ಸೂರ್ಯವಂಶಿ ಬ್ಯಾಟಿಂಗ್​ ವೈಭವ! ಲಕ್ನೋ ವಿರುದ್ಧ ರಾಜಸ್ಥಾನ್ ರಾಯಲ್ಸ್‌ಗೆ ಭರ್ಜರಿ ಜಯ! RRvsLSG

ಲಕ್ನೋ ತಂಡ ಸೃಷ್ಟಿಸಿದ್ದ ಬೃಹತ್ ಮೊತ್ತವನ್ನು ಕಂಡು ರಾಜಸ್ಥಾನ್ ರಾಯಲ್ಸ್ ಒತ್ತಡಕ್ಕೆ ಒಳಗಾಗಬಹುದು ಎಂದು ಭಾವಿಸಿದ್ದ ಅಭಿಮಾನಿಗಳಿಗೆ ಯುವ ಓಪನರ್ ವೈಭವ್ ಸೂರ್ಯವಂಶಿ ಸಂಪೂರ್ಣ ಆಘಾತ ನೀಡಿದರು. ಮೊದಲ ಓವರ್‌ನಿಂದಲೇ ಲಕ್ನೋ ಬೌಲರ್‌ಗಳ ಮೇಲೆ ಸಿಡಿಲಮರಿಯಂತೆ ಮುಗಿಬಿದ್ದ ಸೂರ್ಯವಂಶಿ ಜೈಪುರ ಅಂಗಳದಲ್ಲಿ ರನ್ ಚಂಡಮಾರುತ ಎಬ್ಬಿಸಿದರು.

ಕೇವಲ 38 ಎಸೆತಗಳಲ್ಲಿ ಬರೋಬ್ಬರಿ 93 ರನ್ ಚಚ್ಚಿದ ವೈಭವ್, ಲಕ್ನೋ ತಂಡದ ಎಲ್ಲಾ ರಣತಂತ್ರಗಳನ್ನು ಧೂಳೀಪಟ ಮಾಡಿದರು. ಇವರ ಈ ಭೀಕರ ಇನ್ನಿಂಗ್ಸ್‌ನಲ್ಲಿ ಬೌಂಡರಿ ಮತ್ತು ಸಿಕ್ಸರ್‌ಗಳ ಭಾರಿ ಮಳೆಯೇ ಆಯಿತು. ಕೇವಲ 7 ರನ್‌ಗಳಿಂದ ಶತಕ ವಂಚಿತರಾಗಿ ವೈಭವ್ ಔಟಾಗುವಷ್ಟರಲ್ಲಿ, ರಾಜಸ್ಥಾನ್ ರಾಯಲ್ಸ್ ಜಯದ ಹೊಸ್ತಿಲಿಗೆ ಬಂದು ನಿಂತಿತ್ತು.

ಇದಕ್ಕೂ ಮುನ್ನ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ್ದ ಲಕ್ನೋ ಸೂಪರ್ ಜೈಂಟ್ಸ್ ಪರ ಆಸ್ಟ್ರೇಲಿಯಾದ ದೈತ್ಯ ಆಲ್‌ರೌಂಡರ್ ಮಿಚೆಲ್ ಮಾರ್ಷ್ ಭೀಕರ ಬ್ಯಾಟಿಂಗ್ ನಡೆಸಿದ್ದರು. ಕೇವಲ 57 ಎಸೆತಗಳಲ್ಲಿ 96 ರನ್ ಸಿಡಿಸಿದ ಮಾರ್ಷ್ ಮತ್ತು ಬಿರುಸಿನ 60 ರನ್ ಗಳಿಸಿದ ಜೋಶ್ ಇಂಗ್ಲಿಸ್ ಮೊದಲ ವಿಕೆಟ್‌ಗೆ 50 ಎಸೆತಗಳಲ್ಲಿ 109 ರನ್‌ಗಳ ಬೃಹತ್ ಜೊತೆಯಾಟದ ಬುನಾದಿ ಹಾಕಿದ್ದರು. ಅಂತಿಮ ಓವರ್‌ಗಳಲ್ಲಿ ನಾಯಕ ರಿಷಭ್ ಪಂತ್ (35 ರನ್) ಅವರೊಂದಿಗೆ ಸೇರಿ ಮಾರ್ಷ್ ಎಲ್‌ಎಸ್‌ಜಿ ಮೊತ್ತವನ್ನು ೨೨೦ ಕ್ಕೆ ತಲುಪಿಸಿದ್ದರು.

ರಾಜಸ್ಥಾನ್ ಪರ ಲೆಗ್ ಸ್ಪಿನ್ನರ್ ಯಶ್ ರಾಜ್ ಪುಂಜಾ 35 ರನ್ ನೀಡಿ 2 ವಿಕೆಟ್ ಕಸಿದು ಸ್ವಲ್ಪ ಬ್ರೇಕ್ ಹಾಕಿದ್ದರು. ಆದರೆ, ಲಕ್ನೋ ತಂಡದ ಈ ಹಿಮಾಲಯದಂತಹ ಸ್ಕೋರ್ ವೈಭವ್ ಸೂರ್ಯವಂಶಿ ಅವರ ಬ್ಯಾಟಿಂಗ್ ದರ್ಬಾರ್ ಮುಂದೆ ಕರಗಿ ನೀರಾಯಿತು. ರಾಜಸ್ಥಾನ್ ರಾಯಲ್ಸ್ ಕೇವಲ ೩ ವಿಕೆಟ್ ಕಳೆದುಕೊಂಡು 19.1 ಓವರ್‌ಗಳಲ್ಲೇ ಗೆಲುವಿನ ನಗೆ ಬೀರಿದೆ.