ಚರ್ಮದ ಬಣ್ಣದ ಕಾರಣಕ್ಕೆ ಸಹಪಾಠಿಯಿಂದ ನಿಂದನೆ: ಮನನೊಂದು ಸಾವಿಗೆ ಶರಣಾದ 16 ವರ್ಷದ ವಿದ್ಯಾರ್ಥಿ! Student Suicide Case

ಪೊಲೀಸರ ಮಾಹಿತಿ ಪ್ರಕಾರ, ಮೂಲತಃ ಮಧ್ಯಪ್ರದೇಶದ ಟಕ್ರೌಲಿ ಗ್ರಾಮದ ನಿವಾಸಿ ರಾಹುಲ್, ಧೋಲ್ಪುರದಲ್ಲಿ ತನ್ನ ಸಂಬಂಧಿಕರ ಮನೆಯಲ್ಲಿದ್ದುಕೊಂಡು ವಿದ್ಯಾಭ್ಯಾಸ ಮಾಡುತ್ತಿದ್ದ. ಗುರುವಾರದಂದು (ಜು.17) ಶಾಲೆಯಲ್ಲಿ ರಾಹುಲ್ ಹಾಗೂ ಆತನ ಸಹಪಾಠಿಯೊಂದಿಗೆ ನಡೆದ ಸಣ್ಣ ಜಗಳ ನಡೆದಿತ್ತು. ಈ ವೇಳೆ ಆ ವಿದ್ಯಾರ್ಥಿನಿ ಆತನ ಚರ್ಮದ ಬಣ್ಣವನ್ನು ಗುರಿಯಾಗಿಸಿಕೊಂಡು ಅತ್ಯಂತ ಅವಹೇಳನಕಾರಿ ಪದ ಬಳಸಿ ನಿಂದಿಸಿದ್ದಳು ಎನ್ನಲಾಗಿದೆ.

ಆ ಹೇಳಿಕೆಯಿಂದ ಬೇಸರಗೊಂಡ ರಾಹುಲ್ ಆ ಸಂಜೆ ತನ್ನ ಕೋಣೆಗೆ ಹಿಂತಿರುಗಿ ನೇಣು ಹಾಕಿಕೊಂಡಿರುವುದಾಗಿ ತಿಳಿದುಬಂದಿದೆ. ಮರುದಿನ ಆತ ತನ್ನ ಕೋಣೆಯಿಂದ ಎಷ್ಟೋತ್ತಾದರೂ ಹೊರಗೆ ಬಾರದ ಕಾರಣ ಮನೆಯವರು ಕಿಟಕಿಯಲ್ಲಿ ಇಣುಕಿ ನೋಡಿದಾಗ ಅವನ ಶವ ಕಾಣಿಸಿದೆ. 

ಸ್ಥಳೀಯ ನಿವಾಸಿಗಳು ನೀಡಿದ ಪ್ರಮುಖ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ತಕ್ಷಣವೇ ಘಟನಾ ಸ್ಥಳಕ್ಕೆ ಧಾವಿಸಿ ಸಂಪೂರ್ಣ ಪರಿಶೀಲನೆ ನಡೆಸಿದ್ದಾರೆ. ತದನಂತರ ಮೃತದೇಹವನ್ನು ತಮ್ಮ ವಶಕ್ಕೆ ಪಡೆದುಕೊಂಡಿದ್ದಾರೆ. ಮೃತನ ಸಂಬಂಧಿಕರು ಸ್ಥಳಕ್ಕೆ ಆಗಮಿಸಿದ ನಂತರ, ಪೊಲೀಸರು ನಿಯಮಾನುಸಾರ ಮರಣೋತ್ತರ ಪರೀಕ್ಷೆಯನ್ನು ನೆರವೇರಿಸಿ, ಶವವನ್ನು ಅಂತ್ಯಕ್ರಿಯೆಗಾಗಿ ಕುಟುಂಬಸ್ಥರಿಗೆ ಹಸ್ತಾಂತರಿಸಿದ್ದಾರೆ.

ಈ ಇಡೀ ದುರಂತ ಘಟನೆಯ ಸಂಪೂರ್ಣ ಅನುಕ್ರಮ ಹಾಗೂ ಹಿನ್ನೆಲೆಯ ಕುರಿತು ಪೊಲೀಸರು ಎಲ್ಲಾ ಆಯಾಮಗಳಿಂದಲೂ ತೀವ್ರ ತನಿಖೆ ನಡೆಸುತ್ತಿದ್ದಾರೆ ಎಂದು ಸಬ್-ಇನ್ಸ್‌ಪೆಕ್ಟರ್ ಹರ್ವೀರ್ ಸಿಂಗ್ ಅವರು ತಿಳಿಸಿದ್ದಾರೆ (ಏಜೆನ್ಸೀಸ್​).