾರಕ್ಕೆ ಬರಲು ನಂದಿಗ್ರಾಮದ ಹೋರಾಟವೇ ಮೂಲಾಧಾರವಾಗಿತ್ತು. ಅಂದು ಮಮತಾ ಬ್ಯಾನರ್ಜಿಯವರ ಅತ್ಯಂತ ನಿಕಟವರ್ತಿಯಾಗಿದ್ದ ಸುವೇಂದು ಅಧಿಕಾರಿ, ಗ್ರೌಂಡ್ ಲೆವೆಲ್‌ನಲ್ಲಿ ಜನರನ್ನು ಸಂಘಟಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಆದರೆ ಇಂದು ಕಾಲಚಕ್ರ ಉರುಳಿದೆ. ಮಮತಾ ಅವರನ್ನು ಅವರದ್ದೇ ಭದ್ರಕೋಟೆಯಲ್ಲಿ ಸೋಲಿಸುವ ಮೂಲಕ ಅಧಿಕಾರಿ ಜೈಂಟ್ ಕಿಲ್ಲರ್ ಆಗಿ ಹೊರಹೊಮ್ಮಿದ್ದಾರೆ.

ಸುವೇಂದು ಅಧಿಕಾರಿ ಅವರ ಈ ಗೆಲುವು ಕೇವಲ ವ್ಯಕ್ತಿಗತ ಗೆಲುವಲ್ಲ, ಇದು ಬಂಗಾಳದಲ್ಲಿ ಬಿಜೆಪಿ ನಡೆಸುತ್ತಿರುವ ಸೈದ್ಧಾಂತಿಕ ಸಂಘರ್ಷದ ದೊಡ್ಡ ಗೆಲುವು. ಮಮತಾ ಬ್ಯಾನರ್ಜಿ ಬಂಗಾಳದಲ್ಲಿ ತಮ್ಮ ರಾಜಕೀಯ ಪ್ರಸ್ತುತತೆಯನ್ನು ಕಳೆದುಕೊಂಡಿದ್ದಾರೆ. ಅವರ ರಾಜೀನಾಮೆಯ ಕುರಿತು ರಾಜ್ಯಪಾಲರು ನಿರ್ಧರಿಸಲಿದ್ದಾರೆ ಎಂಬ ಮಾತುಗಳು ರಾಜ್ಯದಲ್ಲಿ ಆಡಳಿತ ಬದಲಾವಣೆಯ ಗಾಳಿ ಬೀಸುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.

ಸುವೇಂದು ಅವರ ಮಾತುಗಳಲ್ಲಿ ದರ್ಪಕ್ಕಿಂತ ಹೆಚ್ಚಾಗಿ ತಳಮಟ್ಟದ ಸಂಘಟನಾ ಶಕ್ತಿಯ ಆತ್ಮವಿಶ್ವಾಸ ಎದ್ದು ಕಾಣುತ್ತಿತ್ತು. ಬಂಗಾಳದ ಕರಾವಳಿ ಭಾಗದಲ್ಲಿ ಪಾರಮ್ಯ ಹೊಂದಿರುವ ಅಧಿಕಾರಿ ಕುಟುಂಬ, ಈಗ ರಾಜ್ಯದಾದ್ಯಂತ ಕಮಲ ಅರಳಿಸಲು ಸನ್ನದ್ಧವಾಗಿದೆ,(ಏಜೆನ್ಸೀಸ್​).