ಬಡತನ ಮೀರಿ ಬೆಳೆದ ಬಂಗಾರದ ಮನುಷ್ಯ: 12 ರೂ.ನಿಂದ 15 ಸಾವಿರ ಕೋಟಿಗೇರಿದ ಡೈಮಂಡ್ ಕಿಂಗ್ ಯಶೋಗಾಥೆ! Success Story

Success Story : ಜೀವನದಲ್ಲಿ ಯಶಸ್ವಿಯಾಗಲು ಕೇವಲ ಅದೃಷ್ಟ ಮಾತ್ರ ಸಾಕಾಗುವುದಿಲ್ಲ, ಸಮರ್ಪಣೆ, ಕಠಿಣ ಪರಿಶ್ರಮ ಮತ್ತು ಪರಿಶ್ರಮ ತುಂಬಾ ಅಗತ್ಯ. ಶೂನ್ಯದಿಂದ ಉನ್ನತ ಸ್ಥಾನ ತಲುಪುವುದು ಹೇಗೆ ಎಂಬುದನ್ನು ಸಾಬೀತು ಮಾಡಿದ ಮಹಾನ್​ ವ್ಯಕ್ತಿ ಯಾರೆಂದರೆ ಅದು ಸಾವ್ಜಿ ಧೋಲಾಕಿಯಾ. ಕೇವಲ 12 ರೂಪಾಯಿಗಳಿಂದ ತಮ್ಮ ಪ್ರಯಾಣವನ್ನು ಪ್ರಾರಂಭಿಸಿ ಇಂದು ಸಾವಿರಾರು ಕೋಟಿ ಮೌಲ್ಯದ ಸಾಮ್ರಾಜ್ಯವನ್ನು ನಿರ್ಮಿಸಿದ ಧೋಲಾಕಿಯಾ ಅವರ ಯಶೋಗಾಥೆ ಎಲ್ಲರಿಗೂ ಒಂದು ಪಾಠ. ಬಡತನ ಎಂದಿಗೂ ನಿಮ್ಮ ಬೆಳವಣಿಗೆಗೆ ಅಡ್ಡಿಯಾಗುವುದಿಲ್ಲ ಮತ್ತು ನೀವು ನಿಮ್ಮ ಗುರಿಯತ್ತ ಪ್ರಾಮಾಣಿಕ ಹೆಜ್ಜೆಗಳನ್ನು ಇಟ್ಟರೆ ಯಶಸ್ಸು ಖಂಡಿತವಾಗಿ ಬಂದೇ ಬರುತ್ತದೆ ಅನ್ನೋದನ್ನ ಧೋಲಾಕಿಯಾ ಅವರ ಜೀವನ ಸಾಬೀತುಪಡಿಸುತ್ತದೆ. ನೀವು ಕಷ್ಟಪಟ್ಟು ಕೆಲಸ ಮಾಡುವ ಮನಸ್ಥಿತಿಯನ್ನು ಹೊಂದಿದ್ದರೆ ಸಾಮಾನ್ಯ ವ್ಯಕ್ತಿಯೂ ಸಹ ಅಸಾಧಾರಣನಾಗಬಹುದು ಎಂಬುದಕ್ಕೆ ಅವರು ಉತ್ತಮ ಉದಾಹರಣೆ.

ಗುಜರಾತ್‌ನ ಸರಳ ರೈತ ಕುಟುಂಬದಲ್ಲಿ ಜನಿಸಿದ ಸಾವ್ಜಿ ಧೋಲಾಕಿಯಾ ಶಾಲೆಯನ್ನು ತೊರೆದು ಕೇವಲ 13ನೇ ವಯಸ್ಸಿನಲ್ಲಿ ಸೂರತ್ ತಲುಪಿದರು. ಆ ಸಮಯದಲ್ಲಿ ಅವರ ಬಳಿ ಕೇವಲ 12 ರೂ. ಮಾತ್ರ ಇತ್ತು. ಅದು ಕೂಡ ತಮ್ಮ ಊರಿನವರಿಂದ ಸಾಲ ಪಡೆದ ಹಣವಾಗಿತ್ತು. ತಮ್ಮ ಚಿಕ್ಕಪ್ಪನ ವಜ್ರ ಹೊಳಪು ವ್ಯವಹಾರಕ್ಕೆ ಸೇರಿ ಆ ವ್ಯವಹಾರದ ಕೌಶಲ್ಯಗಳನ್ನು ಕಲಿತರು. ಸುಮಾರು ಹತ್ತು ವರ್ಷಗಳ ಕಠಿಣ ಪರಿಶ್ರಮ ಮತ್ತು ಕಲಿಕೆಯ ನಂತರ, 1992 ರಲ್ಲಿ ತಮ್ಮ ಸಹೋದರರೊಂದಿಗೆ 'ಹರಿಕೃಷ್ಣ ಎಕ್ಸ್‌ಪೋರ್ಟ್ಸ್' ಎಂಬ ಕಂಪನಿಯನ್ನು ಸ್ಥಾಪಿಸಿದರು.

