ತಂದೆ ಸಾವು, ಕುಟುಂಬದ ಜವಾಬ್ದಾರಿ...ತನ್ನ ಬಾಲ್ಯವನ್ನೇ ತ್ಯಾಗ ಮಾಡಿ ಬಡತನ ಮೆಟ್ಟಿ ನಿಂತ ಲಸ್ಸಿ ವ್ಯಾಪಾರಿಯ ಯಶೋಗಾಥೆ! Success Story

Success Story : ಬಾಲ್ಯದ ನಗುವನ್ನು ಕಳೆದುಕೊಂಡು, ಕೇವಲ ಹನ್ನೊಂದನೇ ವಯಸ್ಸಿಗೆ ಹಸಿವಿನ ನೋವು ಮತ್ತು ಕುಟುಂಬದ ಜವಾಬ್ದಾರಿಯ ಭಾರವನ್ನು ಕಂದಕದಂತೆ ಹೊತ್ತುಕೊಂಡ ಆ ಬಾಲಕನ ಕಣ್ಣೀರಿನ ದಿನಗಳು ಇಂದಿಗೂ ಕಾಡುತ್ತವೆ. ಹೊಟ್ಟೆಪಾಡಿಗಾಗಿ ಅಲೆಯುತ್ತಿದ್ದ ಆ ಪುಟ್ಟ ಹೆಜ್ಜೆಗಳು ಸೋಲಿಗೆ ಶರಣಾಗದೆ, ಕಠಿಣ ಪರಿಶ್ರಮ ಮತ್ತು ಛಲದ ಬೆನ್ನೇರಿ ಇಂದು ತನ್ನದೇ ಆದ ಸುಂದರವಾದ ಎರಡು ಅಂತಸ್ತಿನ ಸ್ವಂತ ಮನೆಯಲ್ಲಿ ನಿಂತು ತಿಂಗಳಿಗೆ 90,000 ರೂಪಾಯಿಗಳ ಗೌರವಾನ್ವಿತ ಆದಾಯವನ್ನು ಗಳಿಸುತ್ತಿರುವಾಗ, ಆ ಯಶಸ್ಸಿನ ಹಿಂದೆ ಬೆವರು ಮತ್ತು ರಕ್ತದ ಕಣ್ಣೀರಿನ ಕಥೆಯಿದೆ. ಬಡತನವೆಂಬ ಕತ್ತಲೆಯನ್ನು ಮೆಟ್ಟಿನಿಂತು ಕನಸುಗಳನ್ನು ಜೀವಂತವಿರಿಸಿಕೊಳ್ಳಲು ಹಗಲಿರುಳು ಶ್ರಮಿಸಿದ ಆ ಧೀರನ ಜೀವನಯಾತ್ರೆಯು, ಮುರಿದುಬಿದ್ದವರಲ್ಲಿ ಹೊಸ ಭರವಸೆಯನ್ನು ಮೂಡಿಸುವ ಜೀವಂತ ಕಾವ್ಯದಂತಿದ್ದು, ಬದುಕಿನಲ್ಲಿ ಗೆಲ್ಲಲು ಇದಕ್ಕಿಂತ ಮಿಗಿಲಾದ ಸ್ಫೂರ್ತಿ ಬೇರೆ ಬೇಕೇ?

