ಪಾಕ್​ ಮಿತ್ರ ರಾಷ್ಟ್ರಗಳ ಎದುರೇ ಪಹಲ್ಗಾಮ್ ದಾಳಿ ಖಂಡನೆ: ಇದು ಮೋದಿ ಸರ್ಕಾರದ ವಿದೇಶಾಂಗ ನೀತಿಗೆ ಸಿಕ್ಕ ದೊಡ್ಡ ಯಶಸ್ಸು ಎಂದ ಅಬ್ದುಲ್ಲಾ! | Omar Abdullah

ಈ ಘೋಷಣೆಯಲ್ಲಿ ಪಾಕಿಸ್ತಾನದ ಹೆಸರಿನ ಉಲ್ಲೇಖವಿಲ್ಲ ಎಂಬ ಪ್ರಶ್ನೆಗೆ ಉತ್ತರಿಸಿದ ಒಮರ್ ಅಬ್ದುಲ್ಲಾ, ಆ ವಿಷಯವಾಗಿ ಕೇಂದ್ರ ಸರ್ಕಾರ ಮತ್ತು ವಿದೇಶಾಂಗ ಸಚಿವಾಲಯವೇ ಉತ್ತರಿಸಬೇಕು ಎಂದರು.

ಮಾಧ್ಯಮಗಳೊಂದಿಗೆ ಮಾತನಾಡಿದ ಸಿಎಂ ಅಬ್ದುಲ್ಲಾ, ಪಹಲ್ಗಾಮ್ ಘಟನೆಯನ್ನು ಖಂಡಿಸಿರುವುದು ದೊಡ್ಡ ವಿಷಯ. ಆ ಸಭಾಂಗಣದಲ್ಲಿ ಪಾಕಿಸ್ತಾನದ ಅನೇಕ ಮಿತ್ರರಿದ್ದರು ಎಂಬುದನ್ನು ದಯವಿಟ್ಟು ನೋಡಿ. ಆದ್ದರಿಂದ, ಪಹಲ್ಗಾಮ್ ಹೆಸರನ್ನು ಉಲ್ಲೇಖಿಸಿರುವುದೇ ನಮ್ಮ ವಿದೇಶಾಂಗ ನೀತಿಯ ಯಶಸ್ಸು ಎಂದು ಅಬ್ದುಲ್ಲಾ ಉಲ್ಲೇಖಿಸಿದರು. ರಾಷ್ಟ್ರ ರಾಜಧಾನಿಯಲ್ಲಿ ನಡೆದ 18ನೇ ಬ್ರಿಕ್ಸ್‌ ಶೃಂಗಸಭೆಯಲ್ಲಿ ಸದಸ್ಯ ರಾಷ್ಟ್ರಗಳು 140 ಅಂಶಗಳನ್ನು ಒಳಗೊಂಡ 45 ಪುಟಗಳ ಸಮಗ್ರ ನವದೆಹಲಿ ಘೋಷಣೆ 2026 ಅನ್ನು ಸರ್ವಾನುಮತದಿಂದ ಅಂಗೀಕರಿಸಿದವು.

ಜಾಗತಿಕ ಭದ್ರತೆಯ ಬಗ್ಗೆ ವಿಸ್ತೃತವಾಗಿ ಪ್ರಸ್ತಾಪಿಸಿದ ಬ್ರಿಕ್ಸ್‌ ಘೋಷಣೆಯು, ಗಡಿಯಾಚೆಗಿನ ಉಗ್ರವಾದ, ಭಯೋತ್ಪಾದಕರಿಗೆ ಹರಿಯುವ ಹಣಕಾಸಿನ ಜಾಲಗಳು ಮತ್ತು ಅವರಿಗೆ ಸಿಗುವ ಸುರಕ್ಷಿತ ತಾಣಗಳು ಸೇರಿದಂತೆ ಎಲ್ಲಾ ರೀತಿಯ ಭಯೋತ್ಪಾದನೆಯನ್ನು ಬಲವಾಗಿ ಖಂಡಿಸಿತು. ವಿಶೇಷವಾಗಿ, 2025 ರ ಏಪ್ರಿಲ್ 22 ರಂದು ಜಮ್ಮು ಮತ್ತು ಕಾಶ್ಮೀರದ ಪ್ರವಾಸಿ ತಾಣ ಪಹಲ್ಗಾಮ್ ಬಳಿ ನಡೆದ ಭೀಕರ ದಾಳಿಯನ್ನು ನಿರ್ದಿಷ್ಟವಾಗಿ ಉಲ್ಲೇಖಿಸಿ ಖಂಡಿಸಲಾಯಿತು. ಈ ದಾಳಿಯಲ್ಲಿ 26 ಜನರು ಸಾವನ್ನಪ್ಪಿ, ಹಲವರು ಗಾಯಗೊಂಡಿದ್ದರು. ಇದು ಭಾರತ ಮತ್ತು ಪಾಕಿಸ್ತಾನದ ನಡುವೆ ನಾಲ್ಕು ದಿನಗಳ ಕಾಲ ತೀವ್ರ ಸಂಘರ್ಷಕ್ಕೂ ಕಾರಣವಾಗಿತ್ತು.

ಈ ದಾಳಿಯನ್ನು ತೀವ್ರವಾಗಿ ಖಂಡಿಸಿದ ಬ್ರಿಕ್ಸ್‌ ನಾಯಕರು, ಉಗ್ರವಾದದ ವಿರುದ್ಧ ಶೂನ್ಯ ಸಹಿಷ್ಣುತೆ ಮತ್ತು ಕಟ್ಟುನಿಟ್ಟಿನ ಜವಾಬ್ದಾರಿಯನ್ನು ಪ್ರದರ್ಶಿಸಬೇಕು ಎಂದು ಜಂಟಿ ಹೇಳಿಕೆಯಲ್ಲಿ ಸ್ಪಷ್ಟಪಡಿಸಿದರು. ಜೊತೆಗೆ, ಭಯೋತ್ಪಾದನೆಯನ್ನು ಜಾಗತಿಕ ಮಟ್ಟದಲ್ಲಿ ಮಟ್ಟಹಾಕಲು ವಿಶ್ವಸಂಸ್ಥೆಯ ಅಂತಾರಾಷ್ಟ್ರೀಯ ಭಯೋತ್ಪಾದನೆ ಮೇಲಿನ ಸಮಗ್ರ ಸಮಾವೇಶವನ್ನು (CCIT) ಶೀಘ್ರವಾಗಿ ಅಂಗೀಕರಿಸಬೇಕು ಎಂದು ನಾಯಕರು ಈ ಶೃಂಗಸಭೆಯಲ್ಲಿ ಒತ್ತಾಯಿಸಿದರು(ಏಜೆನ್ಸೀಸ್​).