ಸಾವ್ಜಿ ಧೋಲಕಿಯಾ ಅವರು ತಮ್ಮ ಕಠಿಣ ಪರಿಶ್ರಮ ಮತ್ತು ದೂರದೃಷ್ಟಿಯಿಂದ ಸಣ್ಣ ಮಟ್ಟದಲ್ಲಿ ಪ್ರಾರಂಭಿಸಿದ ವ್ಯವಹಾರವನ್ನು ಇಂದು 15,000 ಕೋಟಿ ರೂಪಾಯಿಗಳಿಗೂ ಅಧಿಕ ಮೌಲ್ಯದ ಜಾಗತಿಕ ಸಾಮ್ರಾಜ್ಯವನ್ನಾಗಿ ಬೆಳೆಸಿದ್ದಾರೆ. ಅವರ ಕಂಪನಿಯು ಸಿದ್ಧಪಡಿಸುವ ವಜ್ರಗಳು ಇಂದು ವಿಶ್ವದಾದ್ಯಂತ ರಫ್ತಾಗುತ್ತಿದ್ದು, ಅಲ್ಪಾವಧಿಯಲ್ಲಿಯೇ ಅಂತರಾಷ್ಟ್ರೀಯ ಮಟ್ಟದಲ್ಲಿ ಮನ್ನಣೆ ಗಳಿಸಿವೆ. ಕೇವಲ ಲಾಭ ಗಳಿಸುವುದನ್ನೇ ಗುರಿಯಾಗಿಸಿಕೊಳ್ಳದ ಅವರು, ತಮ್ಮ ಉದ್ಯಮದ ಯಶಸ್ಸಿನ ಹಿಂದೆ ಇರುವ ಪ್ರತಿಯೊಬ್ಬ ಕಾರ್ಮಿಕನ ಶ್ರಮವನ್ನು ಗುರುತಿಸಿ ಗೌರವಿಸುತ್ತಾರೆ.

ಧೋಲಕಿಯಾ ಅವರು ತಮ್ಮ ಉದ್ಯೋಗಿಗಳನ್ನು ಕೇವಲ ಕೆಲಸಗಾರರಂತೆ ನೋಡದೆ, ಸ್ವಂತ ಕುಟುಂಬದ ಸದಸ್ಯರಂತೆ ನಡೆಸಿಕೊಳ್ಳುತ್ತಾರೆ. ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಕಂಪನಿಯ ಬೆಳವಣಿಗೆಗೆ ಶ್ರಮಿಸಿದ ನೂರಾರು ಉದ್ಯೋಗಿಗಳಿಗೆ ಕಾರುಗಳು, ಮನೆಗಳು ಮತ್ತು ಬೆಲೆಬಾಳುವ ಆಭರಣಗಳನ್ನು ಉಡುಗೊರೆಯಾಗಿ ನೀಡುವ ಮೂಲಕ ಅವರು ದೇಶಾದ್ಯಂತ ಸುದ್ದಿಯಾಗಿದ್ದರು. ಕಂಪನಿಯ ಲಾಭದಲ್ಲಿ ಉದ್ಯೋಗಿಗಳಿಗೂ ಸಮಾನ ಪಾಲಿದೆ ಎಂದು ನಂಬುವ ಇವರು, ಮಾನವೀಯ ಮೌಲ್ಯಗಳನ್ನೊಳಗೊಂಡ ಉದ್ಯಮಶೀಲತೆಗೆ ಒಂದು ದೊಡ್ಡ ಮಾದರಿಯಾಗಿದ್ದಾರೆ.

ಅವರು ಕೇವಲ ಒಬ್ಬ ಯಶಸ್ವಿ ಉದ್ಯಮಿಯಲ್ಲದೆ, ಸಮಾಜ ಸೇವೆಯಲ್ಲಿಯೂ ಅಪ್ರತಿಮ ಕೊಡುಗೆ ನೀಡಿದ ಪ್ರವರ್ತಕರಾಗಿದ್ದಾರೆ. ಕೆರೆಗಳ ನಿರ್ಮಾಣ ಮತ್ತು ಪರಿಸರ ಸಂರಕ್ಷಣೆಯಂತಹ ಮಹತ್ಕಾರ್ಯಗಳನ್ನು ಕೈಗೊಂಡಿರುವ ಇವರ ಸೇವೆಯನ್ನು ಗುರುತಿಸಿ ಭಾರತ ಸರ್ಕಾರವು ಇವರಿಗೆ 'ಪದ್ಮಶ್ರೀ' ಪ್ರಶಸ್ತಿ ನೀಡಿ ಗೌರವಿಸಿದೆ. ಕೇವಲ 12 ರೂಪಾಯಿಗಳಿಂದ ತಮ್ಮ ವೃತ್ತಿಜೀವನವನ್ನು ಆರಂಭಿಸಿ, ಇಂದು 15 ಸಾವಿರ ಕೋಟಿ ರೂಪಾಯಿಗಳ ಬೃಹತ್ ಸಾಮ್ರಾಜ್ಯವನ್ನು ಕಟ್ಟಿ ಬೆಳೆಸಿದ ಇವರ ಸಾಧನೆಯ ಹಾದಿ ಇಂದಿನ ಯುವ ಪೀಳಿಗೆಗೆ ಅತ್ಯಂತ ಸ್ಫೂರ್ತಿದಾಯಕವಾಗಿದೆ, (ಏಜೆನ್ಸೀಸ್​).