ಈ ಡಿಜಿಟಲ್​ ಯುಗದಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿದಿನ ಸಾವಿರಾರು ವಿಡಿಯೋಗಳು ಹರಿದಾಡುತ್ತಿರುತ್ತವೆ. ಆದರೆ, ಕೆಲವು ದೃಶ್ಯಗಳು ನಮ್ಮ ಹೃದಯವನ್ನು ತಾಕುವುದಲ್ಲದೆ, ಜೀವನದ ಬಗ್ಗೆ ನಮಗಿರುವ ದೃಷ್ಟಿಕೋನವನ್ನೇ ಬದಲಾಯಿಸಿಬಿಡುತ್ತವೆ. ಇದೀಗ ಡಿಜಿಟಲ್ ಕಂಟೆಂಟ್ ಕ್ರಿಯೇಟರ್ ಉಪನ್ ವರ್ಮಾ ಹಂಚಿಕೊಂಡಿರುವ ಲಸ್ಸಿ ಮಾರಾಟಗಾರರೊಬ್ಬರ ಸಂದರ್ಶನವು ಕೂಡ ಇದಕ್ಕೆ ತಕ್ಕ ನಿದರ್ಶನವಾಗಿದೆ. ದುರಂತಮಯ ಮತ್ತು ಕಷ್ಟದ ಭೂತಕಾಲದಿಂದ ಹೊರಬಂದು, ಯಶಸ್ಸಿನ ಸಿಹಿಯನ್ನುಂಡ ಒಬ್ಬ ಸಾಮಾನ್ಯ ಲಸ್ಸಿ ವ್ಯಾಪಾರಿಯ ಈ ಅದ್ಭುತ ಜೀವನ ಪಯಣವು ಈಗ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಸಂಚಲನ ಮೂಡಿಸಿದೆ.

ಬಾಲ್ಯದಲ್ಲೇ ತೀವ್ರ ಹಸಿವಿನ ನಡುವೆ ಆತ ತನ್ನ ತಂದೆಯನ್ನು ಕಳೆದುಕೊಂಡನು. ಆತನಿಗೆ ಆಸರೆಯಾಗಬೇಕಿದ್ದ ತಂದೆ ಎಂಬ ಮರವೇ ಕಳಚಿಬಿದ್ದಾಗ, ಕೇವಲ 11 ವರ್ಷದ ಆ ಪುಟ್ಟ ಬಾಲಕ ಇಡೀ ಕುಟುಂಬದ ಜವಾಬ್ದಾರಿಯನ್ನು ತನ್ನ ಚಿಕ್ಕ ಹೆಗಲ ಮೇಲೆ ಹೊರಬೇಕಾಯಿತು. ಆ ಸಂದರ್ಭದಲ್ಲಿ ಕುಟುಂಬಕ್ಕೆ ಒಂದು ಸೂರು ಕೂಡ ಇರಲಿಲ್ಲ. ಹಸಿವಿನ ವಿರುದ್ಧ ಹೋರಾಟ ನಡೆಸಿದ ಆ ಹುಡುಗ, ತನ್ನ ಕುಟುಂಬವನ್ನು ಪೋಷಿಸಲು ದಿನಕ್ಕೆ ಕೇವಲ 250 ರೂಪಾಯಿಗಳನ್ನು ಸಂಪಾದಿಸುತ್ತಿದ್ದನು.

ನೀವು ದೇವರಲ್ಲಿ ಒಂದೇ ಒಂದು ವರವನ್ನು ಕೇಳುವುದಾದರೆ, ಏನು ಕೇಳುತ್ತೀರಿ? ಎಂದು ಲಸ್ಸಿ ವ್ಯಾಪಾರಿಯನ್ನು ಉಪನ್ ಅವರು ಪ್ರಶ್ನಿಸಿದಾಗ, ಆತ ಯಾವುದೇ ಹಿಂಜರಿಕೆಯಿಲ್ಲದೆ, ನಮ್ಮ ತಂದೆಯ ಜೀವ ಎಂದನು. ಆ ಸಮಯದಲ್ಲಿ ನಮಗೆ ವಾಸಿಸಲು ಮನೆಯೂ ಇರಲಿಲ್ಲ, ಆ ನೋವಿನಲ್ಲೇ ನಮ್ಮ ತಂದೆ ತೀರಿಕೊಂಡರು. ಅದಕ್ಕಾಗಿಯೇ ನನಗೆ ನನ್ನ ತಂದೆ ಮತ್ತೆ ಬೇಕು ಎಂದು ಉತ್ತರಿಸಿದರು. ತಮ್ಮ 11ನೇ ವಯಸ್ಸಿನಿಂದಲೇ ಕಷ್ಟಪಟ್ಟು ಕೆಲಸ ಮಾಡಿದ ಅನುಭವಗಳನ್ನು ಮೆಲುಕುಹಾಕುತ್ತಾ, ತಂದೆಯ ಮರಣದ ನಂತರ ತಾನು ಎದುರಿಸಿದ ಬಿಕ್ಕಟ್ಟುಗಳ ಬಗ್ಗೆಯೂ ಅವರು ಮುಕ್ತವಾಗಿ ಮಾತನಾಡಿದರು.

ದಶಕಗಳ ಅಚಲ ಪರಿಶ್ರಮ ಮತ್ತು ಛಲ ಆ ವ್ಯಕ್ತಿಯ ಜೀವನವನ್ನೇ ಬದಲಾಯಿಸಿತು. ಕಠಿಣ ಪರಿಶ್ರಮದಿಂದ ದುಡಿದು ಅವರು ತಮ್ಮ ಒಡಹುಟ್ಟಿದವರ ಮದುವೆಯನ್ನು ನೆರವೇರಿಸಿದರು. ಬಳಿಕ ತಾವೂ ವಿವಾಹವಾದರು. ತಮ್ಮ ದೀರ್ಘಕಾಲದ ಕನಸಿನಂತೆ, ಉತ್ತರ ಪ್ರದೇಶದಲ್ಲಿ ತಮ್ಮ ಕುಟುಂಬಕ್ಕಾಗಿ ಒಂದು ಸುರಕ್ಷಿತ ಮನೆಯನ್ನೂ ನಿರ್ಮಿಸಿದರು. ಎಂದೊಮ್ಮೆ ದಿನಕ್ಕೆ ಕೇವಲ 250 ರೂಪಾಯಿ ಸಂಪಾದಿಸುತ್ತಿದ್ದ ಅವರು, ಇಂದು ದೆಹಲಿಯಲ್ಲಿ ಲಸ್ಸಿ ಮಾರಾಟ ಮಾಡುತ್ತಾ ತಿಂಗಳಿಗೆ 80,000 ರಿಂದ 90,000 ರೂಪಾಯಿಗಳನ್ನು ಸಂಪಾದಿಸುತ್ತಿದ್ದಾರೆ.

ಈಗ ದೇವರ ದಯೆಯಿಂದ ನಾನು ಚೆನ್ನಾಗಿ ಸಂಪಾದಿಸುತ್ತಿದ್ದೇನೆ. ತಿಂಗಳಿಗೆ 80,000 ರಿಂದ 90,000 ರೂ. ಗಳಿಸುತ್ತಿದ್ದೇನೆ. ಆಗ ಸ್ವಂತ ಮನೆ ಇಲ್ಲ ಎಂಬ ಚಿಂತೆಯಿತ್ತು, ಆದರೆ ಇಂದು ನಾನು ಈ ಮನೆಯನ್ನು ಕಟ್ಟಿದ್ದೇನೆ ಎಂದು ಅವರು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ.

ಬದುಕಿನಲ್ಲಿ ನಿರಾಶೆಗೊಂಡು, ತಮಗೆ ಜೀವನದಲ್ಲಿ ಏನನ್ನೂ ಸಾಧಿಸಲು ಸಾಧ್ಯವಿಲ್ಲ ಎಂದು ಭಾವಿಸುವವರಿಗೆ ಆ ಲಸ್ಸಿ ವ್ಯಾಪಾರಿ ನೀಡಿರುವ ಸಲಹೆ ಬಹಳ ಸರಳವಾಗಿದೆ. 'ಹಾಗೆಲ್ಲ ಅಂದುಕೊಳ್ಳಬೇಡಿ ಸ್ನೇಹಿತರೆ... ಕಠಿಣ ಪರಿಶ್ರಮ ಪಡಿ. ನಿಮ್ಮ ಪ್ರಯತ್ನವನ್ನು ನೀವು ನಿಲ್ಲಿಸದಿದ್ದರೆ, ದೇವರು ಖಂಡಿತವಾಗಿಯೂ ನಿಮಗೆ ಆಶೀರ್ವಾದ ಮಾಡುತ್ತಾನೆ. ಒಂದು ದಿನ ನೀವೂ ದೊಡ್ಡ ವ್ಯಕ್ತಿಯಾಗುತ್ತೀರಿ ಎಂದಿದ್ದಾರೆ ಆ ಲಸ್ಸಿ ವ್ಯಾಪಾರಿ.

ಲಸ್ಸಿ ವ್ಯಾಪಾರಿಯ ಈ ಸಂಭಾಷಣೆಯು ತಮ್ಮ ಜೀವನದ ಅತ್ಯಂತ ಸುಂದರ ಅನುಭವಗಳಲ್ಲಿ ಒಂದಾಗಿದೆ ಎಂದು ಕಂಟೆಂಟ್ ಕ್ರಿಯೇಟರ್ ಉಪನ್ ವರ್ಮಾ ತಮ್ಮ ವಿಡಿಯೋದಲ್ಲಿ ಬರೆದುಕೊಂಡಿದ್ದಾರೆ. ನಿಜವಾದ ಕಥೆಗಳೇ ನಿಜವಾದ ಸ್ಫೂರ್ತಿ. ಇದು ಸಾಮಾನ್ಯ ಸಂಭಾಷಣೆಯಂತೆ ಕಂಡರೂ, ನನಗೆ ದೊಡ್ಡ ಪ್ರೇರಕ ಪಾಠವಾಯಿತು. ಮನಸ್ಸು ಮತ್ತು ಆತ್ಮವನ್ನು ಒಟ್ಟುಮಾಡಿ ಶ್ರಮಿಸಿದರೆ ಯಾವುದೇ ಕನಸು ನನಸಾಗಬಹುದು ಎಂಬುದನ್ನು ಇದು ಸಾಬೀತುಪಡಿಸುತ್ತದೆ ಎಂದು ಉಪನ್ ವರ್ಮಾ ಇನ್‌ಸ್ಟಾಗ್ರಾಂನಲ್ಲಿ ಬರೆದಿದ್ದಾರೆ.

ಉಪನ್​ ವರ್ಮಾ ಹಂಚಿಕೊಂಡ ವಿಡಿಯೋ ವೈರಲ್ ಆಗುತ್ತಿದ್ದಂತೆ, ಸಾವಿರಾರು ಜನರು ವರ್ಮಾ ಅವರಿಗೆ ಅಭಿನಂದನೆಗಳ ಮಹಾಪೂರವನ್ನೇ ಹರಿಸಿದ್ದಾರೆ. ಒಬ್ಬ ಕಷ್ಟಜೀವಿಯ ಸ್ಫೂರ್ತಿದಾಯಕ ಕಥೆಯನ್ನು ಹಂಚಿಕೊಂಡಿದ್ದಕ್ಕೆ ಧನ್ಯವಾದಗಳು, ನಾನು ಇಂಟರ್ನೆಟ್‌ನಲ್ಲಿ ನೋಡಿದ ಅತ್ಯುತ್ತಮ ವಿಡಿಯೋ. ಇದು ಕಠಿಣ ಸತ್ಯಗಳನ್ನು ಒಳಗೊಂಡಿರುವ ಅತ್ಯಂತ ಸ್ಫೂರ್ತಿದಾಯಕ ಕಥೆ. ನಿರಂತರತೆ ಮತ್ತು ಶಿಸ್ತು ಯಾವಾಗಲೂ ನಮಗೆ ಯಶಸ್ಸು ತಂದುಕೊಡುತ್ತದೆ ಎಂಬ ಕಾಮೆಂಟ್‌ಗಳು ವಿಡಿಯೋದ ಕೆಳಗೆ ಕಾಮೆಂಟ್​ ವಿಭಾಗದಲ್ಲಿ ತುಂಬಿ ತುಳುಕುತ್ತಿವೆ, (ಏಜೆನ್ಸೀಸ್​).